Utshovঅধ্যায় 3
3.1
সূত উবাচ
জনমেজয়ঃ পারিক্ষিতঃ সহ ভ্রাতৃভিঃ কুরুক্ষেত্রে দীর্ঘসত্রমুপাস্তে
তস্য ভ্রাতরস্ত্রয়ঃ শ্রুতসেন উগ্রসেনো ভীমসেন ইতি
3.2
তেষু তত্সত্রমুপাসীনেষু তত্র শ্বাভ্যাগচ্ছত্সারমেয়ঃ
স জনমেজয়স্য ভ্রাতৃভিরভিহতো রোরূয়মাণো মাতুঃ সমীপমুপাগচ্ছৎ
3.3
তং মাতা রোরূয়মাণমুবাচ
কিং রোদিষি
কেনাস্যভিহত ইতি
3.4
স এবমুক্তো মাতরং প্রত্যুবাচ
জনমেজয়স্য ভ্রাতৃভিরভিহতোঽস্মীতি
3.5
তং মাতা প্রত্যুবাচ
ব্যক্তং ত্বয়া তত্রাপরাদ্ধং যেনাস্যভিহত ইতি
3.6
স তাং পুনরুবাচ
নাপরাধ্যামি কিংচিৎ
নাবেক্ষে হবীংষি নাবলিহ ইতি
3.7
তচ্ছ্রুত্বা তস্য মাতা সরমা পুত্রশোকার্তা তত্সত্রমুপাগচ্ছদ্যত্র স জনমেজয়ঃ সহ ভ্রাতৃভির্দীর্ঘসত্রমুপাস্তে
3.8
স তয়া ক্রুদ্ধয়া তত্রোক্তঃ
অয়ং মে পুত্রো ন কিংচিদপরাধ্যতি
কিমর্থমভিহত ইতি
যস্মাচ্চায়মভিহতোঽনপকারী তস্মাদদৃষ্টং ত্বাং ভয়মাগমিষ্যতীতি
3.9
স জনমেজয় এবমুক্তো দেবশুন্যা সরময়া দৃঢং সংভ্রান্তো বিষণ্ণশ্চাসীৎ
3.10
স তস্মিন্সত্রে সমাপ্তে হাস্তিনপুরং প্রত্যেত্য পুরোহিতমনুরূপমন্বিচ্ছমানঃ পরং যত্নমকরোদ্যো মে পাপকৃত্যাং শময়েদিতি
3.11
স কদাচিন্মৃগয়াং যাতঃ পারিক্ষিতো জনমেজয়ঃ কস্মিংশ্চিত্স্ববিষয়োদ্দেশে আশ্রমমপশ্যৎ
3.12
তত্র কশ্চিদৃষিরাসাং চক্রে শ্রুতশ্রবা নাম
তস্যাভিমতঃ পুত্র আস্তে সোমশ্রবা নাম
3.13
তস্য তং পুত্রমভিগম্য জনমেজয়ঃ পারিক্ষিতঃ পৌরোহিত্যায় বব্রে
3.14
স নমস্কৃত্য তমৃষিমুবাচ
ভগবন্নয়ং তব পুত্রো মম পুরোহিতোঽস্ত্বিতি
3.15
স এবমুক্তঃ প্রত্যুবাচ
ভো জনমেজয় পুত্রোঽয়ং মম সর্প্যাং জাতঃ
মহাতপস্বী স্বাধ্যায়সংপন্নো মত্তপোবীর্যসংভৃতো মচ্ছুক্রং পীতবত্যাস্তস্যাঃ কুক্ষৌ সংবৃদ্ধঃ
সমর্থোঽয়ং ভবতঃ সর্বাঃ পাপকৃত্যাঃ শময়িতুমন্তরেণ মহাদেবকৃত্যাম্
অস্য ত্বেকমুপাংশুব্রতম্
যদেনং কশ্চিদ্ব্রাহ্মণঃ কংচিদর্থমভিয়াচেত্তং তস্মৈ দদ্যাদয়ম্
যদ্যেতদুত্সহসে ততো নয়স্বৈনমিতি
3.16
তেনৈবমুক্তো জনমেজয়স্তং প্রত্যুবাচ
ভগবংস্তথা ভবিষ্যতীতি
3.17
স তং পুরোহিতমুপাদায়োপাবৃত্তো ভ্রাতৄনুবাচ
ময়ায়ং বৃত উপাধ্যায়ঃ
যদয়ং ব্রূয়াত্তত্কার্যমবিচারয়দ্ভিরিতি
3.18
তেনৈবমুক্তা ভ্রাতরস্তস্য তথা চক্রুঃ
স তথা ভ্রাতৄন্সংদিশ্য তক্ষশিলাং প্রত্যভিপ্রতস্থে
তং চ দেশং বশে স্থাপয়ামাস
3.19
এতস্মিন্নন্তরে কশ্চিদৃষির্ধৌম্যো নামায়োদঃ
তস্য শিষ্যাস্ত্রয়ো বভূবুরুপমন্যুরারুণির্বেদশ্চেতি
3.20
স একং শিষ্যমারুণিং পাঞ্চাল্যং প্রেষয়ামাস
গচ্ছ কেদারখণ্ডং বধানেতি
3.21
স উপাধ্যায়েন সংদিষ্ট আরুণিঃ পাঞ্চাল্যস্তত্র গত্বা তত্কেদারখণ্ডং বদ্ধুং নাশক্নোৎ
3.22
স ক্লিশ্যমানোঽপশ্যদুপায়ম্
ভবত্বেবং করিষ্যামীতি
3.23
স তত্র সংবিবেশ কেদারখণ্ডে
শয়ানে তস্মিংস্তদুদকং তস্থৌ
3.24
ততঃ কদাচিদুপাধ্যায় আয়োদো ধৌম্যঃ শিষ্যানপৃচ্ছৎ
ক্ব আরুণিঃ পাঞ্চাল্যো গত ইতি
3.25
তে প্রত্যূচুঃ
ভগবতৈব প্রেষিতো গচ্ছ কেদারখণ্ডং বধানেতি
3.26
স এবমুক্তস্তাঞ্শিষ্যান্প্রত্যুবাচ
তস্মাত্সর্বে তত্র গচ্ছামো যত্র স ইতি
