Utshovঅধ্যায় 17
17.1
বৈশংপায়ন উবাচ
হতেষু সর্বসৈন্যেষু সৌপ্তিকে তৈ রথৈস্ত্রিভিঃ
শোচন্যুধিষ্ঠিরো রাজা দাশার্হমিদমব্রবীৎ
17.2
কথং নু কৃষ্ণ পাপেন ক্ষুদ্রেণাক্লিষ্টকর্মণা
দ্রৌণিনা নিহতাঃ সর্বে মম পুত্রা মহারথাঃ
17.3
তথা কৃতাস্ত্রা বিক্রান্তাঃ সহস্রশতয়োধিনঃ
দ্রুপদস্যাত্মজাশ্চৈব দ্রোণপুত্রেণ পাতিতাঃ
17.4
যস্য দ্রোণো মহেষ্বাসো ন প্রাদাদাহবে মুখম্
তং জঘ্নে রথিনাং শ্রেষ্ঠং ধৃষ্টদ্যুম্নং কথং নু সঃ
17.5
কিং নু তেন কৃতং কর্ম তথায়ুক্তং নরর্ষভ
যদেকঃ শিবিরং সর্বমবধীন্নো গুরোঃ সুতঃ
17.6
বাসুদেব উবাচ
নূনং স দেবদেবানামীশ্বরেশ্বরমব্যয়ম্
জগাম শরণং দ্রৌণিরেকস্তেনাবধীদ্বহূন্
17.7
প্রসন্নো হি মহাদেবো দদ্যাদমরতামপি
বীর্যং চ গিরিশো দদ্যাদ্যেনেন্দ্রমপি শাতয়েৎ
17.8
বেদাহং হি মহাদেবং তত্ত্বেন ভরতর্ষভ
যানি চাস্য পুরাণানি কর্মাণি বিবিধান্যুত
17.9
আদিরেষ হি ভূতানাং মধ্যমন্তশ্চ ভারত
বিচেষ্টতে জগচ্চেদং সর্বমস্যৈব কর্মণা
17.10
এবং সিসৃক্ষুর্ভূতানি দদর্শ প্রথমং বিভুঃ
পিতামহোঽব্রবীচ্চৈনং ভূতানি সৃজ মাচিরম্
17.11
হরিকেশস্তথেত্যুক্ত্বা ভূতানাং দোষদর্শিবান্
দীর্ঘকালং তপস্তেপে মগ্নোঽম্ভসি মহাতপাঃ
17.12
সুমহান্তং ততঃ কালং প্রতীক্ষ্যৈনং পিতামহঃ
স্রষ্টারং সর্বভূতানাং সসর্জ মনসাপরম্
17.13
সোঽব্রবীত্পিতরং দৃষ্ট্বা গিরিশং মগ্নমম্ভসি
যদি মে নাগ্রজস্ত্বন্যস্ততঃ স্রক্ষ্যাম্যহং প্রজাঃ
17.14
তমব্রবীত্পিতা নাস্তি ত্বদন্যঃ পুরুষোঽগ্রজঃ
স্থাণুরেষ জলে মগ্নো বিস্রব্ধঃ কুরু বৈ কৃতিম্
17.15
স ভূতান্যসৃজত্সপ্ত দক্ষাদীংস্তু প্রজাপতীন্
যৈরিমং ব্যকরোত্সর্বং ভূতগ্রামং চতুর্বিধম্
17.16
তাঃ সৃষ্টমাত্রাঃ ক্ষুধিতাঃ প্রজাঃ সর্বাঃ প্রজাপতিম্
বিভক্ষয়িষবো রাজন্সহসা প্রাদ্রবংস্তদা
17.17
স ভক্ষ্যমাণস্ত্রাণার্থী পিতামহমুপাদ্রবৎ
আভ্যো মাং ভগবান্পাতু বৃত্তিরাসাং বিধীয়তাম্
17.18
ততস্তাভ্যো দদাবন্নমোষধীঃ স্থাবরাণি চ
জঙ্গমানি চ ভূতানি দুর্বলানি বলীয়সাম্
17.19
বিহিতান্নাঃ প্রজাস্তাস্তু জগ্মুস্তুষ্টা যথাগতম্
ততো ববৃধিরে রাজন্প্রীতিমত্যঃ স্বয়োনিষু
17.20
ভূতগ্রামে বিবৃদ্ধে তু তুষ্টে লোকগুরাবপি
উদতিষ্ঠজ্জলাজ্জ্যেষ্ঠঃ প্রজাশ্চেমা দদর্শ সঃ
17.21
বহুরূপাঃ প্রজা দৃষ্ট্বা বিবৃদ্ধাঃ স্বেন তেজসা
চুক্রোধ ভগবান্রুদ্রো লিঙ্গং স্বং চাপ্যবিধ্যত
17.22
তত্প্রবিদ্ধং তদা ভূমৌ তথৈব প্রত্যতিষ্ঠত
তমুবাচাব্যয়ো ব্রহ্মা বচোভিঃ শময়ন্নিব
17.23
কিং কৃতং সলিলে শর্ব চিরকালং স্থিতেন তে
কিমর্থং চৈতদুত্পাট্য ভূমৌ লিঙ্গং প্রবেরিতম্
17.24
সোঽব্রবীজ্জাতসংরম্ভস্তদা লোকগুরুর্গুরুম্
প্রজাঃ সৃষ্টাঃ পরেণেমাঃ কিং করিষ্যাম্যনেন বৈ
17.25
তপসাধিগতং চান্নং প্রজার্থং মে পিতামহ
ওষধ্যঃ পরিবর্তেরন্যথৈব সততং প্রজাঃ
17.26
এবমুক্ত্বা তু সংক্রুদ্ধো জগাম বিমনা ভবঃ
গিরের্মুঞ্জবতঃ পাদং তপস্তপ্তুং মহাতপাঃ