Utshovঅধ্যায় 3
3.1
সংজয় উবাচ
কৃপস্য বচনং শ্রুত্বা ধর্মার্থসহিতং শুভম্
অশ্বত্থামা মহারাজ দুঃখশোকসমন্বিতঃ
3.2
দহ্যমানস্তু শোকেন প্রদীপ্তেনাগ্নিনা যথা
ক্রূরং মনস্ততঃ কৃত্বা তাবুভৌ প্রত্যভাষত
3.3
পুরুষে পুরুষে বুদ্ধিঃ সা সা ভবতি শোভনা
তুষ্যন্তি চ পৃথক্সর্বে প্রজ্ঞয়া তে স্বয়া স্বয়া
3.4
সর্বো হি মন্যতে লোক আত্মানং বুদ্ধিমত্তরম্
সর্বস্যাত্মা বহুমতঃ সর্বাত্মানং প্রশংসতি
3.5
সর্বস্য হি স্বকা প্রজ্ঞা সাধুবাদে প্রতিষ্ঠিতা
পরবুদ্ধিং চ নিন্দন্তি স্বাং প্রশংসন্তি চাসকৃৎ
3.6
কারণান্তরয়োগেন যোগে যেষাং সমা মতিঃ
তেঽন্যোন্যেন চ তুষ্যন্তি বহু মন্যন্তি চাসকৃৎ
3.7
তস্যৈব তু মনুষ্যস্য সা সা বুদ্ধিস্তদা তদা
কালয়োগবিপর্যাসং প্রাপ্যান্যোন্যং বিপদ্যতে
3.8
অচিন্ত্যত্বাদ্ধি চিত্তানাং মনুষ্যাণাং বিশেষতঃ
চিত্তবৈকল্যমাসাদ্য সা সা বুদ্ধিঃ প্রজায়তে
3.9
যথা হি বৈদ্যঃ কুশলো জ্ঞাত্বা ব্যাধিং যথাবিধি
ভেষজং কুরুতে যোগাত্প্রশমার্থমিহাভিভো
3.10
এবং কার্যস্য যোগার্থং বুদ্ধিং কুর্বন্তি মানবাঃ
প্রজ্ঞয়া হি স্বয়া যুক্তাস্তাং চ নিন্দন্তি মানবাঃ
3.11
অন্যয়া যৌবনে মর্ত্যো বুদ্ধ্যা ভবতি মোহিতঃ
মধ্যেঽন্যয়া জরায়াং তু সোঽন্যাং রোচয়তে মতিম্
3.12
ব্যসনং বা পুনর্ঘোরং সমৃদ্ধিং বাপি তাদৃশীম্
অবাপ্য পুরুষো ভোজ কুরুতে বুদ্ধিবৈকৃতম্
3.13
একস্মিন্নেব পুরুষে সা সা বুদ্ধিস্তদা তদা
ভবত্যনিত্যপ্রজ্ঞত্বাত্সা তস্যৈব ন রোচতে
3.14
নিশ্চিত্য তু যথাপ্রজ্ঞং যাং মতিং সাধু পশ্যতি
তস্যাং প্রকুরুতে ভাবং সা তস্যোদ্যোগকারিকা
3.15
সর্বো হি পুরুষো ভোজ সাধ্বেতদিতি নিশ্চিতঃ
কর্তুমারভতে প্রীতো মরণাদিষু কর্মসু
3.16
সর্বে হি যুক্তিং বিজ্ঞায় প্রজ্ঞাং চাপি স্বকাং নরাঃ
চেষ্টন্তে বিবিধাশ্চেষ্টা হিতমিত্যেব জানতে
3.17
উপজাতা ব্যসনজা যেয়মদ্য মতির্মম
যুবয়োস্তাং প্রবক্ষ্যামি মম শোকবিনাশিনীম্
3.18
প্রজাপতিঃ প্রজাঃ সৃষ্ট্বা কর্ম তাসু বিধায় চ
বর্ণে বর্ণে সমাধত্ত একৈকং গুণবত্তরম্