3.27
স তত্র গত্বা তস্যাহ্বানায় শব্দং চকার
ভো আরুণে পাঞ্চাল্য ক্বাসি
বত্সৈহীতি
3.28
স তচ্ছ্রুত্বা আরুণিরুপাধ্যায়বাক্যং তস্মাত্কেদারখণ্ডাত্সহসোত্থায় তমুপাধ্যায়মুপতস্থে
প্রোবাচ চৈনম্
অয়মস্ম্যত্র কেদারখণ্ডে নিঃসরমাণমুদকমবারণীয়ং সংরোদ্ধুং সংবিষ্টো ভগবচ্ছব্দং শ্রুত্বৈব সহসা বিদার্য কেদারখণ্ডং ভবন্তমুপস্থিতঃ
তদভিবাদয়ে ভগবন্তম্
আজ্ঞাপয়তু ভবান্
কিং করবাণীতি
3.29
তমুপাধ্যায়োঽব্রবীৎ
যস্মাদ্ভবান্কেদারখণ্ডমবদার্যোত্থিতস্তস্মাদ্ভবানুদ্দালক এব নাম্না ভবিষ্যতীতি
3.30
স উপাধ্যায়েনানুগৃহীতঃ
যস্মাত্ত্বয়া মদ্বচোঽনুষ্ঠিতং তস্মাচ্ছ্রেয়োঽবাপ্স্যসীতি
সর্বে চ তে বেদাঃ প্রতিভাস্যন্তি সর্বাণি চ ধর্মশাস্ত্রাণীতি
3.31
স এবমুক্ত উপাধ্যায়েনেষ্টং দেশং জগাম
3.32
অথাপরঃ শিষ্যস্তস্যৈবায়োদস্য ধৌম্যস্যোপমন্যুর্নাম
3.33
তমুপাধ্যায়ঃ প্রেষয়ামাস
বত্সোপমন্যো গা রক্ষস্বেতি
3.34
স উপাধ্যায়বচনাদরক্ষদ্গাঃ
স চাহনি গা রক্ষিত্বা দিবসক্ষয়েঽভ্যাগম্যোপাধ্যায়স্যাগ্রতঃ স্থিত্বা নমশ্চক্রে
3.35
তমুপাধ্যায়ঃ পীবানমপশ্যৎ
উবাচ চৈনম্
বত্সোপমন্যো কেন বৃত্তিং কল্পয়সি
পীবানসি দৃঢমিতি
3.36
স উপাধ্যায়ং প্রত্যুবাচ
ভৈক্ষেণ বৃত্তিং কল্পয়ামীতি
3.37
তমুপাধ্যায়ঃ প্রত্যুবাচ
মমানিবেদ্য ভৈক্ষং নোপয়োক্তব্যমিতি
3.38
স তথেত্যুক্ত্বা পুনররক্ষদ্গাঃ
রক্ষিত্বা চাগম্য তথৈবোপাধ্যায়স্যাগ্রতঃ স্থিত্বা নমশ্চক্রে
3.39
তমুপাধ্যায়স্তথাপি পীবানমেব দৃষ্ট্বোবাচ
বত্সোপমন্যো সর্বমশেষতস্তে ভৈক্ষং গৃহ্ণামি
কেনেদানীং বৃত্তিং কল্পয়সীতি
3.40
স এবমুক্ত উপাধ্যায়েন প্রত্যুবাচ
ভগবতে নিবেদ্য পূর্বমপরং চরামি
তেন বৃত্তিং কল্পয়ামীতি
3.41
তমুপাধ্যায়ঃ প্রত্যুবাচ
নৈষা ন্যায্যা গুরুবৃত্তিঃ
অন্যেষামপি বৃত্ত্যুপরোধং করোষ্যেবং বর্তমানঃ
লুব্ধোঽসীতি
3.42
স তথেত্যুক্ত্বা গা অরক্ষৎ
রক্ষিত্বা চ পুনরুপাধ্যায়গৃহমাগম্যোপাধ্যায়স্যাগ্রতঃ স্থিত্বা নমশ্চক্রে
3.43
তমুপাধ্যায়স্তথাপি পীবানমেব দৃষ্ট্বা পুনরুবাচ
অহং তে সর্বং ভৈক্ষং গৃহ্ণামি ন চান্যচ্চরসি
পীবানসি
কেন বৃত্তিং কল্পয়সীতি
3.44
স উপাধ্যায়ং প্রত্যুবাচ
ভো এতাসাং গবাং পয়সা বৃত্তিং কল্পয়ামীতি
3.45
তমুপাধ্যায়ঃ প্রত্যুবাচ
নৈতন্ন্যায্যং পয় উপয়োক্তুং ভবতো ময়াননুজ্ঞাতমিতি
3.46
স তথেতি প্রতিজ্ঞায় গা রক্ষিত্বা পুনরুপাধ্যায়গৃহানেত্য গুরোরগ্রতঃ স্থিত্বা নমশ্চক্রে
3.47
তমুপাধ্যায়ঃ পীবানমেবাপশ্যৎ
উবাচ চৈনম্
ভৈক্ষং নাশ্নাসি ন চান্যচ্চরসি
পয়ো ন পিবসি
পীবানসি
কেন বৃত্তিং কল্পয়সীতি
3.48
স এবমুক্ত উপাধ্যায়ং প্রত্যুবাচ
ভোঃ ফেনং পিবামি যমিমে বত্সা মাতৄণাং স্তনং পিবন্ত উদ্গিরন্তীতি
3.49
তমুপাধ্যায়ঃ প্রত্যুবাচ
এতে ত্বদনুকম্পয়া গুণবন্তো বত্সাঃ প্রভূততরং ফেনমুদ্গিরন্তি
তদেবমপি বত্সানাং বৃত্ত্যুপরোধং করোষ্যেবং বর্তমানঃ
ফেনমপি ভবান্ন পাতুমর্হতীতি
3.50
স তথেতি প্রতিজ্ঞায় নিরাহারস্তা গা অরক্ষৎ
তথা প্রতিষিদ্ধো ভৈক্ষং নাশ্নাতি ন চান্যচ্চরতি
