Utshovঅধ্যায় 7
7.1
সংজয় উবাচ
স এবং চিন্তয়িত্বা তু দ্রোণপুত্রো বিশাং পতে
অবতীর্য রথোপস্থাদ্দধ্যৌ সংপ্রয়তঃ স্থিতঃ
7.2
দ্রৌণিরুবাচ
উগ্রং স্থাণুং শিবং রুদ্রং শর্বমীশানমীশ্বরম্
গিরিশং বরদং দেবং ভবং ভাবনমব্যয়ম্
7.3
শিতিকণ্ঠমজং শক্রং ক্রথং ক্রতুহরং হরম্
বিশ্বরূপং বিরূপাক্ষং বহুরূপমুমাপতিম্
7.4
শ্মশানবাসিনং দৃপ্তং মহাগণপতিং প্রভুম্
খট্বাঙ্গধারিণং মুণ্ডং জটিলং ব্রহ্মচারিণম্
7.5
মনসাপ্যসুচিন্ত্যেন দুষ্করেণাল্পচেতসা
সোঽহমাত্মোপহারেণ যক্ষ্যে ত্রিপুরঘাতিনম্
7.6
স্তুতং স্তুত্যং স্তূয়মানমমোঘং চর্মবাসসম্
বিলোহিতং নীলকণ্ঠমপৃক্তং দুর্নিবারণম্
7.7
শুক্রং বিশ্বসৃজং ব্রহ্ম ব্রহ্মচারিণমেব চ
ব্রতবন্তং তপোনিত্যমনন্তং তপতাং গতিম্
7.8
বহুরূপং গণাধ্যক্ষং ত্র্যক্ষং পারিষদপ্রিয়ম্
গণাধ্যক্ষেক্ষিতমুখং গৌরীহৃদয়বল্লভম্
7.9
কুমারপিতরং পিঙ্গং গোবৃষোত্তমবাহনম্
তনুবাসসমত্যুগ্রমুমাভূষণতত্পরম্
7.10
পরং পরেভ্যঃ পরমং পরং যস্মান্ন বিদ্যতে
ইষ্বস্ত্রোত্তমভর্তারং দিগন্তং চৈব দক্ষিণম্
7.11
হিরণ্যকবচং দেবং চন্দ্রমৌলিবিভূষিতম্
প্রপদ্যে শরণং দেবং পরমেণ সমাধিনা
7.12
ইমাং চাপ্যাপদং ঘোরাং তরাম্যদ্য সুদুস্তরাম্
সর্বভূতোপহারেণ যক্ষ্যেঽহং শুচিনা শুচিম্
7.13
ইতি তস্য ব্যবসিতং জ্ঞাত্বা ত্যাগাত্মকং মনঃ
পুরস্তাত্কাঞ্চনী বেদিঃ প্রাদুরাসীন্মহাত্মনঃ
7.14
তস্যাং বেদ্যাং তদা রাজংশ্চিত্রভানুরজায়ত
দ্যাং দিশো বিদিশঃ খং চ জ্বালাভিরভিপূরয়ন্
7.15
দীপ্তাস্যনয়নাশ্চাত্র নৈকপাদশিরোভুজাঃ
দ্বিপশৈলপ্রতীকাশাঃ প্রাদুরাসন্মহাননাঃ
7.16
শ্ববরাহোষ্ট্ররূপাশ্চ হয়গোমায়ুগোমুখাঃ
ঋক্ষমার্জারবদনা ব্যাঘ্রদ্বীপিমুখাস্তথা
7.17
কাকবক্ত্রাঃ প্লবমুখাঃ শুকবক্ত্রাস্তথৈব চ
মহাজগরবক্ত্রাশ্চ হংসবক্ত্রাঃ সিতপ্রভাঃ
7.18
দার্বাঘাটমুখাশ্চৈব চাষবক্ত্রাশ্চ ভারত
কূর্মনক্রমুখাশ্চৈব শিশুমারমুখাস্তথা
7.19
মহামকরবক্ত্রাশ্চ তিমিবক্ত্রাস্তথৈব চ
হরিবক্ত্রাঃ ক্রৌঞ্চমুখাঃ কপোতেভমুখাস্তথা
7.20
পারাবতমুখাশ্চৈব মদ্গুবক্ত্রাস্তথৈব চ
পাণিকর্ণাঃ সহস্রাক্ষাস্তথৈব চ শতোদরাঃ
7.21
নির্মাংসাঃ কোকবক্ত্রাশ্চ শ্যেনবক্ত্রাশ্চ ভারত
তথৈবাশিরসো রাজন্নৃক্ষবক্ত্রাশ্চ ভীষণাঃ
7.22
প্রদীপ্তনেত্রজিহ্বাশ্চ জ্বালাবক্ত্রাস্তথৈব চ
মেষবক্ত্রাস্তথৈবান্যে তথা ছাগমুখা নৃপ
7.23
শঙ্খাভাঃ শঙ্খবক্ত্রাশ্চ শঙ্খকর্ণাস্তথৈব চ
