Utshovঅধ্যায় 5
5.1
কৃপ উবাচ
শুশ্রূষুরপি দুর্মেধাঃ পুরুষোঽনিয়তেন্দ্রিয়ঃ
নালং বেদয়িতুং কৃত্স্নৌ ধর্মার্থাবিতি মে মতিঃ
5.2
তথৈব তাবন্মেধাবী বিনয়ং যো ন শিক্ষতি
ন চ কিংচন জানাতি সোঽপি ধর্মার্থনিশ্চয়ম্
5.3
শুশ্রূষুস্ত্বেব মেধাবী পুরুষো নিয়তেন্দ্রিয়ঃ
জানীয়াদাগমান্সর্বান্গ্রাহ্যং চ ন বিরোধয়েৎ
5.4
অনেয়স্ত্ববমানী যো দুরাত্মা পাপপূরুষঃ
দিষ্টমুত্সৃজ্য কল্যাণং করোতি বহুপাপকম্
5.5
নাথবন্তং তু সুহৃদঃ প্রতিষেধন্তি পাতকাৎ
নিবর্ততে তু লক্ষ্মীবান্নালক্ষ্মীবান্নিবর্ততে
5.6
যথা হ্যুচ্চাবচৈর্বাক্যৈঃ ক্ষিপ্তচিত্তো নিয়ম্যতে
তথৈব সুহৃদা শক্যো নশক্যস্ত্ববসীদতি
5.7
তথৈব সুহৃদং প্রাজ্ঞং কুর্বাণং কর্ম পাপকম্
প্রাজ্ঞাঃ সংপ্রতিষেধন্তে যথাশক্তি পুনঃ পুনঃ
5.8
স কল্যাণে মতিং কৃত্বা নিয়ম্যাত্মানমাত্মনা
কুরু মে বচনং তাত যেন পশ্চান্ন তপ্যসে
5.9
ন বধঃ পূজ্যতে লোকে সুপ্তানামিহ ধর্মতঃ
তথৈব ন্যস্তশস্ত্রাণাং বিমুক্তরথবাজিনাম্
5.10
যে চ ব্রূয়ুস্তবাস্মীতি যে চ স্যুঃ শরণাগতাঃ
বিমুক্তমূর্ধজা যে চ যে চাপি হতবাহনাঃ
5.11
অদ্য স্বপ্স্যন্তি পাঞ্চালা বিমুক্তকবচা বিভো
বিশ্বস্তা রজনীং সর্বে প্রেতা ইব বিচেতসঃ
5.12
যস্তেষাং তদবস্থানাং দ্রুহ্যেত পুরুষোঽনৃজুঃ
ব্যক্তং স নরকে মজ্জেদগাধে বিপুলেঽপ্লবে
5.13
সর্বাস্ত্রবিদুষাং লোকে শ্রেষ্ঠস্ত্বমসি বিশ্রুতঃ
ন চ তে জাতু লোকেঽস্মিন্সুসূক্ষ্মমপি কিল্বিষম্
5.14
ত্বং পুনঃ সূর্যসংকাশঃ শ্বোভূত উদিতে রবৌ
প্রকাশে সর্বভূতানাং বিজেতা যুধি শাত্রবান্
5.15
অসংভাবিতরূপং হি ত্বয়ি কর্ম বিগর্হিতম্
শুক্লে রক্তমিব ন্যস্তং ভবেদিতি মতির্মম
5.16
অশ্বত্থামোবাচ
এবমেতদ্যথাত্থ ত্বমনুশাস্মীহ মাতুল
তৈস্তু পূর্বময়ং সেতুঃ শতধা বিদলীকৃতঃ
5.17
প্রত্যক্ষং ভূমিপালানাং ভবতাং চাপি সংনিধৌ
ন্যস্তশস্ত্রো মম পিতা ধৃষ্টদ্যুম্নেন পাতিতঃ
5.18
কর্ণশ্চ পতিতে চক্রে রথস্য রথিনাং বরঃ
উত্তমে ব্যসনে সন্নো হতো গাণ্ডীবধন্বনা
5.19
তথা শাংতনবো ভীষ্মো ন্যস্তশস্ত্রো নিরায়ুধঃ