পয়ো ন পিবতি
ফেনং নোপয়ুঙ্ক্তে
3.51
স কদাচিদরণ্যে ক্ষুধার্তোঽর্কপত্রাণ্যভক্ষয়ৎ
3.52
স তৈরর্কপত্রৈর্ভক্ষিতৈঃ ক্ষারকটূষ্ণবিপাকিভিশ্চক্ষুষ্যুপহতোঽন্ধোঽভবৎ
সোঽন্ধোঽপি চঙ্ক্রম্যমাণঃ কূপেঽপতৎ
3.53
অথ তস্মিন্ননাগচ্ছত্যুপাধ্যায়ঃ শিষ্যানবোচৎ
ময়োপমন্যুঃ সর্বতঃ প্রতিষিদ্ধঃ
স নিয়তং কুপিতঃ
ততো নাগচ্ছতি চিরগতশ্চেতি
3.54
স এবমুক্ত্বা গত্বারণ্যমুপমন্যোরাহ্বানং চক্রে
ভো উপমন্যো ক্বাসি
বত্সৈহীতি
3.55
স তদাহ্বানমুপাধ্যায়াচ্ছ্রুত্বা প্রত্যুবাচোচ্চৈঃ
অয়মস্মি ভো উপাধ্যায় কূপে পতিত ইতি
3.56
তমুপাধ্যায়ঃ প্রত্যুবাচ
কথমসি কূপে পতিত ইতি
3.57
স তং প্রত্যুবাচ
অর্কপত্রাণি ভক্ষয়িত্বান্ধীভূতোঽস্মি
অতঃ কূপে পতিত ইতি
3.58
তমুপাধ্যায়ঃ প্রত্যুবাচ
অশ্বিনৌ স্তুহি
তৌ ত্বাং চক্ষুষ্মন্তং করিষ্যতো দেবভিষজাবিতি
3.59
স এবমুক্ত উপাধ্যায়েন স্তোতুং প্রচক্রমে দেবাবশ্বিনৌ বাগ্ভিরৃগ্ভিঃ
3.60
প্র পূর্বগৌ পূর্বজৌ চিত্রভানূ; গিরা বা শংসামি তপনাবনন্তৌ
দিব্যৌ সুপর্ণৌ বিরজৌ বিমানা;বধিক্ষিয়ন্তৌ ভুবনানি বিশ্বা
3.61
হিরণ্ময়ৌ শকুনী সাংপরায়ৌ; নাসত্যদস্রৌ সুনসৌ বৈজয়ন্তৌ
শুক্রং বয়ন্তৌ তরসা সুবেমা;বভি ব্যয়ন্তাবসিতং বিবস্বৎ
3.62
গ্রস্তাং সুপর্ণস্য বলেন বর্তিকা;মমুঞ্চতামশ্বিনৌ সৌভগায়
তাবত্সুবৃত্তাবনমন্ত মায়য়া; সত্তমা গা অরুণা উদাবহন্
3.63
ষষ্টিশ্চ গাবস্ত্রিশতাশ্চ ধেনব; একং বত্সং সুবতে তং দুহন্তি
নানাগোষ্ঠা বিহিতা একদোহনা;স্তাবশ্বিনৌ দুহতো ঘর্মমুক্থ্যম্
3.64
একাং নাভিং সপ্তশতা অরাঃ শ্রিতাঃ; প্রধিষ্বন্যা বিংশতিরর্পিতা অরাঃ
অনেমি চক্রং পরিবর্ততেঽজরং; মায়াশ্বিনৌ সমনক্তি চর্ষণী
3.65
একং চক্রং বর্ততে দ্বাদশারং প্রধি;ষণ্ণাভিমেকাক্ষমমৃতস্য ধারণম্
যস্মিন্দেবা অধি বিশ্বে বিষক্তা;স্তাবশ্বিনৌ মুঞ্চতো মা বিষীদতম্
3.66
অশ্বিনাবিন্দ্রমমৃতং বৃত্তভূয়ৌ; তিরোধত্তামশ্বিনৌ দাসপত্নী
ভিত্ত্বা গিরিমশ্বিনৌ গামুদাচরন্তৌ; তদ্বৃষ্টমহ্না প্রথিতা বলস্য
3.67
যুবাং দিশো জনয়থো দশাগ্রে; সমানং মূর্ধ্নি রথয়া বিয়ন্তি
তাসাং যাতমৃষয়োঽনুপ্রয়ান্তি; দেবা মনুষ্যাঃ ক্ষিতিমাচরন্তি
3.68
যুবাং বর্ণান্বিকুরুথো বিশ্বরূপাং;স্তেঽধিক্ষিয়ন্তি ভুবনানি বিশ্বা
তে ভানবোঽপ্যনুসৃতাশ্চরন্তি; দেবা মনুষ্যাঃ ক্ষিতিমাচরন্তি
3.69
তৌ নাসত্যাবশ্বিনাবামহে বাং; স্রজং চ যাং বিভৃথঃ পুষ্করস্য
তৌ নাসত্যাবমৃতাবৃতাবৃধা;বৃতে দেবাস্তত্প্রপদেন সূতে
3.70
মুখেন গর্ভং লভতাং যুবানৌ; গতাসুরেতত্প্রপদেন সূতে
সদ্যো জাতো মাতরমত্তি গর্ভ;স্তাবশ্বিনৌ মুঞ্চথো জীবসে গাঃ
3.71
এবং তেনাভিষ্টুতাবশ্বিনাবাজগ্মতুঃ
আহতুশ্চৈনম্
প্রীতৌ স্বঃ
এষ তেঽপূপঃ
অশানৈনমিতি
3.72
স এবমুক্তঃ প্রত্যুবাচ
নানৃতমূচতুর্ভবন্তৌ
ন ত্বহমেতমপূপমুপয়োক্তুমুত্সহে অনিবেদ্য গুরব ইতি
3.73
ততস্তমশ্বিনাবূচতুঃ
আবাভ্যাং পুরস্তাদ্ভবত উপাধ্যায়েনৈবমেবাভিষ্টুতাভ্যামপূপঃ প্রীতাভ্যাং দত্তঃ
উপয়ুক্তশ্চ স তেনানিবেদ্য গুরবে
ত্বমপি তথৈব কুরুষ্ব যথা কৃতমুপাধ্যায়েনেতি
3.74
