Utshovঅধ্যায় 8
8.1
ধৃতরাষ্ট্র উবাচ
তথা প্রয়াতে শিবিরং দ্রোণপুত্রে মহারথে
কচ্চিত্কৃপশ্চ ভোজশ্চ ভয়ার্তৌ ন ন্যবর্ততাম্
8.2
কচ্চিন্ন বারিতৌ ক্ষুদ্রৈ রক্ষিভির্নোপলক্ষিতৌ
অসহ্যমিতি বা মত্বা ন নিবৃত্তৌ মহারথৌ
8.3
কচ্চিত্প্রমথ্য শিবিরং হত্বা সোমকপাণ্ডবান্
দুর্যোধনস্য পদবীং গতৌ পরমিকাং রণে
8.4
পাঞ্চালৈর্বা বিনিহতৌ কচ্চিন্নাস্বপতাং ক্ষিতৌ
কচ্চিত্তাভ্যাং কৃতং কর্ম তন্মমাচক্ষ্ব সংজয়
8.5
সংজয় উবাচ
তস্মিন্প্রয়াতে শিবিরং দ্রোণপুত্রে মহাত্মনি
কৃপশ্চ কৃতবর্মা চ শিবিরদ্বার্যতিষ্ঠতাম্
8.6
অশ্বত্থামা তু তৌ দৃষ্ট্বা যত্নবন্তৌ মহারথৌ
প্রহৃষ্টঃ শনকৈ রাজন্নিদং বচনমব্রবীৎ
8.7
যত্তৌ ভবন্তৌ পর্যাপ্তৌ সর্বক্ষত্রস্য নাশনে
কিং পুনর্যোধশেষস্য প্রসুপ্তস্য বিশেষতঃ
8.8
অহং প্রবেক্ষ্যে শিবিরং চরিষ্যামি চ কালবৎ
যথা ন কশ্চিদপি মে জীবন্মুচ্যেত মানবঃ
8.9
ইত্যুক্ত্বা প্রাবিশদ্দ্রৌণিঃ পার্থানাং শিবিরং মহৎ
অদ্বারেণাভ্যবস্কন্দ্য বিহায় ভয়মাত্মনঃ
8.10
স প্রবিশ্য মহাবাহুরুদ্দেশজ্ঞশ্চ তস্য হ
ধৃষ্টদ্যুম্নস্য নিলয়ং শনকৈরভ্যুপাগমৎ
8.11
তে তু কৃত্বা মহত্কর্ম শ্রান্তাশ্চ বলবদ্রণে
প্রসুপ্তা বৈ সুবিশ্বস্তাঃ স্বসৈন্যপরিবারিতাঃ
8.12
অথ প্রবিশ্য তদ্বেশ্ম ধৃষ্টদ্যুম্নস্য ভারত
পাঞ্চাল্যং শয়নে দ্রৌণিরপশ্যত্সুপ্তমন্তিকাৎ
8.13
ক্ষৌমাবদাতে মহতি স্পর্ধ্যাস্তরণসংবৃতে
মাল্যপ্রবরসংয়ুক্তে ধূপৈশ্চূর্ণৈশ্চ বাসিতে
8.14
তং শয়ানং মহাত্মানং বিস্রব্ধমকুতোভয়ম্
প্রাবোধয়ত পাদেন শয়নস্থং মহীপতে
8.15
স বুদ্ধ্বা চরণস্পর্শমুত্থায় রণদুর্মদঃ
অভ্যজানদমেয়াত্মা দ্রোণপুত্রং মহারথম্
8.16
তমুত্পতন্তং শয়নাদশ্বত্থামা মহাবলঃ
কেশেষ্বালম্ব্য পাণিভ্যাং নিষ্পিপেষ মহীতলে
8.17
স বলাত্তেন নিষ্পিষ্টঃ সাধ্বসেন চ ভারত
নিদ্রয়া চৈব পাঞ্চাল্যো নাশকচ্চেষ্টিতুং তদা
8.18
তমাক্রম্য তদা রাজন্কণ্ঠে চোরসি চোভয়োঃ
নদন্তং বিস্ফুরন্তং চ পশুমারমমারয়ৎ
8.19
তুদন্নখৈস্তু স দ্রৌণিং নাতিব্যক্তমুদাহরৎ
আচার্যপুত্র শস্ত্রেণ জহি মা মা চিরং কৃথাঃ
ত্বত্কৃতে সুকৃতাঁল্লোকান্গচ্ছেয়ং দ্বিপদাং বর
8.20
