Utshovঅধ্যায় 12
12.1
বৈশংপায়ন উবাচ
তস্মিন্প্রয়াতে দুর্ধর্ষে যদূনামৃষভস্ততঃ
অব্রবীত্পুণ্ডরীকাক্ষঃ কুন্তীপুত্রং যুধিষ্ঠিরম্
12.2
এষ পাণ্ডব তে ভ্রাতা পুত্রশোকমপারয়ন্
জিঘাংসুর্দ্রৌণিমাক্রন্দে যাতি ভারত ভারতঃ
12.3
ভীমঃ প্রিয়স্তে সর্বেভ্যো ভ্রাতৃভ্যো ভরতর্ষভ
তং কৃচ্ছ্রগতমদ্য ত্বং কস্মান্নাভ্যবপদ্যসে
12.4
যত্তদাচষ্ট পুত্রায় দ্রোণঃ পরপুরংজয়ঃ
অস্ত্রং ব্রহ্মশিরো নাম দহেদ্যত্পৃথিবীমপি
12.5
তন্মহাত্মা মহাভাগঃ কেতুঃ সর্বধনুষ্মতাম্
প্রত্যপাদয়দাচার্যঃ প্রীয়মাণো ধনংজয়ম্
12.6
তত্পুত্রোঽস্যৈবমেবৈনমন্বয়াচদমর্ষণঃ
ততঃ প্রোবাচ পুত্রায় নাতিহৃষ্টমনা ইব
12.7
বিদিতং চাপলং হ্যাসীদাত্মজস্য মহাত্মনঃ
সর্বধর্মবিদাচার্যো নান্বিষত্সততং সুতম্
12.8
পরমাপদ্গতেনাপি ন স্ম তাত ত্বয়া রণে
ইদমস্ত্রং প্রয়োক্তব্যং মানুষেষু বিশেষতঃ
12.9
ইত্যুক্তবান্গুরুঃ পুত্রং দ্রোণঃ পশ্চাদথোক্তবান্
ন ত্বং জাতু সতাং মার্গে স্থাতেতি পুরুষর্ষভ
12.10
স তদাজ্ঞায় দুষ্টাত্মা পিতুর্বচনমপ্রিয়ম্
নিরাশঃ সর্বকল্যাণৈঃ শোচন্পর্যপতন্মহীম্
12.11
ততস্তদা কুরুশ্রেষ্ঠ বনস্থে ত্বয়ি ভারত
অবসদ্দ্বারকামেত্য বৃষ্ণিভিঃ পরমার্চিতঃ
12.12
স কদাচিত্সমুদ্রান্তে বসন্দ্রারবতীমনু
এক একং সমাগম্য মামুবাচ হসন্নিব
12.13
যত্তদুগ্রং তপঃ কৃষ্ণ চরন্সত্যপরাক্রমঃ
অগস্ত্যাদ্ভারতাচার্যঃ প্রত্যপদ্যত মে পিতা
12.14
অস্ত্রং ব্রহ্মশিরো নাম দেবগন্ধর্বপূজিতম্
তদদ্য ময়ি দাশার্হ যথা পিতরি মে তথা
12.15
অস্মত্তস্তদুপাদায় দিব্যমস্ত্রং যদূত্তম
মমাপ্যস্ত্রং প্রয়চ্ছ ত্বং চক্রং রিপুহরং রণে
12.16
স রাজন্প্রীয়মাণেন ময়াপ্যুক্তঃ কৃতাঞ্জলিঃ
যাচমানঃ প্রয়ত্নেন মত্তোঽস্ত্রং ভরতর্ষভ
12.17
দেবদানবগন্ধর্বমনুষ্যপতগোরগাঃ
ন সমা মম বীর্যস্য শতাংশেনাপি পিণ্ডিতাঃ
12.18
ইদং ধনুরিয়ং শক্তিরিদং চক্রমিয়ং গদা
যদ্যদিচ্ছসি চেদস্ত্রং মত্তস্তত্তদ্দদানি তে
12.19
যচ্ছক্নোষি সমুদ্যন্তুং প্রয়োক্তুমপি বা রণে
তদ্গৃহাণ বিনাস্ত্রেণ যন্মে দাতুমভীপ্সসি
12.20
স সুনাভং সহস্রারং বজ্রনাভময়স্ময়ম্
বব্রে চক্রং মহাবাহো স্পর্ধমানো ময়া সহ
12.21
গৃহাণ চক্রমিত্যুক্তো ময়া তু তদনন্তরম্
