Utshovঅধ্যায় 2
2.1
কৃপ উবাচ
শ্রুতং তে বচনং সর্বং হেতুয়ুক্তং ময়া বিভো
মমাপি তু বচঃ কিংচিচ্ছৃণুষ্বাদ্য মহাভুজ
2.2
আবদ্ধা মানুষাঃ সর্বে নির্বন্ধাঃ কর্মণোর্দ্বয়োঃ
দৈবে পুরুষকারে চ পরং তাভ্যাং ন বিদ্যতে
2.3
ন হি দৈবেন সিধ্যন্তি কর্মাণ্যেকেন সত্তম
ন চাপি কর্মণৈকেন দ্বাভ্যাং সিদ্ধিস্তু যোগতঃ
2.4
তাভ্যামুভাভ্যাং সর্বার্থা নিবদ্ধা হ্যধমোত্তমাঃ
প্রবৃত্তাশ্চৈব দৃশ্যন্তে নিবৃত্তাশ্চৈব সর্বশঃ
2.5
পর্জন্যঃ পর্বতে বর্ষন্কিং নু সাধয়তে ফলম্
কৃষ্টে ক্ষেত্রে তথাবর্ষন্কিং নু সাধয়তে ফলম্
2.6
উত্থানং চাপ্যদৈবস্য হ্যনুত্থানস্য দৈবতম্
ব্যর্থং ভবতি সর্বত্র পূর্বং কস্তত্র নিশ্চয়ঃ
2.7
প্রবৃষ্টে চ যথা দেবে সম্যক্ক্ষেত্রে চ কর্ষিতে
বীজং মহাগুণং ভূয়াত্তথা সিদ্ধির্হি মানুষী
2.8
তয়োর্দৈবং বিনিশ্চিত্য স্ববশেনৈব বর্ততে
প্রাজ্ঞাঃ পুরুষকারং তু ঘটন্তে দাক্ষ্যমাস্থিতাঃ
2.9
তাভ্যাং সর্বে হি কার্যার্থা মনুষ্যাণাং নরর্ষভ
বিচেষ্টন্তশ্চ দৃশ্যন্তে নিবৃত্তাশ্চ তথৈব হি
2.10
কৃতঃ পুরুষকারঃ সন্সোঽপি দৈবেন সিধ্যতি
তথাস্য কর্মণঃ কর্তুরভিনির্বর্ততে ফলম্
2.11
উত্থানং তু মনুষ্যাণাং দক্ষাণাং দৈববর্জিতম্
অফলং দৃশ্যতে লোকে সম্যগপ্যুপপাদিতম্
2.12
তত্রালসা মনুষ্যাণাং যে ভবন্ত্যমনস্বিনঃ
উত্থানং তে বিগর্হন্তি প্রাজ্ঞানাং তন্ন রোচতে
2.13
প্রায়শো হি কৃতং কর্ম অফলং দৃশ্যতে ভুবি
অকৃত্বা চ পুনর্দুঃখং কর্ম দৃশ্যেন্মহাফলম্
2.14
চেষ্টামকুর্বঁল্লভতে যদি কিংচিদ্যদৃচ্ছয়া
যো বা ন লভতে কৃত্বা দুর্দশৌ তাবুভাবপি
2.15
শক্নোতি জীবিতুং দক্ষো নালসঃ সুখমেধতে
দৃশ্যন্তে জীবলোকেঽস্মিন্দক্ষাঃ প্রায়ো হিতৈষিণঃ
2.16
যদি দক্ষঃ সমারম্ভাত্কর্মণাং নাশ্নুতে ফলম্
নাস্য বাচ্যং ভবেত্কিংচিত্তত্ত্বং চাপ্যধিগচ্ছতি
2.17
অকৃত্বা কর্ম যো লোকে ফলং বিন্দতি বিষ্টিতঃ
স তু বক্তব্যতাং যাতি দ্বেষ্যো ভবতি প্রায়শঃ
2.18
এবমেতদনাদৃত্য বর্ততে যস্ত্বতোঽন্যথা
স করোত্যাত্মনোঽনর্থান্নৈষ বুদ্ধিমতাং নয়ঃ
2.19
হীনং পুরুষকারেণ যদা দৈবেন বা পুনঃ
কারণাভ্যামথৈতাভ্যামুত্থানমফলং ভবেৎ
হীনং পুরুষকারেণ কর্ম ত্বিহ ন সিধ্যতি
2.20
দৈবতেভ্যো নমস্কৃত্য যস্ত্বর্থান্সম্যগীহতে
দক্ষো দাক্ষিণ্যসংপন্নো ন স মোঘং বিহন্যতে
2.21
সম্যগীহা পুনরিয়ং যো বৃদ্ধানুপসেবতে
আপৃচ্ছতি চ যচ্ছ্রেয়ঃ করোতি চ হিতং বচঃ
2.22
উত্থায়োত্থায় হি সদা প্রষ্টব্যা বৃদ্ধসংমতাঃ
তেঽস্য যোগে পরং মূলং তন্মূলা সিদ্ধিরুচ্যতে
2.23
বৃদ্ধানাং বচনং শ্রুত্বা যো হ্যুত্থানং প্রয়োজয়েৎ
উত্থানস্য ফলং সম্যক্তদা স লভতেঽচিরাৎ
2.24
রাগাত্ক্রোধাদ্ভয়াল্লোভাদ্যোঽর্থানীহেত মানবঃ
অনীশশ্চাবমানী চ স শীঘ্রং ভ্রশ্যতে শ্রিয়ঃ
2.25
সোঽয়ং দুর্যোধনেনার্থো লুব্ধেনাদীর্ঘদর্শিনা
অসমর্থ্য সমারব্ধো মূঢত্বাদবিচিন্তিতঃ
2.26
হিতবুদ্ধীননাদৃত্য সংমন্ত্র্যাসাধুভিঃ সহ
বার্যমাণোঽকরোদ্বৈরং পাণ্ডবৈর্গুণবত্তরৈঃ
2.27
পূর্বমপ্যতিদুঃশীলো ন দৈন্যং কর্তুমর্হতি
তপত্যর্থে বিপন্নে হি মিত্রাণামকৃতং বচঃ
2.28
অন্বাবর্তামহি বয়ং যত্তু তং পাপপূরুষম্
অস্মানপ্যনয়স্তস্মাত্প্রাপ্তোঽয়ং দারুণো মহান্
2.29
অনেন তু মমাদ্যাপি ব্যসনেনোপতাপিতা
বুদ্ধিশ্চিন্তয়তঃ কিংচিত্স্বং শ্রেয়ো নাববুধ্যতে
2.30
মুহ্যতা তু মনুষ্যেণ প্রষ্টব্যাঃ সুহৃদো বুধাঃ
তে চ পৃষ্টা যথা ব্রূয়ুস্তত্কর্তব্যং তথা ভবেৎ
2.31
তে বয়ং ধৃতরাষ্ট্রং চ গান্ধারীং চ সমেত্য হ
উপপৃচ্ছামহে গত্বা বিদুরং চ মহামতিম্
2.32
তে পৃষ্টাশ্চ বদেয়ুর্যচ্ছ্রেয়ো নঃ সমনন্তরম্
তদস্মাভিঃ পুনঃ কার্যমিতি মে নৈষ্ঠিকী মতিঃ
2.33
অনারম্ভাত্তু কার্যাণাং নার্থঃ সংপদ্যতে ক্বচিৎ
কৃতে পুরুষকারে চ যেষাং কার্যং ন সিধ্যতি
দৈবেনোপহতাস্তে তু নাত্র কার্যা বিচারণা