স এবমুক্তঃ পুনরেব প্রত্যুবাচৈতৌ
প্রত্যনুনয়ে ভবন্তাবশ্বিনৌ
নোত্সহেঽহমনিবেদ্যোপাধ্যায়ায়োপয়োক্তুমিতি
3.75
তমশ্বিনাবাহতুঃ
প্রীতৌ স্বস্তবানয়া গুরুবৃত্ত্যা
উপাধ্যায়স্য তে কার্ষ্ণায়সা দন্তাঃ
ভবতো হিরণ্ময়া ভবিষ্যন্তি
চক্ষুষ্মাংশ্চ ভবিষ্যসি
শ্রেয়শ্চাবাপ্স্যসীতি
3.76
স এবমুক্তোঽশ্বিভ্যাং লব্ধচক্ষুরুপাধ্যায়সকাশমাগম্যোপাধ্যায়মভিবাদ্যাচচক্ষে
স চাস্য প্রীতিমানভূৎ
3.77
আহ চৈনম্
যথাশ্বিনাবাহতুস্তথা ত্বং শ্রেয়োঽবাপ্স্যসীতি
সর্বে চ তে বেদাঃ প্রতিভাস্যন্তীতি
3.78
এষা তস্যাপি পরীক্ষোপমন্যোঃ
3.79
অথাপরঃ শিষ্যস্তস্যৈবায়োদস্য ধৌম্যস্য বেদো নাম
3.80
তমুপাধ্যায়ঃ সংদিদেশ
বত্স বেদ ইহাস্যতাম্
ভবতা মদ্গৃহে কংচিত্কালং শুশ্রূষমাণেন ভবিতব্যম্
শ্রেয়স্তে ভবিষ্যতীতি
3.81
স তথেত্যুক্ত্বা গুরুকুলে দীর্ঘকালং গুরুশুশ্রূষণপরোঽবসৎ
গৌরিব নিত্যং গুরুষু ধূর্ষু নিয়ুজ্যমানঃ শীতোষ্ণক্ষুত্তৃষ্ণাদুঃখসহঃ সর্বত্রাপ্রতিকূলঃ
3.82
তস্য মহতা কালেন গুরুঃ পরিতোষং জগাম
তত্পরিতোষাচ্চ শ্রেয়ঃ সর্বজ্ঞতাং চাবাপ
এষা তস্যাপি পরীক্ষা বেদস্য
3.83
স উপাধ্যায়েনানুজ্ঞাতঃ সমাবৃত্তস্তস্মাদ্গুরুকুলবাসাদ্গৃহাশ্রমং প্রত্যপদ্যত
তস্যাপি স্বগৃহে বসতস্ত্রয়ঃ শিষ্যা বভূবুঃ
3.84
স শিষ্যান্ন কিংচিদুবাচ
কর্ম বা ক্রিয়তাং গুরুশুশ্রূষা বেতি
দুঃখাভিজ্ঞো হি গুরুকুলবাসস্য শিষ্যান্পরিক্লেশেন যোজয়িতুং নেয়েষ
3.85
অথ কস্যচিত্কালস্য বেদং ব্রাহ্মণং জনমেজয়ঃ পৌষ্যশ্চ ক্ষত্রিয়াবুপেত্যোপাধ্যায়ং বরয়াং চক্রতুঃ
3.86
স কদাচিদ্যাজ্যকার্যেণাভিপ্রস্থিত উত্তঙ্কং নাম শিষ্যং নিয়োজয়ামাস
ভো উত্তঙ্ক যত্কিংচিদস্মদ্গৃহে পরিহীয়তে তদিচ্ছাম্যহমপরিহীণং ভবতা ক্রিয়মাণমিতি
3.87
স এবং প্রতিসমাদিশ্যোত্তঙ্কং বেদঃ প্রবাসং জগাম
3.88
অথোত্তঙ্কো গুরুশুশ্রূষুর্গুরুনিয়োগমনুতিষ্ঠমানস্তত্র গুরুকুলে বসতি স্ম
3.89
স বসংস্তত্রোপাধ্যায়স্ত্রীভিঃ সহিতাভিরাহূয়োক্তঃ
উপাধ্যায়িনী তে ঋতুমতী
উপাধ্যায়শ্চ প্রোষিতঃ
অস্যা যথায়মৃতুর্বন্ধ্যো ন ভবতি তথা ক্রিয়তাম্
এতদ্বিষীদতীতি
3.90
স এবমুক্তস্তাঃ স্ত্রিয়ঃ প্রত্যুবাচ
ন ময়া স্ত্রীণাং বচনাদিদমকার্যং কার্যম্
ন হ্যহমুপাধ্যায়েন সংদিষ্টঃ
অকার্যমপি ত্বয়া কার্যমিতি
3.91
তস্য পুনরুপাধ্যায়ঃ কালান্তরেণ গৃহানুপজগাম তস্মাত্প্রবাসাৎ
স তদ্বৃত্তং তস্যাশেষমুপলভ্য প্রীতিমানভূৎ
3.92
উবাচ চৈনম্
বত্সোত্তঙ্ক কিং তে প্রিয়ং করবাণীতি
ধর্মতো হি শুশ্রূষিতোঽস্মি ভবতা
তেন প্রীতিঃ পরস্পরেণ নৌ সংবৃদ্ধা
তদনুজানে ভবন্তম্
সর্বামেব সিদ্ধিং প্রাপ্স্যসি
গম্যতামিতি
3.93
স এবমুক্তঃ প্রত্যুবাচ
কিং তে প্রিয়ং করবাণীতি
এবং হ্যাহুঃ
3.94
যশ্চাধর্মেণ বিব্রূয়াদ্যশ্চাধর্মেণ পৃচ্ছতি
তয়োরন্যতরঃ প্রৈতি বিদ্বেষং চাধিগচ্ছতি
3.95
সোঽহমনুজ্ঞাতো ভবতা ইচ্ছামীষ্টং তে গুর্বর্থমুপহর্তুমিতি
3.96
তেনৈবমুক্ত উপাধ্যায়ঃ প্রত্যুবাচ
বত্সোত্তঙ্ক উষ্যতাং তাবদিতি
3.97
স কদাচিত্তমুপাধ্যায়মাহোত্তঙ্কঃ
আজ্ঞাপয়তু ভবান্
