UtshovChapter 11
11.1
डुण्डुभ उवाच
सखा बभूव मे पूर्वं खगमो नाम वै द्विजः
भृशं संशितवाक्तात तपोबलसमन्वितः
Dundubha uvacha
Sakha babhuva me purvam khagamo nama vai dvijah
Bhrisham sanshitavaktata tapobalasamanvitah
11.2
स मया क्रीडता बाल्ये कृत्वा तार्णमथोरगम्
अग्निहोत्रे प्रसक्तः सन्भीषितः प्रमुमोह वै
Sa maya kridata balye kritva tarnamathoragam
Agnihotre prasaktah sanbhishitah pramumoha vai
11.3
लब्ध्वा च स पुनः संज्ञां मामुवाच तपोधनः
निर्दहन्निव कोपेन सत्यवाक्संशितव्रतः
Labdhva cha sa punah sangyam mamuvacha tapodhanah
Nirdahanniva kopena satyavaksanshitavratah
11.4
यथावीर्यस्त्वया सर्पः कृतोऽयं मद्बिभीषया
तथावीर्यो भुजंगस्त्वं मम कोपाद्भविष्यसि
Yathaviryastvaya sarpah kritoyam madbibhishaya
Tathaviryo bhujangastvam mama kopadbhavishyasi
11.5
तस्याहं तपसो वीर्यं जानमानस्तपोधन
भृशमुद्विग्नहृदयस्तमवोचं वनौकसम्
Tasyaham tapaso viryam janamanastapodhana
Bhrishamudvignahridayastamavocham vanaukasam
11.6
प्रयतः संभ्रमाच्चैव प्राञ्जलिः प्रणतः स्थितः
सखेति हसतेदं ते नर्मार्थं वै कृतं मया
Prayatah sambhramachchaiva pranjalih pranatah sthitah
Sakheti hasatedam te narmartham vai kritam maya
11.7
क्षन्तुमर्हसि मे ब्रह्मञ्शापोऽयं विनिवर्त्यताम्
सोऽथ मामब्रवीद्दृष्ट्वा भृशमुद्विग्नचेतसम्
Kshantumarhasi me brahmanshapoyam vinivartyatam
Sotha mamabraviddrishtva bhrishamudvignachetasam
11.8
मुहुरुष्णं विनिःश्वस्य सुसंभ्रान्तस्तपोधनः
नानृतं वै मया प्रोक्तं भवितेदं कथंचन
Muhurushnam vinihshvasya susambhrantastapodhanah
Nanritam vai maya proktam bhavitedam kathanchana
11.9
यत्तु वक्ष्यामि ते वाक्यं शृणु तन्मे धृतव्रत
श्रुत्वा च हृदि ते वाक्यमिदमस्तु तपोधन
Yattu vakshyami te vakyam shrinu tanme dhritavrata
Shrutva cha hridi te vakyamidamastu tapodhana
11.10
उत्पत्स्यति रुरुर्नाम प्रमतेरात्मजः शुचिः
तं दृष्ट्वा शापमोक्षस्ते भविता नचिरादिव
Utpatsyati rururnama pramateratmajah shuchih
Tam drishtva shapamokshaste bhavita nachiradiva
11.11
स त्वं रुरुरिति ख्यातः प्रमतेरात्मजः शुचिः
स्वरूपं प्रतिलभ्याहमद्य वक्ष्यामि ते हितम्
Sa tvam rururiti khyatah pramateratmajah shuchih
Svarupam pratilabhyahamadya vakshyami te hitam
11.12
अहिंसा परमो धर्मः सर्वप्राणभृतां स्मृतः
तस्मात्प्राणभृतः सर्वान्न हिंस्याद्ब्राह्मणः क्वचित्
Ahinsa paramo dharmah sarvapranabhritam smritah
Tasmatpranabhritah sarvanna hinsyadbrahmanah kvachit
11.13
ब्राह्मणः सौम्य एवेह जायतेति परा श्रुतिः
वेदवेदाङ्गवित्तात सर्वभूताभयप्रदः
Brahmanah saumya eveha jayateti para shrutih
Vedavedangavittata sarvabhutabhayapradah
11.14
अहिंसा सत्यवचनं क्षमा चेति विनिश्चितम्
ब्राह्मणस्य परो धर्मो वेदानां धरणादपि
Ahinsa satyavachanam kshama cheti vinishchitam
Brahmanasya paro dharmo vedanam dharanadapi
11.15
क्षत्रियस्य तु यो धर्मः स नेहेष्यति वै तव
दण्डधारणमुग्रत्वं प्रजानां परिपालनम्
Kshatriyasya tu yo dharmah sa neheshyati vai tava
Dandadharanamugratvam prajanam paripalanam
11.16
तदिदं क्षत्रियस्यासीत्कर्म वै शृणु मे रुरो
जनमेजयस्य धर्मात्मन्सर्पाणां हिंसनं पुरा
Tadidam kshatriyasyasitkarma vai shrinu me ruro
Janamejayasya dharmatmansarpanam hinsanam pura
11.17
परित्राणं च भीतानां सर्पाणां ब्राह्मणादपि
तपोवीर्यबलोपेताद्वेदवेदाङ्गपारगात्
आस्तीकाद्द्विजमुख्याद्वै सर्पसत्रे द्विजोत्तम
Paritranam cha bhitanam sarpanam brahmanadapi
Tapoviryabalopetadvedavedangaparagat
Astikaddvijamukhyadvai sarpasatre dvijottama