অধ্যায় 29

29.1

সূত উবাচ
জাম্বূনদময়ো ভূত্বা মরীচিবিকচোজ্জ্বলঃ
প্রবিবেশ বলাত্পক্ষী বারিবেগ ইবার্ণবম্

স চক্রং ক্ষুরপর্যন্তমপশ্যদমৃতান্তিকে
পরিভ্রমন্তমনিশং তীক্ষ্ণধারময়স্ময়ম্

জ্বলনার্কপ্রভং ঘোরং ছেদনং সোমহারিণাম্
ঘোররূপং তদত্যর্থং যন্ত্রং দেবৈঃ সুনির্মিতম্

তস্যান্তরং স দৃষ্ট্বৈব পর্যবর্তত খেচরঃ
অরান্তরেণাভ্যপতত্সংক্ষিপ্যাঙ্গং ক্ষণেন হ

অধশ্চক্রস্য চৈবাত্র দীপ্তানলসমদ্যুতী
বিদ্যুজ্জিহ্বৌ মহাঘোরৌ দীপ্তাস্যৌ দীপ্তলোচনৌ

চক্ষুর্বিষৌ মহাবীর্যৌ নিত্যক্রুদ্ধৌ তরস্বিনৌ
রক্ষার্থমেবামৃতস্য দদর্শ ভুজগোত্তমৌ

সদা সংরব্ধনয়নৌ সদা চানিমিষেক্ষণৌ
তয়োরেকোঽপি যং পশ্যেত্স তূর্ণং ভস্মসাদ্ভবেৎ

তয়োশ্চক্ষূংষি রজসা সুপর্ণস্তূর্ণমাবৃণোৎ
অদৃষ্টরূপস্তৌ চাপি সর্বতঃ পর্যকালয়ৎ

তয়োরঙ্গে সমাক্রম্য বৈনতেয়োঽন্তরিক্ষগঃ
আচ্ছিনত্তরসা মধ্যে সোমমভ্যদ্রবত্ততঃ

সমুত্পাট্যামৃতং তত্তু বৈনতেয়স্ততো বলী
উত্পপাত জবেনৈব যন্ত্রমুন্মথ্য বীর্যবান্

অপীত্বৈবামৃতং পক্ষী পরিগৃহ্যাশু বীর্যবান্
অগচ্ছদপরিশ্রান্ত আবার্যার্কপ্রভাং খগঃ

বিষ্ণুনা তু তদাকাশে বৈনতেয়ঃ সমেয়িবান্
তস্য নারায়ণস্তুষ্টস্তেনালৌল্যেন কর্মণা

তমুবাচাব্যয়ো দেবো বরদোঽস্মীতি খেচরম্
স বব্রে তব তিষ্ঠেয়মুপরীত্যন্তরিক্ষগঃ

উবাচ চৈনং ভূয়োঽপি নারায়ণমিদং বচঃ
অজরশ্চামরশ্চ স্যামমৃতেন বিনাপ্যহম্

প্রতিগৃহ্য বরৌ তৌ চ গরুডো বিষ্ণুমব্রবীৎ
ভবতেঽপি বরং দদ্মি বৃণীতাং ভগবানপি

তং বব্রে বাহনং কৃষ্ণো গরুত্মন্তং মহাবলম্
ধ্বজং চ চক্রে ভগবানুপরি স্থাস্যসীতি তম্

অনুপত্য খগং ত্বিন্দ্রো বজ্রেণাঙ্গেঽভ্যতাডয়ৎ
বিহংগমং সুরামিত্রং হরন্তমমৃতং বলাৎ

তমুবাচেন্দ্রমাক্রন্দে গরুডঃ পততাং বরঃ
প্রহসঞ্শ্লক্ষ্ণয়া বাচা তথা বজ্রসমাহতঃ

ঋষের্মানং করিষ্যামি বজ্রং যস্যাস্থিসংভবম্
বজ্রস্য চ করিষ্যামি তব চৈব শতক্রতো

এষ পত্রং ত্যজাম্যেকং যস্যান্তং নোপলপ্স্যসে
ন হি বজ্রনিপাতেন রুজা মেঽস্তি কদাচন

তত্র তং সর্বভূতানি বিস্মিতান্যব্রুবংস্তদা
সুরূপং পত্রমালক্ষ্য সুপর্ণোঽয়ং ভবত্বিতি

দৃষ্ট্বা তদদ্ভুতং চাপি সহস্রাক্ষঃ পুরংদরঃ
খগো মহদিদং ভূতমিতি মত্বাভ্যভাষত

বলং বিজ্ঞাতুমিচ্ছামি যত্তে পরমনুত্তমম্
সখ্যং চানন্তমিচ্ছামি ত্বয়া সহ খগোত্তম