Utshovঅধ্যায় 6
6.1
ধৃতরাষ্ট্র উবাচ
দ্বারদেশে ততো দ্রৌণিমবস্থিতমবেক্ষ্য তৌ
অকুর্বতাং ভোজকৃপৌ কিং সংজয় বদস্ব মে
6.2
সংজয় উবাচ
কৃতবর্মাণমামন্ত্র্য কৃপং চ স মহারথম্
দ্রৌণির্মন্যুপরীতাত্মা শিবিরদ্বারমাসদৎ
6.3
তত্র ভূতং মহাকায়ং চন্দ্রার্কসদৃশদ্যুতিম্
সোঽপশ্যদ্দ্বারমাবৃত্য তিষ্ঠন্তং লোমহর্ষণম্
6.4
বসানং চর্ম বৈয়াঘ্রং মহারুধিরবিস্রবম্
কৃষ্ণাজিনোত্তরাসঙ্গং নাগয়জ্ঞোপবীতিনম্
6.5
বাহুভিঃ স্বায়তৈঃ পীনৈর্নানাপ্রহরণোদ্যতৈঃ
বদ্ধাঙ্গদমহাসর্পং জ্বালামালাকুলাননম্
6.6
দংষ্ট্রাকরালবদনং ব্যাদিতাস্যং ভয়াবহম্
নয়নানাং সহস্রৈশ্চ বিচিত্রৈরভিভূষিতম্
6.7
নৈব তস্য বপুঃ শক্যং প্রবক্তুং বেষ এব বা
সর্বথা তু তদালক্ষ্য স্ফুটেয়ুরপি পর্বতাঃ
6.8
তস্যাস্যান্নাসিকাভ্যাং চ শ্রবণাভ্যাং চ সর্বশঃ
তেভ্যশ্চাক্ষিসহস্রেভ্যঃ প্রাদুরাসন্মহার্চিষঃ
6.9
তথা তেজোমরীচিভ্যঃ শঙ্খচক্রগদাধরাঃ
প্রাদুরাসন্হৃষীকেশাঃ শতশোঽথ সহস্রশঃ
6.10
তদত্যদ্ভুতমালোক্য ভূতং লোকভয়ংকরম্
দ্রৌণিরব্যথিতো দিব্যৈরস্ত্রবর্ষৈরবাকিরৎ
6.11
দ্রৌণিমুক্তাঞ্শরাংস্তাংস্তু তদ্ভূতং মহদগ্রসৎ
উদধেরিব বার্যোঘান্পাবকো বডবামুখঃ
6.12
অশ্বত্থামা তু সংপ্রেক্ষ্য তাঞ্শরৌঘান্নিরর্থকান্
রথশক্তিং মুমোচাস্মৈ দীপ্তামগ্নিশিখামিব
6.13
সা তদাহত্য দীপ্তাগ্রা রথশক্তিরশীর্যত
যুগান্তে সূর্যমাহত্য মহোল্কেব দিবশ্চ্যুতা
6.14
অথ হেমত্সরুং দিব্যং খড্গমাকাশবর্চসম্
কোশাত্সমুদ্ববর্হাশু বিলাদ্দীপ্তমিবোরগম্
6.15
ততঃ খড্গবরং ধীমান্ভূতায় প্রাহিণোত্তদা
স তদাসাদ্য ভূতং বৈ বিলয়ং তূলবদ্যয়ৌ
6.16
ততঃ স কুপিতো দ্রৌণিরিন্দ্রকেতুনিভাং গদাম্
জ্বলন্তীং প্রাহিণোত্তস্মৈ ভূতং তামপি চাগ্রসৎ
6.17
ততঃ সর্বায়ুধাভাবে বীক্ষমাণস্ততস্ততঃ
অপশ্যত্কৃতমাকাশমনাকাশং জনার্দনৈঃ
6.18
তদদ্ভুততমং দৃষ্ট্বা দ্রোণপুত্রো নিরায়ুধঃ
অব্রবীদভিসংতপ্তঃ কৃপবাক্যমনুস্মরন্
6.19
ব্রুবতামপ্রিয়ং পথ্যং সুহৃদাং ন শৃণোতি যঃ
স শোচত্যাপদং প্রাপ্য যথাহমতিবর্ত্য তৌ
6.20
শাস্ত্রদৃষ্টানবধ্যান্যঃ সমতীত্য জিঘাংসতি
স পথঃ প্রচ্যুতো ধর্ম্যাত্কুপথং প্রতিপদ্যতে
6.21
গোব্রাহ্মণনৃপস্ত্রীষু সখ্যুর্মাতুর্গুরোস্তথা
বৃদ্ধবালজডান্ধেষু সুপ্তভীতোত্থিতেষু চ
6.22
মত্তোন্মত্তপ্রমত্তেষু ন শস্ত্রাণ্যুপধারয়েৎ
ইত্যেবং গুরুভিঃ পূর্বমুপদিষ্টং নৃণাং সদা
6.23
সোঽহমুত্ক্রম্য পন্থানং শাস্ত্রদৃষ্টং সনাতনম্
অমার্গেণৈবমারভ্য ঘোরামাপদমাগতঃ
6.24
তাং চাপদং ঘোরতরাং প্রবদন্তি মনীষিণঃ
যদুদ্যম্য মহত্কৃত্যং ভয়াদপি নিবর্ততে
6.25
অশক্যং চৈব কঃ কর্তুং শক্তঃ শক্তিবলাদিহ
ন হি দৈবাদ্গরীয়ো বৈ মানুষং কর্ম কথ্যতে
6.26
মানুষং কুর্বতঃ কর্ম যদি দৈবান্ন সিধ্যতি
স পথঃ প্রচ্যুতো ধর্ম্যাদ্বিপদং প্রতিপদ্যতে
6.27
প্রতিঘাতং হ্যবিজ্ঞাতং প্রবদন্তি মনীষিণঃ
যদারভ্য ক্রিয়াং কাংচিদ্ভয়াদিহ নিবর্ততে
6.28
তদিদং দুষ্প্রণীতেন ভয়ং মাং সমুপস্থিতম্
ন হি দ্রোণসুতঃ সংখ্যে নিবর্তেত কথংচন
6.29
ইদং চ সুমহদ্ভূতং দৈবদণ্ডমিবোদ্যতম্
ন চৈতদভিজানামি চিন্তয়ন্নপি সর্বথা
6.30
ধ্রুবং যেয়মধর্মে মে প্রবৃত্তা কলুষা মতিঃ
তস্যাঃ ফলমিদং ঘোরং প্রতিঘাতায় দৃশ্যতে
6.31
তদিদং দৈববিহিতং মম সংখ্যে নিবর্তনম্
নান্যত্র দৈবাদুদ্যন্তুমিহ শক্যং কথংচন
6.32
সোঽহমদ্য মহাদেবং প্রপদ্যে শরণং প্রভুম্
দৈবদণ্ডমিমং ঘোরং স হি মে নাশয়িষ্যতি
6.33
কপর্দিনং প্রপদ্যাথ দেবদেবমুমাপতিম্
কপালমালিনং রুদ্রং ভগনেত্রহরং হরম্
6.34
স হি দেবোঽত্যগাদ্দেবাংস্তপসা বিক্রমেণ চ
তস্মাচ্ছরণমভ্যেষ্যে গিরিশং শূলপাণিনম্