UtshovChapter 9
9.1
सूत उवाच
तेषु तत्रोपविष्टेषु ब्राह्मणेषु समन्ततः
रुरुश्चुक्रोश गहनं वनं गत्वा सुदुःखितः
Suta uvacha
Teshu tatropavishteshu brahmaneshu samantatah
Rurushchukrosha gahanam vanam gatva suduhkhitah
9.2
शोकेनाभिहतः सोऽथ विलपन्करुणं बहु
अब्रवीद्वचनं शोचन्प्रियां चिन्त्य प्रमद्वराम्
Shokenabhihatah sotha vilapankarunam bahu
Abravidvachanam shochanpriyam chintya pramadvaram
9.3
शेते सा भुवि तन्वङ्गी मम शोकविवर्धिनी
बान्धवानां च सर्वेषां किं नु दुःखमतः परम्
Shete sa bhuvi tanvangi mama shokavivardhini
Bandhavanam cha sarvesham kim nu duhkhamatah param
9.4
यदि दत्तं तपस्तप्तं गुरवो वा मया यदि
सम्यगाराधितास्तेन संजीवतु मम प्रिया
Yadi dattam tapastaptam guravo va maya yadi
Samyagaradhitastena sanjivatu mama priya
9.5
यथा जन्मप्रभृति वै यतात्माहं धृतव्रतः
प्रमद्वरा तथाद्यैव समुत्तिष्ठतु भामिनी
Yatha janmaprabhriti vai yatatmaham dhritavratah
Pramadvara tathadyaiva samuttishthatu bhamini
9.6
देवदूत उवाच
अभिधत्से ह यद्वाचा रुरो दुःखेन तन्मृषा
न तु मर्त्यस्य धर्मात्मन्नायुरस्ति गतायुषः
Devaduta uvacha
Abhidhatse ha yadvacha ruro duhkhena tanmrisha
Na tu martyasya dharmatmannayurasti gatayushah
9.7
गतायुरेषा कृपणा गन्धर्वाप्सरसोः सुता
तस्माच्छोके मनस्तात मा कृथास्त्वं कथंचन
Gatayuresha kripana gandharvapsarasoh suta
Tasmachchhoke manastata ma krithastvam kathanchana
9.8
उपायश्चात्र विहितः पूर्वं देवैर्महात्मभिः
तं यदीच्छसि कर्तुं त्वं प्राप्स्यसीमां प्रमद्वराम्
Upayashchatra vihitah purvam devairmahatmabhih
Tam yadichchhasi kartum tvam prapsyasimam pramadvaram
9.9
रुरुरुवाच
क उपायः कृतो देवैर्ब्रूहि तत्त्वेन खेचर
करिष्ये तं तथा श्रुत्वा त्रातुमर्हति मां भवान्
Rururuvacha
Ka upayah krito devairbruhi tattvena khechara
Karishye tam tatha shrutva tratumarhati mam bhavan
9.10
देवदूत उवाच
आयुषोऽर्धं प्रयच्छस्व कन्यायै भृगुनन्दन
एवमुत्थास्यति रुरो तव भार्या प्रमद्वरा
Devaduta uvacha
Ayushordham prayachchhasva kanyayai bhrigunandana
Evamutthasyati ruro tava bharya pramadvara
9.11
रुरुरुवाच
आयुषोऽर्धं प्रयच्छामि कन्यायै खेचरोत्तम
शृङ्गाररूपाभरणा उत्तिष्ठतु मम प्रिया
Rururuvacha
Ayushordham prayachchhami kanyayai khecharottama
Shringararupabharana uttishthatu mama priya
9.12
सूत उवाच
ततो गन्धर्वराजश्च देवदूतश्च सत्तमौ
धर्मराजमुपेत्येदं वचनं प्रत्यभाषताम्
Suta uvacha
Tato gandharvarajashcha devadutashcha sattamau
Dharmarajamupetyedam vachanam pratyabhashatam
9.13
धर्मराजायुषोऽर्धेन रुरोर्भार्या प्रमद्वरा
समुत्तिष्ठतु कल्याणी मृतैव यदि मन्यसे
Dharmarajayushordhena rurorbharya pramadvara
Samuttishthatu kalyani mritaiva yadi manyase
9.14
धर्मराज उवाच
प्रमद्वरा रुरोर्भार्या देवदूत यदीच्छसि
उत्तिष्ठत्वायुषोऽर्धेन रुरोरेव समन्विता
Dharmaraja uvacha
Pramadvara rurorbharya devaduta yadichchhasi
Uttishthatvayushordhena ruroreva samanvita
9.15
सूत उवाच
एवमुक्ते ततः कन्या सोदतिष्ठत्प्रमद्वरा
रुरोस्तस्यायुषोऽर्धेन सुप्तेव वरवर्णिनी
Suta uvacha
Evamukte tatah kanya sodatishthatpramadvara
Rurostasyayushordhena supteva varavarnini
9.16
एतद्दृष्टं भविष्ये हि रुरोरुत्तमतेजसः
आयुषोऽतिप्रवृद्धस्य भार्यार्थेऽर्धं ह्रसत्विति
Etaddrishtam bhavishye hi ruroruttamatejasah
Ayushotipravriddhasya bharyartherdham hrasatviti
9.17
तत इष्टेऽहनि तयोः पितरौ चक्रतुर्मुदा
विवाहं तौ च रेमाते परस्परहितैषिणौ
Tata ishtehani tayoh pitarau chakraturmuda
Vivaham tau cha remate parasparahitaishinau
9.18
स लब्ध्वा दुर्लभां भार्यां पद्मकिञ्जल्कसप्रभाम्
व्रतं चक्रे विनाशाय जिह्मगानां धृतव्रतः
Sa labdhva durlabham bharyam padmakinjalkasaprabham
Vratam chakre vinashaya jihmaganam dhritavratah
9.19
स दृष्ट्वा जिह्मगान्सर्वांस्तीव्रकोपसमन्वितः
अभिहन्ति यथासन्नं गृह्य प्रहरणं सदा
Sa drishtva jihmagansarvanstivrakopasamanvitah
Abhihanti yathasannam grihya praharanam sada
9.20
स कदाचिद्वनं विप्रो रुरुरभ्यागमन्महत्
शयानं तत्र चापश्यड्डुण्डुभं वयसान्वितम्
Sa kadachidvanam vipro rururabhyagamanmahat
Shayanam tatra chapashyaddundubham vayasanvitam
9.21
तत उद्यम्य दण्डं स कालदण्डोपमं तदा
अभ्यघ्नद्रुषितो विप्रस्तमुवाचाथ डुण्डुभः
Tata udyamya dandam sa kaladandopamam tada
Abhyaghnadrushito viprastamuvachatha dundubhah
9.22
नापराध्यामि ते किंचिदहमद्य तपोधन
संरम्भात्तत्किमर्थं मामभिहंसि रुषान्वितः
Naparadhyami te kinchidahamadya tapodhana
Sanrambhattatkimartham mamabhihansi rushanvitah