UtshovChapter 22
22.1
गान्धार्युवाच
आवन्त्यं भीमसेनेन भक्षयन्ति निपातितम्
गृध्रगोमायवः शूरं बहुबन्धुमबन्धुवत्
Gandharyuvacha
Avantyam bhimasenena bhakshayanti nipatitam
Gridhragomayavah shuram bahubandhumabandhuvat
22.2
तं पश्य कदनं कृत्वा शत्रूणां मधुसूदन
शयानं वीरशयने रुधिरेण समुक्षितम्
Tam pashya kadanam kritva shatrunam madhusudana
Shayanam virashayane rudhirena samukshitam
22.3
तं सृगालाश्च कङ्काश्च क्रव्यादाश्च पृथग्विधाः
तेन तेन विकर्षन्ति पश्य कालस्य पर्ययम्
Tam srigalashcha kankashcha kravyadashcha prithagvidhah
Tena tena vikarshanti pashya kalasya paryayam
22.4
शयानं वीरशयने वीरमाक्रन्दसारिणम्
आवन्त्यमभितो नार्यो रुदत्यः पर्युपासते
Shayanam virashayane viramakrandasarinam
Avantyamabhito naryo rudatyah paryupasate
22.5
प्रातिपीयं महेष्वासं हतं भल्लेन बाह्लिकम्
प्रसुप्तमिव शार्दूलं पश्य कृष्ण मनस्विनम्
Pratipiyam maheshvasam hatam bhallena bahlikam
Prasuptamiva shardulam pashya krishna manasvinam
22.6
अतीव मुखवर्णोऽस्य निहतस्यापि शोभते
सोमस्येवाभिपूर्णस्य पौर्णमास्यां समुद्यतः
Ativa mukhavarnosya nihatasyapi shobhate
Somasyevabhipurnasya paurnamasyam samudyatah
22.7
पुत्रशोकाभितप्तेन प्रतिज्ञां परिरक्षता
पाकशासनिना संख्ये वार्द्धक्षत्रिर्निपातितः
Putrashokabhitaptena pratigyam parirakshata
Pakashasanina sankhye varddhakshatrirnipatitah
22.8
एकादश चमूर्जित्वा रक्ष्यमाणं महात्मना
सत्यं चिकीर्षता पश्य हतमेनं जयद्रथम्
Ekadasha chamurjitva rakshyamanam mahatmana
Satyam chikirshata pashya hatamenam jayadratham
22.9
सिन्धुसौवीरभर्तारं दर्पपूर्णं मनस्विनम्
भक्षयन्ति शिवा गृध्रा जनार्दन जयद्रथम्
Sindhusauvirabhartaram darpapurnam manasvinam
Bhakshayanti shiva gridhra janardana jayadratham
22.10
संरक्ष्यमाणं भार्याभिरनुरक्ताभिरच्युत
भषन्तो व्यपकर्षन्ति गहनं निम्नमन्तिकात्
Sanrakshyamanam bharyabhiranuraktabhirachyuta
Bhashanto vyapakarshanti gahanam nimnamantikat
22.11
तमेताः पर्युपासन्ते रक्षमाणा महाभुजम्
सिन्धुसौवीरगान्धारकाम्बोजयवनस्त्रियः
Tametah paryupasante rakshamana mahabhujam
Sindhusauviragandharakambojayavanastriyah
22.12
यदा कृष्णामुपादाय प्राद्रवत्केकयैः सह
तदैव वध्यः पाण्डूनां जनार्दन जयद्रथः
Yada krishnamupadaya pradravatkekayaih saha
Tadaiva vadhyah pandunam janardana jayadrathah
22.13
दुःशलां मानयद्भिस्तु यदा मुक्तो जयद्रथः
कथमद्य न तां कृष्ण मानयन्ति स्म ते पुनः
Duhshalam manayadbhistu yada mukto jayadrathah
Kathamadya na tam krishna manayanti sma te punah
22.14
सैषा मम सुता बाला विलपन्ती सुदुःखिता
प्रमापयति चात्मानमाक्रोशति च पाण्डवान्
Saisha mama suta bala vilapanti suduhkhita
Pramapayati chatmanamakroshati cha pandavan
22.15
किं नु दुःखतरं कृष्ण परं मम भविष्यति
यत्सुता विधवा बाला स्नुषाश्च निहतेश्वराः
Kim nu duhkhataram krishna param mama bhavishyati
Yatsuta vidhava bala snushashcha nihateshvarah
22.16
अहो धिग्दुःशलां पश्य वीतशोकभयामिव
शिरो भर्तुरनासाद्य धावमानामितस्ततः
Aho dhigduhshalam pashya vitashokabhayamiva
Shiro bharturanasadya dhavamanamitastatah
22.17
वारयामास यः सर्वान्पाण्डवान्पुत्रगृद्धिनः
स हत्वा विपुलाः सेनाः स्वयं मृत्युवशं गतः
Varayamasa yah sarvanpandavanputragriddhinah
Sa hatva vipulah senah svayam mrityuvasham gatah
22.18
तं मत्तमिव मातङ्गं वीरं परमदुर्जयम्
परिवार्य रुदन्त्येताः स्त्रियश्चन्द्रोपमाननाः
Tam mattamiva matangam viram paramadurjayam
Parivarya rudantyetah striyashchandropamananah