অধ্যায় 21

21.1

সূত উবাচ
ততঃ কামগমঃ পক্ষী মহাবীর্যো মহাবলঃ
মাতুরন্তিকমাগচ্ছত্পরং তীরং মহোদধেঃ

যত্র সা বিনতা তস্মিন্পণিতেন পরাজিতা
অতীব দুঃখসংতপ্তা দাসীভাবমুপাগতা

ততঃ কদাচিদ্বিনতাং প্রবণাং পুত্রসংনিধৌ
কাল আহূয় বচনং কদ্রূরিদমভাষত

নাগানামালয়ং ভদ্রে সুরম্যং রমণীয়কম্
সমুদ্রকুক্ষাবেকান্তে তত্র মাং বিনতে বহ

ততঃ সুপর্ণমাতা তামবহত্সর্পমাতরম্
পন্নগান্গরুডশ্চাপি মাতুর্বচনচোদিতঃ

স সূর্যস্যাভিতো যাতি বৈনতেয়ো বিহংগমঃ
সূর্যরশ্মিপরীতাশ্চ মূর্চ্ছিতাঃ পন্নগাভবন্
তদবস্থান্সুতান্দৃষ্ট্বা কদ্রূঃ শক্রমথাস্তুবৎ

নমস্তে দেবদেবেশ নমস্তে বলসূদন
নমুচিঘ্ন নমস্তেঽস্তু সহস্রাক্ষ শচীপতে

সর্পাণাং সূর্যতপ্তানাং বারিণা ত্বং প্লবো ভব
ত্বমেব পরমং ত্রাণমস্মাকমমরোত্তম

ঈশো হ্যসি পয়ঃ স্রষ্টুং ত্বমনল্পং পুরংদর
ত্বমেব মেঘস্ত্বং বায়ুস্ত্বমগ্নির্বৈদ্যুতোঽম্বরে

ত্বমভ্রঘনবিক্ষেপ্তা ত্বামেবাহুঃ পুনর্ঘনম্
ত্বং বজ্রমতুলং ঘোরং ঘোষবাংস্ত্বং বলাহকঃ

স্রষ্টা ত্বমেব লোকানাং সংহর্তা চাপরাজিতঃ
ত্বং জ্যোতিঃ সর্বভূতানাং ত্বমাদিত্যো বিভাবসুঃ

ত্বং মহদ্ভূতমাশ্চর্যং ত্বং রাজা ত্বং সুরোত্তমঃ
ত্বং বিষ্ণুস্ত্বং সহস্রাক্ষস্ত্বং দেবস্ত্বং পরায়ণম্

ত্বং সর্বমমৃতং দেব ত্বং সোমঃ পরমার্চিতঃ
ত্বং মুহূর্তস্তিথিশ্চ ত্বং লবস্ত্বং বৈ পুনঃ ক্ষণঃ

শুক্লস্ত্বং বহুলশ্চৈব কলা কাষ্ঠা ত্রুটিস্তথা
সংবত্সরর্তবো মাসা রজন্যশ্চ দিনানি চ

ত্বমুত্তমা সগিরিবনা বসুংধরা; সভাস্করং বিতিমিরমম্বরং তথা
মহোদধিঃ সতিমিতিমিংগিলস্তথা; মহোর্মিমান্বহুমকরো ঝষালয়ঃ

মহদ্যশস্ত্বমিতি সদাভিপূজ্যসে; মনীষিভির্মুদিতমনা মহর্ষিভিঃ
অভিষ্টুতঃ পিবসি চ সোমমধ্বরে; বষট্কৃতান্যপি চ হবীংষি ভূতয়ে

ত্বং বিপ্রৈঃ সততমিহেজ্যসে ফলার্থং; বেদাঙ্গেষ্বতুলবলৌঘ গীয়সে চ
ত্বদ্ধেতোর্যজনপরায়ণা দ্বিজেন্দ্রা; বেদাঙ্গান্যভিগময়ন্তি সর্ববেদৈঃ