তস্যাব্যক্তাং তু তাং বাচং সংশ্রুত্য দ্রৌণিরব্রবীৎ
আচার্যঘাতিনাং লোকা ন সন্তি কুলপাংসন
তস্মাচ্ছস্ত্রেণ নিধনং ন ত্বমর্হসি দুর্মতে
8.21
এবং ব্রুবাণস্তং বীরং সিংহো মত্তমিব দ্বিপম্
মর্মস্বভ্যবধীত্ক্রুদ্ধঃ পাদাষ্ঠীলৈঃ সুদারুণৈঃ
8.22
তস্য বীরস্য শব্দেন মার্যমাণস্য বেশ্মনি
অবুধ্যন্ত মহারাজ স্ত্রিয়ো যে চাস্য রক্ষিণঃ
8.23
তে দৃষ্ট্বা বর্ষ্মবন্তং তমতিমানুষবিক্রমম্
ভূতমেব ব্যবস্যন্তো ন স্ম প্রব্যাহরন্ভয়াৎ
8.24
তং তু তেনাভ্যুপায়েন গময়িত্বা যমক্ষয়ম্
অধ্যতিষ্ঠত্স তেজস্বী রথং প্রাপ্য সুদর্শনম্
8.25
স তস্য ভবনাদ্রাজন্নিষ্ক্রম্যানাদয়ন্দিশঃ
রথেন শিবিরং প্রায়াজ্জিঘাংসুর্দ্বিষতো বলী
8.26
অপক্রান্তে ততস্তস্মিন্দ্রোণপুত্রে মহারথে
সহ তৈ রক্ষিভিঃ সর্বৈঃ প্রণেদুর্যোষিতস্তদা
8.27
রাজানং নিহতং দৃষ্ট্বা ভৃশং শোকপরায়ণাঃ
ব্যাক্রোশন্ক্ষত্রিয়াঃ সর্বে ধৃষ্টদ্যুম্নস্য ভারত
8.28
তাসাং তু তেন শব্দেন সমীপে ক্ষত্রিয়র্ষভাঃ
ক্ষিপ্রং চ সমনহ্যন্ত কিমেতদিতি চাব্রুবন্
8.29
স্ত্রিয়স্তু রাজন্বিত্রস্তা ভারদ্বাজং নিরীক্ষ্য তম্
অব্রুবন্দীনকণ্ঠেন ক্ষিপ্রমাদ্রবতেতি বৈ
8.30
রাক্ষসো বা মনুষ্যো বা নৈনং জানীমহে বয়ম্
হত্বা পাঞ্চালরাজং যো রথমারুহ্য তিষ্ঠতি
8.31
ততস্তে যোধমুখ্যাস্তং সহসা পর্যবারয়ন্
স তানাপততঃ সর্বান্রুদ্রাস্ত্রেণ ব্যপোথয়ৎ
8.32
ধৃষ্টদ্যুম্নং চ হত্বা স তাংশ্চৈবাস্য পদানুগান্
অপশ্যচ্ছয়নে সুপ্তমুত্তমৌজসমন্তিকে
8.33
তমপ্যাক্রম্য পাদেন কণ্ঠে চোরসি চৌজসা
তথৈব মারয়ামাস বিনর্দন্তমরিংদমম্
8.34
যুধামন্যুস্তু সংপ্রাপ্তো মত্ত্বা তং রক্ষসা হতম্
গদামুদ্যম্য বেগেন হৃদি দ্রৌণিমতাডয়ৎ
8.35
তমভিদ্রুত্য জগ্রাহ ক্ষিতৌ চৈনমপাতয়ৎ
বিস্ফুরন্তং চ পশুবত্তথৈবৈনমমারয়ৎ
8.36
তথা স বীরো হত্বা তং ততোঽন্যান্সমুপাদ্রবৎ
সংসুপ্তানেব রাজেন্দ্র তত্র তত্র মহারথান্
স্ফুরতো বেপমানাংশ্চ শমিতেব পশূন্মখে
8.37
ততো নিস্ত্রিংশমাদায় জঘানান্যান্পৃথগ্জনান্
ভাগশো বিচরন্মার্গানসিয়ুদ্ধবিশারদঃ
8.38
তথৈব গুল্মে সংপ্রেক্ষ্য শয়ানান্মধ্যগৌল্মিকান্
