Chapter 24

24.1

सूत उवाच
इत्युक्तो गरुडः सर्पैस्ततो मातरमब्रवीत्
गच्छाम्यमृतमाहर्तुं भक्ष्यमिच्छामि वेदितुम्

Suta uvacha
Ityukto garudah sarpaistato mataramabravit
Gachchhamyamritamahartum bhakshyamichchhami veditum

विनतोवाच
समुद्रकुक्षावेकान्ते निषादालयमुत्तमम्
सहस्राणामनेकानां तान्भुक्त्वामृतमानय

Vinatovacha
Samudrakukshavekante nishadalayamuttamam
Sahasranamanekanam tanbhuktvamritamanaya

न तु ते ब्राह्मणं हन्तुं कार्या बुद्धिः कथंचन
अवध्यः सर्वभूतानां ब्राह्मणो ह्यनलोपमः

Na tu te brahmanam hantum karya buddhih kathanchana
Avadhyah sarvabhutanam brahmano hyanalopamah

अग्निरर्को विषं शस्त्रं विप्रो भवति कोपितः
भूतानामग्रभुग्विप्रो वर्णश्रेष्ठः पिता गुरुः

Agnirarko visham shastram vipro bhavati kopitah
Bhutanamagrabhugvipro varnashreshthah pita guruh

गरुड उवाच
यथाहमभिजानीयां ब्राह्मणं लक्षणैः शुभैः
तन्मे कारणतो मातः पृच्छतो वक्तुमर्हसि

Garuda uvacha
Yathahamabhijaniyam brahmanam lakshanaih shubhaih
Tanme karanato matah prichchhato vaktumarhasi

विनतोवाच
यस्ते कण्ठमनुप्राप्तो निगीर्णं बडिशं यथा
दहेदङ्गारवत्पुत्र तं विद्याद्ब्राह्मणर्षभम्

Vinatovacha
Yaste kanthamanuprapto nigirnam badisham yatha
Dahedangaravatputra tam vidyadbrahmanarshabham

सूत उवाच
प्रोवाच चैनं विनता पुत्रहार्दादिदं वचः
जानन्त्यप्यतुलं वीर्यमाशीर्वादसमन्वितम्

Suta uvacha
Provacha chainam vinata putrahardadidam vachah
Janantyapyatulam viryamashirvadasamanvitam

पक्षौ ते मारुतः पातु चन्द्रः पृष्ठं तु पुत्रक
शिरस्तु पातु ते वह्निर्भास्करः सर्वमेव तु

Pakshau te marutah patu chandrah prishtham tu putraka
Shirastu patu te vahnirbhaskarah sarvameva tu

अहं च ते सदा पुत्र शान्तिस्वस्तिपरायणा
अरिष्टं व्रज पन्थानं वत्स कार्यार्थसिद्धये

Aham cha te sada putra shantisvastiparayana
Arishtam vraja panthanam vatsa karyarthasiddhaye

ततः स मातुर्वचनं निशम्य; वितत्य पक्षौ नभ उत्पपात
ततो निषादान्बलवानुपागम;द्बुभुक्षितः काल इवान्तको महान्

Tatah sa maturvachanam nishamya; vitatya pakshau nabha utpapata
Tato nishadanbalavanupagama;dbubhukshitah kala ivantako mahan

स तान्निषादानुपसंहरंस्तदा; रजः समुद्धूय नभःस्पृशं महत्
समुद्रकुक्षौ च विशोषयन्पयः; समीपगान्भूमिधरान्विचालयन्

Sa tannishadanupasanharanstada; rajah samuddhuya nabhahsprisham mahat
Samudrakukshau cha vishoshayanpayah; samipaganbhumidharanvichalayan

ततः स चक्रे महदाननं तदा; निषादमार्गं प्रतिरुध्य पक्षिराट्
ततो निषादास्त्वरिताः प्रवव्रजु;र्यतो मुखं तस्य भुजंगभोजिनः

Tatah sa chakre mahadananam tada; nishadamargam pratirudhya pakshirat
Tato nishadastvaritah pravavraju;ryato mukham tasya bhujangabhojinah

तदाननं विवृतमतिप्रमाणव;त्समभ्ययुर्गगनमिवार्दिताः खगाः
सहस्रशः पवनरजोभ्रमोहिता; महानिलप्रचलितपादपे वने

Tadananam vivritamatipramanava;tsamabhyayurgaganamivarditah khagah
Sahasrashah pavanarajobhramohita; mahanilaprachalitapadape vane

ततः खगो वदनममित्रतापनः; समाहरत्परिचपलो महाबलः
निषूदयन्बहुविधमत्स्यभक्षिणो; बुभुक्षितो गगनचरेश्वरस्तदा

Tatah khago vadanamamitratapanah; samaharatparichapalo mahabalah
Nishudayanbahuvidhamatsyabhakshino; bubhukshito gaganachareshvarastada