Utshovঅধ্যায় 26
26.1
সূত উবাচ
স্পৃষ্টমাত্রা তু পদ্ভ্যাং সা গরুডেন বলীয়সা
অভজ্যত তরোঃ শাখা ভগ্নাং চৈনামধারয়ৎ
26.2
তাং ভগ্নাং স মহাশাখাং স্ময়ন্সমবলোকয়ন্
অথাত্র লম্বতোঽপশ্যদ্বালখিল্যানধোমুখান্
26.3
স তদ্বিনাশসংত্রাসাদনুপত্য খগাধিপঃ
শাখামাস্যেন জগ্রাহ তেষামেবান্ববেক্ষয়া
শনৈঃ পর্যপতত্পক্ষী পর্বতান্প্রবিশাতয়ন্
26.4
এবং সোঽভ্যপতদ্দেশান্বহূন্সগজকচ্ছপঃ
দয়ার্থং বালখিল্যানাং ন চ স্থানমবিন্দত
26.5
স গত্বা পর্বতশ্রেষ্ঠং গন্ধমাদনমব্যয়ম্
দদর্শ কশ্যপং তত্র পিতরং তপসি স্থিতম্
26.6
দদর্শ তং পিতা চাপি দিব্যরূপং বিহংগমম্
তেজোবীর্যবলোপেতং মনোমারুতরংহসম্
26.7
শৈলশৃঙ্গপ্রতীকাশং ব্রহ্মদণ্ডমিবোদ্যতম্
অচিন্ত্যমনভিজ্ঞেয়ং সর্বভূতভয়ংকরম্
26.8
মায়াবীর্যধরং সাক্ষাদগ্নিমিদ্ধমিবোদ্যতম্
অপ্রধৃষ্যমজেয়ং চ দেবদানবরাক্ষসৈঃ
26.9
ভেত্তারং গিরিশৃঙ্গাণাং নদীজলবিশোষণম্
লোকসংলোডনং ঘোরং কৃতান্তসমদর্শনম্
26.10
তমাগতমভিপ্রেক্ষ্য ভগবান্কশ্যপস্তদা
বিদিত্বা চাস্য সংকল্পমিদং বচনমব্রবীৎ
26.11
পুত্র মা সাহসং কার্ষীর্মা সদ্যো লপ্স্যসে ব্যথাম্
মা ত্বা দহেয়ুঃ সংক্রুদ্ধা বালখিল্যা মরীচিপাঃ
26.12
প্রসাদয়ামাস স তান্কশ্যপঃ পুত্রকারণাৎ
বালখিল্যাংস্তপঃসিদ্ধানিদমুদ্দিশ্য কারণম্
26.13
প্রজাহিতার্থমারম্ভো গরুডস্য তপোধনাঃ
চিকীর্ষতি মহত্কর্ম তদনুজ্ঞাতুমর্হথ
26.14
এবমুক্তা ভগবতা মুনয়স্তে সমভ্যয়ুঃ
মুক্ত্বা শাখাং গিরিং পুণ্যং হিমবন্তং তপোর্থিনঃ
26.15
ততস্তেষ্বপয়াতেষু পিতরং বিনতাত্মজঃ
শাখাব্যাক্ষিপ্তবদনঃ পর্যপৃচ্ছত কশ্যপম্
26.16
ভগবন্ক্ব বিমুঞ্চামি তরুশাখামিমামহম্
বর্জিতং ব্রাহ্মণৈর্দেশমাখ্যাতু ভগবান্মম
26.17
ততো নিষ্পুরুষং শৈলং হিমসংরুদ্ধকন্দরম্
অগম্যং মনসাপ্যন্যৈস্তস্যাচখ্যৌ স কশ্যপঃ
26.18
তং পর্বতমহাকুক্ষিমাবিশ্য মনসা খগঃ
জবেনাভ্যপতত্তার্ক্ষ্যঃ সশাখাগজকচ্ছপঃ
26.19
ন তাং বধ্রঃ পরিণহেচ্ছতচর্মা মহানণুঃ
শাখিনো মহতীং শাখাং যাং প্রগৃহ্য যয়ৌ খগঃ
26.20
ততঃ স শতসাহস্রং যোজনান্তরমাগতঃ
কালেন নাতিমহতা গরুডঃ পততাং বরঃ
26.21
স তং গত্বা ক্ষণেনৈব পর্বতং বচনাত্পিতুঃ
অমুঞ্চন্মহতীং শাখাং সস্বনাং তত্র খেচরঃ
26.22
পক্ষানিলহতশ্চাস্য প্রাকম্পত স শৈলরাট্
মুমোচ পুষ্পবর্ষং চ সমাগলিতপাদপঃ
26.23
শৃঙ্গাণি চ ব্যশীর্যন্ত গিরেস্তস্য সমন্ততঃ
মণিকাঞ্চনচিত্রাণি শোভয়ন্তি মহাগিরিম্
26.24
শাখিনো বহবশ্চাপি শাখয়াভিহতাস্তয়া
কাঞ্চনৈঃ কুসুমৈর্ভান্তি বিদ্যুত্বন্ত ইবাম্বুদাঃ
26.25
তে হেমবিকচা ভূয়ো যুক্তাঃ পর্বতধাতুভিঃ
