অধ্যায় 5

5.1

শৌনক উবাচ
পুরাণমখিলং তাত পিতা তেঽধীতবান্পুরা
কচ্চিত্ত্বমপি তত্সর্বমধীষে লোমহর্ষণে

5.2

পুরাণে হি কথা দিব্যা আদিবংশাশ্চ ধীমতাম্
কথ্যন্তে তাঃ পুরাস্মাভিঃ শ্রুতাঃ পূর্বং পিতুস্তব

5.3

তত্র বংশমহং পূর্বং শ্রোতুমিচ্ছামি ভার্গবম্
কথয়স্ব কথামেতাং কল্যাঃ স্ম শ্রবণে তব

5.4

সূত উবাচ
যদধীতং পুরা সম্যগ্দ্বিজশ্রেষ্ঠ মহাত্মভিঃ
বৈশংপায়নবিপ্রাদ্যৈস্তৈশ্চাপি কথিতং পুরা

5.5

যদধীতং চ পিত্রা মে সম্যক্চৈব ততো ময়া
তত্তাবচ্ছৃণু যো দেবৈঃ সেন্দ্রৈঃ সাগ্নিমরুদ্গণৈঃ
পূজিতঃ প্রবরো বংশো ভৃগূণাং ভৃগুনন্দন

5.6

ইমং বংশমহং ব্রহ্মন্ভার্গবং তে মহামুনে
নিগদামি কথায়ুক্তং পুরাণাশ্রয়সংয়ুতম্

5.7

ভৃগোঃ সুদয়িতঃ পুত্রশ্চ্যবনো নাম ভার্গবঃ
চ্যবনস্যাপি দায়াদঃ প্রমতির্নাম ধার্মিকঃ
প্রমতেরপ্যভূত্পুত্রো ঘৃতাচ্যাং রুরুরিত্যুত

5.8

রুরোরপি সুতো জজ্ঞে শুনকো বেদপারগঃ
প্রমদ্বরায়াং ধর্মাত্মা তব পূর্বপিতামহাৎ

5.9

তপস্বী চ যশস্বী চ শ্রুতবান্ব্রহ্মবিত্তমঃ
ধর্মিষ্ঠঃ সত্যবাদী চ নিয়তো নিয়তেন্দ্রিয়ঃ

5.10

শৌনক উবাচ
সূতপুত্র যথা তস্য ভার্গবস্য মহাত্মনঃ
চ্যবনত্বং পরিখ্যাতং তন্মমাচক্ষ্ব পৃচ্ছতঃ

5.11

সূত উবাচ
ভৃগোঃ সুদয়িতা ভার্যা পুলোমেত্যভিবিশ্রুতা
তস্যাং গর্ভঃ সমভবদ্ভৃগোর্বীর্যসমুদ্ভবঃ

5.12

তস্মিন্গর্ভে সংভৃতেঽথ পুলোমায়াং ভৃগূদ্বহ
সময়ে সমশীলিন্যাং ধর্মপত্ন্যাং যশস্বিনঃ

5.13

অভিষেকায় নিষ্ক্রান্তে ভৃগৌ ধর্মভৃতাং বরে
আশ্রমং তস্য রক্ষোঽথ পুলোমাভ্যাজগাম হ

5.14

তং প্রবিশ্যাশ্রমং দৃষ্ট্বা ভৃগোর্ভার্যামনিন্দিতাম্
হৃচ্ছয়েন সমাবিষ্টো বিচেতাঃ সমপদ্যত

5.15

অভ্যাগতং তু তদ্রক্ষঃ পুলোমা চারুদর্শনা
ন্যমন্ত্রয়ত বন্যেন ফলমূলাদিনা তদা

5.16

তাং তু রক্ষস্ততো ব্রহ্মন্হৃচ্ছয়েনাভিপীডিতম্
দৃষ্ট্বা হৃষ্টমভূত্তত্র জিহীর্ষুস্তামনিন্দিতাম্

5.17

অথাগ্নিশরণেঽপশ্যজ্জ্বলিতং জাতবেদসম্
তমপৃচ্ছত্ততো রক্ষঃ পাবকং জ্বলিতং তদা

5.18

শংস মে কস্য ভার্যেয়মগ্নে পৃষ্ট ঋতেন বৈ
সত্যস্ত্বমসি সত্যং মে বদ পাবক পৃচ্ছতে

5.19

ময়া হীয়ং পূর্ববৃতা ভার্যার্থে বরবর্ণিনী
পশ্চাত্ত্বিমাং পিতা প্রাদাদ্ভৃগবেঽনৃতকারিণে

5.20

সেয়ং যদি বরারোহা ভৃগোর্ভার্যা রহোগতা
তথা সত্যং সমাখ্যাহি জিহীর্ষাম্যাশ্রমাদিমাম্

5.21

মন্যুর্হি হৃদয়ং মেঽদ্য প্রদহন্নিব তিষ্ঠতি
মত্পূর্বভার্যাং যদিমাং ভৃগুঃ প্রাপ সুমধ্যমাম্

5.22

তদ্রক্ষ এবমামন্ত্র্য জ্বলিতং জাতবেদসম্
শঙ্কমানো ভৃগোর্ভার্যাং পুনঃ পুনরপৃচ্ছত

5.23

ত্বমগ্নে সর্বভূতানামন্তশ্চরসি নিত্যদা
সাক্ষিবত্পুণ্যপাপেষু সত্যং ব্রূহি কবে বচঃ

5.24

মত্পূর্বভার্যাপহৃতা ভৃগুণানৃতকারিণা
সেয়ং যদি তথা মে ত্বং সত্যমাখ্যাতুমর্হসি

5.25

শ্রুত্বা ত্বত্তো ভৃগোর্ভার্যাং হরিষ্যাম্যহমাশ্রমাৎ
জাতবেদঃ পশ্যতস্তে বদ সত্যাং গিরং মম

5.26

তস্য তদ্বচনং শ্রুত্বা সপ্তার্চির্দুঃখিতো ভৃশম্
ভীতোঽনৃতাচ্চ শাপাচ্চ ভৃগোরিত্যব্রবীচ্ছনৈঃ

Contains text from DharmicData, made available under the Open Database License (ODbL). Simple meanings are written by AI and can contain mistakes.