Utshovঅধ্যায় 11
11.1
ডুণ্ডুভ উবাচ
সখা বভূব মে পূর্বং খগমো নাম বৈ দ্বিজঃ
ভৃশং সংশিতবাক্তাত তপোবলসমন্বিতঃ
11.2
স ময়া ক্রীডতা বাল্যে কৃত্বা তার্ণমথোরগম্
অগ্নিহোত্রে প্রসক্তঃ সন্ভীষিতঃ প্রমুমোহ বৈ
11.3
লব্ধ্বা চ স পুনঃ সংজ্ঞাং মামুবাচ তপোধনঃ
নির্দহন্নিব কোপেন সত্যবাক্সংশিতব্রতঃ
11.4
যথাবীর্যস্ত্বয়া সর্পঃ কৃতোঽয়ং মদ্বিভীষয়া
তথাবীর্যো ভুজংগস্ত্বং মম কোপাদ্ভবিষ্যসি
11.5
তস্যাহং তপসো বীর্যং জানমানস্তপোধন
ভৃশমুদ্বিগ্নহৃদয়স্তমবোচং বনৌকসম্
11.6
প্রয়তঃ সংভ্রমাচ্চৈব প্রাঞ্জলিঃ প্রণতঃ স্থিতঃ
সখেতি হসতেদং তে নর্মার্থং বৈ কৃতং ময়া
11.7
ক্ষন্তুমর্হসি মে ব্রহ্মঞ্শাপোঽয়ং বিনিবর্ত্যতাম্
সোঽথ মামব্রবীদ্দৃষ্ট্বা ভৃশমুদ্বিগ্নচেতসম্
11.8
মুহুরুষ্ণং বিনিঃশ্বস্য সুসংভ্রান্তস্তপোধনঃ
নানৃতং বৈ ময়া প্রোক্তং ভবিতেদং কথংচন
11.9
যত্তু বক্ষ্যামি তে বাক্যং শৃণু তন্মে ধৃতব্রত
শ্রুত্বা চ হৃদি তে বাক্যমিদমস্তু তপোধন
11.10
উত্পত্স্যতি রুরুর্নাম প্রমতেরাত্মজঃ শুচিঃ
তং দৃষ্ট্বা শাপমোক্ষস্তে ভবিতা নচিরাদিব
11.11
স ত্বং রুরুরিতি খ্যাতঃ প্রমতেরাত্মজঃ শুচিঃ
স্বরূপং প্রতিলভ্যাহমদ্য বক্ষ্যামি তে হিতম্
11.12
অহিংসা পরমো ধর্মঃ সর্বপ্রাণভৃতাং স্মৃতঃ
তস্মাত্প্রাণভৃতঃ সর্বান্ন হিংস্যাদ্ব্রাহ্মণঃ ক্বচিৎ
11.13
ব্রাহ্মণঃ সৌম্য এবেহ জায়তেতি পরা শ্রুতিঃ
বেদবেদাঙ্গবিত্তাত সর্বভূতাভয়প্রদঃ
11.14
অহিংসা সত্যবচনং ক্ষমা চেতি বিনিশ্চিতম্
ব্রাহ্মণস্য পরো ধর্মো বেদানাং ধরণাদপি
11.15
ক্ষত্রিয়স্য তু যো ধর্মঃ স নেহেষ্যতি বৈ তব
দণ্ডধারণমুগ্রত্বং প্রজানাং পরিপালনম্
11.16
তদিদং ক্ষত্রিয়স্যাসীত্কর্ম বৈ শৃণু মে রুরো
জনমেজয়স্য ধর্মাত্মন্সর্পাণাং হিংসনং পুরা
11.17
পরিত্রাণং চ ভীতানাং সর্পাণাং ব্রাহ্মণাদপি
তপোবীর্যবলোপেতাদ্বেদবেদাঙ্গপারগাৎ
আস্তীকাদ্দ্বিজমুখ্যাদ্বৈ সর্পসত্রে দ্বিজোত্তম