Utshovঅধ্যায় 16
16.1
বৈশংপায়ন উবাচ
তদাজ্ঞায় হৃষীকেশো বিসৃষ্টং পাপকর্মণা
হৃষ্যমাণ ইদং বাক্যং দ্রৌণিং প্রত্যব্রবীত্তদা
16.2
বিরাটস্য সুতাং পূর্বং স্নুষাং গাণ্ডীবধন্বনঃ
উপপ্লব্যগতাং দৃষ্ট্বা ব্রতবান্ব্রাহ্মণোঽব্রবীৎ
16.3
পরিক্ষীণেষু কুরুষু পুত্রস্তব জনিষ্যতি
এতদস্য পরিক্ষিত্ত্বং গর্ভস্থস্য ভবিষ্যতি
16.4
তস্য তদ্বচনং সাধোঃ সত্যমেব ভবিষ্যতি
পরিক্ষিদ্ভবিতা হ্যেষাং পুনর্বংশকরঃ সুতঃ
16.5
এবং ব্রুবাণং গোবিন্দং সাত্বতপ্রবরং তদা
দ্রৌণিঃ পরমসংরব্ধঃ প্রত্যুবাচেদমুত্তরম্
16.6
নৈতদেবং যথাত্থ ত্বং পক্ষপাতেন কেশব
বচনং পুণ্ডরীকাক্ষ ন চ মদ্বাক্যমন্যথা
16.7
পতিষ্যত্যেতদস্ত্রং হি গর্ভে তস্যা ময়োদ্যতম্
বিরাটদুহিতুঃ কৃষ্ণ যাং ত্বং রক্ষিতুমিচ্ছসি
16.8
বাসুদেব উবাচ
অমোঘঃ পরমাস্ত্রস্য পাতস্তস্য ভবিষ্যতি
স তু গর্ভো মৃতো জাতো দীর্ঘমায়ুরবাপ্স্যতি
16.9
ত্বাং তু কাপুরুষং পাপং বিদুঃ সর্বে মনীষিণঃ
অসকৃত্পাপকর্মাণং বালজীবিতঘাতকম্
16.10
তস্মাত্ত্বমস্য পাপস্য কর্মণঃ ফলমাপ্নুহি
ত্রীণি বর্ষসহস্রাণি চরিষ্যসি মহীমিমাম্
অপ্রাপ্নুবন্ক্বচিত্কাংচিত্সংবিদং জাতু কেনচিৎ
16.11
নির্জনানসহায়স্ত্বং দেশান্প্রবিচরিষ্যসি
ভবিত্রী ন হি তে ক্ষুদ্র জনমধ্যেষু সংস্থিতিঃ
16.12
পূয়শোণিতগন্ধী চ দুর্গকান্তারসংশ্রয়ঃ
বিচরিষ্যসি পাপাত্মন্সর্বব্যাধিসমন্বিতঃ
16.13
বয়ঃ প্রাপ্য পরিক্ষিত্তু বেদব্রতমবাপ্য চ
কৃপাচ্ছারদ্বতাদ্বীরঃ সর্বাস্ত্রাণ্যুপলপ্স্যতে
16.14
বিদিত্বা পরমাস্ত্রাণি ক্ষত্রধর্মব্রতে স্থিতঃ
ষষ্টিং বর্ষাণি ধর্মাত্মা বসুধাং পালয়িষ্যতি
16.15
ইতশ্চোর্ধ্বং মহাবাহুঃ কুরুরাজো ভবিষ্যতি
পরিক্ষিন্নাম নৃপতির্মিষতস্তে সুদুর্মতে
পশ্য মে তপসো বীর্যং সত্যস্য চ নরাধম
16.16
ব্যাস উবাচ
যস্মাদনাদৃত্য কৃতং ত্বয়াস্মান্কর্ম দারুণম্
ব্রাহ্মণস্য সতশ্চৈব যস্মাত্তে বৃত্তমীদৃশম্
16.17
তস্মাদ্যদ্দেবকীপুত্র উক্তবানুত্তমং বচঃ
অসংশয়ং তে তদ্ভাবি ক্ষুদ্রকর্মন্ব্রজাশ্বিতঃ
16.18
অশ্বত্থামোবাচ
