Utshovঅধ্যায় 15
15.1
বৈশংপায়ন উবাচ
দৃষ্ট্বৈব নরশার্দূলস্তাবগ্নিসমতেজসৌ
সংজহার শরং দিব্যং ত্বরমাণো ধনংজয়ঃ
15.2
উবাচ বদতাং শ্রেষ্ঠস্তাবৃষী প্রাঞ্জলিস্তদা
প্রয়ুক্তমস্ত্রমস্ত্রেণ শাম্যতামিতি বৈ ময়া
15.3
সংহৃতে পরমাস্ত্রেঽস্মিন্সর্বানস্মানশেষতঃ
পাপকর্মা ধ্রুবং দ্রৌণিঃ প্রধক্ষ্যত্যস্ত্রতেজসা
15.4
অত্র যদ্ধিতমস্মাকং লোকানাং চৈব সর্বথা
ভবন্তৌ দেবসংকাশৌ তথা সংহর্তুমর্হতঃ
15.5
ইত্যুক্ত্বা সংজহারাস্ত্রং পুনরেব ধনংজয়ঃ
সংহারো দুষ্করস্তস্য দেবৈরপি হি সংয়ুগে
15.6
বিসৃষ্টস্য রণে তস্য পরমাস্ত্রস্য সংগ্রহে
ন শক্তঃ পাণ্ডবাদন্যঃ সাক্ষাদপি শতক্রতুঃ
15.7
ব্রহ্মতেজোভবং তদ্ধি বিসৃষ্টমকৃতাত্মনা
ন শক্যমাবর্তয়িতুং ব্রহ্মচারিব্রতাদৃতে
15.8
অচীর্ণব্রহ্মচর্যো যঃ সৃষ্ট্বাবর্তয়তে পুনঃ
তদস্ত্রং সানুবন্ধস্য মূর্ধানং তস্য কৃন্ততি
15.9
ব্রহ্মচারী ব্রতী চাপি দুরবাপমবাপ্য তৎ
পরমব্যসনার্তোঽপি নার্জুনোঽস্ত্রং ব্যমুঞ্চত
15.10
সত্যব্রতধরঃ শূরো ব্রহ্মচারী চ পাণ্ডবঃ
গুরুবর্তী চ তেনাস্ত্রং সংজহারার্জুনঃ পুনঃ
15.11
দ্রৌণিরপ্যথ সংপ্রেক্ষ্য তাবৃষী পুরতঃ স্থিতৌ
ন শশাক পুনর্ঘোরমস্ত্রং সংহর্তুমাহবে
15.12
অশক্তঃ প্রতিসংহারে পরমাস্ত্রস্য সংয়ুগে
দ্রৌণির্দীনমনা রাজন্দ্বৈপায়নমভাষত
15.13
উত্তমব্যসনার্তেন প্রাণত্রাণমভীপ্সুনা
ময়ৈতদস্ত্রমুত্সৃষ্টং ভীমসেনভয়ান্মুনে
15.14
অধর্মশ্চ কৃতোঽনেন ধার্তরাষ্ট্রং জিঘাংসতা
মিথ্যাচারেণ ভগবন্ভীমসেনেন সংয়ুগে
15.15
অতঃ সৃষ্টমিদং ব্রহ্মন্ময়াস্ত্রমকৃতাত্মনা
তস্য ভূয়োঽদ্য সংহারং কর্তুং নাহমিহোত্সহে
15.16
বিসৃষ্টং হি ময়া দিব্যমেতদস্ত্রং দুরাসদম্
অপাণ্ডবায়েতি মুনে বহ্নিতেজোঽনুমন্ত্র্য বৈ
15.17
তদিদং পাণ্ডবেয়ানামন্তকায়াভিসংহিতম্
অদ্য পাণ্ডুসুতান্সর্বাঞ্জীবিতাদ্ভ্রংশয়িষ্যতি
15.18
কৃতং পাপমিদং ব্রহ্মন্রোষাবিষ্টেন চেতসা
বধমাশাস্য পার্থানাং ময়াস্ত্রং সৃজতা রণে
15.19
ব্যাস উবাচ
অস্ত্রং ব্রহ্মশিরস্তাত বিদ্বান্পার্থো ধনংজয়ঃ
উত্সৃষ্টবান্ন রোষেণ ন বধায় তবাহবে
15.20
অস্ত্রমস্ত্রেণ তু রণে তব সংশময়িষ্যতা
বিসৃষ্টমর্জুনেনেদং পুনশ্চ প্রতিসংহৃতম্
15.21
ব্রহ্মাস্ত্রমপ্যবাপ্যৈতদুপদেশাত্পিতুস্তব
ক্ষত্রধর্মান্মহাবাহুর্নাকম্পত ধনংজয়ঃ
15.22
এবং ধৃতিমতঃ সাধোঃ সর্বাস্ত্রবিদুষঃ সতঃ
সভ্রাতৃবন্ধোঃ কস্মাত্ত্বং বধমস্য চিকীর্ষসি
15.23
অস্ত্রং ব্রহ্মশিরো যত্র পরমাস্ত্রেণ বধ্যতে
সমা দ্বাদশ পর্জন্যস্তদ্রাষ্ট্রং নাভিবর্ষতি
15.24
এতদর্থং মহাবাহুঃ শক্তিমানপি পাণ্ডবঃ
ন বিহন্ত্যেতদস্ত্রং তে প্রজাহিতচিকীর্ষয়া
15.25
পাণ্ডবাস্ত্বং চ রাষ্ট্রং চ সদা সংরক্ষ্যমেব নঃ
তস্মাত্সংহর দিব্যং ত্বমস্ত্রমেতন্মহাভুজ
15.26
অরোষস্তব চৈবাস্তু পার্থাঃ সন্তু নিরাময়াঃ
ন হ্যধর্মেণ রাজর্ষিঃ পাণ্ডবো জেতুমিচ্ছতি
15.27
মণিং চৈতং প্রয়চ্ছৈভ্যো যস্তে শিরসি তিষ্ঠতি
এতদাদায় তে প্রাণান্প্রতিদাস্যন্তি পাণ্ডবাঃ
15.28
দ্রৌণিরুবাচ
পাণ্ডবৈর্যানি রত্নানি যচ্চান্যত্কৌরবৈর্ধনম্
অবাপ্তানীহ তেভ্যোঽয়ং মণির্মম বিশিষ্যতে
15.29
যমাবধ্য ভয়ং নাস্তি শস্ত্রব্যাধিক্ষুধাশ্রয়ম্
দেবেভ্যো দানবেভ্যো বা নাগেভ্যো বা কথংচন
15.30
ন চ রক্ষোগণভয়ং ন তস্করভয়ং তথা
এবংবীর্যো মণিরয়ং ন মে ত্যাজ্যঃ কথংচন
15.31
যত্তু মে ভগবানাহ তন্মে কার্যমনন্তরম্
অয়ং মণিরয়ং চাহমিষীকা নিপতিষ্যতি
গর্ভেষু পাণ্ডবেয়ানামমোঘং চৈতদুদ্যতম্
15.32
ব্যাস উবাচ
এবং কুরু ন চান্যা তে বুদ্ধিঃ কার্যা কদাচন
গর্ভেষু পাণ্ডবেয়ানাং বিসৃজ্যৈতদুপারম
15.33
বৈশংপায়ন উবাচ
ততঃ পরমমস্ত্রং তদশ্বত্থামা ভৃশাতুরঃ
দ্বৈপায়নবচঃ শ্রুত্বা গর্ভেষু প্রমুমোচ হ