UtshovChapter 14
14.1
वैशंपायन उवाच
इङ्गितेनैव दाशार्हस्तमभिप्रायमादितः
द्रौणेर्बुद्ध्वा महाबाहुरर्जुनं प्रत्यभाषत
Vaishampayana uvacha
Ingitenaiva dasharhastamabhiprayamaditah
Draunerbuddhva mahabahurarjunam pratyabhashata
14.2
अर्जुनार्जुन यद्दिव्यमस्त्रं ते हृदि वर्तते
द्रोणोपदिष्टं तस्यायं कालः संप्रति पाण्डव
Arjunarjuna yaddivyamastram te hridi vartate
Dronopadishtam tasyayam kalah samprati pandava
14.3
भ्रातॄणामात्मनश्चैव परित्राणाय भारत
विसृजैतत्त्वमप्याजावस्त्रमस्त्रनिवारणम्
Bhratrinamatmanashchaiva paritranaya bharata
Visrijaitattvamapyajavastramastranivaranam
14.4
केशवेनैवमुक्तस्तु पाण्डवः परवीरहा
अवातरद्रथात्तूर्णं प्रगृह्य सशरं धनुः
Keshavenaivamuktastu pandavah paraviraha
Avataradrathatturnam pragrihya sasharam dhanuh
14.5
पूर्वमाचार्यपुत्राय ततोऽनन्तरमात्मने
भ्रातृभ्यश्चैव सर्वेभ्यः स्वस्तीत्युक्त्वा परंतपः
Purvamacharyaputraya tatonantaramatmane
Bhratribhyashchaiva sarvebhyah svastityuktva parantapah
14.6
देवताभ्यो नमस्कृत्य गुरुभ्यश्चैव सर्वशः
उत्ससर्ज शिवं ध्यायन्नस्त्रमस्त्रेण शाम्यताम्
Devatabhyo namaskritya gurubhyashchaiva sarvashah
Utsasarja shivam dhyayannastramastrena shamyatam
14.7
ततस्तदस्त्रं सहसा सृष्टं गाण्डीवधन्वना
प्रजज्वाल महार्चिष्मद्युगान्तानलसंनिभम्
Tatastadastram sahasa srishtam gandivadhanvana
Prajajvala maharchishmadyugantanalasannibham
14.8
तथैव द्रोणपुत्रस्य तदस्त्रं तिग्मतेजसः
प्रजज्वाल महाज्वालं तेजोमण्डलसंवृतम्
Tathaiva dronaputrasya tadastram tigmatejasah
Prajajvala mahajvalam tejomandalasanvritam
14.9
निर्घाता बहवश्चासन्पेतुरुल्काः सहस्रशः
महद्भयं च भूतानां सर्वेषां समजायत
Nirghata bahavashchasanpeturulkah sahasrashah
Mahadbhayam cha bhutanam sarvesham samajayata
14.10
सशब्दमभवद्व्योम ज्वालामालाकुलं भृशम्
चचाल च मही कृत्स्ना सपर्वतवनद्रुमा
Sashabdamabhavadvyoma jvalamalakulam bhrisham
Chachala cha mahi kritsna saparvatavanadruma
14.11
ते अस्त्रे तेजसा लोकांस्तापयन्ती व्यवस्थिते
महर्षी सहितौ तत्र दर्शयामासतुस्तदा
Te astre tejasa lokanstapayanti vyavasthite
Maharshi sahitau tatra darshayamasatustada
14.12
नारदः स च धर्मात्मा भरतानां पितामहः
उभौ शमयितुं वीरौ भारद्वाजधनंजयौ
Naradah sa cha dharmatma bharatanam pitamahah
Ubhau shamayitum virau bharadvajadhananjayau
14.13
तौ मुनी सर्वधर्मज्ञौ सर्वभूतहितैषिणौ
दीप्तयोरस्त्रयोर्मध्ये स्थितौ परमतेजसौ
Tau muni sarvadharmagyau sarvabhutahitaishinau
Diptayorastrayormadhye sthitau paramatejasau
14.14
तदन्तरमनाधृष्यावुपगम्य यशस्विनौ
आस्तामृषिवरौ तत्र ज्वलिताविव पावकौ
Tadantaramanadhrishyavupagamya yashasvinau
Astamrishivarau tatra jvalitaviva pavakau
14.15
प्राणभृद्भिरनाधृष्यौ देवदानवसंमतौ
अस्त्रतेजः शमयितुं लोकानां हितकाम्यया
Pranabhridbhiranadhrishyau devadanavasammatau
Astratejah shamayitum lokanam hitakamyaya
14.16
ऋषी ऊचतुः
नानाशस्त्रविदः पूर्वे येऽप्यतीता महारथाः
नैतदस्त्रं मनुष्येषु तैः प्रयुक्तं कथंचन
Rishi uchatuh
Nanashastravidah purve yepyatita maharathah
Naitadastram manushyeshu taih prayuktam kathanchana