Utshovঅধ্যায় 27
27.1
বৈশংপায়ন উবাচ
তে সমাসাদ্য গঙ্গাং তু শিবাং পুণ্যজনোচিতাম্
হ্রদিনীং বপ্রসংপন্নাং মহানূপাং মহাবনাম্
27.2
ভূষণান্যুত্তরীয়াণি বেষ্টনান্যবমুচ্য চ
ততঃ পিতৄণাং পৌত্রাণাং ভ্রাতৄণাং স্বজনস্য চ
27.3
পুত্রাণামার্যকাণাং চ পতীনাং চ কুরুস্ত্রিয়ঃ
উদকং চক্রিরে সর্বা রুদন্ত্যো ভৃশদুঃখিতাঃ
সুহৃদাং চাপি ধর্মজ্ঞাঃ প্রচক্রুঃ সলিলক্রিয়াঃ
27.4
উদকে ক্রিয়মাণে তু বীরাণাং বীরপত্নিভিঃ
সূপতীর্থাভবদ্গঙ্গা ভূয়ো বিপ্রসসার চ
27.5
তন্মহোদধিসংকাশং নিরানন্দমনুত্সবম্
বীরপত্নীভিরাকীর্ণং গঙ্গাতীরমশোভত
27.6
ততঃ কুন্তী মহারাজ সহসা শোককর্শিতা
রুদতী মন্দয়া বাচা পুত্রান্বচনমব্রবীৎ
27.7
যঃ স শূরো মহেষ্বাসো রথয়ূথপয়ূথপঃ
অর্জুনেন হতঃ সংখ্যে বীরলক্ষণলক্ষিতঃ
27.8
যং সূতপুত্রং মন্যধ্বং রাধেয়মিতি পাণ্ডবাঃ
যো ব্যরাজচ্চমূমধ্যে দিবাকর ইব প্রভুঃ
27.9
প্রত্যয়ুধ্যত যঃ সর্বান্পুরা বঃ সপদানুগান্
দুর্যোধনবলং সর্বং যঃ প্রকর্ষন্ব্যরোচত
27.10
যস্য নাস্তি সমো বীর্যে পৃথিব্যামপি কশ্চন
সত্যসংধস্য শূরস্য সংগ্রামেষ্বপলায়িনঃ
27.11
কুরুধ্বমুদকং তস্য ভ্রাতুরক্লিষ্টকর্মণঃ
স হি বঃ পূর্বজো ভ্রাতা ভাস্করান্ময্যজায়ত
কুণ্ডলী কবচী শূরো দিবাকরসমপ্রভঃ
27.12
শ্রুত্বা তু পাণ্ডবাঃ সর্বে মাতুর্বচনমপ্রিয়ম্
কর্ণমেবানুশোচন্ত ভূয়শ্চার্ততরাভবন্
27.13
ততঃ স পুরুষব্যাঘ্রঃ কুন্তীপুত্রো যুধিষ্ঠিরঃ
উবাচ মাতরং বীরো নিঃশ্বসন্নিব পন্নগঃ
27.14
যস্যেষুপাতমাসাদ্য নান্যস্তিষ্ঠেদ্ধনংজয়াৎ
কথং পুত্রো ভবত্যাং স দেবগর্ভঃ পুরাভবৎ
27.15
যস্য বাহুপ্রতাপেন তাপিতাঃ সর্বতো বয়ম্
তমগ্নিমিব বস্ত্রেণ কথং ছাদিতবত্যসি
যস্য বাহুবলং ঘোরং ধার্তরাষ্ট্রৈরুপাসিতম্
27.16
নান্যঃ কুন্তীসুতাত্কর্ণাদগৃহ্ণাদ্রথিনাং রথী
স নঃ প্রথমজো ভ্রাতা সর্বশস্ত্রভৃতাং বরঃ
অসূত তং ভবত্যগ্রে কথমদ্ভুতবিক্রমম্
27.17
অহো ভবত্যা মন্ত্রস্য পিধানেন বয়ং হতাঃ
নিধনেন হি কর্ণস্য পীডিতাঃ স্ম সবান্ধবাঃ
27.18
অভিমন্যোর্বিনাশেন দ্রৌপদেয়বধেন চ
পাঞ্চালানাং চ নাশেন কুরূণাং পতনেন চ
27.19
ততঃ শতগুণং দুঃখমিদং মামস্পৃশদ্ভৃশম্
কর্ণমেবানুশোচন্হি দহ্যাম্যগ্নাবিবাহিতঃ
27.20
ন হি স্ম কিংচিদপ্রাপ্যং ভবেদপি দিবি স্থিতম্
ন চ স্ম বৈশসং ঘোরং কৌরবান্তকরং ভবেৎ
27.21
এবং বিলপ্য বহুলং ধর্মরাজো যুধিষ্ঠিরঃ
বিনদঞ্শনকৈ রাজংশ্চকারাস্যোদকং প্রভুঃ
27.22
ততো বিনেদুঃ সহসা স্ত্রীপুংসাস্তত্র সর্বশঃ
অভিতো যে স্থিতাস্তত্র তস্মিন্নুদককর্মণি
27.23
তত আনায়য়ামাস কর্ণস্য সপরিচ্ছদম্
স্ত্রিয়ঃ কুরুপতির্ধীমান্ভ্রাতুঃ প্রেম্ণা যুধিষ্ঠিরঃ
27.24
স তাভিঃ সহ ধর্মাত্মা প্রেতকৃত্যমনন্তরম্
কৃত্বোত্ততার গঙ্গায়াঃ সলিলাদাকুলেন্দ্রিয়ঃ