অধ্যায় 7

7.1

সূত উবাচ
শপ্তস্তু ভৃগুণা বহ্নিঃ ক্রুদ্ধো বাক্যমথাব্রবীৎ
কিমিদং সাহসং ব্রহ্মন্কৃতবানসি সাংপ্রতম্

7.2

ধর্মে প্রয়তমানস্য সত্যং চ বদতঃ সমম্
পৃষ্টো যদব্রুবং সত্যং ব্যভিচারোঽত্র কো মম

7.3

পৃষ্টো হি সাক্ষী যঃ সাক্ষ্যং জানমানোঽন্যথা বদেৎ
স পূর্বানাত্মনঃ সপ্ত কুলে হন্যাত্তথা পরান্

7.4

যশ্চ কার্যার্থতত্ত্বজ্ঞো জানমানো ন ভাষতে
সোঽপি তেনৈব পাপেন লিপ্যতে নাত্র সংশয়ঃ

7.5

শক্তোঽহমপি শপ্তুং ত্বাং মান্যাস্তু ব্রাহ্মণা মম
জানতোঽপি চ তে ব্যক্তং কথয়িষ্যে নিবোধ তৎ

7.6

যোগেন বহুধাত্মানং কৃত্বা তিষ্ঠামি মূর্তিষু
অগ্নিহোত্রেষু সত্রেষু ক্রিয়াস্বথ মখেষু চ

7.7

বেদোক্তেন বিধানেন ময়ি যদ্ধূয়তে হবিঃ
দেবতাঃ পিতরশ্চৈব তেন তৃপ্তা ভবন্তি বৈ

7.8

আপো দেবগণাঃ সর্বে আপঃ পিতৃগণাস্তথা
দর্শশ্চ পৌর্ণমাসশ্চ দেবানাং পিতৃভিঃ সহ

7.9

দেবতাঃ পিতরস্তস্মাত্পিতরশ্চাপি দেবতাঃ
একীভূতাশ্চ পূজ্যন্তে পৃথক্ত্বেন চ পর্বসু

7.10

দেবতাঃ পিতরশ্চৈব জুহ্বতে ময়ি যত্সদা
ত্রিদশানাং পিতৄণাং চ মুখমেবমহং স্মৃতঃ

7.11

অমাবাস্যাং চ পিতরঃ পৌর্ণমাস্যাং চ দেবতাঃ
মন্মুখেনৈব হূয়ন্তে ভুঞ্জতে চ হুতং হবিঃ
সর্বভক্ষঃ কথং তেষাং ভবিষ্যামি মুখং ত্বহম্

7.12

চিন্তয়িত্বা ততো বহ্নিশ্চক্রে সংহারমাত্মনঃ
দ্বিজানামগ্নিহোত্রেষু যজ্ঞসত্রক্রিয়াসু চ

7.13

নিরোংকারবষট্কারাঃ স্বধাস্বাহাবিবর্জিতাঃ
বিনাগ্নিনা প্রজাঃ সর্বাস্তত আসন্সুদুঃখিতাঃ

7.14

অথর্ষয়ঃ সমুদ্বিগ্না দেবান্গত্বাব্রুবন্বচঃ
অগ্নিনাশাত্ক্রিয়াভ্রংশাদ্ভ্রান্তা লোকাস্ত্রয়োঽনঘাঃ
বিধধ্বমত্র যত্কার্যং ন স্যাত্কালাত্যয়ো যথা

7.15

অথর্ষয়শ্চ দেবাশ্চ ব্রহ্মাণমুপগম্য তু
অগ্নেরাবেদয়ঞ্শাপং ক্রিয়াসংহারমেব চ

7.16

ভৃগুণা বৈ মহাভাগ শপ্তোঽগ্নিঃ কারণান্তরে
কথং দেবমুখো ভূত্বা যজ্ঞভাগাগ্রভুক্তথা
হুতভুক্সর্বলোকেষু সর্বভক্ষত্বমেষ্যতি

7.17

শ্রুত্বা তু তদ্বচস্তেষামগ্নিমাহূয় লোককৃৎ
উবাচ বচনং শ্লক্ষ্ণং ভূতভাবনমব্যয়ম্

7.18

লোকানামিহ সর্বেষাং ত্বং কর্তা চান্ত এব চ
ত্বং ধারয়সি লোকাংস্ত্রীন্ক্রিয়াণাং চ প্রবর্তকঃ
স তথা কুরু লোকেশ নোচ্ছিদ্যেরন্ক্রিয়া যথা

7.19

কস্মাদেবং বিমূঢস্ত্বমীশ্বরঃ সন্হুতাশনঃ
ত্বং পবিত্রং যদা লোকে সর্বভূতগতশ্চ হ

7.20

ন ত্বং সর্বশরীরেণ সর্বভক্ষত্বমেষ্যসি
উপাদানেঽর্চিষো যাস্তে সর্বং ধক্ষ্যন্তি তাঃ শিখিন্

7.21

যথা সূর্যাংশুভিঃ স্পৃষ্টং সর্বং শুচি বিভাব্যতে
তথা ত্বদর্চির্নির্দগ্ধং সর্বং শুচি ভবিষ্যতি

7.22

তদগ্নে ত্বং মহত্তেজঃ স্বপ্রভাবাদ্বিনির্গতম্
স্বতেজসৈব তং শাপং কুরু সত্যমৃষের্বিভো
দেবানাং চাত্মনো ভাগং গৃহাণ ত্বং মুখে হুতম্

7.23

এবমস্ত্বিতি তং বহ্নিঃ প্রত্যুবাচ পিতামহম্
জগাম শাসনং কর্তুং দেবস্য পরমেষ্ঠিনঃ

7.24

দেবর্ষয়শ্চ মুদিতাস্ততো জগ্মুর্যথাগতম্
ঋষয়শ্চ যথাপূর্বং ক্রিয়াঃ সর্বাঃ প্রচক্রিরে

7.25

দিবি দেবা মুমুদিরে ভূতসংঘাশ্চ লৌকিকাঃ
অগ্নিশ্চ পরমাং প্রীতিমবাপ হতকল্মষঃ

7.26

এবমেষ পুরাবৃত্ত ইতিহাসোঽগ্নিশাপজঃ
পুলোমস্য বিনাশশ্চ চ্যবনস্য চ সংভবঃ

Contains text from DharmicData, made available under the Open Database License (ODbL). Simple meanings are written by AI and can contain mistakes.