সহৈব ভবতা ব্রহ্মন্স্থাস্যামি পুরুষেষ্বহম্
সত্যবাগস্তু ভগবানয়ং চ পুরুষোত্তমঃ
16.19
বৈশংপায়ন উবাচ
প্রদায়াথ মণিং দ্রৌণিঃ পাণ্ডবানাং মহাত্মনাম্
জগাম বিমনাস্তেষাং সর্বেষাং পশ্যতাং বনম্
16.20
পাণ্ডবাশ্চাপি গোবিন্দং পুরস্কৃত্য হতদ্বিষঃ
কৃষ্ণদ্বৈপায়নং চৈব নারদং চ মহামুনিম্
16.21
দ্রোণপুত্রস্য সহজং মণিমাদায় সত্বরাঃ
দ্রৌপদীমভ্যধাবন্ত প্রায়োপেতাং মনস্বিনীম্
16.22
ততস্তে পুরুষব্যাঘ্রাঃ সদশ্বৈরনিলোপমৈঃ
অভ্যয়ুঃ সহদাশার্হাঃ শিবিরং পুনরেব হ
16.23
অবতীর্য রথাভ্যাং তু ত্বরমাণা মহারথাঃ
দদৃশুর্দ্রৌপদীং কৃষ্ণামার্তামার্ততরাঃ স্বয়ম্
16.24
তামুপেত্য নিরানন্দাং দুঃখশোকসমন্বিতাম্
পরিবার্য ব্যতিষ্ঠন্ত পাণ্ডবাঃ সহকেশবাঃ
16.25
ততো রাজ্ঞাভ্যনুজ্ঞাতো ভীমসেনো মহাবলঃ
প্রদদৌ তু মণিং দিব্যং বচনং চেদমব্রবীৎ
16.26
অয়ং ভদ্রে তব মণিঃ পুত্রহন্তা জিতঃ স তে
উত্তিষ্ঠ শোকমুত্সৃজ্য ক্ষত্রধর্মমনুস্মর
16.27
প্রয়াণে বাসুদেবস্য শমার্থমসিতেক্ষণে
যান্যুক্তানি ত্বয়া ভীরু বাক্যানি মধুঘাতিনঃ
16.28
নৈব মে পতয়ঃ সন্তি ন পুত্রা ভ্রাতরো ন চ
নৈব ত্বমপি গোবিন্দ শমমিচ্ছতি রাজনি
16.29
উক্তবত্যসি ধীরাণি বাক্যানি পুরুষোত্তমম্
ক্ষত্রধর্মানুরূপাণি তানি সংস্মর্তুমর্হসি
16.30
হতো দুর্যোধনঃ পাপো রাজ্যস্য পরিপন্থকঃ
দুঃশাসনস্য রুধিরং পীতং বিস্ফুরতো ময়া
16.31
বৈরস্য গতমানৃণ্যং ন স্ম বাচ্যা বিবক্ষতাম্
জিত্বা মুক্তো দ্রোণপুত্রো ব্রাহ্মণ্যাদ্গৌরবেণ চ
16.32
যশোঽস্য পাতিতং দেবি শরীরং ত্ববশেষিতম্
বিয়োজিতশ্চ মণিনা ন্যাসিতশ্চায়ুধং ভুবি
16.33
দ্রৌপদ্যুবাচ
কেবলানৃণ্যমাপ্তাস্মি গুরুপুত্রো গুরুর্মম
শিরস্যেতং মণিং রাজা প্রতিবধ্নাতু ভারত
16.34
বৈশংপায়ন উবাচ
তং গৃহীত্বা ততো রাজা শিরস্যেবাকরোত্তদা
গুরোরুচ্ছিষ্টমিত্যেব দ্রৌপদ্যা বচনাদপি
16.35
ততো দিব্যং মণিবরং শিরসা ধারয়ন্প্রভুঃ
শুশুভে স মহারাজঃ সচন্দ্র ইব পর্বতঃ
16.36
উত্তস্থৌ পুত্রশোকার্তা ততঃ কৃষ্ণা মনস্বিনী
কৃষ্ণং চাপি মহাবাহুং পর্যপৃচ্ছত ধর্মরাট্