শ্রান্তান্ন্যস্তায়ুধান্সর্বান্ক্ষণেনৈব ব্যপোথয়ৎ
8.39
যোধানশ্বান্দ্বিপাংশ্চৈব প্রাচ্ছিনত্স বরাসিনা
রুধিরোক্ষিতসর্বাঙ্গঃ কালসৃষ্ট ইবান্তকঃ
8.40
বিস্ফুরদ্ভিশ্চ তৈর্দ্রৌণির্নিস্ত্রিংশস্যোদ্যমেন চ
আক্ষেপেণ তথৈবাসেস্ত্রিধা রক্তোক্ষিতোঽভবৎ
8.41
তস্য লোহিতসিক্তস্য দীপ্তখড্গস্য যুধ্যতঃ
অমানুষ ইবাকারো বভৌ পরমভীষণঃ
8.42
যে ত্বজাগ্রত কৌরব্য তেঽপি শব্দেন মোহিতাঃ
নিরীক্ষ্যমাণা অন্যোন্যং দ্রৌণিং দৃষ্ট্বা প্রবিব্যথুঃ
8.43
তদ্রূপং তস্য তে দৃষ্ট্বা ক্ষত্রিয়াঃ শত্রুকর্শনাঃ
রাক্ষসং মন্যমানাস্তং নয়নানি ন্যমীলয়ন্
8.44
স ঘোররূপো ব্যচরত্কালবচ্ছিবিরে ততঃ
অপশ্যদ্দ্রৌপদীপুত্রানবশিষ্টাংশ্চ সোমকান্
8.45
তেন শব্দেন বিত্রস্তা ধনুর্হস্তা মহারথাঃ
ধৃষ্টদ্যুম্নং হতং শ্রুত্বা দ্রৌপদেয়া বিশাং পতে
অবাকিরঞ্শরব্রাতৈর্ভারদ্বাজমভীতবৎ
8.46
ততস্তেন নিনাদেন সংপ্রবুদ্ধাঃ প্রভদ্রকাঃ
শিলীমুখৈঃ শিখণ্ডী চ দ্রোণপুত্রং সমার্দয়ন্
8.47
ভারদ্বাজস্তু তান্দৃষ্ট্বা শরবর্ষাণি বর্ষতঃ
ননাদ বলবন্নাদং জিঘাংসুস্তান্সুদুর্জয়ান্
8.48
ততঃ পরমসংক্রুদ্ধঃ পিতুর্বধমনুস্মরন্
অবরুহ্য রথোপস্থাত্ত্বরমাণোঽভিদুদ্রুবে
8.49
সহস্রচন্দ্রং বিপুলং গৃহীত্বা চর্ম সংয়ুগে
খড্গং চ বিপুলং দিব্যং জাতরূপপরিষ্কৃতম্
দ্রৌপদেয়ানভিদ্রুত্য খড্গেন ব্যচরদ্বলী
8.50
ততঃ স নরশার্দূলঃ প্রতিবিন্ধ্যং তমাহবে
কুক্ষিদেশেঽবধীদ্রাজন্স হতো ন্যপতদ্ভুবি
8.51
প্রাসেন বিদ্ধ্বা দ্রৌণিং তু সুতসোমঃ প্রতাপবান্
পুনশ্চাসিং সমুদ্যম্য দ্রোণপুত্রমুপাদ্রবৎ
8.52
সুতসোমস্য সাসিং তু বাহুং ছিত্ত্বা নরর্ষভঃ
পুনরভ্যহনত্পার্শ্বে স ভিন্নহৃদয়োঽপতৎ
8.53
নাকুলিস্তু শতানীকো রথচক্রেণ বীর্যবান্
দোর্ভ্যামুত্ক্ষিপ্য বেগেন বক্ষস্যেনমতাডয়ৎ
8.54
অতাডয়চ্ছতানীকং মুক্তচক্রং দ্বিজস্তু সঃ
স বিহ্বলো যয়ৌ ভূমিং ততোঽস্যাপাহরচ্ছিরঃ
8.55
শ্রুতকর্মা তু পরিঘং গৃহীত্বা সমতাডয়ৎ
অভিদ্রুত্য ততো দ্রৌণিং সব্যে স ফলকে ভৃশম্
8.56
স তু তং শ্রুতকর্মাণমাস্যে জঘ্নে বরাসিনা
স হতো ন্যপতদ্ভূমৌ বিমূঢো বিকৃতাননঃ
8.57
তেন শব্দেন বীরস্তু শ্রুতকীর্তির্মহাধনুঃ
