অধ্যায় 13

13.1

বৈশংপায়ন উবাচ
ধৃতরাষ্ট্রাভ্যনুজ্ঞাতাস্ততস্তে কুরুপুংগবাঃ
অভ্যয়ুর্ভ্রাতরঃ সর্বে গান্ধারীং সহকেশবাঃ

ততো জ্ঞাত্বা হতামিত্রং ধর্মরাজং যুধিষ্ঠিরম্
গান্ধারী পুত্রশোকার্তা শপ্তুমৈচ্ছদনিন্দিতা

তস্যাঃ পাপমভিপ্রায়ং বিদিত্বা পাণ্ডবান্প্রতি
ঋষিঃ সত্যবতীপুত্রঃ প্রাগেব সমবুধ্যত

স গঙ্গায়ামুপস্পৃশ্য পুণ্যগন্ধং পয়ঃ শুচি
তং দেশমুপসংপেদে পরমর্ষির্মনোজবঃ

দিব্যেন চক্ষুষা পশ্যন্মনসানুদ্ধতেন চ
সর্বপ্রাণভৃতাং ভাবং স তত্র সমবুধ্যত

স স্নুষামব্রবীত্কালে কল্যবাদী মহাতপাঃ
শাপকালমবাক্ষিপ্য শমকালমুদীরয়ন্

ন কোপঃ পাণ্ডবে কার্যো গান্ধারি শমমাপ্নুহি
রজো নিগৃহ্যতামেতচ্ছৃণু চেদং বচো মম

উক্তাস্যষ্টাদশাহানি পুত্রেণ জয়মিচ্ছতা
শিবমাশাস্স্ব মে মাতর্যুধ্যমানস্য শত্রুভিঃ

সা তথা যাচ্যমানা ত্বং কালে কালে জয়ৈষিণা
উক্তবত্যসি গান্ধারি যতো ধর্মস্ততো জয়ঃ

ন চাপ্যতীতাং গান্ধারি বাচং তে বিতথামহম্
স্মরামি ভাষমাণায়াস্তথা প্রণিহিতা হ্যসি

সা ত্বং ধর্মং পরিস্মৃত্য বাচা চোক্ত্বা মনস্বিনি
কোপং সংয়চ্ছ গান্ধারি মৈবং ভূঃ সত্যবাদিনি

গান্ধার্যুবাচ
ভগবন্নাভ্যসূয়ামি নৈতানিচ্ছামি নশ্যতঃ
পুত্রশোকেন তু বলান্মনো বিহ্বলতীব মে

যথৈব কুন্ত্যা কৌন্তেয়া রক্ষিতব্যাস্তথা ময়া
যথৈব ধৃতরাষ্ট্রেণ রক্ষিতব্যাস্তথা ময়া

দুর্যোধনাপরাধেন শকুনেঃ সৌবলস্য চ
কর্ণদুঃশাসনাভ্যাং চ বৃত্তোঽয়ং কুরুসংক্ষয়ঃ

নাপরাধ্যতি বীভত্সুর্ন চ পার্থো বৃকোদরঃ
নকুলঃ সহদেবো বা নৈব জাতু যুধিষ্ঠিরঃ

যুধ্যমানা হি কৌরব্যাঃ কৃন্তমানাঃ পরস্পরম্
নিহতাঃ সহিতাশ্চান্যৈস্তত্র নাস্ত্যপ্রিয়ং মম

যত্তু কর্মাকরোদ্ভীমো বাসুদেবস্য পশ্যতঃ
দুর্যোধনং সমাহূয় গদায়ুদ্ধে মহামনাঃ

শিক্ষয়াভ্যধিকং জ্ঞাত্বা চরন্তং বহুধা রণে
অধো নাভ্যাং প্রহৃতবাংস্তন্মে কোপমবর্ধয়ৎ

কথং নু ধর্মং ধর্মজ্ঞৈঃ সমুদ্দিষ্টং মহাত্মভিঃ
ত্যজেয়ুরাহবে শূরাঃ প্রাণহেতোঃ কথংচন