অধ্যায় 30

30.1

গরুড উবাচ
সখ্যং মেঽস্তু ত্বয়া দেব যথেচ্ছসি পুরংদর
বলং তু মম জানীহি মহচ্চাসহ্যমেব চ

কামং নৈতত্প্রশংসন্তি সন্তঃ স্ববলসংস্তবম্
গুণসংকীর্তনং চাপি স্বয়মেব শতক্রতো

সখেতি কৃত্বা তু সখে পৃষ্টো বক্ষ্যাম্যহং ত্বয়া
ন হ্যাত্মস্তবসংয়ুক্তং বক্তব্যমনিমিত্ততঃ

সপর্বতবনামুর্বীং সসাগরবনামিমাম্
পক্ষনাড্যৈকয়া শক্র ত্বাং চৈবাত্রাবলম্বিনম্

সর্বান্সংপিণ্ডিতান্বাপি লোকান্সস্থাণুজঙ্গমান্
বহেয়মপরিশ্রান্তো বিদ্ধীদং মে মহদ্বলম্

সূত উবাচ
ইত্যুক্তবচনং বীরং কিরীটী শ্রীমতাং বরঃ
আহ শৌনক দেবেন্দ্রঃ সর্বভূতহিতঃ প্রভুঃ

প্রতিগৃহ্যতামিদানীং মে সখ্যমানন্ত্যমুত্তমম্
ন কার্যং তব সোমেন মম সোমঃ প্রদীয়তাম্
অস্মাংস্তে হি প্রবাধেয়ুর্যেভ্যো দদ্যাদ্ভবানিমম্

গরুড উবাচ
কিংচিত্কারণমুদ্দিশ্য সোমোঽয়ং নীয়তে ময়া
ন দাস্যামি সমাদাতুং সোমং কস্মৈচিদপ্যহম্

যত্রেমং তু সহস্রাক্ষ নিক্ষিপেয়মহং স্বয়ম্
ত্বমাদায় ততস্তূর্ণং হরেথাস্ত্রিদশেশ্বর

শক্র উবাচ
বাক্যেনানেন তুষ্টোঽহং যত্ত্বয়োক্তমিহাণ্ডজ
যদিচ্ছসি বরং মত্তস্তদ্গৃহাণ খগোত্তম

সূত উবাচ
ইত্যুক্তঃ প্রত্যুবাচেদং কদ্রূপুত্রাননুস্মরন্
স্মৃত্বা চৈবোপধিকৃতং মাতুর্দাস্যনিমিত্ততঃ

ঈশোঽহমপি সর্বস্য করিষ্যামি তু তেঽর্থিতাম্
ভবেয়ুর্ভুজগাঃ শক্র মম ভক্ষ্যা মহাবলাঃ

তথেত্যুক্ত্বান্বগচ্ছত্তং ততো দানবসূদনঃ
হরিষ্যামি বিনিক্ষিপ্তং সোমমিত্যনুভাষ্য তম্

আজগাম ততস্তূর্ণং সুপর্ণো মাতুরন্তিকম্
অথ সর্পানুবাচেদং সর্বান্পরমহৃষ্টবৎ

ইদমানীতমমৃতং নিক্ষেপ্স্যামি কুশেষু বঃ
স্নাতা মঙ্গলসংয়ুক্তাস্ততঃ প্রাশ্নীত পন্নগাঃ

অদাসী চৈব মাতেয়মদ্যপ্রভৃতি চাস্তু মে
যথোক্তং ভবতামেতদ্বচো মে প্রতিপাদিতম্

ততঃ স্নাতুং গতাঃ সর্পাঃ প্রত্যুক্ত্বা তং তথেত্যুত
শক্রোঽপ্যমৃতমাক্ষিপ্য জগাম ত্রিদিবং পুনঃ

অথাগতাস্তমুদ্দেশং সর্পাঃ সোমার্থিনস্তদা
স্নাতাশ্চ কৃতজপ্যাশ্চ প্রহৃষ্টাঃ কৃতমঙ্গলাঃ

তদ্বিজ্ঞায় হৃতং সর্পাঃ প্রতিমায়াকৃতং চ তৎ
সোমস্থানমিদং চেতি দর্ভাংস্তে লিলিহুস্তদা

ততো দ্বৈধীকৃতা জিহ্বা সর্পাণাং তেন কর্মণা
অভবংশ্চামৃতস্পর্শাদ্দর্ভাস্তেঽথ পবিত্রিণঃ

ততঃ সুপর্ণঃ পরমপ্রহৃষ্টবা;ন্বিহৃত্য মাত্রা সহ তত্র কাননে
ভুজংগভক্ষঃ পরমার্চিতঃ খগৈ;রহীনকীর্তির্বিনতামনন্দয়ৎ

ইমাং কথাং যঃ শৃণুয়ান্নরঃ সদা; পঠেত বা দ্বিজজনমুখ্যসংসদি
অসংশয়ং ত্রিদিবমিয়াত্স পুণ্যভা;ঙ্মহাত্মনঃ পতগপতেঃ প্রকীর্তনাৎ