Utshovঅধ্যায় 1
1.1
সংজয় উবাচ
ততস্তে সহিতা বীরাঃ প্রয়াতা দক্ষিণামুখাঃ
উপাস্তময়বেলায়াং শিবিরাভ্যাশমাগতাঃ
1.2
বিমুচ্য বাহাংস্ত্বরিতা ভীতাঃ সমভবংস্তদা
গহনং দেশমাসাদ্য প্রচ্ছন্না ন্যবিশন্ত তে
1.3
সেনানিবেশমভিতো নাতিদূরমবস্থিতাঃ
নিকৃত্তা নিশিতৈঃ শস্ত্রৈঃ সমন্তাত্ক্ষতবিক্ষতাঃ
1.4
দীর্ঘমুষ্ণং চ নিঃশ্বস্য পাণ্ডবানন্বচিন্তয়ন্
শ্রুত্বা চ নিনদং ঘোরং পাণ্ডবানাং জয়ৈষিণাম্
1.5
অনুসারভয়াদ্ভীতাঃ প্রাঙ্মুখাঃ প্রাদ্রবন্পুনঃ
তে মুহূর্তং ততো গত্বা শ্রান্তবাহাঃ পিপাসিতাঃ
1.6
নামৃষ্যন্ত মহেষ্বাসাঃ ক্রোধামর্ষবশং গতাঃ
রাজ্ঞো বধেন সংতপ্তা মুহূর্তং সমবস্থিতাঃ
1.7
ধৃতরাষ্ট্র উবাচ
অশ্রদ্ধেয়মিদং কর্ম কৃতং ভীমেন সংজয়
যত্স নাগায়ুতপ্রাণঃ পুত্রো মম নিপাতিতঃ
1.8
অবধ্যঃ সর্বভূতানাং বজ্রসংহননো যুবা
পাণ্ডবৈঃ সমরে পুত্রো নিহতো মম সংজয়
1.9
ন দিষ্টমভ্যতিক্রান্তুং শক্যং গাবল্গণে নরৈঃ
যত্সমেত্য রণে পার্থৈঃ পুত্রো মম নিপাতিতঃ
1.10
অদ্রিসারময়ং নূনং হৃদয়ং মম সংজয়
হতং পুত্রশতং শ্রুত্বা যন্ন দীর্ণং সহস্রধা
1.11
কথং হি বৃদ্ধমিথুনং হতপুত্রং ভবিষ্যতি
ন হ্যহং পাণ্ডবেয়স্য বিষয়ে বস্তুমুত্সহে
1.12
কথং রাজ্ঞঃ পিতা ভূত্বা স্বয়ং রাজা চ সংজয়
প্রেষ্যভূতঃ প্রবর্তেয়ং পাণ্ডবেয়স্য শাসনাৎ
1.13
আজ্ঞাপ্য পৃথিবীং সর্বাং স্থিত্বা মূর্ধ্নি চ সংজয়
কথমদ্য ভবিষ্যামি প্রেষ্যভূতো দুরন্তকৃৎ
1.14
কথং ভীমস্য বাক্যানি শ্রোতুং শক্ষ্যামি সংজয়
যেন পুত্রশতং পূর্ণমেকেন নিহতং মম
1.15
কৃতং সত্যং বচস্তস্য বিদুরস্য মহাত্মনঃ
অকুর্বতা বচস্তেন মম পুত্রেণ সংজয়
1.16
অধর্মেণ হতে তাত পুত্রে দুর্যোধনে মম
কৃতবর্মা কৃপো দ্রৌণিঃ কিমকুর্বত সংজয়
1.17
সংজয় উবাচ
গত্বা তু তাবকা রাজন্নাতিদূরমবস্থিতাঃ
অপশ্যন্ত বনং ঘোরং নানাদ্রুমলতাকুলম্
1.18
তে মুহূর্তং তু বিশ্রম্য লব্ধতোয়ৈর্হয়োত্তমৈঃ
সূর্যাস্তময়বেলায়ামাসেদুঃ সুমহদ্বনম্
1.19
নানামৃগগণৈর্জুষ্টং নানাপক্ষিসমাকুলম্
নানাদ্রুমলতাচ্ছন্নং নানাব্যালনিষেবিতম্
1.20
নানাতোয়সমাকীর্ণং তডাগৈরুপশোভিতম্
পদ্মিনীশতসংছন্নং নীলোত্পলসমায়ুতম্
1.21
প্রবিশ্য তদ্বনং ঘোরং বীক্ষমাণাঃ সমন্ততঃ
শাখাসহস্রসংছন্নং ন্যগ্রোধং দদৃশুস্ততঃ
1.22
উপেত্য তু তদা রাজন্ন্যগ্রোধং তে মহারথাঃ
দদৃশুর্দ্বিপদাং শ্রেষ্ঠাঃ শ্রেষ্ঠং তং বৈ বনস্পতিম্
1.23
তেঽবতীর্য রথেভ্যস্তু বিপ্রমুচ্য চ বাজিনঃ