কিং তে প্রিয়মুপহরামি গুর্বর্থমিতি
3.98
তমুপাধ্যায়ঃ প্রত্যুবাচ
বত্সোত্তঙ্ক বহুশো মাং চোদয়সি গুর্বর্থমুপহরেয়মিতি
তদ্গচ্ছ
এনাং প্রবিশ্যোপাধ্যায়িনীং পৃচ্ছ কিমুপহরামীতি
এষা যদ্ব্রবীতি তদুপহরস্বেতি
3.99
স এবমুক্ত উপাধ্যায়েনোপাধ্যায়িনীমপৃচ্ছৎ
ভবত্যুপাধ্যায়েনাস্ম্যনুজ্ঞাতো গৃহং গন্তুম্
তদিচ্ছামীষ্টং তে গুর্বর্থমুপহৃত্যানৃণো গন্তুম্
তদাজ্ঞাপয়তু ভবতী
কিমুপহরামি গুর্বর্থমিতি
3.100
সৈবমুক্তোপাধ্যায়িন্যুত্তঙ্কং প্রত্যুবাচ
গচ্ছ পৌষ্যং রাজানম্
ভিক্ষস্ব তস্য ক্ষত্রিয়য়া পিনদ্ধে কুণ্ডলে
তে আনয়স্ব
ইতশ্চতুর্থেঽহনি পুণ্যকং ভবিতা
তাভ্যামাবদ্ধাভ্যাং ব্রাহ্মণান্পরিবেষ্টুমিচ্ছামি
শোভমানা যথা তাভ্যাং কুণ্ডলাভ্যাং তস্মিন্নহনি সংপাদয়স্ব
শ্রেয়ো হি তে স্যাত্ক্ষণং কুর্বত ইতি
3.101
স এবমুক্ত উপাধ্যায়িন্যা প্রাতিষ্ঠতোত্তঙ্কঃ
স পথি গচ্ছন্নপশ্যদৃষভমতিপ্রমাণং তমধিরূঢং চ পুরুষমতিপ্রমাণমেব
3.102
স পুরুষ উত্তঙ্কমভ্যভাষত
উত্তঙ্কৈতত্পুরীষমস্য ঋষভস্য ভক্ষয়স্বেতি
3.103
স এবমুক্তো নৈচ্ছৎ
3.104
তমাহ পুরুষো ভূয়ঃ
ভক্ষয়স্বোত্তঙ্ক
মা বিচারয়
উপাধ্যায়েনাপি তে ভক্ষিতং পূর্বমিতি
3.105
স এবমুক্তো বাঢমিত্যুক্ত্বা তদা তদৃষভস্য পুরীষং মূত্রং চ ভক্ষয়িত্বোত্তঙ্কঃ প্রতস্থে যত্র স ক্ষত্রিয়ঃ পৌষ্যঃ
3.106
তমুপেত্যাপশ্যদুত্তঙ্ক আসীনম্
স তমুপেত্যাশীর্ভিরভিনন্দ্যোবাচ
অর্থী ভবন্তমুপগতোঽস্মীতি
3.107
স এনমভিবাদ্যোবাচ
ভগবন্পৌষ্যঃ খল্বহম্
কিং করবাণীতি
3.108
তমুবাচোত্তঙ্কঃ
গুর্বর্থে কুণ্ডলাভ্যামর্থ্যাগতোঽস্মীতি যে তে ক্ষত্রিয়য়া পিনদ্ধে কুণ্ডলে তে ভবান্দাতুমর্হতীতি
3.109
তং পৌষ্যঃ প্রত্যুবাচ
প্রবিশ্যান্তঃপুরং ক্ষত্রিয়া যাচ্যতামিতি
3.110
স তেনৈবমুক্তঃ প্রবিশ্যান্তঃপুরং ক্ষত্রিয়াং নাপশ্যৎ
3.111
স পৌষ্যং পুনরুবাচ
ন যুক্তং ভবতা বয়মনৃতেনোপচরিতুম্
ন হি তে ক্ষত্রিয়ান্তঃপুরে সংনিহিতা
নৈনাং পশ্যামীতি
3.112
স এবমুক্তঃ পৌষ্যস্তং প্রত্যুবাচ
সংপ্রতি ভবানুচ্ছিষ্টঃ
স্মর তাবৎ
ন হি সা ক্ষত্রিয়া উচ্ছিষ্টেনাশুচিনা বা শক্যা দ্রষ্টুম্
পতিব্রতাত্বাদেষা নাশুচের্দর্শনমুপৈতীতি
3.113
অথৈবমুক্ত উত্তঙ্কঃ স্মৃত্বোবাচ
অস্তি খলু ময়োচ্ছিষ্টেনোপস্পৃষ্টং শীঘ্রং গচ্ছতা চেতি
3.114
তং পৌষ্যঃ প্রত্যুবাচ
এতত্তদেবং হি
ন গচ্ছতোপস্পৃষ্টং ভবতি ন স্থিতেনেতি
3.115
অথোত্তঙ্কস্তথেত্যুক্ত্বা প্রাঙ্মুখ উপবিশ্য সুপ্রক্ষালিতপাণিপাদবদনোঽশব্দাভির্হৃদয়ংগমাভিরদ্ভিরুপস্পৃশ্য ত্রিঃ পীত্বা দ্বিঃ পরিমৃজ্য খান্যদ্ভিরুপস্পৃশ্যান্তঃপুরং প্রবিশ্য তাং ক্ষত্রিয়ামপশ্যৎ
3.116
সা চ দৃষ্ট্বৈবোত্তঙ্কমভ্যুত্থায়াভিবাদ্যোবাচ
স্বাগতং তে ভগবন্
আজ্ঞাপয় কিং করবাণীতি
3.117
স তামুবাচ
এতে কুণ্ডলে গুর্বর্থং মে ভিক্ষিতে দাতুমর্হসীতি
3.118
সা প্রীতা তেন তস্য সদ্ভাবেন পাত্রময়মনতিক্রমণীয়শ্চেতি মত্বা তে কুণ্ডলে অবমুচ্যাস্মৈ প্রায়চ্ছৎ
3.119
আহ চৈনম্
এতে কুণ্ডলে তক্ষকো নাগরাজঃ প্রার্থয়তি
অপ্রমত্তো নেতুমর্হসীতি
3.120
