UtshovChapter 13
13.1
वैशंपायन उवाच
एवमुक्त्वा युधां श्रेष्ठः सर्वयादवनन्दनः
सर्वायुधवरोपेतमारुरोह महारथम्
युक्तं परमकाम्बोजैस्तुरगैर्हेममालिभिः
Vaishampayana uvacha
Evamuktva yudham shreshthah sarvayadavanandanah
Sarvayudhavaropetamaruroha maharatham
Yuktam paramakambojaisturagairhemamalibhih
13.2
आदित्योदयवर्णस्य धुरं रथवरस्य तु
दक्षिणामवहत्सैन्यः सुग्रीवः सव्यतोऽवहत्
पार्ष्णिवाहौ तु तस्यास्तां मेघपुष्पबलाहकौ
Adityodayavarnasya dhuram rathavarasya tu
Dakshinamavahatsainyah sugrivah savyatovahat
Parshnivahau tu tasyastam meghapushpabalahakau
13.3
विश्वकर्मकृता दिव्या नानारत्नविभूषिता
उच्छ्रितेव रथे माया ध्वजयष्टिरदृश्यत
Vishvakarmakrita divya nanaratnavibhushita
Uchchhriteva rathe maya dhvajayashtiradrishyata
13.4
वैनतेयः स्थितस्तस्यां प्रभामण्डलरश्मिवान्
तस्य सत्यवतः केतुर्भुजगारिरदृश्यत
Vainateyah sthitastasyam prabhamandalarashmivan
Tasya satyavatah keturbhujagariradrishyata
13.5
अन्वारोहद्धृषीकेशः केतुः सर्वधनुष्मताम्
अर्जुनः सत्यकर्मा च कुरुराजो युधिष्ठिरः
Anvarohaddhrishikeshah ketuh sarvadhanushmatam
Arjunah satyakarma cha kururajo yudhishthirah
13.6
अशोभेतां महात्मानौ दाशार्हमभितः स्थितौ
रथस्थं शार्ङ्गधन्वानमश्विनाविव वासवम्
Ashobhetam mahatmanau dasharhamabhitah sthitau
Rathastham sharngadhanvanamashvinaviva vasavam
13.7
तावुपारोप्य दाशार्हः स्यन्दनं लोकपूजितम्
प्रतोदेन जवोपेतान्परमाश्वानचोदयत्
Tavuparopya dasharhah syandanam lokapujitam
Pratodena javopetanparamashvanachodayat
13.8
ते हयाः सहसोत्पेतुर्गृहीत्वा स्यन्दनोत्तमम्
आस्थितं पाण्डवेयाभ्यां यदूनामृषभेण च
Te hayah sahasotpeturgrihitva syandanottamam
Asthitam pandaveyabhyam yadunamrishabhena cha
13.9
वहतां शार्ङ्गधन्वानमश्वानां शीघ्रगामिनाम्
प्रादुरासीन्महाञ्शब्दः पक्षिणां पततामिव
Vahatam sharngadhanvanamashvanam shighragaminam
Pradurasinmahanshabdah pakshinam patatamiva
13.10
ते समार्छन्नरव्याघ्राः क्षणेन भरतर्षभ
भीमसेनं महेष्वासं समनुद्रुत्य वेगिताः
Te samarchhannaravyaghrah kshanena bharatarshabha
Bhimasenam maheshvasam samanudrutya vegitah
13.11
क्रोधदीप्तं तु कौन्तेयं द्विषदर्थे समुद्यतम्
नाशक्नुवन्वारयितुं समेत्यापि महारथाः
Krodhadiptam tu kaunteyam dvishadarthe samudyatam
Nashaknuvanvarayitum sametyapi maharathah
13.12
स तेषां प्रेक्षतामेव श्रीमतां दृढधन्विनाम्
ययौ भागिरथीकच्छं हरिभिर्भृशवेगितैः
यत्र स्म श्रूयते द्रौणिः पुत्रहन्ता महात्मनाम्
Sa tesham prekshatameva shrimatam dridhadhanvinam
Yayau bhagirathikachchham haribhirbhrishavegitaih
Yatra sma shruyate draunih putrahanta mahatmanam
13.13
स ददर्श महात्मानमुदकान्ते यशस्विनम्
कृष्णद्वैपायनं व्यासमासीनमृषिभिः सह
Sa dadarsha mahatmanamudakante yashasvinam
Krishnadvaipayanam vyasamasinamrishibhih saha
13.14
तं चैव क्रूरकर्माणं घृताक्तं कुशचीरिणम्
रजसा ध्वस्तकेशान्तं ददर्श द्रौणिमन्तिके
Tam chaiva krurakarmanam ghritaktam kushachirinam
Rajasa dhvastakeshantam dadarsha draunimantike
13.15
तमभ्यधावत्कौन्तेयः प्रगृह्य सशरं धनुः
भीमसेनो महाबाहुस्तिष्ठ तिष्ठेति चाब्रवीत्
Tamabhyadhavatkaunteyah pragrihya sasharam dhanuh
Bhimaseno mahabahustishtha tishtheti chabravit
13.16
स दृष्ट्वा भीमधन्वानं प्रगृहीतशरासनम्
भ्रातरौ पृष्ठतश्चास्य जनार्दनरथे स्थितौ
व्यथितात्माभवद्द्रौणिः प्राप्तं चेदममन्यत
Sa drishtva bhimadhanvanam pragrihitasharasanam
Bhratarau prishthatashchasya janardanarathe sthitau
Vyathitatmabhavaddraunih praptam chedamamanyata
13.17
स तद्दिव्यमदीनात्मा परमास्त्रमचिन्तयत्
जग्राह च स चैषीकां द्रौणिः सव्येन पाणिना
स तामापदमासाद्य दिव्यमस्त्रमुदीरयत्
Sa taddivyamadinatma paramastramachintayat
Jagraha cha sa chaishikam draunih savyena panina
Sa tamapadamasadya divyamastramudirayat
13.18
अमृष्यमाणस्ताञ्शूरान्दिव्यायुधधरान्स्थितान्
अपाण्डवायेति रुषा व्यसृजद्दारुणं वचः
Amrishyamanastanshurandivyayudhadharansthitan
Apandavayeti rusha vyasrijaddarunam vachah
13.19
इत्युक्त्वा राजशार्दूल द्रोणपुत्रः प्रतापवान्
सर्वलोकप्रमोहार्थं तदस्त्रं प्रमुमोच ह
Ityuktva rajashardula dronaputrah pratapavan
Sarvalokapramohartham tadastram pramumocha ha
13.20
ततस्तस्यामिषीकायां पावकः समजायत
प्रधक्ष्यन्निव लोकांस्त्रीन्कालान्तकयमोपमः
Tatastasyamishikayam pavakah samajayata
Pradhakshyanniva lokanstrinkalantakayamopamah