অধ্যায় 8

8.1

সূত উবাচ
স চাপি চ্যবনো ব্রহ্মন্ভার্গবোঽজনয়ত্সুতম্
সুকন্যায়াং মহাত্মানং প্রমতিং দীপ্ততেজসম্

প্রমতিস্তু রুরুং নাম ঘৃতাচ্যাং সমজীজনৎ
রুরুঃ প্রমদ্বরায়াং তু শুনকং সমজীজনৎ

তস্য ব্রহ্মন্রুরোঃ সর্বং চরিতং ভূরিতেজসঃ
বিস্তরেণ প্রবক্ষ্যামি তচ্ছৃণু ত্বমশেষতঃ

ঋষিরাসীন্মহান্পূর্বং তপোবিদ্যাসমন্বিতঃ
স্থূলকেশ ইতি খ্যাতঃ সর্বভূতহিতে রতঃ

এতস্মিন্নেব কালে তু মেনকায়াং প্রজজ্ঞিবান্
গন্ধর্বরাজো বিপ্রর্ষে বিশ্বাবসুরিতি শ্রুতঃ

অথাপ্সরা মেনকা সা তং গর্ভং ভৃগুনন্দন
উত্সসর্জ যথাকালং স্থূলকেশাশ্রমং প্রতি

উত্সৃজ্য চৈব তং গর্ভং নদ্যাস্তীরে জগাম হ
কন্যামমরগর্ভাভাং জ্বলন্তীমিব চ শ্রিয়া

তাং দদর্শ সমুত্সৃষ্টাং নদীতীরে মহানৃষিঃ
স্থূলকেশঃ স তেজস্বী বিজনে বন্ধুবর্জিতাম্

স তাং দৃষ্ট্বা তদা কন্যাং স্থূলকেশো দ্বিজোত্তমঃ
জগ্রাহাথ মুনিশ্রেষ্ঠঃ কৃপাবিষ্টঃ পুপোষ চ
ববৃধে সা বরারোহা তস্যাশ্রমপদে শুভা

প্রমদাভ্যো বরা সা তু সর্বরূপগুণান্বিতা
ততঃ প্রমদ্বরেত্যস্যা নাম চক্রে মহানৃষিঃ

তামাশ্রমপদে তস্য রুরুর্দৃষ্ট্বা প্রমদ্বরাম্
বভূব কিল ধর্মাত্মা মদনানুগতাত্মবান্

পিতরং সখিভিঃ সোঽথ বাচয়ামাস ভার্গবঃ
প্রমতিশ্চাভ্যয়াচ্ছ্রুত্বা স্থূলকেশং যশস্বিনম্

ততঃ প্রাদাত্পিতা কন্যাং রুরবে তাং প্রমদ্বরাম্
বিবাহং স্থাপয়িত্বাগ্রে নক্ষত্রে ভগদৈবতে

ততঃ কতিপয়াহস্য বিবাহে সমুপস্থিতে
সখীভিঃ ক্রীডতী সার্ধং সা কন্যা বরবর্ণিনী

নাপশ্যত প্রসুপ্তং বৈ ভুজগং তির্যগায়তম্
পদা চৈনং সমাক্রামন্মুমূর্ষুঃ কালচোদিতা

স তস্যাঃ সংপ্রমত্তায়াশ্চোদিতঃ কালধর্মণা
বিষোপলিপ্তান্দশনান্ভৃশমঙ্গে ন্যপাতয়ৎ

সা দষ্টা সহসা ভূমৌ পতিতা গতচেতনা
ব্যসুরপ্রেক্ষণীয়াপি প্রেক্ষণীয়তমাকৃতিঃ

প্রসুপ্তেবাভবচ্চাপি ভুবি সর্পবিষার্দিতা
ভূয়ো মনোহরতরা বভূব তনুমধ্যমা

দদর্শ তাং পিতা চৈব তে চৈবান্যে তপস্বিনঃ
বিচেষ্টমানাং পতিতাং ভূতলে পদ্মবর্চসম্

ততঃ সর্বে দ্বিজবরাঃ সমাজগ্মুঃ কৃপান্বিতাঃ
স্বস্ত্যাত্রেয়ো মহাজানুঃ কুশিকঃ শঙ্খমেখলঃ

ভারদ্বাজঃ কৌণকুত্স আর্ষ্টিষেণোঽথ গৌতমঃ
প্রমতিঃ সহ পুত্রেণ তথান্যে বনবাসিনঃ

তাং তে কন্যাং ব্যসুং দৃষ্ট্বা ভুজগস্য বিষার্দিতাম্
রুরুদুঃ কৃপয়াবিষ্টা রুরুস্ত্বার্তো বহির্যয়ৌ