স এবমুক্তস্তাং ক্ষত্রিয়াং প্রত্যুবাচ
ভবতি সুনির্বৃতা ভব
ন মাং শক্তস্তক্ষকো নাগরাজো ধর্ষয়িতুমিতি
3.121
স এবমুক্ত্বা তাং ক্ষত্রিয়ামামন্ত্র্য পৌষ্যসকাশমাগচ্ছৎ
3.122
স তং দৃষ্ট্বোবাচ
ভোঃ পৌষ্য প্রীতোঽস্মীতি
3.123
তং পৌষ্যঃ প্রত্যুবাচ
ভগবংশ্চিরস্য পাত্রমাসাদ্যতে
ভবাংশ্চ গুণবানতিথিঃ
তত্করিষ্যে শ্রাদ্ধম্
ক্ষণঃ ক্রিয়তামিতি
3.124
তমুত্তঙ্কঃ প্রত্যুবাচ
কৃতক্ষণ এবাস্মি
শীঘ্রমিচ্ছামি যথোপপন্নমন্নমুপহৃতং ভবতেতি
3.125
স তথেত্যুক্ত্বা যথোপপন্নেনান্নেনৈনং ভোজয়ামাস
3.126
অথোত্তঙ্কঃ শীতমন্নং সকেশং দৃষ্ট্বা অশুচ্যেতদিতি মত্বা পৌষ্যমুবাচ
যস্মান্মে অশুচ্যন্নং দদাসি তস্মদন্ধো ভবিষ্যসীতি
3.127
তং পৌষ্যঃ প্রত্যুবাচ
যস্মাত্ত্বমপ্যদুষ্টমন্নং দূষয়সি তস্মাদনপত্যো ভবিষ্যসীতি
3.128
সোঽথ পৌষ্যস্তস্যাশুচিভাবমন্নস্যাগময়ামাস
3.129
অথ তদন্নং মুক্তকেশ্যা স্ত্রিয়োপহৃতং সকেশমশুচি মত্বোত্তঙ্কং প্রসাদয়ামাস
ভগবন্নজ্ঞানাদেতদন্নং সকেশমুপহৃতং শীতং চ
তত্ক্ষাময়ে ভবন্তম্
ন ভবেয়মন্ধ ইতি
3.130
তমুত্তঙ্কঃ প্রত্যুবাচ
ন মৃষা ব্রবীমি
ভূত্বা ত্বমন্ধো নচিরাদনন্ধো ভবিষ্যসীতি
মমাপি শাপো ন ভবেদ্ভবতা দত্ত ইতি
3.131
তং পৌষ্যঃ প্রত্যুবাচ
নাহং শক্তঃ শাপং প্রত্যাদাতুম্
ন হি মে মন্যুরদ্যাপ্যুপশমং গচ্ছতি
কিং চৈতদ্ভবতা ন জ্ঞায়তে যথা
3.132
নাবনীতং হৃদয়ং ব্রাহ্মণস্য; বাচি ক্ষুরো নিহিতস্তীক্ষ্ণধারঃ
বিপরীতমেতদুভয়ং ক্ষত্রিয়স্য; বাঙ্নাবনীতী হৃদয়ং তীক্ষ্ণধারম্
3.133
ইতি
তদেবং গতে ন শক্তোঽহং তীক্ষ্ণহৃদয়ত্বাত্তং শাপমন্যথা কর্তুম্
গম্যতামিতি
3.134
তমুত্তঙ্কঃ প্রত্যুবাচ
ভবতাহমন্নস্যাশুচিভাবমাগময্য প্রত্যনুনীতঃ
প্রাক্চ তেঽভিহিতম্
যস্মাদদুষ্টমন্নং দূষয়সি তস্মাদনপত্যো ভবিষ্যসীতি
দুষ্টে চান্নে নৈষ মম শাপো ভবিষ্যতীতি
3.135
সাধয়ামস্তাবদিত্যুক্ত্বা প্রাতিষ্ঠতোত্তঙ্কস্তে কুণ্ডলে গৃহীত্বা
3.136
সোঽপশ্যত্পথি নগ্নং শ্রমণমাগচ্ছন্তং মুহুর্মুহুর্দৃশ্যমানমদৃশ্যমানং চ
অথোত্তঙ্কস্তে কুণ্ডলে ভূমৌ নিক্ষিপ্যোদকার্থং প্রচক্রমে
3.137
এতস্মিন্নন্তরে স শ্রমণস্ত্বরমাণ উপসৃত্য তে কুণ্ডলে গৃহীত্বা প্রাদ্রবৎ
তমুত্তঙ্কোঽভিসৃত্য জগ্রাহ
স তদ্রূপং বিহায় তক্ষকরূপং কৃত্বা সহসা ধরণ্যাং বিবৃতং মহাবিলং বিবেশ
3.138
প্রবিশ্য চ নাগলোকং স্বভবনমগচ্ছৎ
তমুত্তঙ্কোঽন্বাবিবেশ তেনৈব বিলেন
প্রবিশ্য চ নাগানস্তুবদেভিঃ শ্লোকৈঃ
3.139
য ঐরাবতরাজানঃ সর্পাঃ সমিতিশোভনাঃ
বর্ষন্ত ইব জীমূতাঃ সবিদ্যুত্পবনেরিতাঃ
3.140
সুরূপাশ্চ বিরূপাশ্চ তথা কল্মাষকুণ্ডলাঃ
আদিত্যবন্নাকপৃষ্ঠে রেজুরৈরাবতোদ্ভবাঃ
3.141
বহূনি নাগবর্ত্মানি গঙ্গায়াস্তীর উত্তরে
ইচ্ছেত্কোঽর্কাংশুসেনায়াং চর্তুমৈরাবতং বিনা
3.142
শতান্যশীতিরষ্টৌ চ সহস্রাণি চ বিংশতিঃ
সর্পাণাং প্রগ্রহা যান্তি ধৃতরাষ্ট্রো যদেজতি
3.143
যে চৈনমুপসর্পন্তি যে চ দূরং পরং গতাঃ
অহমৈরাবতজ্যেষ্ঠভ্রাতৃভ্যোঽকরবং নমঃ
3.144
যস্য বাসঃ কুরুক্ষেত্রে খাণ্ডবে চাভবত্সদা
তং কাদ্রবেয়মস্তৌষং কুণ্ডলার্থায় তক্ষকম্