অশ্বত্থামানমাসাদ্য শরবর্ষৈরবাকিরৎ
8.58
তস্যাপি শরবর্ষাণি চর্মণা প্রতিবার্য সঃ
সকুণ্ডলং শিরঃ কায়াদ্ভ্রাজমানমপাহরৎ
8.59
ততো ভীষ্মনিহন্তা তং সহ সর্বৈঃ প্রভদ্রকৈঃ
অহনত্সর্বতো বীরং নানাপ্রহরণৈর্বলী
শিলীমুখেন চাপ্যেনং ভ্রুবোর্মধ্যে সমার্দয়ৎ
8.60
স তু ক্রোধসমাবিষ্টো দ্রোণপুত্রো মহাবলঃ
শিখণ্ডিনং সমাসাদ্য দ্বিধা চিচ্ছেদ সোঽসিনা
8.61
শিখণ্ডিনং ততো হত্বা ক্রোধাবিষ্টঃ পরংতপঃ
প্রভদ্রকগণান্সর্বানভিদুদ্রাব বেগবান্
যচ্চ শিষ্টং বিরাটস্য বলং তচ্চ সমাদ্রবৎ
8.62
দ্রুপদস্য চ পুত্রাণাং পৌত্রাণাং সুহৃদামপি
চকার কদনং ঘোরং দৃষ্ট্বা দৃষ্ট্বা মহাবলঃ
8.63
অন্যানন্যাংশ্চ পুরুষানভিসৃত্যাভিসৃত্য চ
ন্যকৃন্তদসিনা দ্রৌণিরসিমার্গবিশারদঃ
8.64
কালীং রক্তাস্যনয়নাং রক্তমাল্যানুলেপনাম্
রক্তাম্বরধরামেকাং পাশহস্তাং শিখণ্ডিনীম্
8.65
দদৃশুঃ কালরাত্রিং তে স্ময়মানামবস্থিতাম্
নরাশ্বকুঞ্জরান্পাশৈর্বদ্ধ্বা ঘোরৈঃ প্রতস্থুষীম্
হরন্তীং বিবিধান্প্রেতান্পাশবদ্ধান্বিমূর্ধজান্
8.66
স্বপ্নে সুপ্তান্নয়ন্তীং তাং রাত্রিষ্বন্যাসু মারিষ
দদৃশুর্যোধমুখ্যাস্তে ঘ্নন্তং দ্রৌণিং চ নিত্যদা
8.67
যতঃ প্রবৃত্তঃ সংগ্রামঃ কুরুপাণ্ডবসেনয়োঃ
ততঃ প্রভৃতি তাং কৃত্যামপশ্যন্দ্রৌণিমেব চ
8.68
তাংস্তু দৈবহতান্পূর্বং পশ্চাদ্দ্রৌণির্ন্যপাতয়ৎ
ত্রাসয়ন্সর্বভূতানি বিনদন্ভৈরবান্রবান্
8.69
তদনুস্মৃত্য তে বীরা দর্শনং পৌর্বকালিকম্
ইদং তদিত্যমন্যন্ত দৈবেনোপনিপীডিতাঃ
8.70
ততস্তেন নিনাদেন প্রত্যবুধ্যন্ত ধন্বিনঃ
শিবিরে পাণ্ডবেয়ানাং শতশোঽথ সহস্রশঃ
8.71
সোঽচ্ছিনত্কস্যচিত্পাদৌ জঘনং চৈব কস্যচিৎ
কাংশ্চিদ্বিভেদ পার্শ্বেষু কালসৃষ্ট ইবান্তকঃ
8.72
অত্যুগ্রপ্রতিপিষ্টৈশ্চ নদদ্ভিশ্চ ভৃশাতুরৈঃ
গজাশ্বমথিতৈশ্চান্যৈর্মহী কীর্ণাভবত্প্রভো
8.73
ক্রোশতাং কিমিদং কোঽয়ং কিং শব্দঃ কিং নু কিং কৃতম্
এবং তেষাং তদা দ্রৌণিরন্তকঃ সমপদ্যত
8.74
অপেতশস্ত্রসংনাহান্সংরব্ধান্পাণ্ডুসৃঞ্জয়ান্
প্রাহিণোন্মৃত্যুলোকায় দ্রৌণিঃ প্রহরতাং বরঃ
8.75
ততস্তচ্ছস্ত্রবিত্রস্তা উত্পতন্তো ভয়াতুরাঃ
নিদ্রান্ধা নষ্টসংজ্ঞাশ্চ তত্র তত্র নিলিল্যিরে