শিখণ্ডিনং পুরস্কৃত্য হতো গাণ্ডীবধন্বনা
5.20
ভূরিশ্রবা মহেষ্বাসস্তথা প্রায়গতো রণে
ক্রোশতাং ভূমিপালানাং যুয়ুধানেন পাতিতঃ
5.21
দুর্যোধনশ্চ ভীমেন সমেত্য গদয়া মৃধে
পশ্যতাং ভূমিপালানামধর্মেণ নিপাতিতঃ
5.22
একাকী বহুভিস্তত্র পরিবার্য মহারথৈঃ
অধর্মেণ নরব্যাঘ্রো ভীমসেনেন পাতিতঃ
5.23
বিলাপো ভগ্নসক্থস্য যো মে রাজ্ঞঃ পরিশ্রুতঃ
বার্ত্তিকানাং কথয়তাং স মে মর্মাণি কৃন্ততি
5.24
এবমধার্মিকাঃ পাপাঃ পাঞ্চালা ভিন্নসেতবঃ
তানেবং ভিন্নমর্যাদান্কিং ভবান্ন বিগর্হতি
5.25
পিতৃহন্তৄনহং হত্বা পাঞ্চালান্নিশি সৌপ্তিকে
কামং কীটঃ পতংগো বা জন্ম প্রাপ্য ভবামি বৈ
5.26
ত্বরে চাহমনেনাদ্য যদিদং মে চিকীর্ষিতম্
তস্য মে ত্বরমাণস্য কুতো নিদ্রা কুতঃ সুখম্
5.27
ন স জাতঃ পুমাঁল্লোকে কশ্চিন্ন চ ভবিষ্যতি
যো মে ব্যাবর্তয়েদেতাং বধে তেষাং কৃতাং মতিম্
5.28
সংজয় উবাচ
এবমুক্ত্বা মহারাজ দ্রোণপুত্রঃ প্রতাপবান্
একান্তে যোজয়িত্বাশ্বান্প্রায়াদভিমুখঃ পরান্
5.29
তমব্রূতাং মহাত্মানৌ ভোজশারদ্বতাবুভৌ
কিময়ং স্যন্দনো যুক্তঃ কিং চ কার্যং চিকীর্ষিতম্
5.30
একসার্থং প্রয়াতৌ স্বস্ত্বয়া সহ নরর্ষভ
সমদুঃখসুখৌ চৈব নাবাং শঙ্কিতুমর্হসি
5.31
অশ্বত্থামা তু সংক্রুদ্ধঃ পিতুর্বধমনুস্মরন্
তাভ্যাং তথ্যং তদাচখ্যৌ যদস্যাত্মচিকীর্ষিতম্
5.32
হত্বা শতসহস্রাণি যোধানাং নিশিতৈঃ শরৈঃ
ন্যস্তশস্ত্রো মম পিতা ধৃষ্টদ্যুম্নেন পাতিতঃ
5.33
তং তথৈব হনিষ্যামি ন্যস্তবর্মাণমদ্য বৈ
পুত্রং পাঞ্চালরাজস্য পাপং পাপেন কর্মণা
5.34
কথং চ নিহতঃ পাপঃ পাঞ্চালঃ পশুবন্ময়া
শস্ত্রাহবজিতাং লোকান্প্রাপ্নুয়াদিতি মে মতিঃ
5.35
ক্ষিপ্রং সংনদ্ধকবচৌ সখড্গাবাত্তকার্মুকৌ
সমাস্থায় প্রতীক্ষেতাং রথবর্যৌ পরংতপৌ
5.36
ইত্যুক্ত্বা রথমাস্থায় প্রায়াদভিমুখঃ পরান্
তমন্বগাত্কৃপো রাজন্কৃতবর্মা চ সাত্বতঃ
5.37
তে প্রয়াতা ব্যরোচন্ত পরানভিমুখাস্ত্রয়ঃ
হূয়মানা যথা যজ্ঞে সমিদ্ধা হব্যবাহনাঃ
5.38
যয়ুশ্চ শিবিরং তেষাং সংপ্রসুপ্তজনং বিভো
দ্বারদেশং তু সংপ্রাপ্য দ্রৌণিস্তস্থৌ রথোত্তমে