অধ্যায় 14

14.1

বৈশংপায়ন উবাচ
তচ্ছ্রুত্বা বচনং তস্যা ভীমসেনোঽথ ভীতবৎ
গান্ধারীং প্রত্যুবাচেদং বচঃ সানুনয়ং তদা

অধর্মো যদি বা ধর্মস্ত্রাসাত্তত্র ময়া কৃতঃ
আত্মানং ত্রাতুকামেন তন্মে ত্বং ক্ষন্তুমর্হসি

ন হি যুদ্ধেন পুত্রস্তে ধর্মেণ স মহাবলঃ
শক্যঃ কেনচিদুদ্যন্তুমতো বিষমমাচরম্

সৈন্যস্যৈকোঽবশিষ্টোঽয়ং গদায়ুদ্ধে চ বীর্যবান্
মাং হত্বা ন হরেদ্রাজ্যমিতি চৈতত্কৃতং ময়া

রাজপুত্রীং চ পাঞ্চালীমেকবস্ত্রাং রজস্বলাম্
ভবত্যা বিদিতং সর্বমুক্তবান্যত্সুতস্তব

সুয়োধনমসংগৃহ্য ন শক্যা ভূঃ সসাগরা
কেবলা ভোক্তুমস্মাভিরতশ্চৈতত্কৃতং ময়া

তচ্চাপ্যপ্রিয়মস্মাকং পুত্রস্তে সমুপাচরৎ
দ্রৌপদ্যা যত্সভামধ্যে সব্যমূরুমদর্শয়ৎ

তত্রৈব বধ্যঃ সোঽস্মাকং দুরাচারোঽম্ব তে সুতঃ
ধর্মরাজাজ্ঞয়া চৈব স্থিতাঃ স্ম সময়ে তদা

বৈরমুদ্ধুক্ষিতং রাজ্ঞি পুত্রেণ তব তন্মহৎ
ক্লেশিতাশ্চ বনে নিত্যং তত এতত্কৃতং ময়া

বৈরস্যাস্য গতঃ পারং হত্বা দুর্যোধনং রণে
রাজ্যং যুধিষ্ঠিরঃ প্রাপ্তো বয়ং চ গতমন্যবঃ

গান্ধার্যুবাচ
ন তস্যৈষ বধস্তাত যত্প্রশংসসি মে সুতম্
কৃতবাংশ্চাপি তত্সর্বং যদিদং ভাষসে ময়ি

হতাশ্বে নকুলে যত্তদ্বৃষসেনেন ভারত
অপিবঃ শোণিতং সংখ্যে দুঃশাসনশরীরজম্

সদ্ভির্বিগর্হিতং ঘোরমনার্যজনসেবিতম্
ক্রূরং কর্মাকরোঃ কস্মাত্তদয়ুক্তং বৃকোদর

ভীমসেন উবাচ
অন্যস্যাপি ন পাতব্যং রুধিরং কিং পুনঃ স্বকম্
যথৈবাত্মা তথা ভ্রাতা বিশেষো নাস্তি কশ্চন

রুধিরং ন ব্যতিক্রামদ্দন্তোষ্ঠং মেঽম্ব মা শুচঃ
বৈবস্বতস্তু তদ্বেদ হস্তৌ মে রুধিরোক্ষিতৌ

হতাশ্বং নকুলং দৃষ্ট্বা বৃষসেনেন সংয়ুগে
ভ্রাতৄণাং সংপ্রহৃষ্টানাং ত্রাসঃ সংজনিতো ময়া

কেশপক্ষপরামর্শে দ্রৌপদ্যা দ্যূতকারিতে
ক্রোধাদ্যদব্রুবং চাহং তচ্চ মে হৃদি বর্ততে

ক্ষত্রধর্মাচ্চ্যুতো রাজ্ঞি ভবেয়ং শাশ্বতীঃ সমাঃ
প্রতিজ্ঞাং তামনিস্তীর্য ততস্তত্কৃতবানহম্

ন মামর্হসি গান্ধারি দোষেণ পরিশঙ্কিতুম্
অনিগৃহ্য পুরা পুত্রানস্মাস্বনপকারিষু

গান্ধার্যুবাচ
বৃদ্ধস্যাস্য শতং পুত্রান্নিঘ্নংস্ত্বমপরাজিতঃ
কস্মান্ন শেষয়ঃ কংচিদ্যেনাল্পমপরাধিতম্

সংতানমাবয়োস্তাত বৃদ্ধয়োর্হৃতরাজ্যয়োঃ
কথমন্ধদ্বয়স্যাস্য যষ্টিরেকা ন বর্জিতা

শেষে হ্যবস্থিতে তাত পুত্রাণামন্তকে ত্বয়ি
ন মে দুঃখং ভবেদেতদ্যদি ত্বং ধর্মমাচরঃ