8.76
ঊরুস্তম্ভগৃহীতাশ্চ কশ্মলাভিহতৌজসঃ
বিনদন্তো ভৃশং ত্রস্তাঃ সংন্যপেষন্পরস্পরম্
8.77
ততো রথং পুনর্দ্রৌণিরাস্থিতো ভীমনিস্বনম্
ধনুষ্পাণিঃ শরৈরন্যান্প্রেষয়দ্বৈ যমক্ষয়ম্
8.78
পুনরুত্পততঃ কাংশ্চিদ্দূরাদপি নরোত্তমান্
শূরান্সংপততশ্চান্যান্কালরাত্র্যৈ ন্যবেদয়ৎ
8.79
তথৈব স্যন্দনাগ্রেণ প্রমথন্স বিধাবতি
শরবর্ষৈশ্চ বিবিধৈরবর্ষচ্ছাত্রবাংস্ততঃ
8.80
পুনশ্চ সুবিচিত্রেণ শতচন্দ্রেণ চর্মণা
তেন চাকাশবর্ণেন তদাচরত সোঽসিনা
8.81
তথা স শিবিরং তেষাং দ্রৌণিরাহবদুর্মদঃ
ব্যক্ষোভয়ত রাজেন্দ্র মহাহ্রদমিব দ্বিপঃ
8.82
উত্পেতুস্তেন শব্দেন যোধা রাজন্বিচেতসঃ
নিদ্রার্তাশ্চ ভয়ার্তাশ্চ ব্যধাবন্ত ততস্ততঃ
8.83
বিস্বরং চুক্রুশুশ্চান্যে বহ্ববদ্ধং তথাবদন্
ন চ স্ম প্রতিপদ্যন্তে শস্ত্রাণি বসনানি চ
8.84
বিমুক্তকেশাশ্চাপ্যন্যে নাভ্যজানন্পরস্পরম্
উত্পতন্তঃ পরে ভীতাঃ কেচিত্তত্র তথাভ্রমন্
পুরীষমসৃজন্কেচিত্কেচিন্মূত্রং প্রসুস্রুবুঃ
8.85
বন্ধনানি চ রাজেন্দ্র সংছিদ্য তুরগা দ্বিপাঃ
সমং পর্যপতংশ্চান্যে কুর্বন্তো মহদাকুলম্
8.86
তত্র কেচিন্নরা ভীতা ব্যলীয়ন্ত মহীতলে
তথৈব তান্নিপতিতানপিংষন্গজবাজিনঃ
8.87
তস্মিংস্তথা বর্তমানে রক্ষাংসি পুরুষর্ষভ
তৃপ্তানি ব্যনদন্নুচ্চৈর্মুদা ভরতসত্তম
8.88
স শব্দঃ প্রেরিতো রাজন্ভূতসংঘৈর্মুদা যুতৈঃ
অপূরয়দ্দিশঃ সর্বা দিবং চাপি মহাস্বনঃ
8.89
তেষামার্তস্বরং শ্রুত্বা বিত্রস্তা গজবাজিনঃ
মুক্তাঃ পর্যপতন্রাজন্মৃদ্নন্তঃ শিবিরে জনম্
8.90
তৈস্তত্র পরিধাবদ্ভিশ্চরণোদীরিতং রজঃ
অকরোচ্ছিবিরে তেষাং রজন্যাং দ্বিগুণং তমঃ
8.91
তস্মিংস্তমসি সংজাতে প্রমূঢাঃ সর্বতো জনাঃ
নাজানন্পিতরঃ পুত্রান্ভ্রাতৄন্ভ্রাতর এব চ
8.92
গজা গজানতিক্রম্য নির্মনুষ্যা হয়া হয়ান্
অতাডয়ংস্তথাভঞ্জংস্তথামৃদ্নংশ্চ ভারত
8.93
তে ভগ্নাঃ প্রপতন্তশ্চ নিঘ্নন্তশ্চ পরস্পরম্
ন্যপাতয়ন্ত চ পরান্পাতয়িত্বা তথাপিষন্
8.94
বিচেতসঃ সনিদ্রাশ্চ তমসা চাবৃতা নরাঃ
জঘ্নুঃ স্বানেব তত্রাথ কালেনাভিপ্রচোদিতাঃ
8.95
ত্যক্ত্বা দ্বারাণি চ দ্বাঃস্থাস্তথা গুল্মাংশ্চ গৌল্মিকাঃ
