Utshovঅধ্যায় 28
28.1
সূত উবাচ
ততস্তস্মিন্দ্বিজশ্রেষ্ঠ সমুদীর্ণে তথাবিধে
গরুত্মান্পক্ষিরাট্তূর্ণং সংপ্রাপ্তো বিবুধান্প্রতি
28.2
তং দৃষ্ট্বাতিবলং চৈব প্রাকম্পন্ত সমন্ততঃ
পরস্পরং চ প্রত্যঘ্নন্সর্বপ্রহরণান্যপি
28.3
তত্র চাসীদমেয়াত্মা বিদ্যুদগ্নিসমপ্রভঃ
ভৌবনঃ সুমহাবীর্যঃ সোমস্য পরিরক্ষিতা
28.4
স তেন পতগেন্দ্রেণ পক্ষতুণ্ডনখৈঃ ক্ষতঃ
মুহূর্তমতুলং যুদ্ধং কৃত্বা বিনিহতো যুধি
28.5
রজশ্চোদ্ধূয় সুমহত্পক্ষবাতেন খেচরঃ
কৃত্বা লোকান্নিরালোকাংস্তেন দেবানবাকিরৎ
28.6
তেনাবকীর্ণা রজসা দেবা মোহমুপাগমন্
ন চৈনং দদৃশুশ্ছন্না রজসামৃতরক্ষিণঃ
28.7
এবং সংলোডয়ামাস গরুডস্ত্রিদিবালয়ম্
পক্ষতুণ্ডপ্রহারৈশ্চ দেবান্স বিদদার হ
28.8
ততো দেবঃ সহস্রাক্ষস্তূর্ণং বায়ুমচোদয়ৎ
বিক্ষিপেমাং রজোবৃষ্টিং তবৈতত্কর্ম মারুত
28.9
অথ বায়ুরপোবাহ তদ্রজস্তরসা বলী
ততো বিতিমিরে জাতে দেবাঃ শকুনিমার্দয়ন্
28.10
ননাদ চোচ্চৈর্বলবান্মহামেঘরবঃ খগঃ
বধ্যমানঃ সুরগণৈঃ সর্বভূতানি ভীষয়ন্
উত্পপাত মহাবীর্যঃ পক্ষিরাট্পরবীরহা
28.11
তমুত্পত্যান্তরিক্ষস্থং দেবানামুপরি স্থিতম্
বর্মিণো বিবুধাঃ সর্বে নানাশস্ত্রৈরবাকিরন্
28.12
পট্টিশৈঃ পরিঘৈঃ শূলৈর্গদাভিশ্চ সবাসবাঃ
ক্ষুরান্তৈর্জ্বলিতৈশ্চাপি চক্রৈরাদিত্যরূপিভিঃ
28.13
নানাশস্ত্রবিসর্গৈশ্চ বধ্যমানঃ সমন্ততঃ
কুর্বন্সুতুমুলং যুদ্ধং পক্ষিরাণ্ন ব্যকম্পত
28.14
বিনর্দন্নিব চাকাশে বৈনতেয়ঃ প্রতাপবান্
পক্ষাভ্যামুরসা চৈব সমন্তাদ্ব্যাক্ষিপত্সুরান্
28.15
তে বিক্ষিপ্তাস্ততো দেবাঃ প্রজগ্মুর্গরুডার্দিতাঃ
নখতুণ্ডক্ষতাশ্চৈব সুস্রুবুঃ শোণিতং বহু
28.16
সাধ্যাঃ প্রাচীং সগন্ধর্বা বসবো দক্ষিণাং দিশম্
প্রজগ্মুঃ সহিতা রুদ্রৈঃ পতগেন্দ্রপ্রধর্ষিতাঃ
28.17
দিশং প্রতীচীমাদিত্যা নাসত্যা উত্তরাং দিশম্
মুহুর্মুহুঃ প্রেক্ষমাণা যুধ্যমানা মহৌজসম্
28.18
অশ্বক্রন্দেন বীরেণ রেণুকেন চ পক্ষিণা
ক্রথনেন চ শূরেণ তপনেন চ খেচরঃ
28.19
উলূকশ্বসনাভ্যাং চ নিমেষেণ চ পক্ষিণা
প্ররুজেন চ সংয়ুদ্ধং চকার প্রলিহেন চ
28.20
তান্পক্ষনখতুণ্ডাগ্রৈরভিনদ্বিনতাসুতঃ
যুগান্তকালে সংক্রুদ্ধঃ পিনাকীব মহাবলঃ
28.21
মহাবীর্যা মহোত্সাহাস্তেন তে বহুধা ক্ষতাঃ
রেজুরভ্রঘনপ্রখ্যা রুধিরৌঘপ্রবর্ষিণঃ
28.22
তান্কৃত্বা পতগশ্রেষ্ঠঃ সর্বানুত্ক্রান্তজীবিতান্
অতিক্রান্তোঽমৃতস্যার্থে সর্বতোঽগ্নিমপশ্যত
28.23
আবৃণ্বানং মহাজ্বালমর্চির্ভিঃ সর্বতোঽম্বরম্
দহন্তমিব তীক্ষ্ণাংশুং ঘোরং বায়ুসমীরিতম্
28.24
ততো নবত্যা নবতীর্মুখানাং; কৃত্বা তরস্বী গরুডো মহাত্মা
নদীঃ সমাপীয় মুখৈস্ততস্তৈঃ; সুশীঘ্রমাগম্য পুনর্জবেন
28.25
জ্বলন্তমগ্নিং তমমিত্রতাপনঃ; সমাস্তরত্পত্ররথো নদীভিঃ
ততঃ প্রচক্রে বপুরন্যদল্পং; প্রবেষ্টুকামোঽগ্নিমভিপ্রশাম্য