UtshovChapter 21
21.1
सूत उवाच
ततः कामगमः पक्षी महावीर्यो महाबलः
मातुरन्तिकमागच्छत्परं तीरं महोदधेः
Suta uvacha
Tatah kamagamah pakshi mahaviryo mahabalah
Maturantikamagachchhatparam tiram mahodadheh
21.2
यत्र सा विनता तस्मिन्पणितेन पराजिता
अतीव दुःखसंतप्ता दासीभावमुपागता
Yatra sa vinata tasminpanitena parajita
Ativa duhkhasantapta dasibhavamupagata
21.3
ततः कदाचिद्विनतां प्रवणां पुत्रसंनिधौ
काल आहूय वचनं कद्रूरिदमभाषत
Tatah kadachidvinatam pravanam putrasannidhau
Kala ahuya vachanam kadruridamabhashata
21.4
नागानामालयं भद्रे सुरम्यं रमणीयकम्
समुद्रकुक्षावेकान्ते तत्र मां विनते वह
Naganamalayam bhadre suramyam ramaniyakam
Samudrakukshavekante tatra mam vinate vaha
21.5
ततः सुपर्णमाता तामवहत्सर्पमातरम्
पन्नगान्गरुडश्चापि मातुर्वचनचोदितः
Tatah suparnamata tamavahatsarpamataram
Pannagangarudashchapi maturvachanachoditah
21.6
स सूर्यस्याभितो याति वैनतेयो विहंगमः
सूर्यरश्मिपरीताश्च मूर्च्छिताः पन्नगाभवन्
तदवस्थान्सुतान्दृष्ट्वा कद्रूः शक्रमथास्तुवत्
Sa suryasyabhito yati vainateyo vihangamah
Suryarashmiparitashcha murchchhitah pannagabhavan
Tadavasthansutandrishtva kadruh shakramathastuvat
21.7
नमस्ते देवदेवेश नमस्ते बलसूदन
नमुचिघ्न नमस्तेऽस्तु सहस्राक्ष शचीपते
Namaste devadevesha namaste balasudana
Namuchighna namastestu sahasraksha shachipate
21.8
सर्पाणां सूर्यतप्तानां वारिणा त्वं प्लवो भव
त्वमेव परमं त्राणमस्माकममरोत्तम
Sarpanam suryataptanam varina tvam plavo bhava
Tvameva paramam tranamasmakamamarottama
21.9
ईशो ह्यसि पयः स्रष्टुं त्वमनल्पं पुरंदर
त्वमेव मेघस्त्वं वायुस्त्वमग्निर्वैद्युतोऽम्बरे
Isho hyasi payah srashtum tvamanalpam purandara
Tvameva meghastvam vayustvamagnirvaidyutombare
21.10
त्वमभ्रघनविक्षेप्ता त्वामेवाहुः पुनर्घनम्
त्वं वज्रमतुलं घोरं घोषवांस्त्वं बलाहकः
Tvamabhraghanavikshepta tvamevahuh punarghanam
Tvam vajramatulam ghoram ghoshavanstvam balahakah
21.11
स्रष्टा त्वमेव लोकानां संहर्ता चापराजितः
त्वं ज्योतिः सर्वभूतानां त्वमादित्यो विभावसुः
Srashta tvameva lokanam sanharta chaparajitah
Tvam jyotih sarvabhutanam tvamadityo vibhavasuh
21.12
त्वं महद्भूतमाश्चर्यं त्वं राजा त्वं सुरोत्तमः
त्वं विष्णुस्त्वं सहस्राक्षस्त्वं देवस्त्वं परायणम्
Tvam mahadbhutamashcharyam tvam raja tvam surottamah
Tvam vishnustvam sahasrakshastvam devastvam parayanam
21.13
त्वं सर्वममृतं देव त्वं सोमः परमार्चितः
त्वं मुहूर्तस्तिथिश्च त्वं लवस्त्वं वै पुनः क्षणः
Tvam sarvamamritam deva tvam somah paramarchitah
Tvam muhurtastithishcha tvam lavastvam vai punah kshanah
21.14
शुक्लस्त्वं बहुलश्चैव कला काष्ठा त्रुटिस्तथा
संवत्सरर्तवो मासा रजन्यश्च दिनानि च
Shuklastvam bahulashchaiva kala kashtha trutistatha
Sanvatsarartavo masa rajanyashcha dinani cha
21.15
त्वमुत्तमा सगिरिवना वसुंधरा; सभास्करं वितिमिरमम्बरं तथा
महोदधिः सतिमितिमिंगिलस्तथा; महोर्मिमान्बहुमकरो झषालयः
Tvamuttama sagirivana vasundhara; sabhaskaram vitimiramambaram tatha
Mahodadhih satimitimingilastatha; mahormimanbahumakaro jhashalayah
21.16
महद्यशस्त्वमिति सदाभिपूज्यसे; मनीषिभिर्मुदितमना महर्षिभिः
अभिष्टुतः पिबसि च सोममध्वरे; वषट्कृतान्यपि च हवींषि भूतये
Mahadyashastvamiti sadabhipujyase; manishibhirmuditamana maharshibhih
Abhishtutah pibasi cha somamadhvare; vashatkritanyapi cha havinshi bhutaye
21.17
त्वं विप्रैः सततमिहेज्यसे फलार्थं; वेदाङ्गेष्वतुलबलौघ गीयसे च
त्वद्धेतोर्यजनपरायणा द्विजेन्द्रा; वेदाङ्गान्यभिगमयन्ति सर्ववेदैः
Tvam vipraih satatamihejyase phalartham; vedangeshvatulabalaugha giyase cha
Tvaddhetoryajanaparayana dvijendra; vedanganyabhigamayanti sarvavedaih