Utshovঅধ্যায় 4
4.1
কৃপ উবাচ
দিষ্ট্যা তে প্রতিকর্তব্যে মতির্জাতেয়মচ্যুত
ন ত্বা বারয়িতুং শক্তো বজ্রপাণিরপি স্বয়ম্
4.2
অনুয়াস্যাবহে ত্বাং তু প্রভাতে সহিতাবুভৌ
অদ্য রাত্রৌ বিশ্রমস্ব বিমুক্তকবচধ্বজঃ
4.3
অহং ত্বামনুয়াস্যামি কৃতবর্মা চ সাত্বতঃ
পরানভিমুখং যান্তং রথাবাস্থায় দংশিতৌ
4.4
আবাভ্যাং সহিতঃ শত্রূঞ্শ্বোঽসি হন্তা সমাগমে
বিক্রম্য রথিনাং শ্রেষ্ঠ পাঞ্চালান্সপদানুগান্
4.5
শক্তস্ত্বমসি বিক্রান্তুং বিশ্রমস্ব নিশামিমাম্
চিরং তে জাগ্রতস্তাত স্বপ তাবন্নিশামিমাম্
4.6
বিশ্রান্তশ্চ বিনিদ্রশ্চ স্বস্থচিত্তশ্চ মানদ
সমেত্য সমরে শত্রূন্বধিষ্যসি ন সংশয়ঃ
4.7
ন হি ত্বা রথিনাং শ্রেষ্ঠ প্রগৃহীতবরায়ুধম্
জেতুমুত্সহতে কশ্চিদপি দেবেষু পাবকিঃ
4.8
কৃপেণ সহিতং যান্তং যুক্তং চ কৃতবর্মণা
কো দ্রৌণিং যুধি সংরব্ধং যোধয়েদপি দেবরাট্
4.9
তে বয়ং পরিবিশ্রান্তা বিনিদ্রা বিগতজ্বরাঃ
প্রভাতায়াং রজন্যাং বৈ নিহনিষ্যাম শাত্রবান্
4.10
তব হ্যস্ত্রাণি দিব্যানি মম চৈব ন সংশয়ঃ
সাত্বতোঽপি মহেষ্বাসো নিত্যং যুদ্ধেষু কোবিদঃ
4.11
তে বয়ং সহিতাস্তাত সর্বাঞ্শত্রূন্সমাগতান্
প্রসহ্য সমরে হত্বা প্রীতিং প্রাপ্স্যাম পুষ্কলাম্
বিশ্রমস্ব ত্বমব্যগ্রঃ স্বপ চেমাং নিশাং সুখম্
4.12
অহং চ কৃতবর্মা চ প্রয়ান্তং ত্বাং নরোত্তম
অনুয়াস্যাব সহিতৌ ধন্বিনৌ পরতাপিনৌ
রথিনং ত্বরয়া যান্তং রথাবাস্থায় দংশিতৌ
4.13
স গত্বা শিবিরং তেষাং নাম বিশ্রাব্য চাহবে
ততঃ কর্তাসি শত্রূণাং যুধ্যতাং কদনং মহৎ
4.14
কৃত্বা চ কদনং তেষাং প্রভাতে বিমলেঽহনি
বিহরস্ব যথা শক্রঃ সূদয়িত্বা মহাসুরান্
4.15
ত্বং হি শক্তো রণে জেতুং পাঞ্চালানাং বরূথিনীম্
দৈত্যসেনামিব ক্রুদ্ধঃ সর্বদানবসূদনঃ
4.16
ময়া ত্বাং সহিতং সংখ্যে গুপ্তং চ কৃতবর্মণা
ন সহেত বিভুঃ সাক্ষাদ্বজ্রপাণিরপি স্বয়ম্
4.17
ন চাহং সমরে তাত কৃতবর্মা তথৈব চ
অনির্জিত্য রণে পাণ্ডূন্ব্যপয়াস্যাব কর্হিচিৎ
4.18
হত্বা চ সমরে ক্ষুদ্রান্পাঞ্চালান্পাণ্ডুভিঃ সহ
নিবর্তিষ্যামহে সর্বে হতা বা স্বর্গগা বয়ম্
4.19
সর্বোপায়ৈঃ সহায়াস্তে প্রভাতে বয়মেব হি
সত্যমেতন্মহাবাহো প্রব্রবীমি তবানঘ
4.20
এবমুক্তস্ততো দ্রৌণির্মাতুলেন হিতং বচঃ
অব্রবীন্মাতুলং রাজন্ক্রোধাদুদ্বৃত্য লোচনে
4.21
আতুরস্য কুতো নিদ্রা নরস্যামর্ষিতস্য চ
অর্থাংশ্চিন্তয়তশ্চাপি কাময়ানস্য বা পুনঃ
4.22
তদিদং সমনুপ্রাপ্তং পশ্য মেঽদ্য চতুষ্টয়ম্
যস্য ভাগশ্চতুর্থো মে স্বপ্নমহ্নায় নাশয়েৎ
4.23
কিং নাম দুঃখং লোকেঽস্মিন্পিতুর্বধমনুস্মরন্
হৃদয়ং নির্দহন্মেঽদ্য রাত্র্যহানি ন শাম্যতি
4.24
যথা চ নিহতঃ পাপৈঃ পিতা মম বিশেষতঃ
প্রত্যক্ষমপি তে সর্বং তন্মে মর্মাণি কৃন্ততি
4.25
কথং হি মাদৃশো লোকে মুহূর্তমপি জীবতি
দ্রোণো হতেতি যদ্বাচঃ পাঞ্চালানাং শৃণোম্যহম্
4.26
দৃষ্টদ্যুম্নমহত্বাজৌ নাহং জীবিতুমুত্সহে
স মে পিতৃবধাদ্বধ্যঃ পাঞ্চালা যে চ সংগতাঃ
4.27
বিলাপো ভগ্নসক্থস্য যস্তু রাজ্ঞো ময়া শ্রুতঃ
স পুনর্হৃদয়ং কস্য ক্রূরস্যাপি ন নির্দহেৎ
4.28
কস্য হ্যকরুণস্যাপি নেত্রাভ্যামশ্রু নাব্রজেৎ
নৃপতের্ভগ্নসক্থস্য শ্রুত্বা তাদৃগ্বচঃ পুনঃ
4.29
যশ্চায়ং মিত্রপক্ষো মে ময়ি জীবতি নির্জিতঃ
শোকং মে বর্ধয়ত্যেষ বারিবেগ ইবার্ণবম্
একাগ্রমনসো মেঽদ্য কুতো নিদ্রা কুতঃ সুখম্
4.30
বাসুদেবার্জুনাভ্যাং হি তানহং পরিরক্ষিতান্
অবিষহ্যতমান্মন্যে মহেন্দ্রেণাপি মাতুল
4.31
ন চাস্মি শক্যঃ সংয়ন্তুমস্মাত্কার্যাত্কথংচন
ন তং পশ্যামি লোকেঽস্মিন্যো মাং কার্যান্নিবর্তয়েৎ
ইতি মে নিশ্চিতা বুদ্ধিরেষা সাধুমতা চ মে
4.32
বার্ত্তিকৈঃ কথ্যমানস্তু মিত্রাণাং মে পরাভবঃ
পাণ্ডবানাং চ বিজয়ো হৃদয়ং দহতীব মে
4.33
অহং তু কদনং কৃত্বা শত্রূণামদ্য সৌপ্তিকে
ততো বিশ্রমিতা চৈব স্বপ্তা চ বিগতজ্বরঃ