UtshovChapter 29
29.1
सूत उवाच
जाम्बूनदमयो भूत्वा मरीचिविकचोज्ज्वलः
प्रविवेश बलात्पक्षी वारिवेग इवार्णवम्
Suta uvacha
Jambunadamayo bhutva marichivikachojjvalah
Pravivesha balatpakshi varivega ivarnavam
29.2
स चक्रं क्षुरपर्यन्तमपश्यदमृतान्तिके
परिभ्रमन्तमनिशं तीक्ष्णधारमयस्मयम्
Sa chakram kshuraparyantamapashyadamritantike
Paribhramantamanisham tikshnadharamayasmayam
29.3
ज्वलनार्कप्रभं घोरं छेदनं सोमहारिणाम्
घोररूपं तदत्यर्थं यन्त्रं देवैः सुनिर्मितम्
Jvalanarkaprabham ghoram chhedanam somaharinam
Ghorarupam tadatyartham yantram devaih sunirmitam
29.4
तस्यान्तरं स दृष्ट्वैव पर्यवर्तत खेचरः
अरान्तरेणाभ्यपतत्संक्षिप्याङ्गं क्षणेन ह
Tasyantaram sa drishtvaiva paryavartata khecharah
Arantarenabhyapatatsankshipyangam kshanena ha
29.5
अधश्चक्रस्य चैवात्र दीप्तानलसमद्युती
विद्युज्जिह्वौ महाघोरौ दीप्तास्यौ दीप्तलोचनौ
Adhashchakrasya chaivatra diptanalasamadyuti
Vidyujjihvau mahaghorau diptasyau diptalochanau
29.6
चक्षुर्विषौ महावीर्यौ नित्यक्रुद्धौ तरस्विनौ
रक्षार्थमेवामृतस्य ददर्श भुजगोत्तमौ
Chakshurvishau mahaviryau nityakruddhau tarasvinau
Raksharthamevamritasya dadarsha bhujagottamau
29.7
सदा संरब्धनयनौ सदा चानिमिषेक्षणौ
तयोरेकोऽपि यं पश्येत्स तूर्णं भस्मसाद्भवेत्
Sada sanrabdhanayanau sada chanimishekshanau
Tayorekopi yam pashyetsa turnam bhasmasadbhavet
29.8
तयोश्चक्षूंषि रजसा सुपर्णस्तूर्णमावृणोत्
अदृष्टरूपस्तौ चापि सर्वतः पर्यकालयत्
Tayoshchakshunshi rajasa suparnasturnamavrinot
Adrishtarupastau chapi sarvatah paryakalayat
29.9
तयोरङ्गे समाक्रम्य वैनतेयोऽन्तरिक्षगः
आच्छिनत्तरसा मध्ये सोममभ्यद्रवत्ततः
Tayorange samakramya vainateyontarikshagah
Achchhinattarasa madhye somamabhyadravattatah
29.10
समुत्पाट्यामृतं तत्तु वैनतेयस्ततो बली
उत्पपात जवेनैव यन्त्रमुन्मथ्य वीर्यवान्
Samutpatyamritam tattu vainateyastato bali
Utpapata javenaiva yantramunmathya viryavan
29.11
अपीत्वैवामृतं पक्षी परिगृह्याशु वीर्यवान्
अगच्छदपरिश्रान्त आवार्यार्कप्रभां खगः
Apitvaivamritam pakshi parigrihyashu viryavan
Agachchhadaparishranta avaryarkaprabham khagah
29.12
विष्णुना तु तदाकाशे वैनतेयः समेयिवान्
तस्य नारायणस्तुष्टस्तेनालौल्येन कर्मणा
Vishnuna tu tadakashe vainateyah sameyivan
Tasya narayanastushtastenalaulyena karmana
29.13
तमुवाचाव्ययो देवो वरदोऽस्मीति खेचरम्
स वव्रे तव तिष्ठेयमुपरीत्यन्तरिक्षगः
Tamuvachavyayo devo varadosmiti khecharam
Sa vavre tava tishtheyamuparityantarikshagah
29.14
उवाच चैनं भूयोऽपि नारायणमिदं वचः
अजरश्चामरश्च स्याममृतेन विनाप्यहम्
Uvacha chainam bhuyopi narayanamidam vachah
Ajarashchamarashcha syamamritena vinapyaham
29.15
प्रतिगृह्य वरौ तौ च गरुडो विष्णुमब्रवीत्
भवतेऽपि वरं दद्मि वृणीतां भगवानपि
Pratigrihya varau tau cha garudo vishnumabravit
Bhavatepi varam dadmi vrinitam bhagavanapi
29.16
तं वव्रे वाहनं कृष्णो गरुत्मन्तं महाबलम्
ध्वजं च चक्रे भगवानुपरि स्थास्यसीति तम्
Tam vavre vahanam krishno garutmantam mahabalam
Dhvajam cha chakre bhagavanupari sthasyasiti tam
29.17
अनुपत्य खगं त्विन्द्रो वज्रेणाङ्गेऽभ्यताडयत्
विहंगमं सुरामित्रं हरन्तममृतं बलात्
Anupatya khagam tvindro vajrenangebhyatadayat
Vihangamam suramitram harantamamritam balat
29.18
तमुवाचेन्द्रमाक्रन्दे गरुडः पततां वरः
प्रहसञ्श्लक्ष्णया वाचा तथा वज्रसमाहतः
Tamuvachendramakrande garudah patatam varah
Prahasanshlakshnaya vacha tatha vajrasamahatah
29.19
ऋषेर्मानं करिष्यामि वज्रं यस्यास्थिसंभवम्
वज्रस्य च करिष्यामि तव चैव शतक्रतो
Rishermanam karishyami vajram yasyasthisambhavam
Vajrasya cha karishyami tava chaiva shatakrato
29.20
एष पत्रं त्यजाम्येकं यस्यान्तं नोपलप्स्यसे
न हि वज्रनिपातेन रुजा मेऽस्ति कदाचन
Esha patram tyajamyekam yasyantam nopalapsyase
Na hi vajranipatena ruja mesti kadachana
29.21
तत्र तं सर्वभूतानि विस्मितान्यब्रुवंस्तदा
सुरूपं पत्रमालक्ष्य सुपर्णोऽयं भवत्विति
Tatra tam sarvabhutani vismitanyabruvanstada
Surupam patramalakshya suparnoyam bhavatviti
29.22
दृष्ट्वा तदद्भुतं चापि सहस्राक्षः पुरंदरः
खगो महदिदं भूतमिति मत्वाभ्यभाषत
Drishtva tadadbhutam chapi sahasrakshah purandarah
Khago mahadidam bhutamiti matvabhyabhashata
29.23
बलं विज्ञातुमिच्छामि यत्ते परमनुत्तमम्
सख्यं चानन्तमिच्छामि त्वया सह खगोत्तम
Balam vigyatumichchhami yatte paramanuttamam
Sakhyam chanantamichchhami tvaya saha khagottama