অধ্যায় 13

13.1

বৈশংপায়ন উবাচ
এবমুক্ত্বা যুধাং শ্রেষ্ঠঃ সর্বয়াদবনন্দনঃ
সর্বায়ুধবরোপেতমারুরোহ মহারথম্
যুক্তং পরমকাম্বোজৈস্তুরগৈর্হেমমালিভিঃ

আদিত্যোদয়বর্ণস্য ধুরং রথবরস্য তু
দক্ষিণামবহত্সৈন্যঃ সুগ্রীবঃ সব্যতোঽবহৎ
পার্ষ্ণিবাহৌ তু তস্যাস্তাং মেঘপুষ্পবলাহকৌ

বিশ্বকর্মকৃতা দিব্যা নানারত্নবিভূষিতা
উচ্ছ্রিতেব রথে মায়া ধ্বজয়ষ্টিরদৃশ্যত

বৈনতেয়ঃ স্থিতস্তস্যাং প্রভামণ্ডলরশ্মিবান্
তস্য সত্যবতঃ কেতুর্ভুজগারিরদৃশ্যত

অন্বারোহদ্ধৃষীকেশঃ কেতুঃ সর্বধনুষ্মতাম্
অর্জুনঃ সত্যকর্মা চ কুরুরাজো যুধিষ্ঠিরঃ

অশোভেতাং মহাত্মানৌ দাশার্হমভিতঃ স্থিতৌ
রথস্থং শার্ঙ্গধন্বানমশ্বিনাবিব বাসবম্

তাবুপারোপ্য দাশার্হঃ স্যন্দনং লোকপূজিতম্
প্রতোদেন জবোপেতান্পরমাশ্বানচোদয়ৎ

তে হয়াঃ সহসোত্পেতুর্গৃহীত্বা স্যন্দনোত্তমম্
আস্থিতং পাণ্ডবেয়াভ্যাং যদূনামৃষভেণ চ

বহতাং শার্ঙ্গধন্বানমশ্বানাং শীঘ্রগামিনাম্
প্রাদুরাসীন্মহাঞ্শব্দঃ পক্ষিণাং পততামিব

তে সমার্ছন্নরব্যাঘ্রাঃ ক্ষণেন ভরতর্ষভ
ভীমসেনং মহেষ্বাসং সমনুদ্রুত্য বেগিতাঃ

ক্রোধদীপ্তং তু কৌন্তেয়ং দ্বিষদর্থে সমুদ্যতম্
নাশক্নুবন্বারয়িতুং সমেত্যাপি মহারথাঃ

স তেষাং প্রেক্ষতামেব শ্রীমতাং দৃঢধন্বিনাম্
যয়ৌ ভাগিরথীকচ্ছং হরিভির্ভৃশবেগিতৈঃ
যত্র স্ম শ্রূয়তে দ্রৌণিঃ পুত্রহন্তা মহাত্মনাম্

স দদর্শ মহাত্মানমুদকান্তে যশস্বিনম্
কৃষ্ণদ্বৈপায়নং ব্যাসমাসীনমৃষিভিঃ সহ

তং চৈব ক্রূরকর্মাণং ঘৃতাক্তং কুশচীরিণম্
রজসা ধ্বস্তকেশান্তং দদর্শ দ্রৌণিমন্তিকে

তমভ্যধাবত্কৌন্তেয়ঃ প্রগৃহ্য সশরং ধনুঃ
ভীমসেনো মহাবাহুস্তিষ্ঠ তিষ্ঠেতি চাব্রবীৎ

স দৃষ্ট্বা ভীমধন্বানং প্রগৃহীতশরাসনম্
ভ্রাতরৌ পৃষ্ঠতশ্চাস্য জনার্দনরথে স্থিতৌ
ব্যথিতাত্মাভবদ্দ্রৌণিঃ প্রাপ্তং চেদমমন্যত

স তদ্দিব্যমদীনাত্মা পরমাস্ত্রমচিন্তয়ৎ
জগ্রাহ চ স চৈষীকাং দ্রৌণিঃ সব্যেন পাণিনা
স তামাপদমাসাদ্য দিব্যমস্ত্রমুদীরয়ৎ

অমৃষ্যমাণস্তাঞ্শূরান্দিব্যায়ুধধরান্স্থিতান্
অপাণ্ডবায়েতি রুষা ব্যসৃজদ্দারুণং বচঃ

ইত্যুক্ত্বা রাজশার্দূল দ্রোণপুত্রঃ প্রতাপবান্
সর্বলোকপ্রমোহার্থং তদস্ত্রং প্রমুমোচ হ

ততস্তস্যামিষীকায়াং পাবকঃ সমজায়ত
প্রধক্ষ্যন্নিব লোকাংস্ত্রীন্কালান্তকয়মোপমঃ