Utshovঅধ্যায় 2
2.1
ঋষয় ঊচুঃ
সমন্তপঞ্চকমিতি যদুক্তং সূতনন্দন
এতত্সর্বং যথান্যায়ং শ্রোতুমিচ্ছামহে বয়ম্
2.2
সূত উবাচ
শুশ্রূষা যদি বো বিপ্রা ব্রুবতশ্চ কথাঃ শুভাঃ
সমন্তপঞ্চকাখ্যং চ শ্রোতুমর্হথ সত্তমাঃ
2.3
ত্রেতাদ্বাপরয়োঃ সংধৌ রামঃ শস্ত্রভৃতাং বরঃ
অসকৃত্পার্থিবং ক্ষত্রং জঘানামর্ষচোদিতঃ
2.4
স সর্বং ক্ষত্রমুত্সাদ্য স্ববীর্যেণানলদ্যুতিঃ
সমন্তপঞ্চকে পঞ্চ চকার রুধিরহ্রদান্
2.5
স তেষু রুধিরাম্ভস্সু হ্রদেষু ক্রোধমূর্চ্ছিতঃ
পিতৄন্সংতর্পয়ামাস রুধিরেণেতি নঃ শ্রুতম্
2.6
অথর্চীকাদয়োঽভ্যেত্য পিতরো ব্রাহ্মণর্ষভম্
তং ক্ষমস্বেতি সিষিধুস্ততঃ স বিররাম হ
2.7
তেষাং সমীপে যো দেশো হ্রদানাং রুধিরাম্ভসাম্
সমন্তপঞ্চকমিতি পুণ্যং তত্পরিকীর্তিতম্
2.8
যেন লিঙ্গেন যো দেশো যুক্তঃ সমুপলক্ষ্যতে
তেনৈব নাম্না তং দেশং বাচ্যমাহুর্মনীষিণঃ
2.9
অন্তরে চৈব সংপ্রাপ্তে কলিদ্বাপরয়োরভূৎ
সমন্তপঞ্চকে যুদ্ধং কুরুপাণ্ডবসেনয়োঃ
2.10
তস্মিন্পরমধর্মিষ্ঠে দেশে ভূদোষবর্জিতে
অষ্টাদশ সমাজগ্মুরক্ষৌহিণ্যো যুয়ুত্সয়া
2.11
এবং নামাভিনির্বৃত্তং তস্য দেশস্য বৈ দ্বিজাঃ
পুণ্যশ্চ রমণীয়শ্চ স দেশো বঃ প্রকীর্তিতঃ
2.12
তদেতত্কথিতং সর্বং ময়া বো মুনিসত্তমাঃ
যথা দেশঃ স বিখ্যাতস্ত্রিষু লোকেষু বিশ্রুতঃ
2.13
ঋষয় ঊচুঃ
অক্ষৌহিণ্য ইতি প্রোক্তং যত্ত্বয়া সূতনন্দন
এতদিচ্ছামহে শ্রোতুং সর্বমেব যথাতথম্
2.14
অক্ষৌহিণ্যাঃ পরীমাণং রথাশ্বনরদন্তিনাম্
যথাবচ্চৈব নো ব্রূহি সর্বং হি বিদিতং তব
2.15
সূত উবাচ
একো রথো গজশ্চৈকো নরাঃ পঞ্চ পদাতয়ঃ
ত্রয়শ্চ তুরগাস্তজ্জ্ঞৈঃ পত্তিরিত্যভিধীয়তে
2.16
পত্তিং তু ত্রিগুণামেতামাহুঃ সেনামুখং বুধাঃ
ত্রীণি সেনামুখান্যেকো গুল্ম ইত্যভিধীয়তে
2.17
ত্রয়ো গুল্মা গণো নাম বাহিনী তু গণাস্ত্রয়ঃ
স্মৃতাস্তিস্রস্তু বাহিন্যঃ পৃতনেতি বিচক্ষণৈঃ
2.18
চমূস্তু পৃতনাস্তিস্রস্তিস্রশ্চম্বস্ত্বনীকিনী
অনীকিনীং দশগুণাং প্রাহুরক্ষৌহিণীং বুধাঃ
2.19
অক্ষৌহিণ্যাঃ প্রসংখ্যানং রথানাং দ্বিজসত্তমাঃ
সংখ্যাগণিততত্ত্বজ্ঞৈঃ সহস্রাণ্যেকবিংশতিঃ
2.20
শতান্যুপরি চৈবাষ্টৌ তথা ভূয়শ্চ সপ্ততিঃ
গজানাং তু পরীমাণমেতদেবাত্র নির্দিশেৎ
2.21
জ্ঞেয়ং শতসহস্রং তু সহস্রাণি তথা নব
নরাণামপি পঞ্চাশচ্ছতানি ত্রীণি চানঘাঃ
2.22
পঞ্চষষ্টিসহস্রাণি তথাশ্বানাং শতানি চ
দশোত্তরাণি ষট্প্রাহুর্যথাবদিহ সংখ্যয়া
2.23
এতামক্ষৌহিণীং প্রাহুঃ সংখ্যাতত্ত্ববিদো জনাঃ
যাং বঃ কথিতবানস্মি বিস্তরেণ দ্বিজোত্তমাঃ
2.24
এতয়া সংখ্যয়া হ্যাসন্কুরুপাণ্ডবসেনয়োঃ
অক্ষৌহিণ্যো দ্বিজশ্রেষ্ঠাঃ পিণ্ডেনাষ্টাদশৈব তাঃ
2.25
সমেতাস্তত্র বৈ দেশে তত্রৈব নিধনং গতাঃ
কৌরবান্কারণং কৃত্বা কালেনাদ্ভুতকর্মণা
2.26
অহানি যুয়ুধে ভীষ্মো দশৈব পরমাস্ত্রবিৎ
অহানি পঞ্চ দ্রোণস্তু ররক্ষ কুরুবাহিনীম্
2.27
অহনী যুয়ুধে দ্বে তু কর্ণঃ পরবলার্দনঃ
শল্যোঽর্ধদিবসং ত্বাসীদ্গদায়ুদ্ধমতঃ পরম্
2.28
তস্যৈব তু দিনস্যান্তে হার্দিক্যদ্রৌণিগৌতমাঃ
প্রসুপ্তং নিশি বিশ্বস্তং জঘ্নুর্যৌধিষ্ঠিরং বলম্
2.29
যত্তু শৌনকসত্রে তে ভারতাখ্যানবিস্তরম্
আখ্যাস্যে তত্র পৌলোমমাখ্যানং চাদিতঃ পরম্
2.30
বিচিত্রার্থপদাখ্যানমনেকসময়ান্বিতম্
অভিপন্নং নরৈঃ প্রাজ্ঞৈর্বৈরাগ্যমিব মোক্ষিভিঃ
2.31
আত্মেব বেদিতব্যেষু প্রিয়েষ্বিব চ জীবিতম্
ইতিহাসঃ প্রধানার্থঃ শ্রেষ্ঠঃ সর্বাগমেষ্বয়ম্
2.32
ইতিহাসোত্তমে হ্যস্মিন্নর্পিতা বুদ্ধিরুত্তমা
