অধ্যায় 10

10.1

রুরুরুবাচ
মম প্রাণসমা ভার্যা দষ্টাসীদ্ভুজগেন হ
তত্র মে সময়ো ঘোর আত্মনোরগ বৈ কৃতঃ

হন্যাং সদৈব ভুজগং যং যং পশ্যেয়মিত্যুত
ততোঽহং ত্বাং জিঘাংসামি জীবিতেন বিমোক্ষ্যসে

ডুণ্ডুভ উবাচ
অন্যে তে ভুজগা বিপ্র যে দশন্তীহ মানবান্
ডুণ্ডুভানহিগন্ধেন ন ত্বং হিংসিতুমর্হসি

একানর্থান্পৃথগর্থানেকদুঃখান্পৃথক্সুখান্
ডুণ্ডুভান্ধর্মবিদ্ভূত্বা ন ত্বং হিংসিতুমর্হসি

সূত উবাচ
ইতি শ্রুত্বা বচস্তস্য ভুজগস্য রুরুস্তদা
নাবধীদ্ভয়সংবিগ্ন ঋষিং মত্বাথ ডুণ্ডুভম্

উবাচ চৈনং ভগবান্রুরুঃ সংশময়ন্নিব
কাময়া ভুজগ ব্রূহি কোঽসীমাং বিক্রিয়াং গতঃ

ডুণ্ডুভ উবাচ
অহং পুরা রুরো নাম্না ঋষিরাসং সহস্রপাৎ
সোঽহং শাপেন বিপ্রস্য ভুজগত্বমুপাগতঃ

রুরুরুবাচ
কিমর্থং শপ্তবান্ক্রুদ্ধো দ্বিজস্ত্বাং ভুজগোত্তম
কিয়ন্তং চৈব কালং তে বপুরেতদ্ভবিষ্যতি