Utshovঅধ্যায় 27
27.1
শৌনক উবাচ
কোঽপরাধো মহেন্দ্রস্য কঃ প্রমাদশ্চ সূতজ
তপসা বালখিল্যানাং সংভূতো গরুডঃ কথম্
27.2
কশ্যপস্য দ্বিজাতেশ্চ কথং বৈ পক্ষিরাট্সুতঃ
অধৃষ্যঃ সর্বভূতানামবধ্যশ্চাভবত্কথম্
27.3
কথং চ কামচারী স কামবীর্যশ্চ খেচরঃ
এতদিচ্ছাম্যহং শ্রোতুং পুরাণে যদি পঠ্যতে
27.4
সূত উবাচ
বিষয়োঽয়ং পুরাণস্য যন্মাং ত্বং পরিপৃচ্ছসি
শৃণু মে বদতঃ সর্বমেতত্সংক্ষেপতো দ্বিজ
27.5
যজতঃ পুত্রকামস্য কশ্যপস্য প্রজাপতেঃ
সাহায্যমৃষয়ো দেবা গন্ধর্বাশ্চ দদুঃ কিল
27.6
তত্রেধ্মানয়নে শক্রো নিয়ুক্তঃ কশ্যপেন হ
মুনয়ো বালখিল্যাশ্চ যে চান্যে দেবতাগণাঃ
27.7
শক্রস্তু বীর্যসদৃশমিধ্মভারং গিরিপ্রভম্
সমুদ্যম্যানয়ামাস নাতিকৃচ্ছ্রাদিব প্রভুঃ
27.8
অথাপশ্যদৃষীন্হ্রস্বানঙ্গুষ্ঠোদরপর্বণঃ
পলাশবৃন্তিকামেকাং সহিতান্বহতঃ পথি
27.9
প্রলীনান্স্বেষ্বিবাঙ্গেষু নিরাহারাংস্তপোধনান্
ক্লিশ্যমানান্মন্দবলান্গোষ্পদে সংপ্লুতোদকে
27.10
তাংশ্চ সর্বান্স্ময়াবিষ্টো বীর্যোন্মত্তঃ পুরংদরঃ
অবহস্যাত্যগাচ্ছীঘ্রং লঙ্ঘয়িত্বাবমন্য চ
27.11
তেঽথ রোষসমাবিষ্টাঃ সুভৃশং জাতমন্যবঃ
আরেভিরে মহত্কর্ম তদা শক্রভয়ংকরম্
27.12
জুহুবুস্তে সুতপসো বিধিবজ্জাতবেদসম্
মন্ত্রৈরুচ্চাবচৈর্বিপ্রা যেন কামেন তচ্ছৃণু
27.13
কামবীর্যঃ কামগমো দেবরাজভয়প্রদঃ
ইন্দ্রোঽন্যঃ সর্বদেবানাং ভবেদিতি যতব্রতাঃ
27.14
ইন্দ্রাচ্ছতগুণঃ শৌর্যে বীর্যে চৈব মনোজবঃ
তপসো নঃ ফলেনাদ্য দারুণঃ সংভবত্বিতি
27.15
তদ্বুদ্ধ্বা ভৃশসংতপ্তো দেবরাজঃ শতক্রতুঃ
জগাম শরণং তত্র কশ্যপং সংশিতব্রতম্
27.16
তচ্ছ্রুত্বা দেবরাজস্য কশ্যপোঽথ প্রজাপতিঃ
বালখিল্যানুপাগম্য কর্মসিদ্ধিমপৃচ্ছত
27.17
এবমস্ত্বিতি তং চাপি প্রত্যূচুঃ সত্যবাদিনঃ
তান্কশ্যপ উবাচেদং সান্ত্বপূর্বং প্রজাপতিঃ
27.18
অয়মিন্দ্রস্ত্রিভুবনে নিয়োগাদ্ব্রহ্মণঃ কৃতঃ
ইন্দ্রার্থং চ ভবন্তোঽপি যত্নবন্তস্তপোধনাঃ
27.19
ন মিথ্যা ব্রহ্মণো বাক্যং কর্তুমর্হথ সত্তমাঃ
ভবতাং চ ন মিথ্যায়ং সংকল্পো মে চিকীর্ষিতঃ
27.20
ভবত্বেষ পতত্রীণামিন্দ্রোঽতিবলসত্ত্ববান্
প্রসাদঃ ক্রিয়তাং চৈব দেবরাজস্য যাচতঃ
27.21
এবমুক্তাঃ কশ্যপেন বালখিল্যাস্তপোধনাঃ
প্রত্যূচুরভিসংপূজ্য মুনিশ্রেষ্ঠং প্রজাপতিম্
27.22
ইন্দ্রার্থোঽয়ং সমারম্ভঃ সর্বেষাং নঃ প্রজাপতে
অপত্যার্থং সমারম্ভো ভবতশ্চায়মীপ্সিতঃ
27.23
তদিদং সফলং কর্ম ত্বয়া বৈ প্রতিগৃহ্যতাম্
তথা চৈব বিধত্স্বাত্র যথা শ্রেয়োঽনুপশ্যসি
27.24
এতস্মিন্নেব কালে তু দেবী দাক্ষায়ণী শুভা
বিনতা নাম কল্যাণী পুত্রকামা যশস্বিনী
27.25
তপস্তপ্ত্বা ব্রতপরা স্নাতা পুংসবনে শুচিঃ
উপচক্রাম ভর্তারং তামুবাচাথ কশ্যপঃ
27.26
আরম্ভঃ সফলো দেবি ভবিতায়ং তবেপ্সিতঃ
জনয়িষ্যসি পুত্রৌ দ্বৌ বীরৌ ত্রিভুবনেশ্বরৌ
27.27
তপসা বালখিল্যানাং মম সংকল্পজৌ তথা
ভবিষ্যতো মহাভাগৌ পুত্রৌ তে লোকপূজিতৌ
27.28
উবাচ চৈনাং ভগবান্মারীচঃ পুনরেব হ
ধার্যতামপ্রমাদেন গর্ভোঽয়ং সুমহোদয়ঃ
27.29
একঃ সর্বপতত্রীণামিন্দ্রত্বং কারয়িষ্যতি
লোকসংভাবিতো বীরঃ কামবীর্যো বিহংগমঃ
27.30
শতক্রতুমথোবাচ প্রীয়মাণঃ প্রজাপতিঃ
ত্বত্সহায়ৌ খগাবেতৌ ভ্রাতরৌ তে ভবিষ্যতঃ
27.31
নৈতাভ্যাং ভবিতা দোষঃ সকাশাত্তে পুরংদর
ব্যেতু তে শক্র সংতাপস্ত্বমেবেন্দ্রো ভবিষ্যসি
27.32
ন চাপ্যেবং ত্বয়া ভূয়ঃ ক্ষেপ্তব্যা ব্রহ্মবাদিনঃ
ন চাবমান্যা দর্পাত্তে বাগ্বিষা ভৃশকোপনাঃ
27.33
এবমুক্তো জগামেন্দ্রো নির্বিশঙ্কস্ত্রিবিষ্টপম্
বিনতা চাপি সিদ্ধার্থা বভূব মুদিতা তদা
27.34
জনয়ামাস পুত্রৌ দ্বাবরুণং গরুডং তথা
অরুণস্তয়োস্তু বিকল আদিত্যস্য পুরঃসরঃ
27.35
পতত্রীণাং তু গরুড ইন্দ্রত্বেনাভ্যষিচ্যত
তস্যৈতত্কর্ম সুমহচ্ছ্রূয়তাং ভৃগুনন্দন