Utshovঅধ্যায় 9
9.1
সংজয় উবাচ
তে হত্বা সর্বপাঞ্চালান্দ্রৌপদেয়াংশ্চ সর্বশঃ
অগচ্ছন্সহিতাস্তত্র যত্র দুর্যোধনো হতঃ
9.2
গত্বা চৈনমপশ্যংস্তে কিংচিত্প্রাণং নরাধিপম্
ততো রথেভ্যঃ প্রস্কন্দ্য পরিবব্রুস্তবাত্মজম্
9.3
তং ভগ্নসক্থং রাজেন্দ্র কৃচ্ছ্রপ্রাণমচেতসম্
বমন্তং রুধিরং বক্ত্রাদপশ্যন্বসুধাতলে
9.4
বৃতং সমন্তাদ্বহুভিঃ শ্বাপদৈর্ঘোরদর্শনৈঃ
শালাবৃকগণৈশ্চৈব ভক্ষয়িষ্যদ্ভিরন্তিকাৎ
9.5
নিবারয়ন্তং কৃচ্ছ্রাত্তাঞ্শ্বাপদান্সংচিখাদিষূন্
বিবেষ্টমানং মহ্যাং চ সুভৃশং গাঢবেদনম্
9.6
তং শয়ানং মহাত্মানং ভূমৌ স্বরুধিরোক্ষিতম্
হতশিষ্টাস্ত্রয়ো বীরাঃ শোকার্তাঃ পর্যবারয়ন্
অশ্বত্থামা কৃপশ্চৈব কৃতবর্মা চ সাত্বতঃ
9.7
তৈস্ত্রিভিঃ শোণিতাদিগ্ধৈর্নিঃশ্বসদ্ভির্মহারথৈঃ
শুশুভে সংবৃতো রাজা বেদী ত্রিভিরিবাগ্নিভিঃ
9.8
তে তং শয়ানং সংপ্রেক্ষ্য রাজানমতথোচিতম্
অবিষহ্যেন দুঃখেন ততস্তে রুরুদুস্ত্রয়ঃ
9.9
ততস্তে রুধিরং হস্তৈর্মুখান্নির্মৃজ্য তস্য হ
রণে রাজ্ঞঃ শয়ানস্য কৃপণং পর্যদেবয়ন্
9.10
কৃপ উবাচ
ন দৈবস্যাতিভারোঽস্তি যদয়ং রুধিরোক্ষিতঃ
একাদশচমূভর্তা শেতে দুর্যোধনো হতঃ
9.11
পশ্য চামীকরাভস্য চামীকরবিভূষিতাম্
গদাং গদাপ্রিয়স্যেমাং সমীপে পতিতাং ভুবি
9.12
ইয়মেনং গদা শূরং ন জহাতি রণে রণে
স্বর্গায়াপি ব্রজন্তং হি ন জহাতি যশস্বিনম্
9.13
পশ্যেমাং সহ বীরেণ জাম্বূনদবিভূষিতাম্
শয়ানাং শয়নে ধর্মে ভার্যাং প্রীতিমতীমিব
9.14
যো বৈ মূর্ধাবসিক্তানামগ্রে যাতঃ পরংতপঃ
স হতো গ্রসতে পাংসূন্পশ্য কালস্য পর্যয়ম্
9.15
যেনাজৌ নিহতা ভূমাবশেরত পুরা দ্বিষঃ
স ভূমৌ নিহতঃ শেতে কুরুরাজঃ পরৈরয়ম্
9.16
ভয়ান্নমন্তি রাজানো যস্য স্ম শতসংঘশঃ
স বীরশয়নে শেতে ক্রব্যাদ্ভিঃ পরিবারিতঃ
9.17
উপাসত নৃপাঃ পূর্বমর্থহেতোর্যমীশ্বরম্
ধিক্সদ্যো নিহতঃ শেতে পশ্য কালস্য পর্যয়ম্
9.18
সংজয় উবাচ
তং শয়ানং নৃপশ্রেষ্ঠং ততো ভরতসত্তম
অশ্বত্থামা সমালোক্য করুণং পর্যদেবয়ৎ
9.19
আহুস্ত্বাং রাজশার্দূল মুখ্যং সর্বধনুষ্মতাম্
ধনাধ্যক্ষোপমং যুদ্ধে শিষ্যং সংকর্ষণস্য হ
9.20
কথং বিবরমদ্রাক্ষীদ্ভীমসেনস্তবানঘ
বলিনঃ কৃতিনো নিত্যং স চ পাপাত্মবান্নৃপ
