UtshovChapter 19
19.1
गान्धार्युवाच
एष माधव पुत्रो मे विकर्णः प्राज्ञसंमतः
भूमौ विनिहतः शेते भीमेन शतधा कृतः
Gandharyuvacha
Esha madhava putro me vikarnah pragyasammatah
Bhumau vinihatah shete bhimena shatadha kritah
19.2
गजमध्यगतः शेते विकर्णो मधुसूदन
नीलमेघपरिक्षिप्तः शरदीव दिवाकरः
Gajamadhyagatah shete vikarno madhusudana
Nilameghaparikshiptah sharadiva divakarah
19.3
अस्य चापग्रहेणैष पाणिः कृतकिणो महान्
कथंचिच्छिद्यते गृध्रैरत्तुकामैस्तलत्रवान्
Asya chapagrahenaisha panih kritakino mahan
Kathanchichchhidyate gridhrairattukamaistalatravan
19.4
अस्य भार्यामिषप्रेप्सून्गृध्रानेतांस्तपस्विनी
वारयत्यनिशं बाला न च शक्नोति माधव
Asya bharyamishaprepsungridhranetanstapasvini
Varayatyanisham bala na cha shaknoti madhava
19.5
युवा वृन्दारकः शूरो विकर्णः पुरुषर्षभ
सुखोचितः सुखार्हश्च शेते पांसुषु माधव
Yuva vrindarakah shuro vikarnah purusharshabha
Sukhochitah sukharhashcha shete pansushu madhava
19.6
कर्णिनालीकनाराचैर्भिन्नमर्माणमाहवे
अद्यापि न जहात्येनं लक्ष्मीर्भरतसत्तमम्
Karninalikanarachairbhinnamarmanamahave
Adyapi na jahatyenam lakshmirbharatasattamam
19.7
एष संग्रामशूरेण प्रतिज्ञां पालयिष्यता
दुर्मुखोऽभिमुखः शेते हतोऽरिगणहा रणे
Esha sangramashurena pratigyam palayishyata
Durmukhobhimukhah shete hatoriganaha rane
19.8
तस्यैतद्वदनं कृष्ण श्वापदैरर्धभक्षितम्
विभात्यभ्यधिकं तात सप्तम्यामिव चन्द्रमाः
Tasyaitadvadanam krishna shvapadairardhabhakshitam
Vibhatyabhyadhikam tata saptamyamiva chandramah
19.9
शूरस्य हि रणे कृष्ण यस्याननमथेदृशम्
स कथं निहतोऽमित्रैः पांसून्ग्रसति मे सुतः
Shurasya hi rane krishna yasyananamathedrisham
Sa katham nihatomitraih pansungrasati me sutah
19.10
यस्याहवमुखे सौम्य स्थाता नैवोपपद्यते
स कथं दुर्मुखोऽमित्रैर्हतो विबुधलोकजित्
Yasyahavamukhe saumya sthata naivopapadyate
Sa katham durmukhomitrairhato vibudhalokajit
19.11
चित्रसेनं हतं भूमौ शयानं मधुसूदन
धार्तराष्ट्रमिमं पश्य प्रतिमानं दनुष्मताम्
Chitrasenam hatam bhumau shayanam madhusudana
Dhartarashtramimam pashya pratimanam danushmatam
19.12
तं चित्रमाल्याभरणं युवत्यः शोककर्शिताः
क्रव्यादसंघैः सहिता रुदन्त्यः पर्युपासते
Tam chitramalyabharanam yuvatyah shokakarshitah
Kravyadasanghaih sahita rudantyah paryupasate
19.13
स्त्रीणां रुदितनिर्घोषः श्वापदानां च गर्जितम्
चित्ररूपमिदं कृष्ण विचित्रं प्रतिभाति मे
Strinam ruditanirghoshah shvapadanam cha garjitam
Chitrarupamidam krishna vichitram pratibhati me
19.14
युवा वृन्दारको नित्यं प्रवरस्त्रीनिषेवितः
विविंशतिरसौ शेते ध्वस्तः पांसुषु माधव
Yuva vrindarako nityam pravarastrinishevitah
Vivinshatirasau shete dhvastah pansushu madhava
19.15
शरसंकृत्तवर्माणं वीरं विशसने हतम्
परिवार्यासते गृध्राः परिविंशा विविंशतिम्
Sharasankrittavarmanam viram vishasane hatam
Parivaryasate gridhrah parivinsha vivinshatim
19.16
प्रविश्य समरे वीरः पाण्डवानामनीकिनीम्
आविश्य शयने शेते पुनः सत्पुरुषोचितम्
Pravishya samare virah pandavanamanikinim
Avishya shayane shete punah satpurushochitam
19.17
स्मितोपपन्नं सुनसं सुभ्रु ताराधिपोपमम्
अतीव शुभ्रं वदनं पश्य कृष्ण विविंशतेः
Smitopapannam sunasam subhru taradhipopamam
Ativa shubhram vadanam pashya krishna vivinshateh
19.18
यं स्म तं पर्युपासन्ते वसुं वासवयोषितः
क्रीडन्तमिव गन्धर्वं देवकन्याः सहस्रशः
Yam sma tam paryupasante vasum vasavayoshitah
Kridantamiva gandharvam devakanyah sahasrashah
19.19
हन्तारं वीरसेनानां शूरं समितिशोभनम्
निबर्हणममित्राणां दुःसहं विषहेत कः
Hantaram virasenanam shuram samitishobhanam
Nibarhanamamitranam duhsaham vishaheta kah
19.20
दुःसहस्यैतदाभाति शरीरं संवृतं शरैः
गिरिरात्मरुहैः फुल्लैः कर्णिकारैरिवावृतः
Duhsahasyaitadabhati shariram sanvritam sharaih
Giriratmaruhaih phullaih karnikarairivavritah
19.21
शातकौम्भ्या स्रजा भाति कवचेन च भास्वता
अग्निनेव गिरिः श्वेतो गतासुरपि दुःसहः
Shatakaumbhya sraja bhati kavachena cha bhasvata
Agnineva girih shveto gatasurapi duhsahah