অধ্যায় 9

9.1

সূত উবাচ
তেষু তত্রোপবিষ্টেষু ব্রাহ্মণেষু সমন্ততঃ
রুরুশ্চুক্রোশ গহনং বনং গত্বা সুদুঃখিতঃ

শোকেনাভিহতঃ সোঽথ বিলপন্করুণং বহু
অব্রবীদ্বচনং শোচন্প্রিয়াং চিন্ত্য প্রমদ্বরাম্

শেতে সা ভুবি তন্বঙ্গী মম শোকবিবর্ধিনী
বান্ধবানাং চ সর্বেষাং কিং নু দুঃখমতঃ পরম্

যদি দত্তং তপস্তপ্তং গুরবো বা ময়া যদি
সম্যগারাধিতাস্তেন সংজীবতু মম প্রিয়া

যথা জন্মপ্রভৃতি বৈ যতাত্মাহং ধৃতব্রতঃ
প্রমদ্বরা তথাদ্যৈব সমুত্তিষ্ঠতু ভামিনী

দেবদূত উবাচ
অভিধত্সে হ যদ্বাচা রুরো দুঃখেন তন্মৃষা
ন তু মর্ত্যস্য ধর্মাত্মন্নায়ুরস্তি গতায়ুষঃ

গতায়ুরেষা কৃপণা গন্ধর্বাপ্সরসোঃ সুতা
তস্মাচ্ছোকে মনস্তাত মা কৃথাস্ত্বং কথংচন

উপায়শ্চাত্র বিহিতঃ পূর্বং দেবৈর্মহাত্মভিঃ
তং যদীচ্ছসি কর্তুং ত্বং প্রাপ্স্যসীমাং প্রমদ্বরাম্

রুরুরুবাচ
ক উপায়ঃ কৃতো দেবৈর্ব্রূহি তত্ত্বেন খেচর
করিষ্যে তং তথা শ্রুত্বা ত্রাতুমর্হতি মাং ভবান্

দেবদূত উবাচ
আয়ুষোঽর্ধং প্রয়চ্ছস্ব কন্যায়ৈ ভৃগুনন্দন
এবমুত্থাস্যতি রুরো তব ভার্যা প্রমদ্বরা

রুরুরুবাচ
আয়ুষোঽর্ধং প্রয়চ্ছামি কন্যায়ৈ খেচরোত্তম
শৃঙ্গাররূপাভরণা উত্তিষ্ঠতু মম প্রিয়া

সূত উবাচ
ততো গন্ধর্বরাজশ্চ দেবদূতশ্চ সত্তমৌ
ধর্মরাজমুপেত্যেদং বচনং প্রত্যভাষতাম্

ধর্মরাজায়ুষোঽর্ধেন রুরোর্ভার্যা প্রমদ্বরা
সমুত্তিষ্ঠতু কল্যাণী মৃতৈব যদি মন্যসে

ধর্মরাজ উবাচ
প্রমদ্বরা রুরোর্ভার্যা দেবদূত যদীচ্ছসি
উত্তিষ্ঠত্বায়ুষোঽর্ধেন রুরোরেব সমন্বিতা

সূত উবাচ
এবমুক্তে ততঃ কন্যা সোদতিষ্ঠত্প্রমদ্বরা
রুরোস্তস্যায়ুষোঽর্ধেন সুপ্তেব বরবর্ণিনী

এতদ্দৃষ্টং ভবিষ্যে হি রুরোরুত্তমতেজসঃ
আয়ুষোঽতিপ্রবৃদ্ধস্য ভার্যার্থেঽর্ধং হ্রসত্বিতি

তত ইষ্টেঽহনি তয়োঃ পিতরৌ চক্রতুর্মুদা
বিবাহং তৌ চ রেমাতে পরস্পরহিতৈষিণৌ

স লব্ধ্বা দুর্লভাং ভার্যাং পদ্মকিঞ্জল্কসপ্রভাম্
ব্রতং চক্রে বিনাশায় জিহ্মগানাং ধৃতব্রতঃ

স দৃষ্ট্বা জিহ্মগান্সর্বাংস্তীব্রকোপসমন্বিতঃ
অভিহন্তি যথাসন্নং গৃহ্য প্রহরণং সদা

স কদাচিদ্বনং বিপ্রো রুরুরভ্যাগমন্মহৎ
শয়ানং তত্র চাপশ্যড্ডুণ্ডুভং বয়সান্বিতম্

তত উদ্যম্য দণ্ডং স কালদণ্ডোপমং তদা
অভ্যঘ্নদ্রুষিতো বিপ্রস্তমুবাচাথ ডুণ্ডুভঃ

নাপরাধ্যামি তে কিংচিদহমদ্য তপোধন
সংরম্ভাত্তত্কিমর্থং মামভিহংসি রুষান্বিতঃ