স্বরব্যঞ্জনয়োঃ কৃত্স্না লোকবেদাশ্রয়েব বাক্
2.33
অস্য প্রজ্ঞাভিপন্নস্য বিচিত্রপদপর্বণঃ
ভারতস্যেতিহাসস্য শ্রূয়তাং পর্বসংগ্রহঃ
2.34
পর্বানুক্রমণী পূর্বং দ্বিতীয়ং পর্বসংগ্রহঃ
পৌষ্যং পৌলোমমাস্তীকমাদিবংশাবতারণম্
2.35
ততঃ সংভবপর্বোক্তমদ্ভুতং দেবনির্মিতম্
দাহো জতুগৃহস্যাত্র হৈডিম্বং পর্ব চোচ্যতে
2.36
ততো বকবধঃ পর্ব পর্ব চৈত্ররথং ততঃ
ততঃ স্বয়ংবরং দেব্যাঃ পাঞ্চাল্যাঃ পর্ব চোচ্যতে
2.37
ক্ষত্রধর্মেণ নির্জিত্য ততো বৈবাহিকং স্মৃতম্
বিদুরাগমনং পর্ব রাজ্যলম্ভস্তথৈব চ
2.38
অর্জুনস্য বনে বাসঃ সুভদ্রাহরণং ততঃ
সুভদ্রাহরণাদূর্ধ্বং জ্ঞেয়ং হরণহারিকম্
2.39
ততঃ খাণ্ডবদাহাখ্যং তত্রৈব ময়দর্শনম্
সভাপর্ব ততঃ প্রোক্তং মন্ত্রপর্ব ততঃ পরম্
2.40
জরাসংধবধঃ পর্ব পর্ব দিগ্বিজয়স্তথা
পর্ব দিগ্বিজয়াদূর্ধ্বং রাজসূয়িকমুচ্যতে
2.41
ততশ্চার্ঘাভিহরণং শিশুপালবধস্ততঃ
দ্যূতপর্ব ততঃ প্রোক্তমনুদ্যূতমতঃ পরম্
2.42
তত আরণ্যকং পর্ব কির্মীরবধ এব চ
ঈশ্বরার্জুনয়োর্যুদ্ধং পর্ব কৈরাতসংজ্ঞিতম্
2.43
ইন্দ্রলোকাভিগমনং পর্ব জ্ঞেয়মতঃ পরম্
তীর্থয়াত্রা ততঃ পর্ব কুরুরাজস্য ধীমতঃ
2.44
জটাসুরবধঃ পর্ব যক্ষয়ুদ্ধমতঃ পরম্
তথৈবাজগরং পর্ব বিজ্ঞেয়ং তদনন্তরম্
2.45
মার্কণ্ডেয়সমস্যা চ পর্বোক্তং তদনন্তরম্
সংবাদশ্চ ততঃ পর্ব দ্রৌপদীসত্যভাময়োঃ
2.46
ঘোষয়াত্রা ততঃ পর্ব মৃগস্বপ্নভয়ং ততঃ
ব্রীহিদ্রৌণিকমাখ্যানং ততোঽনন্তরমুচ্যতে
2.47
দ্রৌপদীহরণং পর্ব সৈন্ধবেন বনাত্ততঃ
কুণ্ডলাহরণং পর্ব ততঃ পরমিহোচ্যতে
2.48
আরণেয়ং ততঃ পর্ব বৈরাটং তদনন্তরম্
কীচকানাং বধঃ পর্ব পর্ব গোগ্রহণং ততঃ
2.49
অভিমন্যুনা চ বৈরাট্যাঃ পর্ব বৈবাহিকং স্মৃতম্
উদ্যোগপর্ব বিজ্ঞেয়মত ঊর্ধ্বং মহাদ্ভুতম্
2.50
ততঃ সংজয়য়ানাখ্যং পর্ব জ্ঞেয়মতঃ পরম্
প্রজাগরং ততঃ পর্ব ধৃতরাষ্ট্রস্য চিন্তয়া
2.51
পর্ব সানত্সুজাতং চ গুহ্যমধ্যাত্মদর্শনম্
যানসংধিস্ততঃ পর্ব ভগবদ্যানমেব চ
2.52
জ্ঞেয়ং বিবাদপর্বাত্র কর্ণস্যাপি মহাত্মনঃ
নির্যাণং পর্ব চ ততঃ কুরুপাণ্ডবসেনয়োঃ
2.53
রথাতিরথসংখ্যা চ পর্বোক্তং তদনন্তরম্
উলূকদূতাগমনং পর্বামর্ষবিবর্ধনম্
2.54
অম্বোপাখ্যানমপি চ পর্ব জ্ঞেয়মতঃ পরম্
ভীষ্মাভিষেচনং পর্ব জ্ঞেয়মদ্ভুতকারণম্
2.55
জম্বূখণ্ডবিনির্মাণং পর্বোক্তং তদনন্তরম্
ভূমিপর্ব ততো জ্ঞেয়ং দ্বীপবিস্তরকীর্তনম্
2.56
পর্বোক্তং ভগবদ্গীতা পর্ব ভীষ্মবধস্ততঃ
দ্রোণাভিষেকঃ পর্বোক্তং সংশপ্তকবধস্ততঃ
2.57
অভিমন্যুবধঃ পর্ব প্রতিজ্ঞাপর্ব চোচ্যতে
জয়দ্রথবধঃ পর্ব ঘটোত্কচবধস্ততঃ
2.58
ততো দ্রোণবধঃ পর্ব বিজ্ঞেয়ং লোমহর্ষণম্
মোক্ষো নারায়ণাস্ত্রস্য পর্বানন্তরমুচ্যতে
2.59
কর্ণপর্ব ততো জ্ঞেয়ং শল্যপর্ব ততঃ পরম্
হ্রদপ্রবেশনং পর্ব গদায়ুদ্ধমতঃ পরম্
2.60
সারস্বতং ততঃ পর্ব তীর্থবংশগুণান্বিতম্
অত ঊর্ধ্বং তু বীভত্সং পর্ব সৌপ্তিকমুচ্যতে
2.61
ঐষীকং পর্ব নির্দিষ্টমত ঊর্ধ্বং সুদারুণম্
জলপ্রদানিকং পর্ব স্ত্রীপর্ব চ ততঃ পরম্
2.62
শ্রাদ্ধপর্ব ততো জ্ঞেয়ং কুরূণামৌর্ধ্বদেহিকম্
আভিষেচনিকং পর্ব ধর্মরাজস্য ধীমতঃ
2.63
চার্বাকনিগ্রহঃ পর্ব রক্ষসো ব্রহ্মরূপিণঃ
প্রবিভাগো গৃহাণাং চ পর্বোক্তং তদনন্তরম্
2.64
শান্তিপর্ব ততো যত্র রাজধর্মানুকীর্তনম্
আপদ্ধর্মশ্চ পর্বোক্তং মোক্ষধর্মস্ততঃ পরম্
2.65
ততঃ পর্ব পরিজ্ঞেয়মানুশাসনিকং পরম্
স্বর্গারোহণিকং পর্ব ততো ভীষ্মস্য ধীমতঃ
2.66
ততোঽশ্বমেধিকং পর্ব সর্বপাপপ্রণাশনম্
অনুগীতা ততঃ পর্ব জ্ঞেয়মধ্যাত্মবাচকম্
