Utshovঅধ্যায় 11
11.1
বৈশংপায়ন উবাচ
স দৃষ্ট্বা নিহতান্সংখ্যে পুত্রান্ভ্রাতৄন্সখীংস্তথা
মহাদুঃখপরীতাত্মা বভূব জনমেজয়
11.2
ততস্তস্য মহাঞ্শোকঃ প্রাদুরাসীন্মহাত্মনঃ
স্মরতঃ পুত্রপৌত্রাণাং ভ্রাতৄণাং স্বজনস্য হ
11.3
তমশ্রুপরিপূর্ণাক্ষং বেপমানমচেতসম্
সুহৃদো ভৃশসংবিগ্নাঃ সান্ত্বয়াং চক্রিরে তদা
11.4
ততস্তস্মিন্ক্ষণে কাল্যে রথেনাদিত্যবর্চসা
নকুলঃ কৃষ্ণয়া সার্ধমুপায়াত্পরমার্তয়া
11.5
উপপ্লব্যগতা সা তু শ্রুত্বা সুমহদপ্রিয়ম্
তদা বিনাশং পুত্রাণাং সর্বেষাং ব্যথিতাভবৎ
11.6
কম্পমানেব কদলী বাতেনাভিসমীরিতা
কৃষ্ণা রাজানমাসাদ্য শোকার্তা ন্যপতদ্ভুবি
11.7
বভূব বদনং তস্যাঃ সহসা শোককর্শিতম্
ফুল্লপদ্মপলাশাক্ষ্যাস্তমোধ্বস্ত ইবাংশুমান্
11.8
ততস্তাং পতিতাং দৃষ্ট্বা সংরম্ভী সত্যবিক্রমঃ
বাহুভ্যাং পরিজগ্রাহ সমুপেত্য বৃকোদরঃ
11.9
সা সমাশ্বাসিতা তেন ভীমসেনেন ভামিনী
রুদতী পাণ্ডবং কৃষ্ণা সহভ্রাতরমব্রবীৎ
11.10
দিষ্ট্যা রাজংস্ত্বমদ্যেমামখিলাং ভোক্ষ্যসে মহীম্
আত্মজান্ক্ষত্রধর্মেণ সংপ্রদায় যমায় বৈ
11.11
দিষ্ট্যা ত্বং পার্থ কুশলী মত্তমাতঙ্গগামিনম্
অবাপ্য পৃথিবীং কৃত্স্নাং সৌভদ্রং ন স্মরিষ্যসি
11.12
আত্মজাংস্তেন ধর্মেণ শ্রুত্বা শূরান্নিপাতিতান্
উপপ্লব্যে ময়া সার্ধং দিষ্ট্যা ত্বং ন স্মরিষ্যসি
11.13
প্রসুপ্তানাং বধং শ্রুত্বা দ্রৌণিনা পাপকর্মণা
শোকস্তপতি মাং পার্থ হুতাশন ইবাশয়ম্
11.14
তস্য পাপকৃতো দ্রৌণের্ন চেদদ্য ত্বয়া মৃধে
হ্রিয়তে সানুবন্ধস্য যুধি বিক্রম্য জীবিতম্
11.15
ইহৈব প্রায়মাসিষ্যে তন্নিবোধত পাণ্ডবাঃ
ন চেত্ফলমবাপ্নোতি দ্রৌণিঃ পাপস্য কর্মণঃ
11.16
এবমুক্ত্বা ততঃ কৃষ্ণা পাণ্ডবং প্রত্যুপাবিশৎ
যুধিষ্ঠিরং যাজ্ঞসেনী ধর্মরাজং যশস্বিনী
11.17
দৃষ্ট্বোপবিষ্টাং রাজর্ষিঃ পাণ্ডবো মহিষীং প্রিয়াম্
প্রত্যুবাচ স ধর্মাত্মা দ্রৌপদীং চারুদর্শনাম্
11.18
ধর্ম্যং ধর্মেণ ধর্মজ্ঞে প্রাপ্তাস্তে নিধনং শুভে
পুত্রাস্তে ভ্রাতরশ্চৈব তান্ন শোচিতুমর্হসি
11.19
দ্রোণপুত্রঃ স কল্যাণি বনং দূরমিতো গতঃ
তস্য ত্বং পাতনং সংখ্যে কথং জ্ঞাস্যসি শোভনে
11.20
দ্রৌপদ্যুবাচ
দ্রোণপুত্রস্য সহজো মণিঃ শিরসি মে শ্রুতঃ
নিহত্য সংখ্যে তং পাপং পশ্যেয়ং মণিমাহৃতম্
রাজঞ্শিরসি তং কৃত্বা জীবেয়মিতি মে মতিঃ
11.21
বৈশংপায়ন উবাচ
ইত্যুক্ত্বা পাণ্ডবং কৃষ্ণা রাজানং চারুদর্শনা
ভীমসেনমথাভ্যেত্য কুপিতা বাক্যমব্রবীৎ
11.22
ত্রাতুমর্হসি মাং ভীম ক্ষত্রধর্মমনুস্মরন্
জহি তং পাপকর্মাণং শম্বরং মঘবানিব
ন হি তে বিক্রমে তুল্যঃ পুমানস্তীহ কশ্চন
11.23
শ্রুতং তত্সর্বলোকেষু পরমব্যসনে যথা
দ্বীপোঽভূস্ত্বং হি পার্থানাং নগরে বারণাবতে
হিডিম্বদর্শনে চৈব তথা ত্বমভবো গতিঃ
11.24
তথা বিরাটনগরে কীচকেন ভৃশার্দিতাম্
মামপ্যুদ্ধৃতবান্কৃচ্ছ্রাত্পৌলোমীং মঘবানিব
11.25
যথৈতান্যকৃথাঃ পার্থ মহাকর্মাণি বৈ পুরা
তথা দ্রৌণিমমিত্রঘ্ন বিনিহত্য সুখী ভব
11.26
তস্যা বহুবিধং দুঃখান্নিশম্য পরিদেবিতম্
নামর্ষয়ত কৌন্তেয়ো ভীমসেনো মহাবলঃ
11.27
স কাঞ্চনবিচিত্রাঙ্গমারুরোহ মহারথম্
আদায় রুচিরং চিত্রং সমার্গণগুণং ধনুঃ
11.28
নকুলং সারথিং কৃত্বা দ্রোণপুত্রবধে বৃতঃ
বিস্ফার্য সশরং চাপং তূর্ণমশ্বানচোদয়ৎ
11.29
তে হয়াঃ পুরুষব্যাঘ্র চোদিতা বাতরংহসঃ
বেগেন ত্বরিতা জগ্মুর্হরয়ঃ শীঘ্রগামিনঃ
11.30
শিবিরাত্স্বাদ্গৃহীত্বা স রথস্য পদমচ্যুতঃ
দ্রোণপুত্ররথস্যাশু যয়ৌ মার্গেণ বীর্যবান্