প্রাদ্রবন্ত যথাশক্তি কাংদিশীকা বিচেতসঃ
8.96
বিপ্রনষ্টাশ্চ তেঽন্যোন্যং নাজানন্ত তদা বিভো
ক্রোশন্তস্তাত পুত্রেতি দৈবোপহতচেতসঃ
8.97
পলায়তাং দিশস্তেষাং স্বানপ্যুত্সৃজ্য বান্ধবান্
গোত্রনামভিরন্যোন্যমাক্রন্দন্ত ততো জনাঃ
8.98
হাহাকারং চ কুর্বাণাঃ পৃথিব্যাং শেরতে পরে
তান্বুদ্ধ্বা রণমত্তোঽসৌ দ্রোণপুত্রো ব্যপোথয়ৎ
8.99
তত্রাপরে বধ্যমানা মুহুর্মুহুরচেতসঃ
শিবিরান্নিষ্পতন্তি স্ম ক্ষত্রিয়া ভয়পীডিতাঃ
8.100
তাংস্তু নিষ্পততস্ত্রস্তাঞ্শিবিরাঞ্জীবিতৈষিণঃ
কৃতবর্মা কৃপশ্চৈব দ্বারদেশে নিজঘ্নতুঃ
8.101
বিশস্ত্রয়ন্ত্রকবচান্মুক্তকেশান্কৃতাঞ্জলীন্
বেপমানান্ক্ষিতৌ ভীতান্নৈব কাংশ্চিদমুঞ্চতাম্
8.102
নামুচ্যত তয়োঃ কশ্চিন্নিষ্ক্রান্তঃ শিবিরাদ্বহিঃ
কৃপস্য চ মহারাজ হার্দিক্যস্য চ দুর্মতেঃ
8.103
ভূয়শ্চৈব চিকীর্ষন্তৌ দ্রোণপুত্রস্য তৌ প্রিয়ম্
ত্রিষু দেশেষু দদতুঃ শিবিরস্য হুতাশনম্
8.104
ততঃ প্রকাশে শিবিরে খড্গেন পিতৃনন্দনঃ
অশ্বত্থামা মহারাজ ব্যচরত্কৃতহস্তবৎ
8.105
কাংশ্চিদাপততো বীরানপরাংশ্চ প্রধাবতঃ
ব্যয়োজয়ত খড্গেন প্রাণৈর্দ্বিজবরো নরান্
8.106
কাংশ্চিদ্যোধান্স খড্গেন মধ্যে সংছিদ্য বীর্যবান্
অপাতয়দ্দ্রোণসুতঃ সংরব্ধস্তিলকাণ্ডবৎ
8.107
বিনদদ্ভির্ভৃশায়স্তৈর্নরাশ্বদ্বিরদোত্তমৈঃ
পতিতৈরভবত্কীর্ণা মেদিনী ভরতর্ষভ
8.108
মানুষাণাং সহস্রেষু হতেষু পতিতেষু চ
উদতিষ্ঠন্কবন্ধানি বহূন্যুত্থায় চাপতন্
8.109
সায়ুধান্সাঙ্গদান্বাহূন্নিচকর্ত শিরাংসি চ
হস্তিহস্তোপমানূরূন্হস্তান্পাদাংশ্চ ভারত
8.110
পৃষ্ঠচ্ছিন্নাঞ্শিরশ্ছিন্নান্পার্শ্বচ্ছিন্নাংস্তথাপরান্
সমাসাদ্যাকরোদ্দ্রৌণিঃ কাংশ্চিচ্চাপি পরাঙ্মুখান্
8.111
মধ্যকায়ান্নরানন্যাংশ্চিচ্ছেদান্যাংশ্চ কর্ণতঃ
অংসদেশে নিহত্যান্যান্কায়ে প্রাবেশয়চ্ছিরঃ
8.112
এবং বিচরতস্তস্য নিঘ্নতঃ সুবহূন্নরান্
তমসা রজনী ঘোরা বভৌ দারুণদর্শনা
8.113
কিংচিত্প্রাণৈশ্চ পুরুষৈর্হতৈশ্চান্যৈঃ সহস্রশঃ
বহুনা চ গজাশ্বেন ভূরভূদ্ভীমদর্শনা
8.114
যক্ষরক্ষঃসমাকীর্ণে রথাশ্বদ্বিপদারুণে
ক্রুদ্ধেন দ্রোণপুত্রেণ সংছিন্নাঃ প্রাপতন্ভুবি
8.115