9.21
কালো নূনং মহারাজ লোকেঽস্মিন্বলবত্তরঃ
পশ্যামো নিহতং ত্বাং চেদ্ভীমসেনেন সংয়ুগে
9.22
কথং ত্বাং সর্বধর্মজ্ঞং ক্ষুদ্রঃ পাপো বৃকোদরঃ
নিকৃত্যা হতবান্মন্দো নূনং কালো দুরত্যয়ঃ
9.23
ধর্ময়ুদ্ধে হ্যধর্মেণ সমাহূয়ৌজসা মৃধে
গদয়া ভীমসেনেন নির্ভিন্নে সক্থিনী তব
9.24
অধর্মেণ হতস্যাজৌ মৃদ্যমানং পদা শিরঃ
যদুপেক্ষিতবান্ক্ষুদ্রো ধিক্তমস্তু যুধিষ্ঠিরম্
9.25
যুদ্ধেষ্বপবদিষ্যন্তি যোধা নূনং বৃকোদরম্
যাবত্স্থাস্যন্তি ভূতানি নিকৃত্যা হ্যসি পাতিতঃ
9.26
ননু রামোঽব্রবীদ্রাজংস্ত্বাং সদা যদুনন্দনঃ
দুর্যোধনসমো নাস্তি গদয়া ইতি বীর্যবান্
9.27
শ্লাঘতে ত্বাং হি বার্ষ্ণেয়ো রাজন্সংসত্সু ভারত
সুশিষ্যো মম কৌরব্যো গদায়ুদ্ধ ইতি প্রভো
9.28
যাং গতিং ক্ষত্রিয়স্যাহুঃ প্রশস্তাং পরমর্ষয়ঃ
হতস্যাভিমুখস্যাজৌ প্রাপ্তস্ত্বমসি তাং গতিম্
9.29
দুর্যোধন ন শোচামি ত্বামহং পুরুষর্ষভ
হতপুত্রাং তু শোচামি গান্ধারীং পিতরং চ তে
ভিক্ষুকৌ বিচরিষ্যেতে শোচন্তৌ পৃথিবীমিমাম্
9.30
ধিগস্তু কৃষ্ণং বার্ষ্ণেয়মর্জুনং চাপি দুর্মতিম্
ধর্মজ্ঞমানিনৌ যৌ ত্বাং বধ্যমানমুপেক্ষতাম্
9.31
পাণ্ডবাশ্চাপি তে সর্বে কিং বক্ষ্যন্তি নরাধিপান্
কথং দুর্যোধনোঽস্মাভির্হত ইত্যনপত্রপাঃ
9.32
ধন্যস্ত্বমসি গান্ধারে যস্ত্বমায়োধনে হতঃ
প্রয়াতোঽভিমুখঃ শত্রূন্ধর্মেণ পুরুষর্ষভ
9.33
হতপুত্রা হি গান্ধারী নিহতজ্ঞাতিবান্ধবা
প্রজ্ঞাচক্ষুশ্চ দুর্ধর্ষঃ কাং গতিং প্রতিপত্স্যতে
9.34
ধিগস্তু কৃতবর্মাণং মাং কৃপং চ মহারথম্
যে বয়ং ন গতাঃ স্বর্গং ত্বাং পুরস্কৃত্য পার্থিবম্
9.35
দাতারং সর্বকামানাং রক্ষিতারং প্রজাহিতম্
যদ্বয়ং নানুগচ্ছামস্ত্বাং ধিগস্মান্নরাধমান্
9.36
কৃপস্য তব বীর্যেণ মম চৈব পিতুশ্চ মে
সভৃত্যানাং নরব্যাঘ্র রত্নবন্তি গৃহাণি চ
9.37
ভবত্প্রসাদাদস্মাভিঃ সমিত্রৈঃ সহবান্ধবৈঃ
অবাপ্তাঃ ক্রতবো মুখ্যা বহবো ভূরিদক্ষিণাঃ
9.38
কুতশ্চাপীদৃশং সার্থমুপলপ্স্যামহে বয়ম্
যাদৃশেন পুরস্কৃত্য ত্বং গতঃ সর্বপার্থিবান্
9.39
বয়মেব ত্রয়ো রাজন্গচ্ছন্তং পরমাং গতিম্
যদ্বৈ ত্বাং নানুগচ্ছামস্তেন তপ্স্যামহে বয়ম্
9.40
ত্বত্স্বর্গহীনা হীনার্থাঃ স্মরন্তঃ সুকৃতস্য তে