2.67
পর্ব চাশ্রমবাসাখ্যং পুত্রদর্শনমেব চ
নারদাগমনং পর্ব ততঃ পরমিহোচ্যতে
2.68
মৌসলং পর্ব চ ততো ঘোরং সমনুবর্ণ্যতে
মহাপ্রস্থানিকং পর্ব স্বর্গারোহণিকং ততঃ
2.69
হরিবংশস্ততঃ পর্ব পুরাণং খিলসংজ্ঞিতম্
ভবিষ্যত্পর্ব চাপ্যুক্তং খিলেষ্বেবাদ্ভুতং মহৎ
2.70
এতত্পর্বশতং পূর্ণং ব্যাসেনোক্তং মহাত্মনা
যথাবত্সূতপুত্রেণ লোমহর্ষণিনা পুনঃ
2.71
কথিতং নৈমিষারণ্যে পর্বাণ্যষ্টাদশৈব তু
সমাসো ভারতস্যায়ং তত্রোক্তঃ পর্বসংগ্রহঃ
2.72
পৌষ্যে পর্বণি মাহাত্ম্যমুত্তঙ্কস্যোপবর্ণিতম্
পৌলোমে ভৃগুবংশস্য বিস্তারঃ পরিকীর্তিতঃ
2.73
আস্তীকে সর্বনাগানাং গরুডস্য চ সংভবঃ
ক্ষীরোদমথনং চৈব জন্মোচ্ছৈঃশ্রবসস্তথা
2.74
যজতঃ সর্পসত্রেণ রাজ্ঞঃ পারিক্ষিতস্য চ
কথেয়মভিনির্বৃত্তা ভারতানাং মহাত্মনাম্
2.75
বিবিধাঃ সংভবা রাজ্ঞামুক্তাঃ সংভবপর্বণি
অন্যেষাং চৈব বিপ্রাণামৃষের্দ্বৈপায়নস্য চ
2.76
অংশাবতরণং চাত্র দেবানাং পরিকীর্তিতম্
দৈত্যানাং দানবানাং চ যক্ষাণাং চ মহৌজসাম্
2.77
নাগানামথ সর্পাণাং গন্ধর্বাণাং পতত্রিণাম্
অন্যেষাং চৈব ভূতানাং বিবিধানাং সমুদ্ভবঃ
2.78
বসূনাং পুনরুত্পত্তির্ভাগীরথ্যাং মহাত্মনাম্
শংতনোর্বেশ্মনি পুনস্তেষাং চারোহণং দিবি
2.79
তেজোংশানাং চ সংঘাতাদ্ভীষ্মস্যাপ্যত্র সংভবঃ
রাজ্যান্নিবর্তনং চৈব ব্রহ্মচর্যব্রতে স্থিতিঃ
2.80
প্রতিজ্ঞাপালনং চৈব রক্ষা চিত্রাঙ্গদস্য চ
হতে চিত্রাঙ্গদে চৈব রক্ষা ভ্রাতুর্যবীয়সঃ
2.81
বিচিত্রবীর্যস্য তথা রাজ্যে সংপ্রতিপাদনম্
ধর্মস্য নৃষু সংভূতিরণীমাণ্ডব্যশাপজা
2.82
কৃষ্ণদ্বৈপায়নাচ্চৈব প্রসূতির্বরদানজা
ধৃতরাষ্ট্রস্য পাণ্ডোশ্চ পাণ্ডবানাং চ সংভবঃ
2.83
বারণাবতয়াত্রা চ মন্ত্রো দুর্যোধনস্য চ
বিদুরস্য চ বাক্যেন সুরুঙ্গোপক্রমক্রিয়া
2.84
পাণ্ডবানাং বনে ঘোরে হিডিম্বায়াশ্চ দর্শনম্
ঘটোত্কচস্য চোত্পত্তিরত্রৈব পরিকীর্তিতা
2.85
অজ্ঞাতচর্যা পাণ্ডূনাং বাসো ব্রাহ্মণবেশ্মনি
বকস্য নিধনং চৈব নাগরাণাং চ বিস্ময়ঃ
2.86
অঙ্গারপর্ণং নির্জিত্য গঙ্গাকূলেঽর্জুনস্তদা
ভ্রাতৃভিঃ সহিতঃ সর্বৈঃ পাঞ্চালানভিতো যয়ৌ
2.87
তাপত্যমথ বাসিষ্ঠমৌর্বং চাখ্যানমুত্তমম্
পঞ্চেন্দ্রাণামুপাখ্যানমত্রৈবাদ্ভুতমুচ্যতে
2.88
পঞ্চানামেকপত্নীত্বে বিমর্শো দ্রুপদস্য চ
দ্রৌপদ্যা দেববিহিতো বিবাহশ্চাপ্যমানুষঃ
2.89
বিদুরস্য চ সংপ্রাপ্তির্দর্শনং কেশবস্য চ
খাণ্ডবপ্রস্থবাসশ্চ তথা রাজ্যার্ধশাসনম্
2.90
নারদস্যাজ্ঞয়া চৈব দ্রৌপদ্যাঃ সময়ক্রিয়া
সুন্দোপসুন্দয়োস্তত্র উপাখ্যানং প্রকীর্তিতম্
2.91
পার্থস্য বনবাসশ্চ উলূপ্যা পথি সংগমঃ
পুণ্যতীর্থানুসংয়ানং বভ্রুবাহনজন্ম চ
2.92
দ্বারকায়াং সুভদ্রা চ কাময়ানেন কামিনী
বাসুদেবস্যানুমতে প্রাপ্তা চৈব কিরীটিনা
2.93
হরণং গৃহ্য সংপ্রাপ্তে কৃষ্ণে দেবকিনন্দনে
সংপ্রাপ্তিশ্চক্রধনুষোঃ খাণ্ডবস্য চ দাহনম্
2.94
অভিমন্যোঃ সুভদ্রায়াং জন্ম চোত্তমতেজসঃ
ময়স্য মোক্ষো জ্বলনাদ্ভুজংগস্য চ মোক্ষণম্
মহর্ষের্মন্দপালস্য শার্ঙ্গ্যং তনয়সংভবঃ
2.95
ইত্যেতদাদিপর্বোক্তং প্রথমং বহুবিস্তরম্
অধ্যায়ানাং শতে দ্বে তু সংখ্যাতে পরমর্ষিণা
অষ্টাদশৈব চাধ্যায়া ব্যাসেনোত্তমতেজসা
2.96
সপ্ত শ্লোকসহস্রাণি তথা নব শতানি চ
শ্লোকাশ্চ চতুরাশীতির্দৃষ্টো গ্রন্থো মহাত্মনা
2.97
দ্বিতীয়ং তু সভাপর্ব বহুবৃত্তান্তমুচ্যতে
সভাক্রিয়া পাণ্ডবানাং কিংকরাণাং চ দর্শনম্
2.98
লোকপালসভাখ্যানং নারদাদ্দেবদর্শনাৎ
রাজসূয়স্য চারম্ভো জরাসংধবধস্তথা
2.99