শঙ্খমালাপরিকরাঃ শঙ্খধ্বনিসমস্বনাঃ
7.24
জটাধরাঃ পঞ্চশিখাস্তথা মুণ্ডাঃ কৃশোদরাঃ
চতুর্দংষ্ট্রাশ্চতুর্জিহ্বাঃ শঙ্কুকর্ণাঃ কিরীটিনঃ
7.25
মৌলীধরাশ্চ রাজেন্দ্র তথাকুঞ্চিতমূর্ধজাঃ
উষ্ণীষিণো মুকুটিনশ্চারুবক্ত্রাঃ স্বলংকৃতাঃ
7.26
পদ্মোত্পলাপীডধরাস্তথা কুমুদধারিণঃ
মাহাত্ম্যেন চ সংয়ুক্তাঃ শতশোঽথ সহস্রশঃ
7.27
শতঘ্নীচক্রহস্তাশ্চ তথা মুসলপাণয়ঃ
ভুশুণ্ডীপাশহস্তাশ্চ গদাহস্তাশ্চ ভারত
7.28
পৃষ্ঠেষু বদ্ধেষুধয়শ্চিত্রবাণা রণোত্কটাঃ
সধ্বজাঃ সপতাকাশ্চ সঘণ্টাঃ সপরশ্বধাঃ
7.29
মহাপাশোদ্যতকরাস্তথা লগুডপাণয়ঃ
স্থূণাহস্তাঃ খড্গহস্তাঃ সর্পোচ্ছ্রিতকিরীটিনঃ
মহাসর্পাঙ্গদধরাশ্চিত্রাভরণধারিণঃ
7.30
রজোধ্বস্তাঃ পঙ্কদিগ্ধাঃ সর্বে শুক্লাম্বরস্রজঃ
নীলাঙ্গাঃ কমলাঙ্গাশ্চ মুণ্ডবক্ত্রাস্তথৈব চ
7.31
ভেরীশঙ্খমৃদঙ্গাংস্তে ঝর্ঝরানকগোমুখান্
অবাদয়ন্পারিষদাঃ প্রহৃষ্টাঃ কনকপ্রভাঃ
7.32
গায়মানাস্তথৈবান্যে নৃত্যমানাস্তথাপরে
লঙ্ঘয়ন্তঃ প্লবন্তশ্চ বল্গন্তশ্চ মহাবলাঃ
7.33
ধাবন্তো জবনাশ্চণ্ডাঃ পবনোদ্ধূতমূর্ধজাঃ
মত্তা ইব মহানাগা বিনদন্তো মুহুর্মুহুঃ
7.34
সুভীমা ঘোররূপাশ্চ শূলপট্টিশপাণয়ঃ
নানাবিরাগবসনাশ্চিত্রমাল্যানুলেপনাঃ
7.35
রত্নচিত্রাঙ্গদধরাঃ সমুদ্যতকরাস্তথা
হন্তারো দ্বিষতাং শূরাঃ প্রসহ্যাসহ্যবিক্রমাঃ
7.36
পাতারোঽসৃগ্বসাদ্যানাং মাংসান্ত্রকৃতভোজনাঃ
চূডালাঃ কর্ণিকালাশ্চ প্রকৃশাঃ পিঠরোদরাঃ
7.37
অতিহ্রস্বাতিদীর্ঘাশ্চ প্রবলাশ্চাতিভৈরবাঃ
বিকটাঃ কাললম্বোষ্ঠা বৃহচ্ছেফাস্থিপিণ্ডিকাঃ
7.38
মহার্হনানামুকুটা মুণ্ডাশ্চ জটিলাঃ পরে
সার্কেন্দুগ্রহনক্ষত্রাং দ্যাং কুর্যুর্যে মহীতলে
7.39
উত্সহেরংশ্চ যে হন্তুং ভূতগ্রামং চতুর্বিধম্
যে চ বীতভয়া নিত্যং হরস্য ভ্রুকুটীভটাঃ
7.40
কামকারকরাঃ সিদ্ধাস্ত্রৈলোক্যস্যেশ্বরেশ্বরাঃ
নিত্যানন্দপ্রমুদিতা বাগীশা বীতমত্সরাঃ
7.41
প্রাপ্যাষ্টগুণমৈশ্বর্যং যে ন যান্তি চ বিস্ময়ম্
যেষাং বিস্ময়তে নিত্যং ভগবান্কর্মভির্হরঃ
7.42
মনোবাক্কর্মভির্ভক্তৈর্নিত্যমারাধিতশ্চ যৈঃ
মনোবাক্কর্মভির্ভক্তান্পাতি পুত্রানিবৌরসান্
7.43
পিবন্তোঽসৃগ্বসাস্ত্বন্যে ক্রুদ্ধা ব্রহ্মদ্বিষাং সদা
চতুর্বিংশাত্মকং সোমং যে পিবন্তি চ নিত্যদা
7.44
শ্রুতেন ব্রহ্মচর্যেণ তপসা চ দমেন চ
যে সমারাধ্য শূলাঙ্কং ভবসায়ুজ্যমাগতাঃ
7.45