উপস্পৃশ্য যথান্যায়ং সংধ্যামন্বাসত প্রভো
1.24
ততোঽস্তং পর্বতশ্রেষ্ঠমনুপ্রাপ্তে দিবাকরে
সর্বস্য জগতো ধাত্রী শর্বরী সমপদ্যত
1.25
গ্রহনক্ষত্রতারাভিঃ প্রকীর্ণাভিরলংকৃতম্
নভোংঽশুকমিবাভাতি প্রেক্ষণীয়ং সমন্ততঃ
1.26
ঈষচ্চাপি প্রবল্গন্তি যে সত্ত্বা রাত্রিচারিণঃ
দিবাচরাশ্চ যে সত্ত্বাস্তে নিদ্রাবশমাগতাঃ
1.27
রাত্রিংচরাণাং সত্ত্বানাং নিনাদোঽভূত্সুদারুণঃ
ক্রব্যাদাশ্চ প্রমুদিতা ঘোরা প্রাপ্তা চ শর্বরী
1.28
তস্মিন্রাত্রিমুখে ঘোরে দুঃখশোকসমন্বিতাঃ
কৃতবর্মা কৃপো দ্রৌণিরুপোপবিবিশুঃ সমম্
1.29
তত্রোপবিষ্টাঃ শোচন্তো ন্যগ্রোধস্য সমন্ততঃ
তমেবার্থমতিক্রান্তং কুরুপাণ্ডবয়োঃ ক্ষয়ম্
1.30
নিদ্রয়া চ পরীতাঙ্গা নিষেদুর্ধরণীতলে
শ্রমেণ সুদৃঢং যুক্তা বিক্ষতা বিবিধৈঃ শরৈঃ
1.31
ততো নিদ্রাবশং প্রাপ্তৌ কৃপভোজৌ মহারথৌ
সুখোচিতাবদুঃখার্হৌ নিষণ্ণৌ ধরণীতলে
তৌ তু সুপ্তৌ মহারাজ শ্রমশোকসমন্বিতৌ
1.32
ক্রোধামর্ষবশং প্রাপ্তো দ্রোণপুত্রস্তু ভারত
নৈব স্ম স জগামাথ নিদ্রাং সর্প ইব শ্বসন্
1.33
ন লেভে স তু নিদ্রাং বৈ দহ্যমানোঽতিমন্যুনা
বীক্ষাং চক্রে মহাবাহুস্তদ্বনং ঘোরদর্শনম্
1.34
বীক্ষমাণো বনোদ্দেশং নানাসত্ত্বৈর্নিষেবিতম্
অপশ্যত মহাবাহুর্ন্যগ্রোধং বায়সায়ুতম্
1.35
তত্র কাকসহস্রাণি তাং নিশাং পর্যণাময়ন্
সুখং স্বপন্তঃ কৌরব্য পৃথক্পৃথগপাশ্রয়াঃ
1.36
সুপ্তেষু তেষু কাকেষু বিস্রব্ধেষু সমন্ততঃ
সোঽপশ্যত্সহসায়ান্তমুলূকং ঘোরদর্শনম্
1.37
মহাস্বনং মহাকায়ং হর্যক্ষং বভ্রুপিঙ্গলম্
সুদীর্ঘঘোণানখরং সুপর্ণমিব বেগিনম্
1.38
সোঽথ শব্দং মৃদুং কৃত্বা লীয়মান ইবাণ্ডজঃ
ন্যগ্রোধস্য ততঃ শাখাং প্রার্থয়ামাস ভারত
1.39
সংনিপত্য তু শাখায়াং ন্যগ্রোধস্য বিহংগমঃ
সুপ্তাঞ্জঘান সুবহূন্বায়সান্বায়সান্তকঃ
1.40
কেষাংচিদচ্ছিনত্পক্ষাঞ্শিরাংসি চ চকর্ত হ
চরণাংশ্চৈব কেষাংচিদ্বভঞ্জ চরণায়ুধঃ
1.41
ক্ষণেনাহন্স বলবান্যেঽস্য দৃষ্টিপথে স্থিতাঃ
তেষাং শরীরাবয়বৈঃ শরীরৈশ্চ বিশাং পতে
ন্যগ্রোধমণ্ডলং সর্বং সংছন্নং সর্বতোঽভবৎ
1.42
তাংস্তু হত্বা ততঃ কাকান্কৌশিকো মুদিতোঽভবৎ
প্রতিকৃত্য যথাকামং শত্রূণাং শত্রুসূদনঃ
1.43
তদ্দৃষ্ট্বা সোপধং কর্ম কৌশিকেন কৃতং নিশি
তদ্ভাবকৃতসংকল্পো দ্রৌণিরেকো ব্যচিন্তয়ৎ
1.44
উপদেশঃ কৃতোঽনেন পক্ষিণা মম সংয়ুগে
শত্রূণাং ক্ষপণে যুক্তঃ প্রাপ্তকালশ্চ মে মতঃ
1.45
নাদ্য শক্যা ময়া হন্তুং পাণ্ডবা জিতকাশিনঃ
বলবন্তঃ কৃতোত্সাহা লব্ধলক্ষাঃ প্রহারিণঃ