গিরিব্রজে নিরুদ্ধানাং রাজ্ঞাং কৃষ্ণেন মোক্ষণম্
রাজসূয়েঽর্ঘসংবাদে শিশুপালবধস্তথা
2.100
যজ্ঞে বিভূতিং তাং দৃষ্ট্বা দুঃখামর্ষান্বিতস্য চ
দুর্যোধনস্যাবহাসো ভীমেন চ সভাতলে
2.101
যত্রাস্য মন্যুরুদ্ভূতো যেন দ্যূতমকারয়ৎ
যত্র ধর্মসুতং দ্যূতে শকুনিঃ কিতবোঽজয়ৎ
2.102
যত্র দ্যূতার্ণবে মগ্নান্দ্রৌপদী নৌরিবার্ণবাৎ
তারয়ামাস তাংস্তীর্ণাঞ্জ্ঞাত্বা দুর্যোধনো নৃপঃ
পুনরেব ততো দ্যূতে সমাহ্বয়ত পাণ্ডবান্
2.103
এতত্সর্বং সভাপর্ব সমাখ্যাতং মহাত্মনা
অধ্যায়াঃ সপ্ততির্জ্ঞেয়াস্তথা দ্বৌ চাত্র সংখ্যয়া
2.104
শ্লোকানাং দ্বে সহস্রে তু পঞ্চ শ্লোকশতানি চ
শ্লোকাশ্চৈকাদশ জ্ঞেয়াঃ পর্বণ্যস্মিন্প্রকীর্তিতাঃ
2.105
অতঃ পরং তৃতীয়ং তু জ্ঞেয়মারণ্যকং মহৎ
পৌরানুগমনং চৈব ধর্মপুত্রস্য ধীমতঃ
2.106
বৃষ্ণীনামাগমো যত্র পাঞ্চালানাং চ সর্বশঃ
যত্র সৌভবধাখ্যানং কির্মীরবধ এব চ
অস্ত্রহেতোর্বিবাসশ্চ পার্থস্যামিততেজসঃ
2.107
মহাদেবেন যুদ্ধং চ কিরাতবপুষা সহ
দর্শনং লোকপালানাং স্বর্গারোহণমেব চ
2.108
দর্শনং বৃহদশ্বস্য মহর্ষের্ভাবিতাত্মনঃ
যুধিষ্ঠিরস্য চার্তস্য ব্যসনে পরিদেবনম্
2.109
নলোপাখ্যানমত্রৈব ধর্মিষ্ঠং করুণোদয়ম্
দময়ন্ত্যাঃ স্থিতির্যত্র নলস্য ব্যসনাগমে
2.110
বনবাসগতানাং চ পাণ্ডবানাং মহাত্মনাম্
স্বর্গে প্রবৃত্তিরাখ্যাতা লোমশেনার্জুনস্য বৈ
2.111
তীর্থয়াত্রা তথৈবাত্র পাণ্ডবানাং মহাত্মনাম্
জটাসুরস্য তত্রৈব বধঃ সমুপবর্ণ্যতে
2.112
নিয়ুক্তো ভীমসেনশ্চ দ্রৌপদ্যা গন্ধমাদনে
যত্র মন্দারপুষ্পার্থং নলিনীং তামধর্ষয়ৎ
2.113
যত্রাস্য সুমহদ্যুদ্ধমভবত্সহ রাক্ষসৈঃ
যক্ষৈশ্চাপি মহাবীর্যৈর্মণিমত্প্রমুখৈস্তথা
2.114
আগস্ত্যমপি চাখ্যানং যত্র বাতাপিভক্ষণম্
লোপামুদ্রাভিগমনমপত্যার্থমৃষেরপি
2.115
ততঃ শ্যেনকপোতীয়মুপাখ্যানমনন্তরম্
ইন্দ্রোঽগ্নির্যত্র ধর্মশ্চ অজিজ্ঞাসঞ্শিবিং নৃপম্
2.116
ঋশ্যশৃঙ্গস্য চরিতং কৌমারব্রহ্মচারিণঃ
জামদগ্ন্যস্য রামস্য চরিতং ভূরিতেজসঃ
2.117
কার্তবীর্যবধো যত্র হৈহয়ানাং চ বর্ণ্যতে
সৌকন্যমপি চাখ্যানং চ্যবনো যত্র ভার্গবঃ
2.118
শর্যাতিয়জ্ঞে নাসত্যৌ কৃতবান্সোমপীথিনৌ
তাভ্যাং চ যত্র স মুনির্যৌবনং প্রতিপাদিতঃ
2.119
জন্তূপাখ্যানমত্রৈব যত্র পুত্রেণ সোমকঃ
পুত্রার্থময়জদ্রাজা লেভে পুত্রশতং চ সঃ
2.120
অষ্টাবক্রীয়মত্রৈব বিবাদে যত্র বন্দিনম্
বিজিত্য সাগরং প্রাপ্তং পিতরং লব্ধবানৃষিঃ
2.121
অবাপ্য দিব্যান্যস্ত্রাণি গুর্বর্থে সব্যসাচিনা
নিবাতকবচৈর্যুদ্ধং হিরণ্যপুরবাসিভিঃ
2.122
সমাগমশ্চ পার্থস্য ভ্রাতৃভির্গন্ধমাদনে
ঘোষয়াত্রা চ গন্ধর্বৈর্যত্র যুদ্ধং কিরীটিনঃ
2.123
পুনরাগমনং চৈব তেষাং দ্বৈতবনং সরঃ
জয়দ্রথেনাপহারো দ্রৌপদ্যাশ্চাশ্রমান্তরাৎ
2.124
যত্রৈনমন্বয়াদ্ভীমো বায়ুবেগসমো জবে
মার্কণ্ডেয়সমস্যায়ামুপাখ্যানানি ভাগশঃ
2.125
সংদর্শনং চ কৃষ্ণস্য সংবাদশ্চৈব সত্যয়া
ব্রীহিদ্রৌণিকমাখ্যানমৈন্দ্রদ্যুম্নং তথৈব চ
2.126
সাবিত্র্যৌদ্দালকীয়ং চ বৈন্যোপাখ্যানমেব চ
রামায়ণমুপাখ্যানমত্রৈব বহুবিস্তরম্
2.127
কর্ণস্য পরিমোষোঽত্র কুণ্ডলাভ্যাং পুরংদরাৎ
আরণেয়মুপাখ্যানং যত্র ধর্মোঽন্বশাত্সুতম্
জগ্মুর্লব্ধবরা যত্র পাণ্ডবাঃ পশ্চিমাং দিশম্
2.128
এতদারণ্যকং পর্ব তৃতীয়ং পরিকীর্তিতম্
অত্রাধ্যায়শতে দ্বে তু সংখ্যাতে পরমর্ষিণা
একোনসপ্ততিশ্চৈব তথাধ্যায়াঃ প্রকীর্তিতাঃ
2.129
একাদশ সহস্রাণি শ্লোকানাং ষট্শতানি চ
চতুঃষষ্টিস্তথা শ্লোকাঃ পর্বৈতত্পরিকীর্তিতম্
