অধ্যায় 24

24.1

সূত উবাচ
ইত্যুক্তো গরুডঃ সর্পৈস্ততো মাতরমব্রবীৎ
গচ্ছাম্যমৃতমাহর্তুং ভক্ষ্যমিচ্ছামি বেদিতুম্

বিনতোবাচ
সমুদ্রকুক্ষাবেকান্তে নিষাদালয়মুত্তমম্
সহস্রাণামনেকানাং তান্ভুক্ত্বামৃতমানয়

ন তু তে ব্রাহ্মণং হন্তুং কার্যা বুদ্ধিঃ কথংচন
অবধ্যঃ সর্বভূতানাং ব্রাহ্মণো হ্যনলোপমঃ

অগ্নিরর্কো বিষং শস্ত্রং বিপ্রো ভবতি কোপিতঃ
ভূতানামগ্রভুগ্বিপ্রো বর্ণশ্রেষ্ঠঃ পিতা গুরুঃ

গরুড উবাচ
যথাহমভিজানীয়াং ব্রাহ্মণং লক্ষণৈঃ শুভৈঃ
তন্মে কারণতো মাতঃ পৃচ্ছতো বক্তুমর্হসি

বিনতোবাচ
যস্তে কণ্ঠমনুপ্রাপ্তো নিগীর্ণং বডিশং যথা
দহেদঙ্গারবত্পুত্র তং বিদ্যাদ্ব্রাহ্মণর্ষভম্

সূত উবাচ
প্রোবাচ চৈনং বিনতা পুত্রহার্দাদিদং বচঃ
জানন্ত্যপ্যতুলং বীর্যমাশীর্বাদসমন্বিতম্

পক্ষৌ তে মারুতঃ পাতু চন্দ্রঃ পৃষ্ঠং তু পুত্রক
শিরস্তু পাতু তে বহ্নির্ভাস্করঃ সর্বমেব তু

অহং চ তে সদা পুত্র শান্তিস্বস্তিপরায়ণা
অরিষ্টং ব্রজ পন্থানং বত্স কার্যার্থসিদ্ধয়ে

ততঃ স মাতুর্বচনং নিশম্য; বিতত্য পক্ষৌ নভ উত্পপাত
ততো নিষাদান্বলবানুপাগম;দ্বুভুক্ষিতঃ কাল ইবান্তকো মহান্

স তান্নিষাদানুপসংহরংস্তদা; রজঃ সমুদ্ধূয় নভঃস্পৃশং মহৎ
সমুদ্রকুক্ষৌ চ বিশোষয়ন্পয়ঃ; সমীপগান্ভূমিধরান্বিচালয়ন্

ততঃ স চক্রে মহদাননং তদা; নিষাদমার্গং প্রতিরুধ্য পক্ষিরাট্
ততো নিষাদাস্ত্বরিতাঃ প্রবব্রজু;র্যতো মুখং তস্য ভুজংগভোজিনঃ

তদাননং বিবৃতমতিপ্রমাণব;ত্সমভ্যয়ুর্গগনমিবার্দিতাঃ খগাঃ
সহস্রশঃ পবনরজোভ্রমোহিতা; মহানিলপ্রচলিতপাদপে বনে

ততঃ খগো বদনমমিত্রতাপনঃ; সমাহরত্পরিচপলো মহাবলঃ
নিষূদয়ন্বহুবিধমত্স্যভক্ষিণো; বুভুক্ষিতো গগনচরেশ্বরস্তদা