ব্যরাজঞ্শাখিনস্তত্র সূর্যাংশুপ্রতিরঞ্জিতাঃ
26.26
ততস্তস্য গিরেঃ শৃঙ্গমাস্থায় স খগোত্তমঃ
ভক্ষয়ামাস গরুডস্তাবুভৌ গজকচ্ছপৌ
26.27
ততঃ পর্বতকূটাগ্রাদুত্পপাত মনোজবঃ
প্রাবর্তন্তাথ দেবানামুত্পাতা ভয়বেদিনঃ
26.28
ইন্দ্রস্য বজ্রং দয়িতং প্রজজ্বাল ব্যথান্বিতম্
সধূমা চাপতত্সার্চির্দিবোল্কা নভসশ্চ্যুতা
26.29
তথা বসূনাং রুদ্রাণামাদিত্যানাং চ সর্বশঃ
সাধ্যানাং মরুতাং চৈব যে চান্যে দেবতাগণাঃ
স্বং স্বং প্রহরণং তেষাং পরস্পরমুপাদ্রবৎ
26.30
অভূতপূর্বং সংগ্রামে তদা দেবাসুরেঽপি চ
ববুর্বাতাঃ সনির্ঘাতাঃ পেতুরুল্কাঃ সমন্ততঃ
26.31
নিরভ্রমপি চাকাশং প্রজগর্জ মহাস্বনম্
দেবানামপি যো দেবঃ সোঽপ্যবর্ষদসৃক্তদা
26.32
মম্লুর্মাল্যানি দেবানাং শেমুস্তেজাংসি চৈব হি
উত্পাতমেঘা রৌদ্রাশ্চ ববর্ষুঃ শোণিতং বহু
রজাংসি মুকুটান্যেষামুত্থিতানি ব্যধর্ষয়ন্
26.33
ততস্ত্রাসসমুদ্বিগ্নঃ সহ দেবৈঃ শতক্রতুঃ
উত্পাতান্দারুণান্পশ্যন্নিত্যুবাচ বৃহস্পতিম্
26.34
কিমর্থং ভগবন্ঘোরা মহোত্পাতাঃ সমুত্থিতাঃ
ন চ শত্রুং প্রপশ্যামি যুধি যো নঃ প্রধর্ষয়েৎ
26.35
বৃহস্পতিরুবাচ
তবাপরাধাদ্দেবেন্দ্র প্রমাদাচ্চ শতক্রতো
তপসা বালখিল্যানাং ভূতমুত্পন্নমদ্ভুতম্
26.36
কশ্যপস্য মুনেঃ পুত্রো বিনতায়াশ্চ খেচরঃ
হর্তুং সোমমনুপ্রাপ্তো বলবান্কামরূপবান্
26.37
সমর্থো বলিনাং শ্রেষ্ঠো হর্তুং সোমং বিহংগমঃ
সর্বং সংভাবয়াম্যস্মিন্নসাধ্যমপি সাধয়েৎ
26.38
সূত উবাচ
শ্রুত্বৈতদ্বচনং শক্রঃ প্রোবাচামৃতরক্ষিণঃ
মহাবীর্যবলঃ পক্ষী হর্তুং সোমমিহোদ্যতঃ
26.39
যুষ্মান্সংবোধয়াম্যেষ যথা স ন হরেদ্বলাৎ
অতুলং হি বলং তস্য বৃহস্পতিরুবাচ মে
26.40
তচ্ছ্রুত্বা বিবুধা বাক্যং বিস্মিতা যত্নমাস্থিতাঃ
পরিবার্যামৃতং তস্থুর্বজ্রী চেন্দ্রঃ শতক্রতুঃ
26.41
ধারয়ন্তো মহার্হাণি কবচানি মনস্বিনঃ
কাঞ্চনানি বিচিত্রাণি বৈডূর্যবিকৃতানি চ
26.42
বিবিধানি চ শস্ত্রাণি ঘোররূপাণ্যনেকশঃ
শিততীক্ষ্ণাগ্রধারাণি সমুদ্যম্য সহস্রশঃ
26.43
সবিস্ফুলিঙ্গজ্বালানি সধূমানি চ সর্বশঃ
চক্রাণি পরিঘাংশ্চৈব ত্রিশূলানি পরশ্বধান্
26.44
শক্তীশ্চ বিবিধাস্তীক্ষ্ণাঃ করবালাংশ্চ নির্মলান্
স্বদেহরূপাণ্যাদায় গদাশ্চোগ্রপ্রদর্শনাঃ
26.45
তৈঃ শস্ত্রৈর্ভানুমদ্ভিস্তে দিব্যাভরণভূষিতাঃ
ভানুমন্তঃ সুরগণাস্তস্থুর্বিগতকল্মষাঃ
26.46
অনুপমবলবীর্যতেজসো; ধৃতমনসঃ পরিরক্ষণেঽমৃতস্য
অসুরপুরবিদারণাঃ সুরা; জ্বলনসমিদ্ধবপুঃপ্রকাশিনঃ
26.47
ইতি সমরবরং সুরাস্থিতং; পরিঘসহস্রশতৈঃ সমাকুলম্
বিগলিতমিব চাম্বরান্তরে; তপনমরীচিবিভাসিতং বভৌ