2.130
অতঃ পরং নিবোধেদং বৈরাটং পর্ববিস্তরম্
বিরাটনগরং গত্বা শ্মশানে বিপুলাং শমীম্
দৃষ্ট্বা সংনিদধুস্তত্র পাণ্ডবা আয়ুধান্যুত
2.131
যত্র প্রবিশ্য নগরং ছদ্মভির্ন্যবসন্ত তে
দুরাত্মনো বধো যত্র কীচকস্য বৃকোদরাৎ
2.132
গোগ্রহে যত্র পার্থেন নির্জিতাঃ কুরবো যুধি
গোধনং চ বিরাটস্য মোক্ষিতং যত্র পাণ্ডবৈঃ
2.133
বিরাটেনোত্তরা দত্তা স্নুষা যত্র কিরীটিনঃ
অভিমন্যুং সমুদ্দিশ্য সৌভদ্রমরিঘাতিনম্
2.134
চতুর্থমেতদ্বিপুলং বৈরাটং পর্ব বর্ণিতম্
অত্রাপি পরিসংখ্যাতমধ্যায়ানাং মহাত্মনা
2.135
সপ্তষষ্টিরথো পূর্ণা শ্লোকাগ্রমপি মে শৃণু
শ্লোকানাং দ্বে সহস্রে তু শ্লোকাঃ পঞ্চাশদেব তু
পর্বণ্যস্মিন্সমাখ্যাতাঃ সংখ্যয়া পরমর্ষিণা
2.136
উদ্যোগপর্ব বিজ্ঞেয়ং পঞ্চমং শৃণ্বতঃ পরম্
উপপ্লব্যে নিবিষ্টেষু পাণ্ডবেষু জিগীষয়া
দুর্যোধনোঽর্জুনশ্চৈব বাসুদেবমুপস্থিতৌ
2.137
সাহায্যমস্মিন্সমরে ভবান্নৌ কর্তুমর্হতি
ইত্যুক্তে বচনে কৃষ্ণো যত্রোবাচ মহামতিঃ
2.138
অয়ুধ্যমানমাত্মানং মন্ত্রিণং পুরুষর্ষভৌ
অক্ষৌহিণীং বা সৈন্যস্য কস্য বা কিং দদাম্যহম্
2.139
বব্রে দুর্যোধনঃ সৈন্যং মন্দাত্মা যত্র দুর্মতিঃ
অয়ুধ্যমানং সচিবং বব্রে কৃষ্ণং ধনংজয়ঃ
2.140
সংজয়ং প্রেষয়ামাস শমার্থং পাণ্ডবান্প্রতি
যত্র দূতং মহারাজো ধৃতরাষ্ট্রঃ প্রতাপবান্
2.141
শ্রুত্বা চ পাণ্ডবান্যত্র বাসুদেবপুরোগমান্
প্রজাগরঃ সংপ্রজজ্ঞে ধৃতরাষ্ট্রস্য চিন্তয়া
2.142
বিদুরো যত্র বাক্যানি বিচিত্রাণি হিতানি চ
শ্রাবয়ামাস রাজানং ধৃতরাষ্ট্রং মনীষিণম্
2.143
তথা সনত্সুজাতেন যত্রাধ্যাত্মমনুত্তমম্
মনস্তাপান্বিতো রাজা শ্রাবিতঃ শোকলালসঃ
2.144
প্রভাতে রাজসমিতৌ সংজয়ো যত্র চাভিভোঃ
ঐকাত্ম্যং বাসুদেবস্য প্রোক্তবানর্জুনস্য চ
2.145
যত্র কৃষ্ণো দয়াপন্নঃ সংধিমিচ্ছন্মহায়শাঃ
স্বয়মাগাচ্ছমং কর্তুং নগরং নাগসাহ্বয়ম্
2.146
প্রত্যাখ্যানং চ কৃষ্ণস্য রাজ্ঞা দুর্যোধনেন বৈ
শমার্থং যাচমানস্য পক্ষয়োরুভয়োর্হিতম্
2.147
কর্ণদুর্যোধনাদীনাং দুষ্টং বিজ্ঞায় মন্ত্রিতম্
যোগেশ্বরত্বং কৃষ্ণেন যত্র রাজসু দর্শিতম্
2.148
রথমারোপ্য কৃষ্ণেন যত্র কর্ণোঽনুমন্ত্রিতঃ
উপায়পূর্বং শৌণ্ডীর্যাত্প্রত্যাখ্যাতশ্চ তেন সঃ
2.149
ততশ্চাপ্যভিনির্যাত্রা রথাশ্বনরদন্তিনাম্
নগরাদ্ধাস্তিনপুরাদ্বলসংখ্যানমেব চ
2.150
যত্র রাজ্ঞা উলূকস্য প্রেষণং পাণ্ডবান্প্রতি
শ্বোভাবিনি মহায়ুদ্ধে দূত্যেন ক্রূরবাদিনা
রথাতিরথসংখ্যানমম্বোপাখ্যানমেব চ
2.151
এতত্সুবহুবৃত্তান্তং পঞ্চমং পর্ব ভারতে
উদ্যোগপর্ব নির্দিষ্টং সংধিবিগ্রহসংশ্রিতম্
2.152
অধ্যায়াঃ সংখ্যয়া ত্বত্র ষডশীতিশতং স্মৃতম্
শ্লোকানাং ষট্সহস্রাণি তাবন্ত্যেব শতানি চ
2.153
শ্লোকাশ্চ নবতিঃ প্রোক্তাস্তথৈবাষ্টৌ মহাত্মনা
ব্যাসেনোদারমতিনা পর্বণ্যস্মিংস্তপোধনাঃ
2.154
অত ঊর্ধ্বং বিচিত্রার্থং ভীষ্মপর্ব প্রচক্ষতে
জম্বূখণ্ডবিনির্মাণং যত্রোক্তং সংজয়েন হ
2.155
যত্র যুদ্ধমভূদ্ঘোরং দশাহান্যতিদারুণম্
যত্র যৌধিষ্ঠিরং সৈন্যং বিষাদমগমত্পরম্
2.156
কশ্মলং যত্র পার্থস্য বাসুদেবো মহামতিঃ
মোহজং নাশয়ামাস হেতুভির্মোক্ষদর্শনৈঃ
2.157
শিখণ্ডিনং পুরস্কৃত্য যত্র পার্থো মহাধনুঃ
বিনিঘ্নন্নিশিতৈর্বাণৈ রথাদ্ভীষ্মমপাতয়ৎ
2.158
ষষ্ঠমেতন্মহাপর্ব ভারতে পরিকীর্তিতম্
অধ্যায়ানাং শতং প্রোক্তং সপ্তদশ তথাপরে
2.159
পঞ্চ শ্লোকসহস্রাণি সংখ্যয়াষ্টৌ শতানি চ
শ্লোকাশ্চ চতুরাশীতিঃ পর্বণ্যস্মিন্প্রকীর্তিতাঃ
