Utshovঅধ্যায় 18
18.1
বাসুদেব উবাচ
ততো দেবয়ুগেঽতীতে দেবা বৈ সমকল্পয়ন্
যজ্ঞং বেদপ্রমাণেন বিধিবদ্যষ্টুমীপ্সবঃ
18.2
কল্পয়ামাসুরব্যগ্রা দেশান্যজ্ঞোচিতাংস্ততঃ
ভাগার্হা দেবতাশ্চৈব যজ্ঞিয়ং দ্রব্যমেব চ
18.3
তা বৈ রুদ্রমজানন্ত্যো যাথাতথ্যেন দেবতাঃ
নাকল্পয়ন্ত দেবস্য স্থাণোর্ভাগং নরাধিপ
18.4
সোঽকল্প্যমানে ভাগে তু কৃত্তিবাসা মখেঽমরৈঃ
তরসা ভাগমন্বিচ্ছন্ধনুরাদৌ সসর্জ হ
18.5
লোকয়জ্ঞঃ ক্রিয়ায়জ্ঞো গৃহয়জ্ঞঃ সনাতনঃ
পঞ্চভূতময়ো যজ্ঞো নৃয়জ্ঞশ্চৈব পঞ্চমঃ
18.6
লোকয়জ্ঞেন যজ্ঞৈষী কপর্দী বিদধে ধনুঃ
ধনুঃ সৃষ্টমভূত্তস্য পঞ্চকিষ্কুপ্রমাণতঃ
18.7
বষট্কারোঽভবজ্জ্যা তু ধনুষস্তস্য ভারত
যজ্ঞাঙ্গানি চ চত্বারি তস্য সংহননেঽভবন্
18.8
ততঃ ক্রুদ্ধো মহাদেবস্তদুপাদায় কার্মুকম্
আজগামাথ তত্রৈব যত্র দেবাঃ সমীজিরে
18.9
তমাত্তকার্মুকং দৃষ্ট্বা ব্রহ্মচারিণমব্যয়ম্
বিব্যথে পৃথিবী দেবী পর্বতাশ্চ চকম্পিরে
18.10
ন ববৌ পবনশ্চৈব নাগ্নির্জজ্বাল চৈধিতঃ
ব্যভ্রমচ্চাপি সংবিগ্নং দিবি নক্ষত্রমণ্ডলম্
18.11
ন বভৌ ভাস্করশ্চাপি সোমঃ শ্রীমুক্তমণ্ডলঃ
তিমিরেণাকুলং সর্বমাকাশং চাভবদ্বৃতম্
18.12
অভিভূতাস্ততো দেবা বিষয়ান্ন প্রজজ্ঞিরে
ন প্রত্যভাচ্চ যজ্ঞস্তান্বেদা বভ্রংশিরে তদা
18.13
ততঃ স যজ্ঞং রৌদ্রেণ বিব্যাধ হৃদি পত্রিণা
অপক্রান্তস্ততো যজ্ঞো মৃগো ভূত্বা সপাবকঃ
18.14
স তু তেনৈব রূপেণ দিবং প্রাপ্য ব্যরোচত
অন্বীয়মানো রুদ্রেণ যুধিষ্ঠির নভস্তলে
18.15
অপক্রান্তে ততো যজ্ঞে সংজ্ঞা ন প্রত্যভাত্সুরান্
নষ্টসংজ্ঞেষু দেবেষু ন প্রজ্ঞায়ত কিংচন
18.16
ত্র্যম্বকঃ সবিতুর্বাহূ ভগস্য নয়নে তথা
পূষ্ণশ্চ দশনান্ক্রুদ্ধো ধনুষ্কোট্যা ব্যশাতয়ৎ
18.17
প্রাদ্রবন্ত ততো দেবা যজ্ঞাঙ্গানি চ সর্বশঃ
কেচিত্তত্রৈব ঘূর্ণন্তো গতাসব ইবাভবন্
18.18
স তু বিদ্রাব্য তত্সর্বং শিতিকণ্ঠোঽবহস্য চ
অবষ্টভ্য ধনুষ্কোটিং রুরোধ বিবুধাংস্ততঃ
18.19
ততো বাগমরৈরুক্তা জ্যাং তস্য ধনুষোঽচ্ছিনৎ
অথ তত্সহসা রাজংশ্ছিন্নজ্যং বিস্ফুরদ্ধনুঃ
18.20
ততো বিধনুষং দেবা দেবশ্রেষ্ঠমুপাগমন্
শরণং সহ যজ্ঞেন প্রসাদং চাকরোত্প্রভুঃ
18.21
ততঃ প্রসন্নো ভগবান্প্রাস্যত্কোপং জলাশয়ে
স জলং পাবকো ভূত্বা শোষয়ত্যনিশং প্রভো
18.22
ভগস্য নয়নে চৈব বাহূ চ সবিতুস্তথা
প্রাদাত্পূষ্ণশ্চ দশনান্পুনর্যজ্ঞং চ পাণ্ডব
18.23
ততঃ সর্বমিদং স্বস্থং বভূব পুনরেব হ
সর্বাণি চ হবীংষ্যস্য দেবা ভাগমকল্পয়ন্
18.24
তস্মিন্ক্রুদ্ধেঽভবত্সর্বমস্বস্থং ভুবনং বিভো
প্রসন্নে চ পুনঃ স্বস্থং স প্রসন্নোঽস্য বীর্যবান্
18.25
ততস্তে নিহতাঃ সর্বে তব পুত্রা মহারথাঃ
অন্যে চ বহবঃ শূরাঃ পাঞ্চালাশ্চ সহানুগাঃ
18.26
ন তন্মনসি কর্তব্যং ন হি তদ্দ্রৌণিনা কৃতম্
মহাদেবপ্রসাদঃ স কুরু কার্যমনন্তরম্