3.145
তক্ষকশ্চাশ্বসেনশ্চ নিত্যং সহচরাবুভৌ
কুরুক্ষেত্রে নিবসতাং নদীমিক্ষুমতীমনু
3.146
জঘন্যজস্তক্ষকস্য শ্রুতসেনেতি যঃ শ্রুতঃ
অবসদ্যো মহদ্দ্যুম্নি প্রার্থয়ন্নাগমুখ্যতাম্
করবাণি সদা চাহং নমস্তস্মৈ মহাত্মনে
3.147
এবং স্তুবন্নপি নাগান্যদা তে কুণ্ডলে নালভদথাপশ্যত্স্ত্রিয়ৌ তন্ত্রে অধিরোপ্য পটং বয়ন্ত্যৌ
3.148
তস্মিংশ্চ তন্ত্রে কৃষ্ণাঃ সিতাশ্চ তন্তবঃ
চক্রং চাপশ্যত্ষড্ভিঃ কুমারৈঃ পরিবর্ত্যমানম্
পুরুষং চাপশ্যদ্দর্শনীয়ম্
3.149
স তান্সর্বাংস্তুষ্টাব এভির্মন্ত্রবাদশ্লোকৈঃ
3.150
ত্রীণ্যর্পিতান্যত্র শতানি মধ্যে; ষষ্টিশ্চ নিত্যং চরতি ধ্রুবেঽস্মিন্
চক্রে চতুর্বিংশতিপর্বয়োগে; ষড্যত্কুমারাঃ পরিবর্তয়ন্তি
3.151
তন্ত্রং চেদং বিশ্বরূপং যুবত্যৌ; বয়তস্তন্তূন্সততং বর্তয়ন্ত্যৌ
কৃষ্ণান্সিতাংশ্চৈব বিবর্তয়ন্ত্যৌ; ভূতান্যজস্রং ভুবনানি চৈব
3.152
বজ্রস্য ভর্তা ভুবনস্য গোপ্তা; বৃত্রস্য হন্তা নমুচের্নিহন্তা
কৃষ্ণে বসানো বসনে মহাত্মা; সত্যানৃতে যো বিবিনক্তি লোকে
3.153
যো বাজিনং গর্ভমপাং পুরাণং; বৈশ্বানরং বাহনমভ্যুপেতঃ
নমঃ সদাস্মৈ জগদীশ্বরায়; লোকত্রয়েশায় পুরংদরায়
3.154
ততঃ স এনং পুরুষঃ প্রাহ
প্রীতোঽস্মি তেঽহমনেন স্তোত্রেণ
কিং তে প্রিয়ং করবাণীতি
3.155
স তমুবাচ
নাগা মে বশমীয়ুরিতি
3.156
স এনং পুরুষঃ পুনরুবাচ
এতমশ্বমপানে ধমস্বেতি
3.157
স তমশ্বমপানেঽধমৎ
অথাশ্বাদ্ধম্যমানাত্সর্বস্রোতোভ্যঃ সধূমা অর্চিষোঽগ্নের্নিষ্পেতুঃ
3.158
তাভির্নাগলোকো ধূপিতঃ
3.159
অথ সসংভ্রমস্তক্ষকোঽগ্নিতেজোভয়বিষণ্ণস্তে কুণ্ডলে গৃহীত্বা সহসা স্বভবনান্নিষ্ক্রম্যোত্তঙ্কমুবাচ
এতে কুণ্ডলে প্রতিগৃহ্ণাতু ভবানিতি
3.160
স তে প্রতিজগ্রাহোত্তঙ্কঃ
কুণ্ডলে প্রতিগৃহ্যাচিন্তয়ৎ
অদ্য তত্পুণ্যকমুপাধ্যায়িন্যাঃ
দূরং চাহমভ্যাগতঃ
কথং নু খলু সংভাবয়েয়মিতি
3.161
তত এনং চিন্তয়ানমেব স পুরুষ উবাচ
উত্তঙ্ক এনমশ্বমধিরোহ
এষ ত্বাং ক্ষণাদেবোপাধ্যায়কুলং প্রাপয়িষ্যতীতি
3.162
স তথেত্যুক্ত্বা তমশ্বমধিরুহ্য প্রত্যাজগামোপাধ্যায়কুলম্
উপাধ্যায়িনী চ স্নাতা কেশানাবপয়ন্ত্যুপবিষ্টোত্তঙ্কো নাগচ্ছতীতি শাপায়াস্য মনো দধে
3.163
অথোত্তঙ্কঃ প্রবিশ্য উপাধ্যায়িনীমভ্যবাদয়ৎ
তে চাস্যৈ কুণ্ডলে প্রায়চ্ছৎ
3.164
সা চৈনং প্রত্যুবাচ
উত্তঙ্ক দেশে কালেঽভ্যাগতঃ
স্বাগতং তে বত্স
মনাগসি ময়া ন শপ্তঃ
শ্রেয়স্তবোপস্থিতম্
সিদ্ধিমাপ্নুহীতি
3.165
অথোত্তঙ্ক উপাধ্যায়মভ্যবাদয়ৎ
তমুপাধ্যায়ঃ প্রত্যুবাচ
বত্সোত্তঙ্ক স্বাগতং তে
কিং চিরং কৃতমিতি
3.166
তমুত্তঙ্ক উপাধ্যায়ং প্রত্যুবাচ
ভোস্তক্ষকেণ নাগরাজেন বিঘ্নঃ কৃতোঽস্মিন্কর্মণি
তেনাস্মি নাগলোকং নীতঃ
3.167
তত্র চ ময়া দৃষ্টে স্ত্রিয়ৌ তন্ত্রেঽধিরোপ্য পটং বয়ন্ত্যৌ
তস্মিংশ্চ তন্ত্রে কৃষ্ণাঃ সিতাশ্চ তন্তবঃ
কিং তৎ
3.168
তত্র চ ময়া চক্রং দৃষ্টং দ্বাদশারম্
ষট্চৈনং কুমারাঃ পরিবর্তয়ন্তি
তদপি কিম্
3.169
পুরুষশ্চাপি ময়া দৃষ্টঃ
স পুনঃ কঃ
3.170
অশ্বশ্চাতিপ্রমাণয়ুক্তঃ
স চাপি কঃ