যৈরাত্মভূতৈর্ভগবান্পার্বত্যা চ মহেশ্বরঃ
সহ ভূতগণান্ভুঙ্ক্তে ভূতভব্যভবত্প্রভুঃ
7.46
নানাবিচিত্রহসিতক্ষ্বেডিতোত্ক্রুষ্টগর্জিতৈঃ
সংনাদয়ন্তস্তে বিশ্বমশ্বত্থামানমভ্যয়ুঃ
7.47
সংস্তুবন্তো মহাদেবং ভাঃ কুর্বাণাঃ সুবর্চসঃ
বিবর্ধয়িষবো দ্রৌণের্মহিমানং মহাত্মনঃ
7.48
জিজ্ঞাসমানাস্তত্তেজঃ সৌপ্তিকং চ দিদৃক্ষবঃ
ভীমোগ্রপরিঘালাতশূলপট্টিশপাণয়ঃ
ঘোররূপাঃ সমাজগ্মুর্ভূতসংঘাঃ সমন্ততঃ
7.49
জনয়েয়ুর্ভয়ং যে স্ম ত্রৈলোক্যস্যাপি দর্শনাৎ
তান্প্রেক্ষমাণোঽপি ব্যথাং ন চকার মহাবলঃ
7.50
অথ দ্রৌণির্ধনুষ্পাণির্বদ্ধগোধাঙ্গুলিত্রবান্
স্বয়মেবাত্মনাত্মানমুপহারমুপাহরৎ
7.51
ধনূংষি সমিধস্তত্র পবিত্রাণি শিতাঃ শরাঃ
হবিরাত্মবতশ্চাত্মা তস্মিন্ভারত কর্মণি
7.52
ততঃ সৌম্যেন মন্ত্রেণ দ্রোণপুত্রঃ প্রতাপবান্
উপহারং মহামন্যুরথাত্মানমুপাহরৎ
7.53
তং রুদ্রং রৌদ্রকর্মাণং রৌদ্রৈঃ কর্মভিরচ্যুতম্
অভিষ্টুত্য মহাত্মানমিত্যুবাচ কৃতাঞ্জলিঃ
7.54
ইমমাত্মানমদ্যাহং জাতমাঙ্গিরসে কুলে
অগ্নৌ জুহোমি ভগবন্প্রতিগৃহ্ণীষ্ব মাং বলিম্
7.55
ভবদ্ভক্ত্যা মহাদেব পরমেণ সমাধিনা
অস্যামাপদি বিশ্বাত্মন্নুপাকুর্মি তবাগ্রতঃ
7.56
ত্বয়ি সর্বাণি ভূতানি সর্বভূতেষু চাসি বৈ
গুণানাং হি প্রধানানামেকত্বং ত্বয়ি তিষ্ঠতি
7.57
সর্বভূতাশয় বিভো হবির্ভূতমুপস্থিতম্
প্রতিগৃহাণ মাং দেব যদ্যশক্যাঃ পরে ময়া
7.58
ইত্যুক্ত্বা দ্রৌণিরাস্থায় তাং বেদীং দীপ্তপাবকাম্
সংত্যক্তাত্মা সমারুহ্য কৃষ্ণবর্ত্মন্যুপাবিশৎ
7.59
তমূর্ধ্ববাহুং নিশ্চেষ্টং দৃষ্ট্বা হবিরুপস্থিতম্
অব্রবীদ্ভগবান্সাক্ষান্মহাদেবো হসন্নিব
7.60
সত্যশৌচার্জবত্যাগৈস্তপসা নিয়মেন চ
ক্ষান্ত্যা ভক্ত্যা চ ধৃত্যা চ বুদ্ধ্যা চ বচসা তথা
7.61
যথাবদহমারাদ্ধঃ কৃষ্ণেনাক্লিষ্টকর্মণা
তস্মাদিষ্টতমঃ কৃষ্ণাদন্যো মম ন বিদ্যতে
7.62
কুর্বতা তস্য সংমানং ত্বাং চ জিজ্ঞাসতা ময়া
পাঞ্চালাঃ সহসা গুপ্তা মায়াশ্চ বহুশঃ কৃতাঃ
7.63
কৃতস্তস্যৈষ সংমানঃ পাঞ্চালান্রক্ষতা ময়া
অভিভূতাস্তু কালেন নৈষামদ্যাস্তি জীবিতম্
7.64
এবমুক্ত্বা মহেষ্বাসং ভগবানাত্মনস্তনুম্
আবিবেশ দদৌ চাস্মৈ বিমলং খড্গমুত্তমম্
7.65
অথাবিষ্টো ভগবতা ভূয়ো জজ্বাল তেজসা
বর্ষ্মবাংশ্চাভবদ্যুদ্ধে দেবসৃষ্টেন তেজসা
7.66
তমদৃশ্যানি ভূতানি রক্ষাংসি চ সমাদ্রবন্
অভিতঃ শত্রুশিবিরং যান্তং সাক্ষাদিবেশ্বরম্