অধ্যায় 12

12.1

বৈশংপায়ন উবাচ
তত এনমুপাতিষ্ঠঞ্শৌচার্থং পরিচারকাঃ
কৃতশৌচং পুনশ্চৈনং প্রোবাচ মধুসূদনঃ

রাজন্নধীতা বেদাস্তে শাস্ত্রাণি বিবিধানি চ
শ্রুতানি চ পুরাণানি রাজধর্মাশ্চ কেবলাঃ

এবং বিদ্বান্মহাপ্রাজ্ঞ নাকার্ষীর্বচনং তদা
পাণ্ডবানধিকাঞ্জানন্বলে শৌর্যে চ কৌরব

রাজা হি যঃ স্থিরপ্রজ্ঞঃ স্বয়ং দোষানবেক্ষতে
দেশকালবিভাগং চ পরং শ্রেয়ঃ স বিন্দতি

উচ্যমানং চ যঃ শ্রেয়ো গৃহ্ণীতে নো হিতাহিতে
আপদং সমনুপ্রাপ্য স শোচত্যনয়ে স্থিতঃ

ততোঽন্যবৃত্তমাত্মানং সমবেক্ষস্ব ভারত
রাজংস্ত্বং হ্যবিধেয়াত্মা দুর্যোধনবশে স্থিতঃ

আত্মাপরাধাদায়স্তস্তত্কিং ভীমং জিঘাংসসি
তস্মাত্সংয়চ্ছ কোপং ত্বং স্বমনুস্মৃত্য দুষ্কৃতম্

যস্তু তাং স্পর্ধয়া ক্ষুদ্রঃ পাঞ্চালীমানয়ত্সভাম্
স হতো ভীমসেনেন বৈরং প্রতিচিকীর্ষতা

আত্মনোঽতিক্রমং পশ্য পুত্রস্য চ দুরাত্মনঃ
যদনাগসি পাণ্ডূনাং পরিত্যাগঃ পরংতপ

এবমুক্তঃ স কৃষ্ণেন সর্বং সত্যং জনাধিপ
উবাচ দেবকীপুত্রং ধৃতরাষ্ট্রো মহীপতিঃ

এবমেতন্মহাবাহো যথা বদসি মাধব
পুত্রস্নেহস্তু ধর্মাত্মন্ধৈর্যান্মাং সমচালয়ৎ

দিষ্ট্যা তু পুরুষব্যাঘ্রো বলবান্সত্যবিক্রমঃ
ত্বদ্গুপ্তো নাগমত্কৃষ্ণ ভীমো বাহ্বন্তরং মম

ইদানীং ত্বহমেকাগ্রো গতমন্যুর্গতজ্বরঃ
মধ্যমং পাণ্ডবং বীরং স্প্রষ্টুমিচ্ছামি কেশব

হতেষু পার্থিবেন্দ্রেষু পুত্রেষু নিহতেষু চ
পাণ্ডুপুত্রেষু মে শর্ম প্রীতিশ্চাপ্যবতিষ্ঠতে

ততঃ স ভীমং চ ধনংজয়ং চ; মাদ্র্যাশ্চ পুত্রৌ পুরুষপ্রবীরৌ
পস্পর্শ গাত্রৈঃ প্ররুদন্সুগাত্রা;নাশ্বাস্য কল্যাণমুবাচ চৈনান্