অধ্যায় 14

14.1

বৈশংপায়ন উবাচ
ইঙ্গিতেনৈব দাশার্হস্তমভিপ্রায়মাদিতঃ
দ্রৌণের্বুদ্ধ্বা মহাবাহুরর্জুনং প্রত্যভাষত

অর্জুনার্জুন যদ্দিব্যমস্ত্রং তে হৃদি বর্ততে
দ্রোণোপদিষ্টং তস্যায়ং কালঃ সংপ্রতি পাণ্ডব

ভ্রাতৄণামাত্মনশ্চৈব পরিত্রাণায় ভারত
বিসৃজৈতত্ত্বমপ্যাজাবস্ত্রমস্ত্রনিবারণম্

কেশবেনৈবমুক্তস্তু পাণ্ডবঃ পরবীরহা
অবাতরদ্রথাত্তূর্ণং প্রগৃহ্য সশরং ধনুঃ

পূর্বমাচার্যপুত্রায় ততোঽনন্তরমাত্মনে
ভ্রাতৃভ্যশ্চৈব সর্বেভ্যঃ স্বস্তীত্যুক্ত্বা পরংতপঃ

দেবতাভ্যো নমস্কৃত্য গুরুভ্যশ্চৈব সর্বশঃ
উত্সসর্জ শিবং ধ্যায়ন্নস্ত্রমস্ত্রেণ শাম্যতাম্

ততস্তদস্ত্রং সহসা সৃষ্টং গাণ্ডীবধন্বনা
প্রজজ্বাল মহার্চিষ্মদ্যুগান্তানলসংনিভম্

তথৈব দ্রোণপুত্রস্য তদস্ত্রং তিগ্মতেজসঃ
প্রজজ্বাল মহাজ্বালং তেজোমণ্ডলসংবৃতম্

নির্ঘাতা বহবশ্চাসন্পেতুরুল্কাঃ সহস্রশঃ
মহদ্ভয়ং চ ভূতানাং সর্বেষাং সমজায়ত

সশব্দমভবদ্ব্যোম জ্বালামালাকুলং ভৃশম্
চচাল চ মহী কৃত্স্না সপর্বতবনদ্রুমা

তে অস্ত্রে তেজসা লোকাংস্তাপয়ন্তী ব্যবস্থিতে
মহর্ষী সহিতৌ তত্র দর্শয়ামাসতুস্তদা

নারদঃ স চ ধর্মাত্মা ভরতানাং পিতামহঃ
উভৌ শময়িতুং বীরৌ ভারদ্বাজধনংজয়ৌ

তৌ মুনী সর্বধর্মজ্ঞৌ সর্বভূতহিতৈষিণৌ
দীপ্তয়োরস্ত্রয়োর্মধ্যে স্থিতৌ পরমতেজসৌ

তদন্তরমনাধৃষ্যাবুপগম্য যশস্বিনৌ
আস্তামৃষিবরৌ তত্র জ্বলিতাবিব পাবকৌ

প্রাণভৃদ্ভিরনাধৃষ্যৌ দেবদানবসংমতৌ
অস্ত্রতেজঃ শময়িতুং লোকানাং হিতকাম্যয়া

ঋষী ঊচতুঃ
নানাশস্ত্রবিদঃ পূর্বে যেঽপ্যতীতা মহারথাঃ
নৈতদস্ত্রং মনুষ্যেষু তৈঃ প্রয়ুক্তং কথংচন