Utshovঅধ্যায় 25
25.1
সূত উবাচ
তস্য কণ্ঠমনুপ্রাপ্তো ব্রাহ্মণঃ সহ ভার্যয়া
দহন্দীপ্ত ইবাঙ্গারস্তমুবাচান্তরিক্ষগঃ
25.2
দ্বিজোত্তম বিনির্গচ্ছ তূর্ণমাস্যাদপাবৃতাৎ
ন হি মে ব্রাহ্মণো বধ্যঃ পাপেষ্বপি রতঃ সদা
25.3
ব্রুবাণমেবং গরুডং ব্রাহ্মণঃ সমভাষত
নিষাদী মম ভার্যেয়ং নির্গচ্ছতু ময়া সহ
25.4
গরুড উবাচ
এতামপি নিষাদীং ত্বং পরিগৃহ্যাশু নিষ্পত
তূর্ণং সংভাবয়াত্মানমজীর্ণং মম তেজসা
25.5
সূত উবাচ
ততঃ স বিপ্রো নিষ্ক্রান্তো নিষাদীসহিতস্তদা
বর্ধয়িত্বা চ গরুডমিষ্টং দেশং জগাম হ
25.6
সহভার্যে বিনিষ্ক্রান্তে তস্মিন্বিপ্রে স পক্ষিরাট্
বিতত্য পক্ষাবাকাশমুত্পপাত মনোজবঃ
25.7
ততোঽপশ্যত্স পিতরং পৃষ্টশ্চাখ্যাতবান্পিতুঃ
অহং হি সর্পৈঃ প্রহিতঃ সোমমাহর্তুমুদ্যতঃ
মাতুর্দাস্যবিমোক্ষার্থমাহরিষ্যে তমদ্য বৈ
25.8
মাত্রা চাস্মি সমাদিষ্টো নিষাদান্ভক্ষয়েতি বৈ
ন চ মে তৃপ্তিরভবদ্ভক্ষয়িত্বা সহস্রশঃ
25.9
তস্মাদ্ভোক্তব্যমপরং ভগবন্প্রদিশস্ব মে
যদ্ভুক্ত্বামৃতমাহর্তুং সমর্থঃ স্যামহং প্রভো
25.10
কশ্যপ উবাচ
আসীদ্বিভাবসুর্নাম মহর্ষিঃ কোপনো ভৃশম্
ভ্রাতা তস্যানুজশ্চাসীত্সুপ্রতীকো মহাতপাঃ
25.11
স নেচ্ছতি ধনং ভ্রাত্রা সহৈকস্থং মহামুনিঃ
বিভাগং কীর্তয়ত্যেব সুপ্রতীকোঽথ নিত্যশঃ
25.12
অথাব্রবীচ্চ তং ভ্রাতা সুপ্রতীকং বিভাবসুঃ
বিভাগং বহবো মোহাত্কর্তুমিচ্ছন্তি নিত্যদা
ততো বিভক্তা অন্যোন্যং নাদ্রিয়ন্তেঽর্থমোহিতাঃ
25.13
ততঃ স্বার্থপরান্মূঢান্পৃথগ্ভূতান্স্বকৈর্ধনৈঃ
বিদিত্বা ভেদয়ন্ত্যেতানমিত্রা মিত্ররূপিণঃ
25.14
বিদিত্বা চাপরে ভিন্নানন্তরেষু পতন্ত্যথ
ভিন্নানামতুলো নাশঃ ক্ষিপ্রমেব প্রবর্ততে
25.15
তস্মাচ্চৈব বিভাগার্থং ন প্রশংসন্তি পণ্ডিতাঃ
গুরুশাস্ত্রে নিবদ্ধানামন্যোন্যমভিশঙ্কিনাম্
25.16
নিয়ন্তুং ন হি শক্যস্ত্বং ভেদতো ধনমিচ্ছসি
যস্মাত্তস্মাত্সুপ্রতীক হস্তিত্বং সমবাপ্স্যসি
25.17
শপ্তস্ত্বেবং সুপ্রতীকো বিভাবসুমথাব্রবীৎ
ত্বমপ্যন্তর্জলচরঃ কচ্ছপঃ সংভবিষ্যসি
25.18
এবমন্যোন্যশাপাত্তৌ সুপ্রতীকবিভাবসূ
গজকচ্ছপতাং প্রাপ্তাবর্থার্থং মূঢচেতসৌ
25.19
রোষদোষানুষঙ্গেণ তির্যগ্যোনিগতাবপি
পরস্পরদ্বেষরতৌ প্রমাণবলদর্পিতৌ
25.20
সরস্যস্মিন্মহাকায়ৌ পূর্ববৈরানুসারিণৌ
তয়োরেকতরঃ শ্রীমান্সমুপৈতি মহাগজঃ
25.21
তস্য বৃংহিতশব্দেন কূর্মোঽপ্যন্তর্জলেশয়ঃ
উত্থিতোঽসৌ মহাকায়ঃ কৃত্স্নং সংক্ষোভয়ন্সরঃ
25.22
তং দৃষ্ট্বাবেষ্টিতকরঃ পতত্যেষ গজো জলম্
দন্তহস্তাগ্রলাঙ্গূলপাদবেগেন বীর্যবান্
25.23
তং বিক্ষোভয়মাণং তু সরো বহুঝষাকুলম্
কূর্মোঽপ্যভ্যুদ্যতশিরা যুদ্ধায়াভ্যেতি বীর্যবান্
25.24
ষডুচ্ছ্রিতো যোজনানি গজস্তদ্দ্বিগুণায়তঃ
কূর্মস্ত্রিয়োজনোত্সেধো দশয়োজনমণ্ডলঃ
25.25
তাবেতৌ যুদ্ধসংমত্তৌ পরস্পরজয়ৈষিণৌ
উপয়ুজ্যাশু কর্মেদং সাধয়েপ্সিতমাত্মনঃ
25.26
সূত উবাচ
স তচ্ছ্রুত্বা পিতুর্বাক্যং ভীমবেগোঽন্তরিক্ষগঃ
নখেন গজমেকেন কূর্মমেকেন চাক্ষিপৎ
25.27
সমুত্পপাত চাকাশং তত উচ্চৈর্বিহংগমঃ
সোঽলম্বতীর্থমাসাদ্য দেববৃক্ষানুপাগমৎ
25.28
তে ভীতাঃ সমকম্পন্ত তস্য পক্ষানিলাহতাঃ
ন নো ভঞ্জ্যাদিতি তদা দিব্যাঃ কনকশাখিনঃ
25.29
প্রচলাঙ্গান্স তান্দৃষ্ট্বা মনোরথফলাঙ্কুরান্
অন্যানতুলরূপাঙ্গানুপচক্রাম খেচরঃ
25.30
কাঞ্চনৈ রাজতৈশ্চৈব ফলৈর্বৈডূর্যশাখিনঃ
সাগরাম্বুপরিক্ষিপ্তান্ভ্রাজমানান্মহাদ্রুমান্
25.31
তমুবাচ খগশ্রেষ্ঠং তত্র রোহিণপাদপঃ
অতিপ্রবৃদ্ধঃ সুমহানাপতন্তং মনোজবম্
25.32
যৈষা মম মহাশাখা শতয়োজনমায়তা
এতামাস্থায় শাখাং ত্বং খাদেমৌ গজকচ্ছপৌ
25.33
ততো দ্রুমং পতগসহস্রসেবিতং; মহীধরপ্রতিমবপুঃ প্রকম্পয়ন্
খগোত্তমো দ্রুতমভিপত্য বেগবা;ন্বভঞ্জ তামবিরলপত্রসংবৃতাম্