কিং নাম তদ্ভবেত্কর্ম যেন ত্বানুব্রজেম বৈ
9.41
দুঃখং নূনং কুরুশ্রেষ্ঠ চরিষ্যামো মহীমিমাম্
হীনানাং নস্ত্বয়া রাজন্কুতঃ শান্তিঃ কুতঃ সুখম্
9.42
গত্বৈতাংস্তু মহারাজ সমেত্য ত্বং মহারথান্
যথাশ্রেষ্ঠং যথাজ্যেষ্ঠং পূজয়ের্বচনান্মম
9.43
আচার্যং পূজয়িত্বা চ কেতুং সর্বধনুষ্মতাম্
হতং ময়াদ্য শংসেথা ধৃষ্টদ্যুম্নং নরাধিপ
9.44
পরিষ্বজেথা রাজানং বাহ্লিকং সুমহারথম্
সৈন্ধবং সোমদত্তং চ ভূরিশ্রবসমেব চ
9.45
তথা পূর্বগতানন্যান্স্বর্গং পার্থিবসত্তমান্
অস্মদ্বাক্যাত্পরিষ্বজ্য পৃচ্ছেথাস্ত্বমনাময়ম্
9.46
ইত্যেবমুক্ত্বা রাজানং ভগ্নসক্থমচেতসম্
অশ্বত্থামা সমুদ্বীক্ষ্য পুনর্বচনমব্রবীৎ
9.47
দুর্যোধন জীবসি চেদ্বাচং শ্রোত্রসুখাং শৃণু
সপ্ত পাণ্ডবতঃ শেষা ধার্তরাষ্ট্রাস্ত্রয়ো বয়ম্
9.48
তে চৈব ভ্রাতরঃ পঞ্চ বাসুদেবোঽথ সাত্যকিঃ
অহং চ কৃতবর্মা চ কৃপঃ শারদ্বতস্তথা
9.49
দ্রৌপদেয়া হতাঃ সর্বে ধৃষ্টদ্যুম্নস্য চাত্মজাঃ
পাঞ্চালা নিহতাঃ সর্বে মত্স্যশেষং চ ভারত
9.50
কৃতে প্রতিকৃতং পশ্য হতপুত্রা হি পাণ্ডবাঃ
সৌপ্তিকে শিবিরং তেষাং হতং সনরবাহনম্
9.51
ময়া চ পাপকর্মাসৌ ধৃষ্টদ্যুম্নো মহীপতে
প্রবিশ্য শিবিরং রাত্রৌ পশুমারেণ মারিতঃ
9.52
দুর্যোধনস্তু তাং বাচং নিশম্য মনসঃ প্রিয়াম্
প্রতিলভ্য পুনশ্চেত ইদং বচনমব্রবীৎ
9.53
ন মেঽকরোত্তদ্গাঙ্গেয়ো ন কর্ণো ন চ তে পিতা
যত্ত্বয়া কৃপভোজাভ্যাং সহিতেনাদ্য মে কৃতম্
9.54
স চেত্সেনাপতিঃ ক্ষুদ্রো হতঃ সার্ধং শিখণ্ডিনা
তেন মন্যে মঘবতা সমমাত্মানমদ্য বৈ
9.55
স্বস্তি প্রাপ্নুত ভদ্রং বঃ স্বর্গে নঃ সংগমঃ পুনঃ
ইত্যেবমুক্ত্বা তূষ্ণীং স কুরুরাজো মহামনাঃ
প্রাণানুদসৃজদ্বীরঃ সুহৃদাং শোকমাদধৎ
9.56
তথেতি তে পরিষ্বক্তাঃ পরিষ্বজ্য চ তং নৃপম্
পুনঃ পুনঃ প্রেক্ষমাণাঃ স্বকানারুরুহূ রথান্
9.57
ইত্যেবং তব পুত্রস্য নিশম্য করুণাং গিরম্
প্রত্যূষকালে শোকার্তঃ প্রাধাবং নগরং প্রতি
9.58
তব পুত্রে গতে স্বর্গং শোকার্তস্য মমানঘ
ঋষিদত্তং প্রনষ্টং তদ্দিব্যদর্শিত্বমদ্য বৈ
9.59
বৈশংপায়ন উবাচ
ইতি শ্রুত্বা স নৃপতিঃ পুত্রজ্ঞাতিবধং তদা
নিঃশ্বস্য দীর্ঘমুষ্ণং চ ততশ্চিন্তাপরোঽভবৎ