মাতৄরন্যে পিতৄনন্যে ভ্রাতৄনন্যে বিচুক্রুশুঃ
কেচিদূচুর্ন তত্ক্রুদ্ধৈর্ধার্তরাষ্ট্রৈঃ কৃতং রণে
8.116
যত্কৃতং নঃ প্রসুপ্তানাং রক্ষোভিঃ ক্রূরকর্মভিঃ
অসাংনিধ্যাদ্ধি পার্থানামিদং নঃ কদনং কৃতম্
8.117
ন দেবাসুরগন্ধর্বৈর্ন যক্ষৈর্ন চ রাক্ষসৈঃ
শক্যো বিজেতুং কৌন্তেয়ো গোপ্তা যস্য জনার্দনঃ
8.118
ব্রহ্মণ্যঃ সত্যবাগ্দান্তঃ সর্বভূতানুকম্পকঃ
ন চ সুপ্তং প্রমত্তং বা ন্যস্তশস্ত্রং কৃতাঞ্জলিম্
ধাবন্তং মুক্তকেশং বা হন্তি পার্থো ধনংজয়ঃ
8.119
তদিদং নঃ কৃতং ঘোরং রক্ষোভিঃ ক্রূরকর্মভিঃ
ইতি লালপ্যমানাঃ স্ম শেরতে বহবো জনাঃ
8.120
স্তনতাং চ মনুষ্যাণামপরেষাং চ কূজতাম্
ততো মুহূর্তাত্প্রাশাম্যত্স শব্দস্তুমুলো মহান্
8.121
শোণিতব্যতিষিক্তায়াং বসুধায়াং চ ভূমিপ
তদ্রজস্তুমুলং ঘোরং ক্ষণেনান্তরধীয়ত
8.122
সংবেষ্টমানানুদ্বিগ্নান্নিরুত্সাহান্সহস্রশঃ
ন্যপাতয়ন্নরান্ক্রুদ্ধঃ পশূন্পশুপতির্যথা
8.123
অন্যোন্যং সংপরিষ্বজ্য শয়ানান্দ্রবতোঽপরান্
সংলীনান্যুধ্যমানাংশ্চ সর্বান্দ্রৌণিরপোথয়ৎ
8.124
দহ্যমানা হুতাশেন বধ্যমানাশ্চ তেন তে
পরস্পরং তদা যোধা অনয়ন্যমসাদনম্
8.125
তস্যা রজন্যাস্ত্বর্ধেন পাণ্ডবানাং মহদ্বলম্
গময়ামাস রাজেন্দ্র দ্রৌণির্যমনিবেশনম্
8.126
নিশাচরাণাং সত্ত্বানাং স রাত্রির্হর্ষবর্ধিনী
আসীন্নরগজাশ্বানাং রৌদ্রী ক্ষয়করী ভৃশম্
8.127
তত্রাদৃশ্যন্ত রক্ষাংসি পিশাচাশ্চ পৃথগ্বিধাঃ
খাদন্তো নরমাংসানি পিবন্তঃ শোণিতানি চ
8.128
করালাঃ পিঙ্গলা রৌদ্রাঃ শৈলদন্তা রজস্বলাঃ
জটিলা দীর্ঘসক্থাশ্চ পঞ্চপাদা মহোদরাঃ
8.129
পশ্চাদঙ্গুলয়ো রূক্ষা বিরূপা ভৈরবস্বনাঃ
ঘটজানবোঽতিহ্রস্বাশ্চ নীলকণ্ঠা বিভীষণাঃ
8.130
সপুত্রদারাঃ সুক্রূরা দুর্দর্শনসুনির্ঘৃণাঃ
বিবিধানি চ রূপাণি তত্রাদৃশ্যন্ত রক্ষসাম্
8.131
পীত্বা চ শোণিতং হৃষ্টাঃ প্রানৃত্যন্গণশোঽপরে
ইদং বরমিদং মেধ্যমিদং স্বাদ্বিতি চাব্রুবন্
8.132
মেদোমজ্জাস্থিরক্তানাং বসানাং চ ভৃশাশিতাঃ
পরমাংসানি খাদন্তঃ ক্রব্যাদা মাংসজীবিনঃ
8.133
বসাং চাপ্যপরে পীত্বা পর্যধাবন্বিকুক্ষিলাঃ
নানাবক্ত্রাস্তথা রৌদ্রাঃ ক্রব্যাদাঃ পিশিতাশিনঃ
8.134
