UtshovChapter 20
20.1
सूत उवाच
तं समुद्रमतिक्रम्य कद्रूर्विनतया सह
न्यपतत्तुरगाभ्याशे नचिरादिव शीघ्रगा
Suta uvacha
Tam samudramatikramya kadrurvinataya saha
Nyapatatturagabhyashe nachiradiva shighraga
20.2
निशाम्य च बहून्वालान्कृष्णान्पुच्छं समाश्रितान्
विनतां विषण्णवदनां कद्रूर्दास्ये न्ययोजयत्
Nishamya cha bahunvalankrishnanpuchchham samashritan
Vinatam vishannavadanam kadrurdasye nyayojayat
20.3
ततः सा विनता तस्मिन्पणितेन पराजिता
अभवद्दुःखसंतप्ता दासीभावं समास्थिता
Tatah sa vinata tasminpanitena parajita
Abhavadduhkhasantapta dasibhavam samasthita
20.4
एतस्मिन्नन्तरे चैव गरुडः काल आगते
विना मात्रा महातेजा विदार्याण्डमजायत
Etasminnantare chaiva garudah kala agate
Vina matra mahateja vidaryandamajayata
20.5
अग्निराशिरिवोद्भासन्समिद्धोऽतिभयंकरः
प्रवृद्धः सहसा पक्षी महाकायो नभोगतः
Agnirashirivodbhasansamiddhotibhayankarah
Pravriddhah sahasa pakshi mahakayo nabhogatah
20.6
तं दृष्ट्वा शरणं जग्मुः प्रजाः सर्वा विभावसुम्
प्रणिपत्याब्रुवंश्चैनमासीनं विश्वरूपिणम्
Tam drishtva sharanam jagmuh prajah sarva vibhavasum
Pranipatyabruvanshchainamasinam vishvarupinam
20.7
अग्ने मा त्वं प्रवर्धिष्ठाः कच्चिन्नो न दिधक्षसि
असौ हि राशिः सुमहान्समिद्धस्तव सर्पति
Agne ma tvam pravardhishthah kachchinno na didhakshasi
Asau hi rashih sumahansamiddhastava sarpati
20.8
अग्निरुवाच
नैतदेवं यथा यूयं मन्यध्वमसुरार्दनाः
गरुडो बलवानेष मम तुल्यः स्वतेजसा
Agniruvacha
Naitadevam yatha yuyam manyadhvamasurardanah
Garudo balavanesha mama tulyah svatejasa
20.9
सूत उवाच
एवमुक्तास्ततो गत्वा गरुडं वाग्भिरस्तुवन्
अदूरादभ्युपेत्यैनं देवाः सर्षिगणास्तदा
Suta uvacha
Evamuktastato gatva garudam vagbhirastuvan
Aduradabhyupetyainam devah sarshiganastada
20.10
त्वमृषिस्त्वं महाभागस्त्वं देवः पतगेश्वरः
त्वं प्रभुस्तपनप्रख्यस्त्वं नस्त्राणमनुत्तमम्
Tvamrishistvam mahabhagastvam devah patageshvarah
Tvam prabhustapanaprakhyastvam nastranamanuttamam
20.11
बलोर्मिमान्साधुरदीनसत्त्वः; समृद्धिमान्दुष्प्रसहस्त्वमेव
तपः श्रुतं सर्वमहीनकीर्ते; अनागतं चोपगतं च सर्वम्
Balormimansadhuradinasattvah; samriddhimandushprasahastvameva
Tapah shrutam sarvamahinakirte; anagatam chopagatam cha sarvam
20.12
त्वमुत्तमः सर्वमिदं चराचरं; गभस्तिभिर्भानुरिवावभाससे
समाक्षिपन्भानुमतः प्रभां मुहु;स्त्वमन्तकः सर्वमिदं ध्रुवाध्रुवम्
Tvamuttamah sarvamidam characharam; gabhastibhirbhanurivavabhasase
Samakshipanbhanumatah prabham muhu;stvamantakah sarvamidam dhruvadhruvam
20.13
दिवाकरः परिकुपितो यथा दहे;त्प्रजास्तथा दहसि हुताशनप्रभ
भयंकरः प्रलय इवाग्निरुत्थितो; विनाशयन्युगपरिवर्तनान्तकृत्
Divakarah parikupito yatha dahe;tprajastatha dahasi hutashanaprabha
Bhayankarah pralaya ivagnirutthito; vinashayanyugaparivartanantakrit
20.14
खगेश्वरं शरणमुपस्थिता वयं; महौजसं वितिमिरमभ्रगोचरम्
महाबलं गरुडमुपेत्य खेचरं; परावरं वरदमजय्यविक्रमम्
Khageshvaram sharanamupasthita vayam; mahaujasam vitimiramabhragocharam
Mahabalam garudamupetya khecharam; paravaram varadamajayyavikramam
20.15
एवं स्तुतः सुपर्णस्तु देवैः सर्षिगणैस्तदा
तेजसः प्रतिसंहारमात्मनः स चकार ह
Evam stutah suparnastu devaih sarshiganaistada
Tejasah pratisanharamatmanah sa chakara ha