অধ্যায় 23

23.1

সূত উবাচ
সুপর্ণেনোহ্যমানাস্তে জগ্মুস্তং দেশমাশু বৈ
সাগরাম্বুপরিক্ষিপ্তং পক্ষিসংঘনিনাদিতম্

বিচিত্রফলপুষ্পাভির্বনরাজিভিরাবৃতম্
ভবনৈরাবৃতং রম্যৈস্তথা পদ্মাকরৈরপি

প্রসন্নসলিলৈশ্চাপি হ্রদৈশ্চিত্রৈর্বিভূষিতম্
দিব্যগন্ধবহৈঃ পুণ্যৈর্মারুতৈরুপবীজিতম্

উপজিঘ্রদ্ভিরাকাশং বৃক্ষৈর্মলয়জৈরপি
শোভিতং পুষ্পবর্ষাণি মুঞ্চদ্ভির্মারুতোদ্ধুতৈঃ

কিরদ্ভিরিব তত্রস্থান্নাগান্পুষ্পাম্বুবৃষ্টিভিঃ
মনঃসংহর্ষণং পুণ্যং গন্ধর্বাপ্সরসাং প্রিয়ম্
নানাপক্ষিরুতং রম্যং কদ্রূপুত্রপ্রহর্ষণম্

তত্তে বনং সমাসাদ্য বিজহ্রুঃ পন্নগা মুদা
অব্রুবংশ্চ মহাবীর্যং সুপর্ণং পতগোত্তমম্

বহাস্মানপরং দ্বীপং সুরম্যং বিপুলোদকম্
ত্বং হি দেশান্বহূন্রম্যান্পতন্পশ্যসি খেচর

স বিচিন্ত্যাব্রবীত্পক্ষী মাতরং বিনতাং তদা
কিং কারণং ময়া মাতঃ কর্তব্যং সর্পভাষিতম্

বিনতোবাচ
দাসীভূতাস্ম্যনার্যায়া ভগিন্যাঃ পতগোত্তম
পণং বিতথমাস্থায় সর্পৈরুপধিনা কৃতম্

সূত উবাচ
তস্মিংস্তু কথিতে মাত্রা কারণে গগনেচরঃ
উবাচ বচনং সর্পাংস্তেন দুঃখেন দুঃখিতঃ

কিমাহৃত্য বিদিত্বা বা কিং বা কৃত্বেহ পৌরুষম্
দাস্যাদ্বো বিপ্রমুচ্যেয়ং সত্যং শংসত লেলিহাঃ

শ্রুত্বা তমব্রুবন্সর্পা আহরামৃতমোজসা
ততো দাস্যাদ্বিপ্রমোক্ষো ভবিতা তব খেচর