ব্যাসেন বেদবিদুষা সংখ্যাতা ভীষ্মপর্বণি
2.160
দ্রোণপর্ব ততশ্চিত্রং বহুবৃত্তান্তমুচ্যতে
যত্র সংশপ্তকাঃ পার্থমপনিন্যূ রণাজিরাৎ
2.161
ভগদত্তো মহারাজো যত্র শক্রসমো যুধি
সুপ্রতীকেন নাগেন সহ শস্তঃ কিরীটিনা
2.162
যত্রাভিমন্যুং বহবো জঘ্নুর্লোকমহারথাঃ
জয়দ্রথমুখা বালং শূরমপ্রাপ্তয়ৌবনম্
2.163
হতেঽভিমন্যৌ ক্রুদ্ধেন যত্র পার্থেন সংয়ুগে
অক্ষৌহিণীঃ সপ্ত হত্বা হতো রাজা জয়দ্রথঃ
সংশপ্তকাবশেষং চ কৃতং নিঃশেষমাহবে
2.164
অলম্বুসঃ শ্রুতায়ুশ্চ জলসংধশ্চ বীর্যবান্
সৌমদত্তির্বিরাটশ্চ দ্রুপদশ্চ মহারথঃ
ঘটোত্কচাদয়শ্চান্যে নিহতা দ্রোণপর্বণি
2.165
অশ্বত্থামাপি চাত্রৈব দ্রোণে যুধি নিপাতিতে
অস্ত্রং প্রাদুশ্চকারোগ্রং নারায়ণমমর্ষিতঃ
2.166
সপ্তমং ভারতে পর্ব মহদেতদুদাহৃতম্
অত্র তে পৃথিবীপালাঃ প্রায়শো নিধনং গতাঃ
দ্রোণপর্বণি যে শূরা নির্দিষ্টাঃ পুরুষর্ষভাঃ
2.167
অধ্যায়ানাং শতং প্রোক্তমধ্যায়াঃ সপ্ততিস্তথা
অষ্টৌ শ্লোকসহস্রাণি তথা নব শতানি চ
2.168
শ্লোকা নব তথৈবাত্র সংখ্যাতাস্তত্ত্বদর্শিনা
পারাশর্যেণ মুনিনা সংচিন্ত্য দ্রোণপর্বণি
2.169
অতঃ পরং কর্ণপর্ব প্রোচ্যতে পরমাদ্ভুতম্
সারথ্যে বিনিয়োগশ্চ মদ্ররাজস্য ধীমতঃ
আখ্যাতং যত্র পৌরাণং ত্রিপুরস্য নিপাতনম্
2.170
প্রয়াণে পরুষশ্চাত্র সংবাদঃ কর্ণশল্যয়োঃ
হংসকাকীয়মাখ্যানমত্রৈবাক্ষেপসংহিতম্
2.171
অন্যোন্যং প্রতি চ ক্রোধো যুধিষ্ঠিরকিরীটিনোঃ
দ্বৈরথে যত্র পার্থেন হতঃ কর্ণো মহারথঃ
2.172
অষ্টমং পর্ব নির্দিষ্টমেতদ্ভারতচিন্তকৈঃ
একোনসপ্ততিঃ প্রোক্তা অধ্যায়াঃ কর্ণপর্বণি
চত্বার্যেব সহস্রাণি নব শ্লোকশতানি চ
2.173
অতঃ পরং বিচিত্রার্থং শল্যপর্ব প্রকীর্তিতম্
হতপ্রবীরে সৈন্যে তু নেতা মদ্রেশ্বরোঽভবৎ
2.174
বৃত্তানি রথয়ুদ্ধানি কীর্ত্যন্তে যত্র ভাগশঃ
বিনাশঃ কুরুমুখ্যানাং শল্যপর্বণি কীর্ত্যতে
2.175
শল্যস্য নিধনং চাত্র ধর্মরাজান্মহারথাৎ
গদায়ুদ্ধং তু তুমুলমত্রৈব পরিকীর্তিতম্
সরস্বত্যাশ্চ তীর্থানাং পুণ্যতা পরিকীর্তিতা
2.176
নবমং পর্ব নির্দিষ্টমেতদদ্ভুতমর্থবৎ
একোনষষ্টিরধ্যায়াস্তত্র সংখ্যাবিশারদৈঃ
2.177
সংখ্যাতা বহুবৃত্তান্তাঃ শ্লোকাগ্রং চাত্র শস্যতে
ত্রীণি শ্লোকসহস্রাণি দ্বে শতে বিংশতিস্তথা
মুনিনা সংপ্রণীতানি কৌরবাণাং যশোভৃতাম্
2.178
অতঃ পরং প্রবক্ষ্যামি সৌপ্তিকং পর্ব দারুণম্
ভগ্নোরুং যত্র রাজানং দুর্যোধনমমর্ষণম্
2.179
ব্যপয়াতেষু পার্থেষু ত্রয়স্তেঽভ্যায়য়ূ রথাঃ
কৃতবর্মা কৃপো দ্রৌণিঃ সায়াহ্নে রুধিরোক্ষিতাঃ
2.180
প্রতিজজ্ঞে দৃঢক্রোধো দ্রৌণির্যত্র মহারথঃ
অহত্বা সর্বপাঞ্চালান্ধৃষ্টদ্যুম্নপুরোগমান্
পাণ্ডবাংশ্চ সহামাত্যান্ন বিমোক্ষ্যামি দংশনম্
2.181
প্রসুপ্তান্নিশি বিশ্বস্তান্যত্র তে পুরুষর্ষভাঃ
পাঞ্চালান্সপরীবারাঞ্জঘ্নুর্দ্রৌণিপুরোগমাঃ
2.182
যত্রামুচ্যন্ত পার্থাস্তে পঞ্চ কৃষ্ণবলাশ্রয়াৎ
সাত্যকিশ্চ মহেষ্বাসঃ শেষাশ্চ নিধনং গতাঃ
2.183
দ্রৌপদী পুত্রশোকার্তা পিতৃভ্রাতৃবধার্দিতা
কৃতানশনসংকল্পা যত্র ভর্তৄনুপাবিশৎ
2.184
দ্রৌপদীবচনাদ্যত্র ভীমো ভীমপরাক্রমঃ
অন্বধাবত সংক্রুদ্ধো ভারদ্বাজং গুরোঃ সুতম্
2.185
ভীমসেনভয়াদ্যত্র দৈবেনাভিপ্রচোদিতঃ
অপাণ্ডবায়েতি রুষা দ্রৌণিরস্ত্রমবাসৃজৎ
2.186
মৈবমিত্যব্রবীত্কৃষ্ণঃ শময়ংস্তস্য তদ্বচঃ
যত্রাস্ত্রমস্ত্রেণ চ তচ্ছময়ামাস ফাল্গুনঃ
2.187
দ্রৌণিদ্বৈপায়নাদীনাং শাপাশ্চান্যোন্যকারিতাঃ
তোয়কর্মণি সর্বেষাং রাজ্ঞামুদকদানিকে
2.188