3.171
পথি গচ্ছতা ময়া ঋষভো দৃষ্টঃ
তং চ পুরুষোঽধিরূঢঃ
তেনাস্মি সোপচারমুক্তঃ
উত্তঙ্কাস্য ঋষভস্য পুরীষং ভক্ষয়
উপাধ্যায়েনাপি তে ভক্ষিতমিতি
ততস্তদ্বচনান্ময়া তদৃষভস্য পুরীষমুপয়ুক্তম্
তদিচ্ছামি ভবতোপদিষ্টং কিং তদিতি
3.172
তেনৈবমুক্ত উপাধ্যায়ঃ প্রত্যুবাচ
যে তে স্ত্রিয়ৌ ধাতা বিধাতা চ
যে চ তে কৃষ্ণাঃ সিতাশ্চ তন্তবস্তে রাত্র্যহনী
3.173
যদপি তচ্চক্রং দ্বাদশারং ষট্কুমারাঃ পরিবর্তয়ন্তি তে ঋতবঃ ষট্সংবত্সরশ্চক্রম্
যঃ পুরুষঃ স পর্জন্যঃ
যোঽশ্বঃ সোঽগ্নিঃ
3.174
য ঋষভস্ত্বয়া পথি গচ্ছতা দৃষ্টঃ স ঐরাবতো নাগরাজঃ
যশ্চৈনমধিরূঢঃ স ইন্দ্রঃ
যদপি তে পুরীষং ভক্ষিতং তস্য ঋষভস্য তদমৃতম্
3.175
তেন খল্বসি ন ব্যাপন্নস্তস্মিন্নাগভবনে
স চাপি মম সখা ইন্দ্রঃ
3.176
তদনুগ্রহাত্কুণ্ডলে গৃহীত্বা পুনরভ্যাগতোঽসি
তত্সৌম্য গম্যতাম্
অনুজানে ভবন্তম্
শ্রেয়োঽবাপ্স্যসীতি
3.177
স উপাধ্যায়েনানুজ্ঞাত উত্তঙ্কঃ ক্রুদ্ধস্তক্ষকস্য প্রতিচিকীর্ষমাণো হাস্তিনপুরং প্রতস্থে
3.178
স হাস্তিনপুরং প্রাপ্য নচিরাদ্দ্বিজসত্তমঃ
সমাগচ্ছত রাজানমুত্তঙ্কো জনমেজয়ম্
3.179
পুরা তক্ষশিলাতস্তং নিবৃত্তমপরাজিতম্
সম্যগ্বিজয়িনং দৃষ্ট্বা সমন্তান্মন্ত্রিভির্বৃতম্
3.180
তস্মৈ জয়াশিষঃ পূর্বং যথান্যায়ং প্রয়ুজ্য সঃ
উবাচৈনং বচঃ কালে শব্দসংপন্নয়া গিরা
3.181
অন্যস্মিন্করণীয়ে ত্বং কার্যে পার্থিবসত্তম
বাল্যাদিবান্যদেব ত্বং কুরুষে নৃপসত্তম
3.182
এবমুক্তস্তু বিপ্রেণ স রাজা প্রত্যুবাচ হ
জনমেজয়ঃ প্রসন্নাত্মা সম্যক্সংপূজ্য তং মুনিম্
3.183
আসাং প্রজানাং পরিপালনেন; স্বং ক্ষত্রধর্মং পরিপালয়ামি
প্রব্রূহি বা কিং ক্রিয়তাং দ্বিজেন্দ্র; শুশ্রূষুরস্ম্যদ্য বচস্ত্বদীয়ম্
3.184
স এবমুক্তস্তু নৃপোত্তমেন; দ্বিজোত্তমঃ পুণ্যকৃতাং বরিষ্ঠঃ
উবাচ রাজানমদীনসত্ত্বং; স্বমেব কার্যং নৃপতেশ্চ যত্তৎ
3.185
তক্ষকেণ নরেন্দ্রেন্দ্র যেন তে হিংসিতঃ পিতা
তস্মৈ প্রতিকুরুষ্ব ত্বং পন্নগায় দুরাত্মনে
3.186
কার্যকালং চ মন্যেঽহং বিধিদৃষ্টস্য কর্মণঃ
তদ্গচ্ছাপচিতিং রাজন্পিতুস্তস্য মহাত্মনঃ
3.187
তেন হ্যনপরাধী স দষ্টো দুষ্টান্তরাত্মনা
পঞ্চত্বমগমদ্রাজা বজ্রাহত ইব দ্রুমঃ
3.188
বলদর্পসমুত্সিক্তস্তক্ষকঃ পন্নগাধমঃ
অকার্যং কৃতবান্পাপো যোঽদশত্পিতরং তব
3.189
রাজর্ষিবংশগোপ্তারমমরপ্রতিমং নৃপম্
জঘান কাশ্যপং চৈব ন্যবর্তয়ত পাপকৃৎ
3.190
দগ্ধুমর্হসি তং পাপং জ্বলিতে হব্যবাহনে
সর্পসত্রে মহারাজ ত্বয়ি তদ্ধি বিধীয়তে
3.191
এবং পিতুশ্চাপচিতিং গতবাংস্ত্বং ভবিষ্যসি
মম প্রিয়ং চ সুমহত্কৃতং রাজন্ভবিষ্যতি
3.192
কর্মণঃ পৃথিবীপাল মম যেন দুরাত্মনা
বিঘ্নঃ কৃতো মহারাজ গুর্বর্থং চরতোঽনঘ
3.193
এতচ্ছ্রুত্বা তু নৃপতিস্তক্ষকস্য চুকোপ হ
উত্তঙ্কবাক্যহবিষা দীপ্তোঽগ্নির্হবিষা যথা
3.194
অপৃচ্ছচ্চ তদা রাজা মন্ত্রিণঃ স্বান্সুদুঃখিতঃ
উত্তঙ্কস্যৈব সাংনিধ্যে পিতুঃ স্বর্গগতিং প্রতি
3.195
তদৈব হি স রাজেন্দ্রো দুঃখশোকাপ্লুতোঽভবৎ
যদৈব পিতরং বৃত্তমুত্তঙ্কাদশৃণোত্তদা