অধ্যায় 4

4.1

লোমহর্ষণপুত্র উগ্রশ্রবাঃ সূতঃ পৌরাণিকো নৈমিষারণ্যে শৌনকস্য কুলপতের্দ্বাদশবার্ষিকে সত্রে ঋষীনভ্যাগতানুপতস্থে

পৌরাণিকঃ পুরাণে কৃতশ্রমঃ স তান্কৃতাঞ্জলিরুবাচ
কিং ভবন্তঃ শ্রোতুমিচ্ছন্তি
কিমহং ব্রুবাণীতি

তমৃষয় ঊচুঃ
পরমং লোমহর্ষণে প্রক্ষ্যামস্ত্বাং বক্ষ্যসি চ নঃ শুশ্রূষতাং কথায়োগম্
তদ্ভগবাংস্তু তাবচ্ছৌনকোঽগ্নিশরণমধ্যাস্তে

যোঽসৌ দিব্যাঃ কথা বেদ দেবতাসুরসংকথাঃ
মনুষ্যোরগগন্ধর্বকথা বেদ চ সর্বশঃ

স চাপ্যস্মিন্মখে সৌতে বিদ্বান্কুলপতির্দ্বিজঃ
দক্ষো ধৃতব্রতো ধীমাঞ্শাস্ত্রে চারণ্যকে গুরুঃ

সত্যবাদী শমপরস্তপস্বী নিয়তব্রতঃ
সর্বেষামেব নো মান্যঃ স তাবত্প্রতিপাল্যতাম্

তস্মিন্নধ্যাসতি গুরাবাসনং পরমার্চিতম্
ততো বক্ষ্যসি যত্ত্বাং স প্রক্ষ্যতি দ্বিজসত্তমঃ

সূত উবাচ
এবমস্তু গুরৌ তস্মিন্নুপবিষ্টে মহাত্মনি
তেন পৃষ্টঃ কথাঃ পুণ্যা বক্ষ্যামি বিবিধাশ্রয়াঃ

সোঽথ বিপ্রর্ষভঃ কার্যং কৃত্বা সর্বং যথাক্রমম্
দেবান্বাগ্ভিঃ পিতৄনদ্ভিস্তর্পয়িত্বাজগাম হ

যত্র ব্রহ্মর্ষয়ঃ সিদ্ধাস্ত আসীনা যতব্রতাঃ
যজ্ঞায়তনমাশ্রিত্য সূতপুত্রপুরঃসরাঃ

ঋত্বিক্ষ্বথ সদস্যেষু স বৈ গৃহপতিস্ততঃ
উপবিষ্টেষূপবিষ্টঃ শৌনকোঽথাব্রবীদিদম্