অয়ুতানি চ তত্রাসন্প্রয়ুতান্যর্বুদানি চ
রক্ষসাং ঘোররূপাণাং মহতাং ক্রূরকর্মণাম্
8.135
মুদিতানাং বিতৃপ্তানাং তস্মিন্মহতি বৈশসে
সমেতানি বহূন্যাসন্ভূতানি চ জনাধিপ
8.136
প্রত্যূষকালে শিবিরাত্প্রতিগন্তুমিয়েষ সঃ
নৃশোণিতাবসিক্তস্য দ্রৌণেরাসীদসিত্সরুঃ
পাণিনা সহ সংশ্লিষ্ট একীভূত ইব প্রভো
8.137
স নিঃশেষানরীন্কৃত্বা বিররাজ জনক্ষয়ে
যুগান্তে সর্বভূতানি ভস্ম কৃত্বেব পাবকঃ
8.138
যথাপ্রতিজ্ঞং তত্কর্ম কৃত্বা দ্রৌণায়নিঃ প্রভো
দুর্গমাং পদবীং কৃত্বা পিতুরাসীদ্গতজ্বরঃ
8.139
যথৈব সংসুপ্তজনে শিবিরে প্রাবিশন্নিশি
তথৈব হত্বা নিঃশব্দে নিশ্চক্রাম নরর্ষভঃ
8.140
নিষ্ক্রম্য শিবিরাত্তস্মাত্তাভ্যাং সংগম্য বীর্যবান্
আচখ্যৌ কর্ম তত্সর্বং হৃষ্টঃ সংহর্ষয়ন্বিভো
8.141
তাবপ্যাচখ্যতুস্তস্মৈ প্রিয়ং প্রিয়করৌ তদা
পাঞ্চালান্সৃঞ্জয়াংশ্চৈব বিনিকৃত্তান্সহস্রশঃ
প্রীত্যা চোচ্চৈরুদক্রোশংস্তথৈবাস্ফোটয়ংস্তলান্
8.142
এবংবিধা হি সা রাত্রিঃ সোমকানাং জনক্ষয়ে
প্রসুপ্তানাং প্রমত্তানামাসীত্সুভৃশদারুণা
8.143
অসংশয়ং হি কালস্য পর্যায়ো দুরতিক্রমঃ
তাদৃশা নিহতা যত্র কৃত্বাস্মাকং জনক্ষয়ম্
8.144
ধৃতরাষ্ট্র উবাচ
প্রাগেব সুমহত্কর্ম দ্রৌণিরেতন্মহারথঃ
নাকরোদীদৃশং কস্মান্মত্পুত্রবিজয়ে ধৃতঃ
8.145
অথ কস্মাদ্ধতে ক্ষত্রে কর্মেদং কৃতবানসৌ
দ্রোণপুত্রো মহেষ্বাসস্তন্মে শংসিতুমর্হসি
8.146
সংজয় উবাচ
তেষাং নূনং ভয়ান্নাসৌ কৃতবান্কুরুনন্দন
অসাংনিধ্যাদ্ধি পার্থানাং কেশবস্য চ ধীমতঃ
8.147
সাত্যকেশ্চাপি কর্মেদং দ্রোণপুত্রেণ সাধিতম্
ন হি তেষাং সমক্ষং তান্হন্যাদপি মরুত্পতিঃ
8.148
এতদীদৃশকং বৃত্তং রাজন্সুপ্তজনে বিভো
ততো জনক্ষয়ং কৃত্বা পাণ্ডবানাং মহাত্যয়ম্
দিষ্ট্যা দিষ্ট্যেতি চান্যোন্যং সমেত্যোচুর্মহারথাঃ
8.149
পর্যষ্বজত্ততো দ্রৌণিস্তাভ্যাং চ প্রতিনন্দিতঃ
ইদং হর্ষাচ্চ সুমহদাদদে বাক্যমুত্তমম্
8.150
পাঞ্চালা নিহতাঃ সর্বে দ্রৌপদেয়াশ্চ সর্বশঃ
সোমকা মত্স্যশেষাশ্চ সর্বে বিনিহতা ময়া
8.151
ইদানীং কৃতকৃত্যাঃ স্ম যাম তত্রৈব মাচিরম্
যদি জীবতি নো রাজা তস্মৈ শংসামহে প্রিয়ম্