জগ্রাহোপেত্য সহসা চক্রং সব্যেন পাণিনা
ন চৈতদশকত্স্থানাত্সংচালয়িতুমচ্যুত
12.22
অথ তদ্দক্ষিণেনাপি গ্রহীতুমুপচক্রমে
সর্বয়ত্নেন তেনাপি গৃহ্ণন্নেতদকল্পয়ৎ
12.23
ততঃ সর্ববলেনাপি যচ্চৈতন্ন শশাক সঃ
উদ্ধর্তুং বা চালয়িতুং দ্রৌণিঃ পরমদুর্মনাঃ
কৃত্বা যত্নং পরং শ্রান্তঃ স ন্যবর্তত ভারত
12.24
নিবৃত্তমথ তং তস্মাদভিপ্রায়াদ্বিচেতসম্
অহমামন্ত্র্য সুস্নিগ্ধমশ্বত্থামানমব্রুবম্
12.25
যঃ স দেবমনুষ্যেষু প্রমাণং পরমং গতঃ
গাণ্ডীবধন্বা শ্বেতাশ্বঃ কপিপ্রবরকেতনঃ
12.26
যঃ সাক্ষাদ্দেবদেবেশং শিতিকণ্ঠমুমাপতিম্
দ্বংদ্বয়ুদ্ধে পরাজিষ্ণুস্তোষয়ামাস শংকরম্
12.27
যস্মাত্প্রিয়তরো নাস্তি মমান্যঃ পুরুষো ভুবি
নাদেয়ং যস্য মে কিংচিদপি দারাঃ সুতাস্তথা
12.28
তেনাপি সুহৃদা ব্রহ্মন্পার্থেনাক্লিষ্টকর্মণা
নোক্তপূর্বমিদং বাক্যং যত্ত্বং মামভিভাষসে
12.29
ব্রহ্মচর্যং মহদ্ঘোরং চীর্ত্বা দ্বাদশবার্ষিকম্
হিমবত্পার্শ্বমভ্যেত্য যো ময়া তপসার্চিতঃ
12.30
সমানব্রতচারিণ্যাং রুক্মিণ্যাং যোঽন্বজায়ত
সনত্কুমারস্তেজস্বী প্রদ্যুম্নো নাম মে সুতঃ
12.31
তেনাপ্যেতন্মহদ্দিব্যং চক্রমপ্রতিমং মম
ন প্রার্থিতমভূন্মূঢ যদিদং প্রার্থিতং ত্বয়া
12.32
রামেণাতিবলেনৈতন্নোক্তপূর্বং কদাচন
ন গদেন ন সাম্বেন যদিদং প্রার্থিতং ত্বয়া
12.33
দ্বারকাবাসিভিশ্চান্যৈর্বৃষ্ণ্যন্ধকমহারথৈঃ
নোক্তপূর্বমিদং জাতু যদিদং প্রার্থিতং ত্বয়া
12.34
ভারতাচার্যপুত্রঃ সন্মানিতঃ সর্বয়াদবৈঃ
চক্রেণ রথিনাং শ্রেষ্ঠ কিং নু তাত যুয়ুত্সসে
12.35
এবমুক্তো ময়া দ্রৌণির্মামিদং প্রত্যুবাচ হ
প্রয়ুজ্য ভবতে পূজাং যোত্স্যে কৃষ্ণ ত্বয়েত্যুত
12.36
ততস্তে প্রার্থিতং চক্রং দেবদানবপূজিতম্
অজেয়ঃ স্যামিতি বিভো সত্যমেতদ্ব্রবীমি তে
12.37
ত্বত্তোঽহং দুর্লভং কামমনবাপ্যৈব কেশব
প্রতিয়াস্যামি গোবিন্দ শিবেনাভিবদস্ব মাম্
12.38
এতত্সুনাভং বৃষ্ণীনামৃষভেণ ত্বয়া ধৃতম্
চক্রমপ্রতিচক্রেণ ভুবি নান্যোঽভিপদ্যতে
12.39
এতাবদুক্ত্বা দ্রৌণির্মাং যুগ্যমশ্বান্ধনানি চ
আদায়োপয়য়ৌ বালো রত্নানি বিবিধানি চ
12.40
স সংরম্ভী দুরাত্মা চ চপলঃ ক্রূর এব চ
বেদ চাস্ত্রং ব্রহ্মশিরস্তস্মাদ্রক্ষ্যো বৃকোদরঃ