3.19
ব্রাহ্মণে দমমব্যগ্রং ক্ষত্রিয়ে তেজ উত্তমম্
দাক্ষ্যং বৈশ্যে চ শূদ্রে চ সর্ববর্ণানুকূলতাম্
3.20
অদান্তো ব্রাহ্মণোঽসাধুর্নিস্তেজাঃ ক্ষত্রিয়োঽধমঃ
অদক্ষো নিন্দ্যতে বৈশ্যঃ শূদ্রশ্চ প্রতিকূলবান্
3.21
সোঽস্মি জাতঃ কুলে শ্রেষ্ঠে ব্রাহ্মণানাং সুপূজিতে
মন্দভাগ্যতয়াস্ম্যেতং ক্ষত্রধর্মমনু ষ্ঠিতঃ
3.22
ক্ষত্রধর্মং বিদিত্বাহং যদি ব্রাহ্মণ্যসংশ্রিতম্
প্রকুর্যাং সুমহত্কর্ম ন মে তত্সাধু সংমতম্
3.23
ধারয়িত্বা ধনুর্দিব্যং দিব্যান্যস্ত্রাণি চাহবে
পিতরং নিহতং দৃষ্ট্বা কিং নু বক্ষ্যামি সংসদি
3.24
সোঽহমদ্য যথাকামং ক্ষত্রধর্মমুপাস্য তম্
গন্তাস্মি পদবীং রাজ্ঞঃ পিতুশ্চাপি মহাদ্যুতেঃ
3.25
অদ্য স্বপ্স্যন্তি পাঞ্চালা বিশ্বস্তা জিতকাশিনঃ
বিমুক্তয়ুগ্যকবচা হর্ষেণ চ সমন্বিতাঃ
বয়ং জিতা মতাশ্চৈষাং শ্রান্তা ব্যায়মনেন চ
3.26
তেষাং নিশি প্রসুপ্তানাং স্বস্থানাং শিবিরে স্বকে
অবস্কন্দং করিষ্যামি শিবিরস্যাদ্য দুষ্করম্
3.27
তানবস্কন্দ্য শিবিরে প্রেতভূতান্বিচেতসঃ
সূদয়িষ্যামি বিক্রম্য মঘবানিব দানবান্
3.28
অদ্য তান্সহিতান্সর্বান্ধৃষ্টদ্যুম্নপুরোগমান্
সূদয়িষ্যামি বিক্রম্য কক্ষং দীপ্ত ইবানলঃ
নিহত্য চৈব পাঞ্চালাঞ্শান্তিং লব্ধাস্মি সত্তম
3.29
পাঞ্চালেষু চরিষ্যামি সূদয়ন্নদ্য সংয়ুগে
পিনাকপাণিঃ সংক্রুদ্ধঃ স্বয়ং রুদ্রঃ পশুষ্বিব
3.30
অদ্যাহং সর্বপাঞ্চালান্নিহত্য চ নিকৃত্য চ
অর্দয়িষ্যামি সংক্রুদ্ধো রণে পাণ্ডুসুতাংস্তথা
3.31
অদ্যাহং সর্বপাঞ্চালৈঃ কৃত্বা ভূমিং শরীরিণীম্
প্রহৃত্যৈকৈকশস্তেভ্যো ভবিষ্যাম্যনৃণঃ পিতুঃ
3.32
দুর্যোধনস্য কর্ণস্য ভীষ্মসৈন্ধবয়োরপি
গময়িষ্যামি পাঞ্চালান্পদবীমদ্য দুর্গমাম্
3.33
অদ্য পাঞ্চালরাজস্য ধৃষ্টদ্যুম্নস্য বৈ নিশি
বিরাত্রে প্রমথিষ্যামি পশোরিব শিরো বলাৎ
3.34
অদ্য পাঞ্চালপাণ্ডূনাং শয়িতানাত্মজান্নিশি
খড্গেন নিশিতেনাজৌ প্রমথিষ্যামি গৌতম
3.35
অদ্য পাঞ্চালসেনাং তাং নিহত্য নিশি সৌপ্তিকে
কৃতকৃত্যঃ সুখী চৈব ভবিষ্যামি মহামতে