রাজ্ঞঃ সকাশে তেষাং চ প্রতিজ্ঞাতো বধো ময়া
1.46
পতংগাগ্নিসমাং বৃত্তিমাস্থায়াত্মবিনাশিনীম্
ন্যায়তো যুধ্যমানস্য প্রাণত্যাগো ন সংশয়ঃ
ছদ্মনা তু ভবেত্সিদ্ধিঃ শত্রূণাং চ ক্ষয়ো মহান্
1.47
তত্র সংশয়িতাদর্থাদ্যোঽর্থো নিঃসংশয়ো ভবেৎ
তং জনা বহু মন্যন্তে যেঽর্থশাস্ত্রবিশারদাঃ
1.48
যচ্চাপ্যত্র ভবেদ্বাচ্যং গর্হিতং লোকনিন্দিতম্
কর্তব্যং তন্মনুষ্যেণ ক্ষত্রধর্মেণ বর্ততা
1.49
নিন্দিতানি চ সর্বাণি কুত্সিতানি পদে পদে
সোপধানি কৃতান্যেব পাণ্ডবৈরকৃতাত্মভিঃ
1.50
অস্মিন্নর্থে পুরা গীতৌ শ্রূয়েতে ধর্মচিন্তকৈঃ
শ্লোকৌ ন্যায়মবেক্ষদ্ভিস্তত্ত্বার্থং তত্ত্বদর্শিভিঃ
1.51
পরিশ্রান্তে বিদীর্ণে চ ভুঞ্জানে চাপি শত্রুভিঃ
প্রস্থানে চ প্রবেশে চ প্রহর্তব্যং রিপোর্বলম্
1.52
নিদ্রার্তমর্ধরাত্রে চ তথা নষ্টপ্রণায়কম্
ভিন্নয়োধং বলং যচ্চ দ্বিধা যুক্তং চ যদ্ভবেৎ
1.53
ইত্যেবং নিশ্চয়ং চক্রে সুপ্তানাং যুধি মারণে
পাণ্ডূনাং সহ পাঞ্চালৈর্দ্রোণপুত্রঃ প্রতাপবান্
1.54
স ক্রূরাং মতিমাস্থায় বিনিশ্চিত্য মুহুর্মুহুঃ
সুপ্তৌ প্রাবোধয়ত্তৌ তু মাতুলং ভোজমেব চ
1.55
নোত্তরং প্রতিপেদে চ তত্র যুক্তং হ্রিয়া বৃতঃ
স মুহূর্তমিব ধ্যাত্বা বাষ্পবিহ্বলমব্রবীৎ
1.56
হতো দুর্যোধনো রাজা একবীরো মহাবলঃ
যস্যার্থে বৈরমস্মাভিরাসক্তং পাণ্ডবৈঃ সহ
1.57
একাকী বহুভিঃ ক্ষুদ্রৈরাহবে শুদ্ধবিক্রমঃ
পাতিতো ভীমসেনেন একাদশচমূপতিঃ
1.58
বৃকোদরেণ ক্ষুদ্রেণ সুনৃশংসমিদং কৃতম্
মূর্ধাভিষিক্তস্য শিরঃ পাদেন পরিমৃদ্নতা
1.59
বিনর্দন্তি স্ম পাঞ্চালাঃ ক্ষ্বেডন্তি চ হসন্তি চ
ধমন্তি শঙ্খাঞ্শতশো হৃষ্টা ঘ্নন্তি চ দুন্দুভীন্
1.60
বাদিত্রঘোষস্তুমুলো বিমিশ্রঃ শঙ্খনিস্বনৈঃ
অনিলেনেরিতো ঘোরো দিশঃ পূরয়তীব হি
1.61
অশ্বানাং হেষমাণানাং গজানাং চৈব বৃংহতাম্
সিংহনাদশ্চ শূরাণাং শ্রূয়তে সুমহানয়ম্
1.62
দিশং প্রাচীং সমাশ্রিত্য হৃষ্টানাং গর্জতাং ভৃশম্
রথনেমিস্বনাশ্চৈব শ্রূয়ন্তে লোমহর্ষণাঃ
1.63
পাণ্ডবৈর্ধার্তরাষ্ট্রাণাং যদিদং কদনং কৃতম্
বয়মেব ত্রয়ঃ শিষ্টাস্তস্মিন্মহতি বৈশসে
1.64
কেচিন্নাগশতপ্রাণাঃ কেচিত্সর্বাস্ত্রকোবিদাঃ
নিহতাঃ পাণ্ডবেয়ৈঃ স্ম মন্যে কালস্য পর্যয়ম্
1.65
এবমেতেন ভাব্যং হি নূনং কার্যেণ তত্ত্বতঃ
যথা হ্যস্যেদৃশী নিষ্ঠা কৃতে কার্যেঽপি দুষ্করে
1.66
ভবতোস্তু যদি প্রজ্ঞা ন মোহাদপচীয়তে
ব্যাপন্নেঽস্মিন্মহত্যর্থে যন্নঃ শ্রেয়স্তদুচ্যতাম্