গূঢোত্পন্নস্য চাখ্যানং কর্ণস্য পৃথয়াত্মনঃ
সুতস্যৈতদিহ প্রোক্তং দশমং পর্ব সৌপ্তিকম্
2.189
অষ্টাদশাস্মিন্নধ্যায়াঃ পর্বণ্যুক্তা মহাত্মনা
শ্লোকাগ্রমত্র কথিতং শতান্যষ্টৌ তথৈব চ
2.190
শ্লোকাশ্চ সপ্ততিঃ প্রোক্তা যথাবদভিসংখ্যয়া
সৌপ্তিকৈষীকসংবন্ধে পর্বণ্যমিতবুদ্ধিনা
2.191
অত ঊর্ধ্বমিদং প্রাহুঃ স্ত্রীপর্ব করুণোদয়ম্
বিলাপো বীরপত্নীনাং যত্রাতিকরুণঃ স্মৃতঃ
ক্রোধাবেশঃ প্রসাদশ্চ গান্ধারীধৃতরাষ্ট্রয়োঃ
2.192
যত্র তান্ক্ষত্রিয়াঞ্শূরান্দিষ্টান্তাননিবর্তিনঃ
পুত্রান্ভ্রাতৄন্পিতৄংশ্চৈব দদৃশুর্নিহতান্রণে
2.193
যত্র রাজা মহাপ্রাজ্ঞঃ সর্বধর্মভৃতাং বরঃ
রাজ্ঞাং তানি শরীরাণি দাহয়ামাস শাস্ত্রতঃ
2.194
এতদেকাদশং প্রোক্তং পর্বাতিকরুণং মহৎ
সপ্তবিংশতিরধ্যায়াঃ পর্বণ্যস্মিন্নুদাহৃতাঃ
2.195
শ্লোকাঃ সপ্তশতং চাত্র পঞ্চসপ্ততিরুচ্যতে
সংখ্যয়া ভারতাখ্যানং কর্ত্রা হ্যত্র মহাত্মনা
প্রণীতং সজ্জনমনোবৈক্লব্যাশ্রুপ্রবর্তকম্
2.196
অতঃ পরং শান্তিপর্ব দ্বাদশং বুদ্ধিবর্ধনম্
যত্র নির্বেদমাপন্নো ধর্মরাজো যুধিষ্ঠিরঃ
ঘাতয়িত্বা পিতৄন্ভ্রাতৄন্পুত্রান্সংবন্ধিবান্ধবান্
2.197
শান্তিপর্বণি ধর্মাশ্চ ব্যাখ্যাতাঃ শরতল্পিকাঃ
রাজভির্বেদিতব্যা যে সম্যঙ্নয়বুভুত্সুভিঃ
2.198
আপদ্ধর্মাশ্চ তত্রৈব কালহেতুপ্রদর্শকাঃ
যান্বুদ্ধ্বা পুরুষঃ সম্যক্সর্বজ্ঞত্বমবাপ্নুয়াৎ
মোক্ষধর্মাশ্চ কথিতা বিচিত্রা বহুবিস্তরাঃ
2.199
দ্বাদশং পর্ব নির্দিষ্টমেতত্প্রাজ্ঞজনপ্রিয়ম্
পর্বণ্যত্র পরিজ্ঞেয়মধ্যায়ানাং শতত্রয়ম্
ত্রিংশচ্চৈব তথাধ্যায়া নব চৈব তপোধনাঃ
2.200
শ্লোকানাং তু সহস্রাণি কীর্তিতানি চতুর্দশ
পঞ্চ চৈব শতান্যাহুঃ পঞ্চবিংশতিসংখ্যয়া
2.201
অত ঊর্ধ্বং তু বিজ্ঞেয়মানুশাসনমুত্তমম্
যত্র প্রকৃতিমাপন্নঃ শ্রুত্বা ধর্মবিনিশ্চয়ম্
ভীষ্মাদ্ভাগীরথীপুত্রাত্কুরুরাজো যুধিষ্ঠিরঃ
2.202
ব্যবহারোঽত্র কার্ত্স্ন্যেন ধর্মার্থীয়ো নিদর্শিতঃ
বিবিধানাং চ দানানাং ফলয়োগাঃ পৃথগ্বিধাঃ
2.203
তথা পাত্রবিশেষাশ্চ দানানাং চ পরো বিধিঃ
আচারবিধিয়োগশ্চ সত্যস্য চ পরা গতিঃ
2.204
এতত্সুবহুবৃত্তান্তমুত্তমং চানুশাসনম্
ভীষ্মস্যাত্রৈব সংপ্রাপ্তিঃ স্বর্গস্য পরিকীর্তিতা
2.205
এতত্ত্রয়োদশং পর্ব ধর্মনিশ্চয়কারকম্
অধ্যায়ানাং শতং চাত্র ষট্চত্বারিংশদেব চ
শ্লোকানাং তু সহস্রাণি ষট্সপ্তৈব শতানি চ
2.206
ততোঽশ্বমেধিকং নাম পর্ব প্রোক্তং চতুর্দশম্
তত্সংবর্তমরুত্তীয়ং যত্রাখ্যানমনুত্তমম্
2.207
সুবর্ণকোশসংপ্রাপ্তির্জন্ম চোক্তং পরিক্ষিতঃ
দগ্ধস্যাস্ত্রাগ্নিনা পূর্বং কৃষ্ণাত্সংজীবনং পুনঃ
2.208
চর্যায়াং হয়মুত্সৃষ্টং পাণ্ডবস্যানুগচ্ছতঃ
তত্র তত্র চ যুদ্ধানি রাজপুত্রৈরমর্ষণৈঃ
2.209
চিত্রাঙ্গদায়াঃ পুত্রেণ পুত্রিকায়া ধনংজয়ঃ
সংগ্রামে বভ্রুবাহেন সংশয়ং চাত্র দর্শিতঃ
অশ্বমেধে মহায়জ্ঞে নকুলাখ্যানমেব চ
2.210
ইত্যাশ্বমেধিকং পর্ব প্রোক্তমেতন্মহাদ্ভুতম্
অত্রাধ্যায়শতং ত্রিংশত্ত্রয়োঽধ্যায়াশ্চ শব্দিতাঃ
2.211
ত্রীণি শ্লোকসহস্রাণি তাবন্ত্যেব শতানি চ
বিংশতিশ্চ তথা শ্লোকাঃ সংখ্যাতাস্তত্ত্বদর্শিনা
2.212
তত আশ্রমবাসাক্যং পর্ব পঞ্চদশং স্মৃতম্
যত্র রাজ্যং পরিত্যজ্য গান্ধারীসহিতো নৃপঃ
ধৃতরাষ্ট্রাশ্রমপদং বিদুরশ্চ জগাম হ
2.213
যং দৃষ্ট্বা প্রস্থিতং সাধ্বী পৃথাপ্যনুয়য়ৌ তদা
পুত্ররাজ্যং পরিত্যজ্য গুরুশুশ্রূষণে রতা
2.214
যত্র রাজা হতান্পুত্রান্পৌত্রানন্যাংশ্চ পার্থিবান্
লোকান্তরগতান্বীরানপশ্যত্পুনরাগতান্
