অধ্যায় 6

6.1

সূত উবাচ
অগ্নেরথ বচঃ শ্রুত্বা তদ্রক্ষঃ প্রজহার তাম্
ব্রহ্মন্বরাহরূপেণ মনোমারুতরংহসা

ততঃ স গর্ভো নিবসন্কুক্ষৌ ভৃগুকুলোদ্বহ
রোষান্মাতুশ্চ্যুতঃ কুক্ষেশ্চ্যবনস্তেন সোঽভবৎ

তং দৃষ্ট্বা মাতুরুদরাচ্চ্যুতমাদিত্যবর্চসম্
তদ্রক্ষো ভস্মসাদ্ভূতং পপাত পরিমুচ্য তাম্

সা তমাদায় সুশ্রোণী সসার ভৃগুনন্দনম্
চ্যবনং ভার্গবং ব্রহ্মন্পুলোমা দুঃখমূর্চ্ছিতা

তাং দদর্শ স্বয়ং ব্রহ্মা সর্বলোকপিতামহঃ
রুদতীং বাষ্পপূর্ণাক্ষীং ভৃগোর্ভার্যামনিন্দিতাম্
সান্ত্বয়ামাস ভগবান্বধূং ব্রহ্মা পিতামহঃ

অশ্রুবিন্দূদ্ভবা তস্যাঃ প্রাবর্তত মহানদী
অনুবর্ততী সৃতিং তস্যা ভৃগোঃ পত্ন্যা যশস্বিনঃ

তস্যা মার্গং সৃতবতীং দৃষ্ট্বা তু সরিতং তদা
নাম তস্যাস্তদা নদ্যাশ্চক্রে লোকপিতামহঃ
বধূসরেতি ভগবাংশ্চ্যবনস্যাশ্রমং প্রতি

স এবং চ্যবনো জজ্ঞে ভৃগোঃ পুত্রঃ প্রতাপবান্
তং দদর্শ পিতা তত্র চ্যবনং তাং চ ভামিনীম্

স পুলোমাং ততো ভার্যাং পপ্রচ্ছ কুপিতো ভৃগুঃ
কেনাসি রক্ষসে তস্মৈ কথিতেহ জিহীর্ষবে
ন হি ত্বাং বেদ তদ্রক্ষো মদ্ভার্যাং চারুহাসিনীম্

তত্ত্বমাখ্যাহি তং হ্যদ্য শপ্তুমিচ্ছাম্যহং রুষা
বিভেতি কো ন শাপান্মে কস্য চায়ং ব্যতিক্রমঃ

পুলোমোবাচ
অগ্নিনা ভগবংস্তস্মৈ রক্ষসেঽহং নিবেদিতা
ততো মামনয়দ্রক্ষঃ ক্রোশন্তীং কুররীমিব

সাহং তব সুতস্যাস্য তেজসা পরিমোক্ষিতা
ভস্মীভূতং চ তদ্রক্ষো মামুত্সৃজ্য পপাত বৈ

সূত উবাচ
ইতি শ্রুত্বা পুলোমায়া ভৃগুঃ পরমমন্যুমান্
শশাপাগ্নিমভিক্রুদ্ধঃ সর্বভক্ষো ভবিষ্যসি