2.215
ঋষেঃ প্রসাদাত্কৃষ্ণস্য দৃষ্ট্বাশ্চর্যমনুত্তমম্
ত্যক্ত্বা শোকং সদারশ্চ সিদ্ধিং পরমিকাং গতঃ
2.216
যত্র ধর্মং সমাশ্রিত্য বিদুরঃ সুগতিং গতঃ
সংজয়শ্চ মহামাত্রো বিদ্বান্গাবল্গণির্বশী
2.217
দদর্শ নারদং যত্র ধর্মরাজো যুধিষ্ঠিরঃ
নারদাচ্চৈব শুশ্রাব বৃষ্ণীনাং কদনং মহৎ
2.218
এতদাশ্রমবাসাখ্যং পূর্বোক্তং সুমহাদ্ভুতম্
দ্বিচত্বারিংশদধ্যায়াঃ পর্বৈতদভিসংখ্যয়া
2.219
সহস্রমেকং শ্লোকানাং পঞ্চ শ্লোকশতানি চ
ষডেব চ তথা শ্লোকাঃ সংখ্যাতাস্তত্ত্বদর্শিনা
2.220
অতঃ পরং নিবোধেদং মৌসলং পর্ব দারুণম্
যত্র তে পুরুষব্যাঘ্রাঃ শস্ত্রস্পর্শসহা যুধি
ব্রহ্মদণ্ডবিনিষ্পিষ্টাঃ সমীপে লবণাম্ভসঃ
2.221
আপানে পানগলিতা দৈবেনাভিপ্রচোদিতাঃ
এরকারূপিভির্বজ্রৈর্নিজঘ্নুরিতরেতরম্
2.222
যত্র সর্বক্ষয়ং কৃত্বা তাবুভৌ রামকেশবৌ
নাতিচক্রমতুঃ কালং প্রাপ্তং সর্বহরং সমম্
2.223
যত্রার্জুনো দ্বারবতীমেত্য বৃষ্ণিবিনাকৃতাম্
দৃষ্ট্বা বিষাদমগমত্পরাং চার্তিং নরর্ষভঃ
2.224
স সত্কৃত্য যদুশ্রেষ্ঠং মাতুলং শৌরিমাত্মনঃ
দদর্শ যদুবীরাণামাপানে বৈশসং মহৎ
2.225
শরীরং বাসুদেবস্য রামস্য চ মহাত্মনঃ
সংস্কারং লম্ভয়ামাস বৃষ্ণীনাং চ প্রধানতঃ
2.226
স বৃদ্ধবালমাদায় দ্বারবত্যাস্ততো জনম্
দদর্শাপদি কষ্টায়াং গাণ্ডীবস্য পরাভবম্
2.227
সর্বেষাং চৈব দিব্যানামস্ত্রাণামপ্রসন্নতাম্
নাশং বৃষ্ণিকলত্রাণাং প্রভাবানামনিত্যতাম্
2.228
দৃষ্ট্বা নির্বেদমাপন্নো ব্যাসবাক্যপ্রচোদিতঃ
ধর্মরাজং সমাসাদ্য সংন্যাসং সমরোচয়েৎ
2.229
ইত্যেতন্মৌসলং পর্ব ষোডশং পরিকীর্তিতম্
অধ্যায়াষ্টৌ সমাখ্যাতাঃ শ্লোকানাং চ শতত্রয়ম্
2.230
মহাপ্রস্থানিকং তস্মাদূর্ধ্বং সপ্তদশং স্মৃতম্
যত্র রাজ্যং পরিত্যজ্য পাণ্ডবাঃ পুরুষর্ষভাঃ
দ্রৌপদ্যা সহিতা দেব্যা সিদ্ধিং পরমিকাং গতাঃ
2.231
অত্রাধ্যায়াস্ত্রয়ঃ প্রোক্তাঃ শ্লোকানাং চ শতং তথা
বিংশতিশ্চ তথা শ্লোকাঃ সংখ্যাতাস্তত্ত্বদর্শিনা
2.232
স্বর্গপর্ব ততো জ্ঞেয়ং দিব্যং যত্তদমানুষম্
অধ্যায়াঃ পঞ্চ সংখ্যাতাঃ পর্বৈতদভিসংখ্যয়া
শ্লোকানাং দ্বে শতে চৈব প্রসংখ্যাতে তপোধনাঃ
2.233
অষ্টাদশৈবমেতানি পর্বাণ্যুক্তান্যশেষতঃ
খিলেষু হরিবংশশ্চ ভবিষ্যচ্চ প্রকীর্তিতম্
2.234
এতদখিলমাখ্যাতং ভারতং পর্বসংগ্রহাৎ
অষ্টাদশ সমাজগ্মুরক্ষৌহিণ্যো যুয়ুত্সয়া
তন্মহদ্দারুণং যুদ্ধমহান্যষ্টাদশাভবৎ
2.235
যো বিদ্যাচ্চতুরো বেদান্সাঙ্গোপনিষদান্দ্বিজঃ
ন চাখ্যানমিদং বিদ্যান্নৈব স স্যাদ্বিচক্ষণঃ
2.236
শ্রুত্বা ত্বিদমুপাখ্যানং শ্রাব্যমন্যন্ন রোচতে
পুংস্কোকিলরুতং শ্রুত্বা রূক্ষা ধ্বাঙ্ক্ষস্য বাগিব
2.237
ইতিহাসোত্তমাদস্মাজ্জায়ন্তে কবিবুদ্ধয়ঃ
পঞ্চভ্য ইব ভূতেভ্যো লোকসংবিধয়স্ত্রয়ঃ
2.238
অস্যাখ্যানস্য বিষয়ে পুরাণং বর্ততে দ্বিজাঃ
অন্তরিক্ষস্য বিষয়ে প্রজা ইব চতুর্বিধাঃ
2.239
ক্রিয়াগুণানাং সর্বেষামিদমাখ্যানমাশ্রয়ঃ
ইন্দ্রিয়াণাং সমস্তানাং চিত্রা ইব মনঃক্রিয়াঃ
2.240
অনাশ্রিত্যৈতদাখ্যানং কথা ভুবি ন বিদ্যতে
আহারমনপাশ্রিত্য শরীরস্যেব ধারণম্
2.241
ইদং সর্বৈঃ কবিবরৈরাখ্যানমুপজীব্যতে
উদয়প্রেপ্সুভির্ভৃত্যৈরভিজাত ইবেশ্বরঃ
2.242
দ্বৈপায়নৌষ্ঠপুটনিঃসৃতমপ্রমেয়ং; পুণ্যং পবিত্রমথ পাপহরং শিবং চ
যো ভারতং সমধিগচ্ছতি বাচ্যমানং; কিং তস্য পুষ্করজলৈরভিষেচনেন
2.243
আখ্যানং তদিদমনুত্তমং মহার্থং; বিন্যস্তং মহদিহ পর্বসংগ্রহেণ
শ্রুত্বাদৌ ভবতি নৃণাং সুখাবগাহং; বিস্তীর্ণং লবণজলং যথা প্লবেন